Ol Provep

¹Ol man, ol i wok long stretim toktok long tingting bilong ol,
tasol rait ensa bilong tang, BIKPELA i save givim.
²Olgeta pasin bilong man em i klin long ai bilong em yet,
tasol BIKPELA i save skelim as tingting bilong em.
³Putim olgeta wok bilong yu long han bilong BIKPELA,
na ol plen bilong yu bai kamap gutpela.
⁴BIKPELA i wokim olgeta samting, na olgeta samting i gat wok bilong em i stap,
na ol manmeri nogut tu, BIKPELA i wokim ol bilong kisim hevi long de bilong trabel.
⁵BIKPELA i hetim tru ol manmeri i apim ol yet long bel bilong ol;
tru tumas, ol i no inap abrusim kot.
⁶Long rot bilong feitful lavim na feitful pasin bai yu rausim sin long laip bilong yu,
na long pasin bilong pret long BIKPELA, bai yu tanim na lusim pasin nogut.
⁷Taim man i mekim pasin BIKPELA i laikim,
orait, Em i ken i mekim ol birua tu i stap wanbel wantaim em.
⁸Man i no gat planti samting na i mekim stretpela pasin,
i winim man i kisim planti kago na i mekim pasin i no stret na fea.
⁹Long bel bilong man, em i plenim ol samting bilong laip bilong em,
tasol BIKPELA i makim na stiaim wokabaut bilong em.

¹⁰Taim king i mekim tok, i olsem tok bilong em i bin kam long BIKPELA;
long maus bilong em, em i mas autim ol disisen i stret na fea.
¹¹BIKPELA Em i papa bilong olgeta skel i stret na fea;
olgeta wanwan skel i stap long beg, BIKPELA i bin wokim.
¹²Ol king ol i hetim pasin nogut,
long wanem, kingdom em i stap strong long rot bilong stretpela pasin.
¹³Maus i mekim stretpela toktok i givim amamas long king;
em i lavim manmeri i autim tok i stret olgeta.
¹⁴Belhat bilong king i ken i kilim yu i dai,
na man i gat save bai slekim belhat bilong em.
¹⁵Long amamas bilong fes bilong king laip i stap,
na wanbel bilong em i olsem klaut i kisim ren i kam long nupela gaden.

¹⁶Sapos yu kisim trupela save, tru tumas dispela i winim yu kisim gol!
Na sapos yu kisim klia tingting, dispela i winim yu kisim silva.
¹⁷Haiwe bilong gutpela man em i save abrusim ol pasin nogut;
man i lukaut long wokabaut bilong em, em i lukautim laip bilong em.
¹⁸Man i apim em yet pastaim, bihain em bai bagarap,
na man i save hambak pastaim, bihain em bai pundaun.
¹⁹Man i pilim olsem em i no bikpela samting na i stap rabisman,
i winim man i apim em yet na i kisim planti kago.

²⁰Man i skelim gut ol gutpela toktok, em bai lukim gutpela samting,
na blesim i stap long man i trastim BIKPELA.
²¹Man i gat trupela save long bel bilong em, ol manmeri i save olsem, em i man bilong skelim ol samting long gutpela wei,
na naispela toktok bilong em bai kirapim manmeri long kisim skul.
²²Klia tingting i olsem wara bilong laip bilong man i kisim,
tasol skul bilong ol ful em i longlong pasin bilong ol.
²³Bel bilong man i gat trupela save, i mekim toktok bilong em i go stret,
na i mekim maus bilong em i kirapim manmeri long kisim skul.
²⁴Gutpela na naispela toktok i olsem hani,
na i mekim laip i stap swit na i givim helt long bodi.

²⁵Wanpela man i makim rot bilong em na em i ken i tingim dispela rot em i gutpela rot,
tasol dispela rot bilong em, em i rot bilong i dai.
²⁶Hangre bilong man i mekim wok i strongim em long mekim wok;
hangre bilong em i fosim em long wok moa.
²⁷Man i nogut tru, em i save plenim ol pasin nogut,
na toktok bilong em i olsem wanpela hatpela paia.
²⁸Man nogut, em i save kamapim trabel nabaut,
na man i tok baksait, em i mekim kros i kamap namel long tupela pren.
²⁹Man bilong mekim trabel, em i save grisim neba bilong em
na em i pulim em i go long rot nogut.
³⁰Man i wokim sain long ai bilong em, em i man i plenim pasin nogut,
na man i pasim maus strong, em i laik wokim samting nogut.

³¹Waitpela gras i olsem wanpela naispela kraun;
long rot bilong stretpela laip bai yu kisim.
³²Man i no belhat kwik, em i winim man i bikpela man,
na man i bosim na kontrolim bel bilong em, em i winim man i pait strong na i kisim siti.
³³Ol manmeri ol i pilai satu,
tasol olgeta disisen bilong em i stap long han bilong BIKPELA.