Prea (2)
Long stadi 1 yumi bin skelim 2-pela toktok….
- Prea em i wanem samting?
- Husat i ken i prea?
Prea em i wanem samting? Prea em i pasin bilong toktok long God. God Em i “man” olsem yumi man, na long dispela as yumi ken i toktok long Em. Taim God i wokim olgeta samting Em i bin wokim manmeri olsem Em yet. Long dispela as yumi gat het na yumi ken i tingting, na yumi ken i pilim ol sampela kain pilim bilong yumi, na yumi ken i opim maus na toktok. Yumi ken i toktok na tokaut long wanem tingting yumi i gat, na yumi ken i toktok na tokaut long wanem kain pilim yumi i kisim. Yumi ken i toktok. Prea em i pasin we yumi toktok long God.
Na husat i ken i prea? God i save harim prea bilong husat? God i save harim prea bilong ol lain bilong Em, em ol manmeri God yet i stretim na i kisim bek long feitful baim bek wok bilong Jisas long diwai kros. Em olsem na, God i harim prea bilong manmeri i tanim bel na i bilipim na trastim God long stretim na kisim bek ol long feitful baim bek wok bilong Jisas. Ol dispela manmeri i save tok tenkyu long God long stretim na baim bek wok bilong Jisas na ol i save lavim Em na bihainim Em.
Sampela manmeri i pilim hevi.
Ating sampela manmeri ol i ken i pilim hevi liklik long dispela toktok. Olsem na mi laik toktok moa na helpim yu klia moa. Lukim Efesus 2:1-5.
1Bipo, yupela i stap insait tru long ol kainkain rong na sin, na spirit bilong yupela i no gat laip. 2Nau yupela no stap olsem, tasol long bipo yupela bihainim olgeta pasin bilong dispela graun na yupela bihainim hetman bilong ol spirit bilong pasin nogut, na em i dispela spirit i wok yet insait long ol manmeri i save sakim tok bilong God. 3Bipo, yumi olgeta i stap olsem ol dispela kain manmeri na yumi amamas long bihainim sin bilong olpela bel bilong yumi na yumi bihainim laik nogut na tingting nogut bilong olpela bel. Olsem na, wankain ol narapela manmeri yumi tu yumi bin i stap aninit long bel hat bilong God. 4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais.
Dispela tok i makim ol manmeri i bin tanim bel na i bilipim na trastim wok God i mekim long dai bilong Jisas bilong stretim na kisim bek ol. Pastaim spirit bilong ol i no gat laip. Dispela i minim olsem pastaim ol i no tingim God trutru long bel bilong ol, na ol i no bihainim Em trutru. Ol i aipas na iapas na bel pas long ol trupela samting bilong God. Ol i stap, na ol i bisi long ol samting bilong ol long laip bilong ol long ples, tasol spirit bilong ol, bel na tingting bilong ol, i no kirap na i no gat laip long ol trupela samting bilong God.
Long dispela as pastaim ol i stap olsem ol manmeri bilong dispela graun – ol i pas tasol long ol kainkain sin pasin. Ol i bihainim hetman bilong ol spirit bilong pasin nogut – na i dispela samting i wok yet insait long ol manmeri i no tanim bel na i wok yet long sakim trupela tok bilong God.
Tasol, bihain, taim ol i stap yet long dispela samting, orait God i kamapim laip long spirit bilong ol, Em i kirapim laip long tingting na bel bilong ol, na nau ol i tingim na bihainim ol trupela samting bilong God. God tasol i kirapim ol. God tasol i opim ai na ia na bel bilong ol, na ol i tanim bel na ol i bilipim na trastim wok God i mekim long dai bilong Jisas bilong stretim na kisim bek ol. Ol yet, long strong bilong ol yet, ol i no kirap na tanim bel. Nogat. God i mekim wok na kirapim tingting na bel bilong ol, na long dispela as tasol ol i tanim bel na bilipim na trastim Em. Olsem na long dispela pasin God i kamapim laip long spirit bilong ol.
Yumi mas klia olsem, manmeri God i no kamapim laip long spirit bilong ol, ol i bihainim hetman bilong ol spirit nogut na dispela spirit i save wok insait long laip bilong ol. Em olsem na God i no inap harim prea bilong ol. Long wanem, tingting na bel bilong ol i no pas long ol trupela samting bilong God, na ol i no tingting long bihainim Em, na ol i bihainim hetman bilong ol spirit bilong pasin nogut tasol.
Manmeri we God i kirapim laip long spirit bilong ol, Em i save harim prea bilong ol. Na ol manmeri God i no kirapim laip long spirit bilong ol, Em i no save harim prea bilong ol. Long wanem, ol i stap yet long pasin nogut na long pasin bilong sakim trupela tok bilong God na ol i bihainim yet hetman bilong ol spirit bilong pasin nogut.
“Tokples” bilong God.
Long ples ol sampela manmeri i mekim tok olsem, “Taim yumi prea, orait yumi mas yusim tokples bilong God yet na yumi prea.” Na sampela bilong yumi i tingting planti long dispela tok bilong ol. Em olsem na mi laik stretim tingting bilong yumi long dispela samting.
