Ol Provep

¹Meri i gat trupela save, em i wok long mekim olgeta samting bilong femili bilong em i kamap gutpela,
tasol, long han bilong em yet, ful i save pundaunim femili bilong em.
²Man i wokabaut long stretpela pasin em i pret long BIKPELA,
tasol man i wokabaut long giaman em i save hetim BIKPELA.
³Maus bilong ful i kisim kanda i kam long baksait bilong em yet,
tasol maus bilong ol man i gat trupela save bai lukautim ol.
⁴Sapos ol bulmakau i no stap, orait haus bulmakau bai i stap klin,
tasol planti kaikai i kamap long strong bilong bulmakau.
⁵Feitful witnis i no inap giaman,
tasol tok giaman i kapsait long maus bilong giaman witnis.
⁶Sapos man bilong tok bilas i wok long painim trupela save, orait em i no inap kisim,
tasol save i no hatwok bilong man i gat klia tingting.
⁷Yu no ken i stap wantaim ol ful,
long wanem, yu no inap harim wanpela tok bilong trupela save long maus bilong em.

⁸Trupela save bilong man i gat save em i pasin bilong skelim gut tru olgeta samting long laip bilong em
tasol longlong bilong ol ful em i pasin bilong giaman.
⁹Ol ful ol i tok bilas long ofa bilong stretim rong,
tasol gutpela man bai amamas long wanbel i kamap long em.
¹⁰Man yet i save long ol hevi i stap dip insait long bel bilong em,
na narapela man i no inap serim amamas bilong em.
¹¹Haus bilong ol man nogut bai bagarap,
tasol haus sel bilong gutpela man bai kamap gutpela moa.
¹²Wanpela man i makim rot bilong em na em i ken i tingim dispela rot em i gutpela rot,
tasol dispela rot bilong em, em i rot bilong i dai.
¹³Yumi ken i lap na amamas, tasol dip insait i gat bel hevi i stap,
na taim amamas i pinis, bai yumi safa long bel bilong yumi.
¹⁴Man i tanim na dropim bilip bilong em, em bai pulap long kaikai bilong rot bilong em,
na gutpela man bai pulap long kaikai bilong rot bilong em.

¹⁵Man i no gat save, em i bilipim olgeta kainkain tok,
tasol man i gat save na i skelim gut tru olgeta samting long laip bilong em, em bai tingting gut pastaim na em i wokabaut.

¹⁶Man i gat trupela save, em i pret na em i tanim na lusim pasin nogut,
tasol ful, em i no tingting na em i no kea.
¹⁷Man i belhat hariap, em bai mekim ol stupit pasin,
na man bilong plenim ol pasin nogut, ol manmeri i hetim em.
¹⁸Ol man i no gat save, bai ol i kisim pasin bilong ol ful,
tasol man i gat save na i skelim gut tru olgeta samting long laip bilong em, em bai kisim kraun bilong trupela save.
¹⁹Ol man nogut bai brukim skru long ol gutpela man,
ol nogut manmeri bai i brukim skru i stap long get bilong ol stretpela man.
²⁰Ol rabisman, neba bilong ol i save hetim ol,
tasol ol maniman ol i gat planti pren bilong ol i stap.
²¹Man i no rispektim neba bilong em, em i wanpela sinman,
tasol blesim i stap long man i givim gutpela helpim long ol rabisman.
²²Ol man i plenim ol pasin nogut, ol i save lukim paul pasin,
tasol manmeri i plenim ol gutpela pasin, bai ol i bungim feitful lavim na trupela bel.
²³Long olgeta kainkain wok, i gat profit bilong em i stap,
tasol toktok nating i save kamapim pasin bilong sot long olgeta samting.
²⁴Planti samting bilong ol man i gat trupela save, em i kraun bilong ol,
tasol longlong bilong ol ful i save kisim longlong i kam tasol.
²⁵Witnis i mekim trupela tok, em bai sevim laip bilong ol man,
tasol witnis i kapsaitim giaman tok long maus bilong em, em i man bilong giaman.
²⁶BIKPELA Em i strongpela haus bilong man i pret long Em,
na pikinini bilong man i pret long BIKPELA ol i gat seif haus bilong ol i stap.
²⁷Pasin bilong pret long BIKPELA i olsem wara bilong laip
bai yumi tanim na lusim ol samting i laik banisim yumi long i dai.
²⁸Bikpela bikpela lain manmeri em i glori bilong king,
tasol sapos ol manmeri i no stap, orait pikinini man bilong king i bagarap.
²⁹Man i no belhat kwik, em i gat gutpela gutpela save,
tasol man i belhat hariap, em i putim longlong bilong em long ples klia.
³⁰Kwaitpela bel i save givim laip long olgeta hap bilong bodi,
tasol jelas pasin i mekim bun bilong man i sting.
³¹Man i daunim wanpela rabisman em i rabisim God i bin wokim em,
tasol man i givim gutpela helpim long rabisman em i rispektim God.
³²Ol man nogut, pasin nogut bilong ol i kapsaitim ol,
tasol stretpela man, em i gat seif haus bilong em i stap maski em i dai.

³³Trupela save i sindaun long bel bilong man i save long skelim ol samting long gutpela wei,
tasol namel long ol ful, trupela save i stap ples klia na ol i ken i lukim.
³⁴Stretpela pasin i givim gutpela nem long kantri,
na sin i givim sem tasol long ol lain manmeri.
³⁵Wokman i yusim trupela save na i mekim wok, em bai lukim amamas bilong king,
tasol belhat bilong king bai pundaun long man i mekim wok nogut.