Moning.
Yumi mas save olsem, olgeta kastem pasin nogut i kamap long pawa bilong Satan em i samting bilong bagarapim yumi na samting bilong bagarapim ol manmeri. Strong bilong Satan i winim strong bilong yumi, na sapos yumi pilai pilai long ol dispela samting, orait yumi no ken i tingim olsem yumi bai stap orait. Nogat. Pawa bilong Satan em i trupela samting na em i samting bilong bagarapim yumi – mobeta yumi stap longwe tru long ol kastem pasin nogut bilong Satan olsem God i tok.
Tasol yumi save pinis olsem, em i no olgeta samting yumi makim na yumi kolim kastem pasin nogut em i kamap long strong na pawa bilong Satan. Nogat. Ol sampela samting yumi kolim kastem pasin nogut em i kamap long paul tudak tingting bilong ol tumbuna bilong yumi na em i tok tasol – em i no trupela samting i kamap long pawa bilong Satan, nogat, em i tok tasol (Lukim Sande Baibel Toktok – “Sampela kastem pasin nogut em i samting bilong paul tingting”). Na ating yumi tingim olsem, dispela samting i no inap bagarapim yumi na i no inap bagarapim ol manmeri, long wanem, em i tok tasol.
Em olsem tasol yumi olgeta yumi save long man (o meri) i kisim bagarap long dispela tok bilong kastem pasin nogut. Ol manmeri long ples ol i ken i makim man na ol i sutim tok olsem, “Ol wanwan manmeri bilong ples i dai na yu kilim ol i dai long posin sanguma puripuri pasin bilong yu.” Ol i mekim dispela tok na kirapim belhat bilong ol planti manmeri na ol i kisim bus naip na ol i katim dispela man na kilim em i dai.
Dispela man ol i katim, em i no wokim wanpela samting. Nogat. Em i stap nating tasol. Ol manmeri bilong ples ol i larim paul tudak tingting bilong ol tumbuna bilong ol i stiaim tingting bilong ol na ol i kam katim na kilim man i dai. Paul tudak tingting i bagarapim dispela man ol i katim, na i bagarapim femili bilong em, na i bagarapim papamama brata susa bilong em, na i bagarapim hauslain wantaim. Em olsem na dispela kain toktok em i no samting nating. Nogat. Em i samting bilong bagarapim yumi wantaim ol manmeri.
Bikpela bagarap moa.
Baibel i tokaut long bikpela bagarap moa i ken i kamap long dispela kain toktok. Lukim Esekiel 13:17-19….
17BIKPELA i tok olsem, “Na yu, man bilong dispela graun, yu mas sanap na egensim ol meri bilong lain bilong yu, em ol meri i save mekim tok profet long giaman tingting bilong ol yet. Yu mas mekim tok profet bilong egensim ol, 18na yu mas tok olsem, ‘BIKPELA Bilong Bosim Olgeta Samting i tok olsem: Yupela ol meri i samapim marila paspas bilong ol manmeri i ken i werim long han bilong ol, na yupela ol meri i mekim ol marila laplap bilong ol manmeri i ken i werim long het bilong ol, yupela i bagarapim laip bilong ol. Nau yupela bai kisim bikpela bagarap. Bai yupela bagarapim laip bilong ol lain bilong Mi na sevim laip bilong yupela yet, a? Nogat. 19Long liklik hap bali na long liklik hap bret yupela i bin daunim na mekim nogut long Mi namel long lain bilong Mi. Yupela giamanim ol lain bilong Mi, na ol i harim giaman tok bilong yupela, na long dispela pasin yupela i kilim i dai ol manmeri i no ken i dai, na yupela larim i stap gut ol manmeri i no ken i stap gut.’ ”
Esekiel em i profet bilong God, na God i tokim em long egensim ol manmeri bilong Israel i bin lainim na bihainim ol samting bilong kastem pasin nogut bilong ol lain Kenan – ol lain Kenan em ol lain pastaim ol i stap long graun God i givim ol Israel.
