Moning.
Las wik long Sande Baibel Toktok yumi skelim Efesus 3:1-13 na yumi kisim save long Pol yet – em i wanem kain man na em i wanem kain wokman bilong God. Tasol Pol em i no mekim dispela toktok long Efesus 3:1-13 bai yumi ken i save long em tasol. Nogat. Yumi ken i save long em, tasol em i mekim dispela toktok bilong soim yumi narapela samting – samting i bikpela samting stret – samting i as bilong plen na wok bilong God long hia long dispela graun.
Nau bai yumi skelim Efesus 3:1-13 gen na yumi kisim save long dispela bikpela samting Pol i tokaut long en.
1Mi Pol, mi kalabusman bilong Krais Jisas. Mi bin mekim wok namel long yupela ol lain Jentail na long dispela as mi stap nau long kalabus.
2Ating yupela harim pinis olsem, God i bin makim mi na Em i givim wok long mi long karim grasia bilong Em i go long yupela. 3Mi tok nau long tok hait God i bin soim mi. Long dispela tok mi raitim liklik hap pinis long yupela. 4Taim yupela ritim dispela tok yupela bai klia olsem God i givim gutpela save long mi long dispela tok hait bilong Krais. 5God i no putim dispela tok hait long ples klia long ol narapela jeneresen. Nau tasol Holi Spirit i putim dispela tok hait long ples klia long ol holi aposel na profet bilong God. 6Na dispela tok hait i olsem, olgeta samting God i promisim ol lain Israel ol lain Jentail tu bai kisim.
Tupela i stap long wanpela bodi tasol na tupela wantaim bai kisim olgeta samting God i bin promisim long wok bilong Krais. Na ol dispela samting i kamap long rot bilong gutnius.
7God i bin mekim mi kamap wokman bilong autim dispela gutnius. Em i bin mekim strongpela wok na mekim grasia long mi na Em givim dispela wok long mi. 8Namel long ol manmeri bilong God mi yet mi man nating tumas. Tasol God i mekim grasia long mi na Em i givim dispela wok long mi. Na dispela wok i olsem, mi mas karim gutnius i go long ol lain Jentail. Mi mas tokim ol long olgeta gutpela samting Krais i bin mekim. 9Mi mas mekim plen bilong dispela tok hait i kamap klia olgeta long olgeta manmeri. God i wokim olgeta samting, na Em i holim dispela tok hait long tingting bilong Em i kam i kam inap long nau. 10God i mekim olsem bilong ol samting bilong heven i ken i lukim wok Em i mekim long sios na ol i ken i klia olsem, save bilong Em i moa moa yet. 11Ol dispela samting em i plen bilong God bilong oltaim oltaim, na long wok bilong Krais Jisas, BIKPELA bilong yumi, God i kamapim pinis plen bilong Em. 12Yumi ken i kam bek long God na yumi no inap sem o pret bikos Krais i bin feitful long mekim wok. 13Olsem na, mi laik tokim yupela olsem, yupela no ken i pilim hevi long dispela pen mi karim bilong helpim yupela. Nogat. Dispela pen mi karim em i gutpela samting tru bilong yupela.
Sios em i as bilong plen bilong God.
Long lain 2-10 Pol em i tok olsem, wanpela samting i hait pastaim, tasol nau Holi Spirit bilong God i putim dispela hait samting long ples klia long ol aposel na long ol profet. Ol narapela jeneresen bipo ol i no klia gut long dispela samting. Tasol nau Holi Spirit i putim dispela hait samting long ples klia na yumi olgeta yumi ken i save long em.
Na dispela tok hait em i wanem samting? Lukim lain 6. Ol wanwan Jentail manmeri na ol wanwan Israel manmeri bai i stap long wanpela bodi – Pol i minim wanpela nupela komyuniti – em i tok long sios – ol wanwan Jentail manmeri na ol wanwan Israel manmeri bai i stap long sios (wanpela bodi) na tupela wantaim bai kisim olgeta samting God i bin promisim.
God i bin promisim wanem samting?
