Moning.
Yu save long pasin bilong ol sampela manmeri. Taim wanpela bilong ol i dai, orait ol i tingim olsem wanpela man i kilim em. Ol i tok olsem, “Ol posin man i kilim em.” Na maski em i lapun nogut tru na em i dai, o em i gat sik kensa na em i dai, o em i kisim ol narapela kain sik na em i dai, stil ol bai tok olsem, “Ol posin man i kilim em.”
Na dispela kain tok i apim strong bilong posin tumas na i apim strong bilong posin man tumas. Dispela kain tok i putim posin man i stap long wanpela level wantaim God.
Skelim tok bilong God long maus bilong aposel Pol. Pol i tokim ol sampela haiden manmeri long taun Atens. Ol i lotu long ol giaman god samting na Pol i laik stretim tingting bilong ol long dispela samting.
24God husat i bin wokim graun na olgeta samting i stap long em, Em i BIKPELA bilong heven na graun, na long dispela as Em i no save stap long ol haus lotu ol man i wokim. 25Na Em i no sot long wanpela samting bai ol manmeri i lotuim Em na givim ol samting long Em. Nogat. Em tasol i save givim laip na win na olgeta samting long ol manmeri. 26Long wanpela man tasol Em i bin kamapim olgeta lain manmeri na ol i sindaun long olgeta 4-kona bilong dispela graun. Em i bin makim taim bilong ol na Em i bin makim graun bilong ol i ken i sindaun i stap. 27Em i mekim olsem bai ol i tingim Em, na bai ol i kam long Em na save long Em. Em i no stap longwe long yumi wan wan. 28Long wanem, ‘Long strong bilong Em tasol yumi i kisim laip na i wokabaut na i stap. ’
Aposel 17:24-28.
Mi tok pinis olsem, taim ol manmeri i tok, “Ol posin man i kilim em,” orait ol i apim nem bilong posin man na ol i apim strong na pawa bilong posin man i go antap na i stap long wanpela level wantaim God. Long wanem, ol i makim posin man i gat pawa na strong olsem God bilong bosim laip na dai bilong ol manmeri. Na ol sampela manmeri, ol i apim nem bilong posin man i go antap moa na i winim God! Long wanem, ol i pret long posin man na ol i no pret long God tumas.
God i makim taim bilong dai bilong yumi.
Tasol harim. God wanpela Em i BIKPELA bilong heven na graun. God wanpela i wokim olgeta samting na i wokim olgeta manmeri na i givim laip na win na olgeta samting bilong ol. God wanpela i makim taim bilong laip na taim bilong dai bilong ol. Long strong bilong God wanpela tasol manmeri i stap laip na i wokabaut na i stap. Long strong bilong God wanpela tasol manmeri i dai na i lusim dispela graun. Ol posin man ol i no gat namba na pawa na strong bilong dispela samting. Nogat, nogat tru!
Taim wanpela man i dai, orait God yet i makim taim stret bilong dai bilong em. Na hamas yia na hamas de na hamas aua na hamas minit na hamas sekon God i makim bilong em, orait wanpela samting i no inap tru long sotim taim bilong em. Wanpela samting i no inap joinim taim bilong em na wanpela samting i no inap sotim taim bilong em. God wanpela tasol i makim na bosim na kontrolim taim bilong laip na dai bilong yumi olgeta manmeri bilong dispela graun.
God i makim rot bilong dai bilong yumi.
God i makim taim bilong dai bilong yumi olgeta manmeri na Em i makim rot bilong dai bilong yumi. Dispela samting tu i stap long han bilong God na i no stap long han bilong narapela samting. Wanem samting God i laik yusim bilong kamapim dai bilong yumi na yumi lusim dispela graun, orait God i ken i yusim. God Em i oana na bos bilong olgeta samting na olgeta samting i stap aninit long pawa na strong bilong Em, na Em i laik yusim wanem samting bilong kamapim dai bilong yumi, orait Em i ken i yusim.
Tingim Jisas yet. Ol manmeri ol i ken i tingim olsem ol man nogut i makim taim bilong dai bilong Jisas na i makim rot bilong dai bilong Jisas. Tasol nogat. God i tokaut klia olsem, God yet i makim taim bilong Jisas i dai na Em i makim rot bilong Jisas i dai. Ol dispela samting i stap long han bilong God na i no stap long han bilong ol man nogut na ol posin man.
23Na long plen na save bilong God yet, Em i bin givim dispela man Jisas i go long han bilong yupela. Na yupela wantaim ol man i save mekim pasin i no stret, yupela i nilim Jisas long diwai kros na kilim Em i dai.
Aposel 2:23.
Pren bilong mi i go pinis long Jisas.
Las wik long Sande Baibel Toktok ( “Pren bilong mi i dai pinis.” ) mi bin stroi long pren bilong mi. Taim em i stap laip yet, orait em i pas long Jisas na em i bihainim Jisas. Em i bilipim na trastim God long kisim bek em long feitful wok bilong Jisas long diwai kros.
Na taim em i dai na lusim mipela, orait God i kisim em i go pinis long heven na nau em i stap pinis long heven wantaim Jisas. Na em i lukim Jisas pinis na em i lukim ol mak bilong i dai long bodi bilong Jisas, na em i amamas moa na tok tenkyu moa long feitful wok bilong Jisas long diwai kros. Long wanem, feitful wok bilong Jisas i kisim em i kam long amamas bilong heven.
Nau gutpela pren bilong mi i no tingting moa long ol hevi bilong dispela graun. Nogat. Em i amamas i stap wantaim Jisas long heven. Tru, mipela bai kraikrai na sori long em i lusim mipela, tasol tu mipela mas amamas long em i go pinis long han bilong God na em i sindaun i stap long heven wantaim Jisas na em i stap gutpela tru.
God yet i makim taim na rot bilong gutpela pren bilong mi i lusim dispela graun na i go long heven – ol posin man ol i no gat strong na i no gat pawa na i no gat namba bilong ol dispela samting. Olsem na maski yumi givim biknem long ol posin man na yumi mekim tok olsem, “Ol posin man i kilim em.”
Glenn.