Na yu save long ol marila samting – em i samting man o meri i ken i werim long han lek bilong em o raunim long nek bilong em. Long tingting bilong ol planti manmeri marila i gat kainkain wok bilong en i stap. Sampela taim ol manmeri i yusim marila samting bilong lukautim ol na ol spirit samting i no ken i bagarapim ol long sik. Sampela taim ol sampela meri i yusim marila samting bilong pulim man na man i yusim bilong pulim meri. Em olsem tasol yumi save olsem ol dispela marila samting em i samting bilong paul toktok bilong ol tumbuna tasol – ol i tok olsem dispela samting i gat strong, tasol ol i toktok nating tasol.
Em olsem na ol sampela meri long lain Israel ol i wokim ol sampela marila samting olsem. Ol i samapim paspas samting bilong werim long han na bilong werim long het, na ol i tokim ol manmeri olsem, dispela samting i gat strong – ol i tok olsem dispela samting em i mejik samting na i gat pawa. Na ol planti manmeri i bilipim na trastim tok bilong meri i wokim marila samting na ol i bihainim tok bilong em.
Na God i tokim Esekiel olsem, ol meri i wokim ol marila samting ol i giamanim ol lain manmeri bilong God (ol lain Israel) na dispela marila giaman i bagarapim laip bilong ol manmeri bilong God (lain 18). Meri i wokim ol marila paspas samting bilong maketim na ol manmeri i baim long hap bali (bali em i samting olsem wit bilong wokim bret), na long dispela rot ol i bagarapim laip bilong manmeri bilong God.
Planti taim tumas ol marila samting i kamapim kros pait namel long ol manmeri. Tasol Esekiel i minim olsem, taim ol manmeri i bilipim na trastim tok bilong meri (o man) i wokim marila samting, na ol i bihainim tok bilong em na ol i yusim ol marila paspas samting, orait ol i givim baksait long God, na ol manmeri i givim baksait long God ol bai kisim bikpela bagarap long han bilong God. Taim ol i bilipim na trastim na bihainim ol marila samting, orait ol i givim baksait long God, na ol i stap nau aninit long belhat bilong God, na bai God i mekim save long ol.
God i bin tokim ol lain Israel long ol i mas i stap longwe tru long ol dispela giaman samting – ol i no ken i lainim na bihainim ol dispela giaman marila samting. Tasol ol i givim baksait long tok bilong God na ol i lainim na bihainim ol giaman marila samting, na nau ol bai fesim belhat bilong God – God bai mekim save long ol. Dispela giaman marila samting i kisim bagarap i kam long ol – em i samting bilong bagarapim ol.
Baibel i givim woning long yumi.
Yumi mas save olsem, olgeta samting bilong kastem pasin nogut em i samting bilong bagarapim yumi. Ol kastem pasin nogut bilong Satan wantaim ol kastem pasin nogut i giaman tok tasol, olgeta i samting bilong bagarapim yumi. Planti manmeri long ples i bagarap long ol dispela samting – ol dispela samting i kamapim kros pait na i bagarapim hauslain. Tasol bikpela bagarap moa i kamap long ol, long wanem, manmeri i givim baksait long God na ol i harim tok bilong ol kastem pasin nogut, na ol i bilipim na trastim ol dispela samting, orait ol bai fesim belhat bilong God – bai God i mekim save long ol – ol i no inap i stap nating.
Harim. Yumi no ken i tingim olsem yumi ken i go long ol samting bilong kastem pasin nogut na yumi stap orait. Nogat tru. Bai yumi bagarap. Olsem na mobeta yumi lusim na yumi ranawe long ol dispela samting olsem God i tok, na yumi harim na bihainim na bilipim na trastim olgeta samting God i tokim yumi.
Yumi i bilipim na trastim God long kisim bek yumi long feitful wok bilong Jisas, orait yumi mas kisim wankain tingting olsem Josua – lukim tok bilong Josua long Josua 24:15….
15Tasol, sapos yupela no laik bihainim BIKPELA, orait yupela yet yupela makim husat yupela bai bihainim. ….Tasol mi wantaim femili bilong mi, mipela bai bihainim BIKPELA.
Glenn.
