Ol Provep
Lukaut long pamuk meri.
7
1Pikinini man bilong mi, lukautim tok bilong mi
na bungim olgeta lo bilong mi long bel bilong yu.
2Lukautim lo bilong mi na bai yu stap laip,
lukautim tisim bilong mi olsem yu lukautim ai bilong yu,
3pasim long pinga bilong yu,
na raitim long bel bilong yu.
4Yu mas tokim trupela save olsem, “Yu sista bilong mi,”
yu mas kolim save i dip tumas, “Gutpela pren bilong mi,”
5na bai yu seif long meri i tambu long yu kisim,
bai yu seif long gris toktok bilong pamuk meri.
6Long wanem, mi bin sanap long windo bilong haus bilong mi,
mi sanap long windo na mi lukim,
7mi lukim wanpela man i no kisim save yet,
mi lukim wanpela yangpela man,
wanpela yangpela man i no gat het,
8em i wokabaut long rot klostu long kona bilong pamuk meri,
em i bihainim rot i go long haus bilong em,
9long apinun, san i go daun pinis,
em i tudak pinis na em i wokabaut i go.
10Em olsem na, meri i bungim em,
em i werim klos bilong 2-kina meri, na long bel bilong em, em i meri bilong konim ol man.
11Em i meri bilong toktok na em i meri bilong raun,
em i no sindaun tasol long haus bilong em,
12em save raun long rot, na raun long maket ples,
na em save sanap long ol rot bung nabaut.
13Na em i holim dispela yangpela man na i givim kis long em,
na em i no sem liklik na em i tokim em,
14“Nau mi bin wokim wanpela ofa,
na mi gat abus i stap long haus,
15olsem na, nau mi kam bilong bungim yu,
mi gat bikpela laik long bungim yu na yu kam pinis.
16Mi bin karamapim bet bilong mi long ol betsit,
ol naispela kala kala betsit bilong Isip,
17mi mekim bet i gat naispela smel bilong mer,
na long alos, na long sinamon.
18Kam, yumi pilai na slip wantaim i go painim tulait,
yumi amamasim yumi long slip wantaim.
19Long wanem, man bilong mi i no stap,
em i go pinis long wanpela longwe hap,
20em i bin karim planti mani i go,
na long bikmun tasol em bai i kam.”
21Meri i mekim planti naispela toktok na yangpela man i wanbel,
em i grisim em na bel bilong yangpela man i kirap.
22Em nau, em i bihainim dispela meri i go,
olsem wanpela bulmakau ol i kisim i go bilong kilim,
olsem wanpela man dia i pas pinis long trap
23na i wetim spia i sutim lewa bilong em,
olsem wanpela pisin i hariap i go insait long trep.
Em i no save olsem em bai lusim laip bilong em long dispela samting.
24Ol pikinini man, harim tok bilong mi,
putim ia bilong yu i go long toktok bilong maus bilong mi.
25Yu no ken i larim bel bilong yu i go long pasin bilong em,
yu no ken i paul long rot na yu wokabaut long rot bilong em.
26Long wanem, em i bagarapim planti man,
ol man em i pundaunim i planti tru.
27Haus bilong em, em i rot bilong ples bilong daiman,
em i rot i go daun long rum bilong daiman.
