Ol Provep
Ol provep bilong Solomon.
10
1Ol provep bilong Solomon.
Sapos pikinini man i gat trupela save, orait papa bai amamas,
tasol sapos pikinini man em i wanpela ful, orait mama bilong em bai kisim hevi.
2Mani i kamap long pasin nogut, em i no inap helpim yu,
tasol stretpela pasin bai lukautim yu.
3BIKPELA bai helpim ol stretpela man i gat hangre,
tasol Em i no inap helpim ol man i hangre long mekim pasin nogut.
4Man i les long mekim wok, em bai sot,
tasol man i strong long mekim wok, em bai i gat planti samting.
5Husat man i bungim kaikai taim kaikai i mau, orait em i pikinini i gat save,
tasol man i save slip tumas long taim bilong haves, orait em i pikinini bilong kisim sem i kam.
6Blesim i save kam long het bilong ol stretpela man,
tasol bagarap i pas olgeta long maus bilong ol man nogut.
7Memori bilong ol stretpela man em i wanpela gutpela blesim,
tasol nem bilong ol man nogut bai sting olgeta.
8Man i gat trupela save long bel bilong em, em bai harim tok,
tasol ol ful i mauswara nating, bai ol i bagarap.
9Husat man i wokabaut long stretpela tingting, em i wokabaut strong,
tasol man i wokabaut long rot nogut, pasin bilong em i no inap hait.
10Husat i wokim sain nogut long ai bilong em, em bai kamapim trabel,
tasol ol ful i mauswara nating, bai ol i bagarap.
11Maus bilong stretpela manmeri, em i save kamapim laip,
tasol bagarap i pas olgeta long maus bilong ol man nogut.
12Pasin bilong hetim i save kirapim trabel,
tasol pasin bilong lavim i save karamapim ol kainkain rong.
13Long maus bilong man i gat klia tingting bai yu painim trupela save,
tasol kanda i stap bilong wipim baksait bilong man i sot long gutpela tingting.
14Man i gat trupela save, em bai wok long kisim ol gutpela save,
tasol maus bilong ful bai kisim bagarap i kam hariap.
15Mani bilong maniman em i strongpela banis bilong em;
na rabisman i nogat mani em bai pret nogut tru.
16Pasin bilong ol stretpela man em i laip,
na wok bilong ol man nogut em i sin.
17Husat man i harim tok, em i soim rot bilong laip,
tasol man i givim baksait long stia tok, em i paulim rot bilong manmeri.
18Man i haitim pasin bilong hetim long bel bilong em, em bai mekim tok giaman,
na husat i tok baksait em i wanpela ful.
19Taim planti toktok i stap, orait sin bai i stap wantaim,
tasol man i no mekim planti toktok, em i gat save na em i skelim gut tru olgeta samting long laip bilong em.
20Tang bilong ol stretpela man em i olsem gutpela silva,
na bel bilong ol man nogut em i rabis.
21Maus bilong ol stretpela man bai helpim planti manmeri,
tasol ol ful ol i sot long gutpela tingting na bai ol i dai.
22Blesim bilong BIKPELA i kamapim ol gutpela samting,
na ol hevi i no inap i pas wantaim.
23Pasin nogut em i fani bilong ol ful,
tasol trupela save em i amamas bilong ol man i gat klia tingting.
24Samting ol ful i pret long lukim, dispela samting bai i kalap long ol,
tasol gutpela samting ol stretpela man i laikim, bai ol i kisim.
25Taim bikpela win i kam i go pinis, orait ol man nogut i no stap moa,
tasol ol stretpela man bai i stap oltaim oltaim.
26Olsem vinega i pait long tit nogut na smok i bagarapim ai,
orait lesman i stap olsem long bos bilong em.
27Pasin bilong pret long BIKPELA bai skruim laip,
tasol ol yia bilong ol man nogut bai sot.
28Hop bilong ol stretpela man em i givim amamas long ol,
tasol hop bilong ol man nogut bai bagarap olgeta.
29Pasin bilong BIKPELA em i wanpela seif haus bilong manmeri i wokabaut long stretpela pasin,
tasol em i bikpela pret bilong ol manmeri nogut.
30Ol stretpela man bai i stap,
tasol ol man nogut i no inap i stap long graun God i givim.
31Maus bilong ol stretpela man i save autim trupela save,
tasol tang bilong man nogut BIKPELA bai katim na kamautim.
32Maus bilong ol stretpela man i klia long wanem tok i rait toktok,
tasol maus bilong ol man nogut i save tasol long ol rabis toktok.
