Ol Provep

¹Man i laik i stap wanpis em i man i laik bihainim save bilong em yet;
em bai tok pait na egensim ol gutpela na trupela tok.
²Wanpela ful em i no laik long kisim gutpela save,
nogat, em i amamas tasol long autim tingting bilong em yet.
³Taim pasin nogut i kamap, orait bel nogut bai kamap tu,
na taim pasin bilong rabisim ol man i kamap, orait sem tu bai kamap.
⁴Toktok bilong ol manmeri i olsem wanpela wara i dip tumas,
tasol toktok bilong trupela save i olsem wanpela wara i boil na i ron i go.
⁵I no gutpela long kot i fevoritim ol man nogut,
na i no gutpela long pasim rot bilong ol stretpela man long kisim disisen i stret na fea.
⁶Toktok bilong ful i save kamapim pait,
na maus bilong em i invaitim ol man long stikim em.
⁷Maus bilong ful bai bagarapim em,
na toktok bilong em bai banisim na pundaunim em.
⁸Tok baksait i olsem wanpela switpela kaikai,
em i holim tru bel bilong manmeri.
⁹Man i slek long mekim wok,
em i brata bilong man i distroim ol samting.
¹⁰Nem bilong BIKPELA i olsem wanpela strongpela haus;
ol stretpela man i save ran i go insait long em na i stap seif.
¹¹Mani bilong maniman em i olsem wanpela strongpela siti bilong em,
na i olsem wanpela bikpela banis long tingting bilong em.

¹²Man i apim em yet long bel bilong em, bihain em bai bagarap,
tasol man i daunim em yet, bihain em bai kisim ona.

¹³Man i no putim ia i go long tok pastaim na em i hariap na bekim tok,
em i mekim pasin bilong ol ful na em i ken i sem.
¹⁴Man i strong long tingting bilong em, em i ken i karim hevi bilong ol kainkain sik,
tasol husat inap long karim hevi bilong tingting i gat sik?
¹⁵Man bilong yusim het em i save kisim na bungim save,
na ia bilong man i gat trupela save em i wok long painim save.
¹⁶Presen i ken i opim rot bilong man i givim presen
na i kisim em i go long ai bilong ol bikpela man.
¹⁷Man i autim tok pastaim, ol man bai tingim tok bilong em i stret,
tasol taim man i kam bihain i kwestenim em, orait tok bilong fes man i no gat strong.
¹⁸Pilai satu i ken i pinisim tok pait
na kamapim disisen namel long tupela strongpela man i kot.
¹⁹Brata i kisim sem, bel bilong em i strong moa na i winim strong bilong wanpela strongpela siti,
na tok pait i olsem stik ain ol i yusim bilong pasim windo bilong kasel.
²⁰Wanem frut maus bilong man i karim, orait em bai kaikaim dispela frut;
em bai kaikaim haves bilong maus bilong em.
²¹Dai na laip i stap long strong bilong tang,
na man i lavim pasin bilong tang, em bai kaikaim kaikai bilong em.

²²Man i kisim na maritim meri em i kisim gutpela samting tru,
na em i kisim orait bilong BIKPELA.
²³Ol rabisman bai tok isi na tok “plis”,
tasol ol mani manmeri bai yusim hatpela toktok bilong bekim ol.
²⁴Man i gat planti pren, em i ken i pundaun na bagarap i stap,
tasol trupela pren bai pas olgeta olsem wanpela brata stret.