Ol Provep
Sampela provep moa bilong Solomon.
25
1Dispela tok tu em i ol provep bilong Solomon. Ol man bilong Hesekia, king bilong Juda, i bin lukim na raitim.
2God Em i haitim ol sampela samting na dispela em i glori bilong Em,
na glori bilong ol king em i wok bilong ol bilong kisim save long ol sampela samting.
3Skai em i antap tumas, na solwara em i dip tumas,
na wankain olsem, em i hat tru long luksave long bel bilong ol king.
4Rausim olgeta pipia long silva,
na wokman i gat gutpela silva bilong wokim sampela samting;
5rausim ol man nogut long ai bilong king,
na long rot bilong stretpela pasin em i ken i holim sia bilong em.
6Yu no ken i putim yu yet i kam antap long ai bilong king,
na yu no ken i sanap long ples bilong ol bikman bilong em.
7Long wanem, nogut em i rausim yu i go daun long ai bilong ol man i gat namba;
mobeta em i tokim yu olsem, “Yu kam antap.”
Samting yu lukim long ai bilong yu,
8yu no ken i kisim i kam hariap long kot.
Long wanem, taim neba em i semim yu, orait bai yu mekim wanem?
9Sapos yu gat hevi long neba bilong yu, orait yu mas toktok wantaim em na yu stretim,
tasol yu no ken i putim hait toktok i kam long ples klia.
10Long wanem, nogut ol man i harim na sem i kam long yu,
na nem nogut i holim yu oltaim.
11Wanpela stretpela disisen long rait taim,
em i olsem epel ol i wokim long gol na raunim long silva.
12Jas i gat trupela save i stretim wanpela man i wanbel long harim,
em i olsem wanpela gol ring ol i pasim long ia o wanpela naispela bilas ol i wokim long gol.
13Man i feitful long karim tok bilong man i salim em,
em i olsem kol bilong sno long taim bilong haves;
em i kamapim amamas gen long laip bilong bosman bilong em.
14Man i toktok planti long givim presen, tasol em i no givim,
em i olsem klaut na win i kam, tasol i no gat ren.
15Sapos yu stap isi na wetim, orait lidaman i ken i senisim tingting bilong em na harim tok bilong yu,
na tang i tok isi isi em i gat strong bilong brukim bun.
16Sapos yu lukim hani, orait yu kaikaim inap tasol bilong yu yet,
long wanem, nogut yu pulap nogut tru na yu traut.
17Yu no ken i go tumas long haus bilong neba bilong yu,
long wanem, nogut em i pulap nogut tru long yu na em i hetim yu.
18Man i mekim giaman witnis long neba bilong em,
em i olsem wanpela stik bilong pait, o wanpela sod, o wanpela spia i sap tumas.
19Long taim bilong trabel, pasin bilong trastim man bilong giaman
em i olsem tit i sting pinis, o lek i bagarap.
20Man i singim song bilong amamas long manmeri i gat bel hevi,
em i olsem man i rausim kolsiot long taim bilong kol, na em i olsem man i putim vinega i pait long sua.
21Sapos birua bilong yu em i hangre, orait givim kaikai long em,
na sapos em i drai long wara, orait givim wara long em.
22Na taim yu mekim olsem, i olsem yu hipim hatpela sit bilong paia long het bilong em,
na BIKPELA bai givim gutpela samting long yu.
23Olsem win i kisim ren i kam long not sait, wanpela man bai saprais nogut tru taim pren bilong em i tok baksait long em;
long fes bilong em bai yu lukim belhat na pen.
24Sindaun bilong man i stap long liklik kona bilong rup bilong haus
i winim sindaun bilong man i stap long bikpela haus na meri bilong em i kros kros olgeta taim.
25Gutnius i kam taim yu stap longwe long as ples bilong yu,
i olsem kol wara bilong man i tait na i drai long wara.
26Stretpela man i no gat strong na i bihainim tok bilong ol man nogut,
i olsem liklik wara i doti, o liklik wara i pulap long ol samting nogut.
27Pasin bilong kaikaim planti hani tumas em i no gutpela,
na em i no gutpela long man i bisi long painimaut sampela samting i dip tumas bilong em.
28Man i no inap kontrolim em yet,
i olsem wanpela siti ol birua i pundaunim banis na i go insait.
