Ol Provep
Trupela save i kamapim ol gutpela samting.
2
1Pikinini man bilong mi, sapos yu kisim tok bilong mi na yu hipim i go antap ol lo bilong mi long tingting bilong yu,
2na sapos yu mekim ia bilong yu i harim trupela save,
na sapos yu redim tingting na bel bilong yu bilong kisim save;
3tru tumas, sapos yu singaut long kisim save long ol tok i dip tumas,
na sapos yu bikmaus bilong kisim save;
4na sapos yu wok hat long painim, olsem ol man i wok hat long painim silva na ol i wok hat long painim gol i hait long graun,
5orait, bai yu klia tru long pasin bilong pret long BIKPELA,
na bai yu lukim trupela save bilong God.
6Long wanem, BIKPELA yet Em i givim trupela save;
trupela save na klia tingting i kam tasol long maus bilong Em.
7Em i hipim strongpela na trupela save bilong givim ol man i pret long Em;
Em i raunim na lukautim ol man i wokabaut long stretpela pasin.
8Em i lukautim na holim i stap rot bilong stretpela kot,
na Em i was na lukautim wokabaut bilong ol manmeri i bilipim na trastim Em.
9Em olsem na yu bai klia long pasin i rait olgeta na pasin i stretpela olgeta na pasin i fea olgeta. Bai yu save long olgeta gutpela rot.
10Long wanem, trupela save bai kam insait long tingting na bel bilong yu,
na trupela save bai swit long laip bilong yu.
11Pasin bilong ai klia na wokabaut long gutpela pasin i no gat sem, dispela pasin bai was gut tru long yu,
na pasin bilong kisim save bai lukautim yu.
12Ol dispela samting bai sevim yu long wokabaut long rot bilong pasin nogut,
na sevim yu long ol man i mekim tok nogut,
13em ol man i lusim rot bilong stretpela pasin,
na i wokabaut long ol pasin bilong tudak,
14na i amamas long mekim pasin nogut,
na i tingim tudak bilong pasin nogut em i swit.
15Rot bilong ol i kranki tru,
na ol i 2-pela maus long olgeta samting bilong ol.
16Na trupela save bai sevim yu long meri yu no ken i kisim,
em bai sevim yu long pamuk meri na tok gris bilong em.
17Dispela kain meri em i givim baksait long man em i maritim taim em i yangpela yet,
na em i lusim tingting pinis long promis em i mekim long God bilong em.
18Haus bilong em, em i haus bilong i dai,
na rot bilong em, em i rot bilong man i dai pinis.
19Ol man i go pinis long em, ol i no inap tru long kam bek gen,
na ol i no save kam bek gen na wokabaut long rot bilong laip.
20Taim yu kisim trupela save, orait bai yu wokabaut long rot bilong ol gutpela samting,
na bai yu pas tasol long rot bilong ol stretpela pasin.
21Manmeri i wokabaut long gutpela pasin, ol bai sindaun na yusim graun God i bin givim ol,
manmeri i wokabaut long stretpela pasin, ol bai i stap tasol na ol i no inap lus long graun God i bin givim.
22Tasol, ol manmeri i mekim pasin nogut, ol bai lus long graun,
na ol manmeri i no feitful, ol bai drai na rop bilong ol i no inap i stap long graun God i bin givim.