God i bin promisim olgeta blesim bilong heven (lukim Efesus 1:3). Olsem na, em i no ol Israel manmeri tasol bai kisim. Nogat. Ol wanwan Jentail manmeri i pas long Krais wantaim ol wanwan Israel manmeri i pas long Krais – tupela wantaim bai pas long Krais na kisim olgeta blesim bilong heven.
Long lain 7-10 Pol em i stori olsem, “God i bin makim mi na mekim mi kamap wokman bilong autim dispela tok hait – dispela gutnius – long olgeta manmeri.”
Orait, nau lukim lain 11. Pol i tok olsem, “Ol dispela samting em i plen bilong God bilong oltaim oltaim, na long wok bilong Krais Jisas, BIKPELA bilong yumi, God i kamapim pinis plen bilong Em.”
Ol dispela samting – dispela nek i makim ol dispela samting we God i pasim ol wanwan manmeri wantaim long wanpela nupela sios komyuniti femili bilong God – ol dispela samting em i plen bilong God bilong oltaim oltaim. God Em i gat wanpela plen bilong Em tasol – Em i bosim na kontrolim na wokim olgeta samting bilong kamapim sios femili bilong Em. Sios femili tasol em i as bilong plen bilong God.
Sios em i wanem samting?
Sios em i manmeri God i bin makim na pasim long Krais, na Krais i bin mekim wok bilong mekim ol i kamap holi na i no gat asua long ai bilong God. Sios em i manmeri God i bin adoptim na mekim ol i kamap femili bilong Em. Sios em i manmeri Holi Spirit i bin mekim wok long laip bilong ol na Em i opim ai na ia na bel bilong ol na ol i luksave long wok Krais i bin mekim bilong ol, na ol i harim tok Krais i tokim ol, na ol i tanim bel na bilipim na trastim feitful wok bilong Krais na ol i stap aninit tru long Krais. (Lukim Efesus sapta 1.)
Orait na taim ol dispela kain manmeri i pas wantaim, ol i sios bilong God. Em olsem na taim ol dispela kain manmeri long taun Efesus i pas wantaim, orait ol i sios bilong God. Na taim ol dispela kain manmeri long wanpela taun bilong P.N.G. i pas wantaim, orait ol i sios bilong God. Na taim ol dispela kain manmeri long wanpela viles long P.N.G. i pas wantaim, orait ol i sios bilong God.
Na bihain God bai kisim ol dispela wanwan sios Em i bin kamapim na Em bai pasim ol long wanpela bikpela sios long heven, na olgeta bai pas i go i go i go olgeta oltaim oltaim. (Lukim Efesus 1:9-10.) Dispela em i plen bilong God bilong oltaim oltaim.
Sios femili bilong God.
Sapos yu tanim bel na yu bilipim na trastim God long kisim bek yu long feitful wok bilong Jisas na yu bihainim Jisas, orait yu ken i save olsem, God i bin makim na pasim yu long Krais. Krais i bin mekim wok bai God i kisim bek yu, na Holi Spirit i bin givim bilip long yu, bai yu lusim olpela femili bilong dispela graun na yu pas long wanpela nupela femili we Krais Em i het. Dispela em i trupela femili bilong yu nau.
Na bai yu stap wantaim ol dispela manmeri oltaim oltaim long heven. Yu no inap i stap wantaim ol femili bilong yu bilong dispela graun. Nogat. Long heven olgeta femili bilong dispela graun bai pinis, na femili bilong God tasol bai i stap wantaim God na wantaim Krais.
Yumi i pas long Jisas na long feitful wok bilong Em orait yumi mas stretim tingting bilong yumi. Yumi mas senisim tingting bilong yumi. Na yumi mas tingim sios femili bilong Jisas em i nambawan femili bilong yumi.
Olsem na, yumi mas lukautim na stap wantaim ol sios femili manmeri wankain olsem ol i wanblut bilong yumi – ol i brata na susa trutru bilong yumi. Lukautim ol, pas wantaim ol, prea wantaim ol, harim tok bilong God wantaim ol, raun wantaim ol, lavim ol, na mekim gutpela long ol.
Glenn.
