Ol Provep
Tok namba 7
1Taim yu sindaun na kaikai wantaim wanpela bikman,
yu mas skelim gut wanem samting yu lukim,
2na sapos yu hangre long ol samting bilong em,
orait mobeta yu katim nek bilong yu yet.
3Yu no ken i mangalim ol naispela samting bilong em,
long wanem, kaikai bilong em i no olsem yu tingim.
Tok namba 8
4Yu no ken i wok wok na tuhat bilong kamapim planti mani;
yusim gutpela skelim bilong yu na yu stap isi.
5Taim ai bilong yu i lukim mani, hariap dispela samting i lus long yu,
long wanem, wantu em i kamapim tupela wing,
na em i flai olsem tarangau i flai i go antap tru long skai.
Tok namba 9
6Yu no ken i strong long kaikaim kaikai bilong man i les long serim;
yu no ken i mangalim ol naispela samting bilong em.
7Long wanem, em i man bilong tingting planti long bel bilong em.
Em i tok, “Kaikai gut na dring gut”,
tasol gutpela tingting bilong em i no stap wantaim yu.
8Bai yu trautim ol liklik hap kaikai yu bin kaikaim,
na ol naispela toktok bilong yu i wes nating.
Tok namba 10
9Yu no ken i mekim toktok long wanpela ful,
long wanem, em bai rabisim gutpela save i stap baksait long tok bilong yu.
Tok namba 11
10Yu no ken i muvim ston bilong bodamak bilong bipo na yu no ken i kisim graun bilong pikinini i no gat papa,
11long wanem, MAN BILONG BAIM BEK bilong ol Em i gat bikpela strong,
na Em bai difenim ol na egensim yu.
Tok namba 12
12Yusim bel bilong yu bilong skelim na kisim stretpela tingting
na yusim ia bilong yu bilong harim tok bilong trupela save.
Tok namba 13
13Yu no ken i lusim pasin bilong stretim pikinini;
Sapos yu givim kanda long em, em i no inap i dai.
14Givim kanda long em,
na bai yu sevim laip bilong em long hel.
Tok namba 14
15Pikinini man bilong mi, sapos bel bilong yu i gat trupela save,
bel bilong mi tu bai amamas.
16Taim mi harim maus bilong yu i mekim tok i stret na tru,
dip insait long mi, mi bai amamas tru.
Tok namba 15
17Yu no ken i larim bel bilong yu i mangalim ol sinman;
long olgeta de yu mas pret long BIKPELA i go yet.
18Tru tumas i gat hop bilong yu i stap long bihain,
na hop bilong yu i no inap lus.
Tok namba 16
19Pikinini man bilong mi, harim tok na kisim trupela save,
na stiaim bel bilong yu long rot.
20Yu no ken i stap wanpela bilong ol spak lain,
na yu no ken i stap wanpela bilong ol manmeri i bisi long kaikai planti na i stap.
21Long wanem, man i spak na man i bisi long kaikai planti, tupela bai kamap rabisman,
na slip bai karamapim tupela long pipia klos.
Tok namba 17
22Harim tok bilong papa bilong yu, em i bin givim laip long yu,
na yu no ken i rabisim mama bilong yu taim em i lapun pinis.
23Baim trupela tok, na yu no ken i salim;
baim trupela save na stretpela skul na klia tingting.
24Papa bilong manmeri i stretpela bai amamas moa;
papa i karim pikinini man i gat trupela save bai amamas long pikinini bilong em.
25Mekim gutpela pasin na larim papa na mama bilong yu i kisim amamas;
Mekim gutpela pasin na larim mama i karim yu i kisim amamas tru.
Tok namba 18
26Pikinini man bilong mi, givim bel bilong yu long mi,
na larim ai bilong yu i glasim gut pasin bilong mi.
27Long wanem, 2-kina meri em i wanpela hul i dip tumas;
pamuk meri em i wanpela hul wara we maus bilong em i liklik tumas.
28Em i wetim ol man olsem ol raskol i wetim ol man,
na em i mekim planti man moa i kamap man nogut.
Tok namba 19
29Husat i gat trabel? Husat i gat bel hevi? Husat i stap long kros pait? Husat i stap long komplen?
Husat ol man i paitim nating? Husat ai bilong ol i ret olgeta?
30Ol man i bisi tasol long dringim wain;
ol man i bisi long traim ol strongpela dring ol i bin miksim nabaut.
31Yu no ken i lukluk i stap long retpela wain;
yu no ken i lukluk taim em i lait insait long kap na em i swit long maus.
32Bihain em bai kaikaim yu olsem snek na em bai givim pen long yu olsem snek i gat marasin nogut.
33Ai bilong yu bai raun na bai yu lukim ol narapela kain samting,
na bel bilong yu bai autim ol tok i nogut tru.
34Bai yu stap olsem man i slip long bikpela solwara;
bai yu stap olsem man i slip long rigin bilong sip.
35Yu bai tok, “Ol i paitim mi, tasol mi no save, na ol i wipim mi, tasol mi no pilim.
Wanem taim bai mi wekap?
Mi mas dringim sampela strongpela dring moa.”