Yumi tok pinis olsem, God i save harim prea bilong ol lain bilong Em, em ol manmeri God i stretim na kisim bek long feitful baim bek wok bilong Jisas long diwai kros. God i save putim ia bilong Em i go long toktok bilong ol. Prea bilong ol lain bilong God i no go nating. Nogat. God i save harim toktok ol i mekim taim ol i prea long Em.
Tingim. God yet i bin kamapim olgeta kainkain tokples long olgeta hap long dispela graun. God tasol i bin kamapim tokples bilong yumi na Em i givim dispela tokples long yumi. God Em i papa bilong olgeta tokples. Olgeta tokples em i tokples bilong Em. God Em i winim olgeta tokples. God Em i God bilong olgeta tokples long olgeta hap.
Long buk Aposel i gat stori we Holi Spirit i bin kamap long ol aposel na long ol narapela manmeri i bilip na ol i spikim ol narapela narapela tokples. Tasol yumi no ken i tingim olsem ol i spikim tok ples bilong God yet. Nogat. Ol i spikim tokples bilong ol wanwan lain manmeri bilong dispela graun tasol. Taim ol i yusim ol dispela tokples, orait ol manmeri bilong ol narapela hap ol i harim na ol i klia long toktok ol i mekim.
Yumi skelim dispela stori liklik. Long de Pentikos Holi Spirit i bin kam long ol aposel wantaim ol bilip manmeri na ol i stat nau na tokaut long ol kainkain tokples. Na taim ol longwe manmeri i kam bung long Jerusalem taun i harim toktok bilong ol aposel, ol i kirap nogut na tok, “Ol i spikim tokples bilong mipela.” Yu save, tokples Holi Spirit i bin givim ol em i tokples bilong ol wanwan manmeri bilong ol narapela narapela hap i kam bung long Jerusalem. Na ol dispela manmeri i harim Tok bilong God long tokples bilong ol yet. Lukim Aposel 2:1-11.
1Taim de Pentikos i kamap pinis ol i stap wantaim long wanpela haus. 2Na wantu tasol wanpela nois olsem krai bilong strongpela win i kamap na i pulapim tru haus ol i sindaun long em. 3Na ol i lukim samting olsem paia, na dispela paia samting em i bruk na ol liklik hap paia samting i go sindaun antap long olgeta manmeri wan wan. 4Na Holi Spirit i pulapim ol dispela manmeri na ol i stat long mekim toktok long ol narapela narapela tok ples inap long Spirit inapim ol.
5Na long dispela taim ol sampela manmeri Juda, ol i bilong olgeta kantri nabaut long dispela graun na ol i trupela manmeri bilong lotuim God, ol i bin kam i stap long Jerusalem. 6Na taim ol i harim nois ol i kam bung na ol i paul, long wanem, ol i harim ol manmeri i mekim toktok long ol wan wan tok ples bilong ol. 7-8Na olgeta i kirap nogut na ol i tok, “Ol dispela manmeri ol i bilong distrik Galili tasol, na olsem wanem taim ol i toktok mipela i save harim ol wan wan tok ples bilong mipela yet? 9Mipela bilong Partia na Midia na Elam, na Mesopotemia na Judia na Kapadosia na Pontus na Esia 10 na Frigia na Pamfilia na Isip na ol hap bilong Libia klostu long Sairini, na bilong Rom. 11Sampela bilong mipela i bilong Juda na sampela bilong mipela i narapela lain na i bihainim lotu bilong Juda. Na sampela bilong mipela i bilong Krit na Arebia. Tasol mipela i harim ol i autim tok long olgeta tokples bilong mipela yet, na ol i tok long ol gutpela wok God i mekim.”
Yu save? Ol aposel wantaim ol bilip manmeri ol i spikim tokples bilong ol wanwan lain manmeri bilong dispela graun. Ol i kam pulap long Jerusalem taun na ol i harim na ol i saprais long harim tok bilong God long tokples bilong ol yet. Ol dispela manmeri ol i harim gut bikos ol aposel ol i spikim tokples bilong ol manmeri yet.
Yumi no ken i paul taim ol sampela manmeri i tok olsem, “Mipela ken i spikim tokples bilong God.” Nogat. Yumi mas tingting klia na yumi ken i save olsem, i no gat as bilong dispela toktok bilong ol.
Na yumi no ken i paul long tok “Haleluya” na tok “Hosana” na ol kainkain tok olsem. Ol dispela kain tok em i no tokples bilong God. Nogat. Tok Haleluya em i tokples Hebru (bilong ol Juda), na tok Hosana em i tokples Grik.
Taim yumi prea yumi no ken i yusim tokples yumi no save long em. Nogat. Yumi yusim tokples bilong yumi yet, na God i ken i harim tok bilong yumi. Taim yumi prea yumi toktok long God, na yumi mas save long wanem toktok yumi mekim long God. Yumi no ken i toktok nating long wanpela tokples na yumi no save long wanem toktok yumi mekim. Nogat. Taim yumi toktok long God, orait yumi tok klia long tokples bilong yumi yet na God bai harim.
Na taim ol sampela man i askim yu long prea long lotu, orait yu no ken i yusim toktok mipela no save long em. Nogat. Yu mas yusim toktok mipela olgeta i ken i harim na wanbel long em. Olsem na taim yu prea, orait yu yusim tokples bilong yu yet na bilong ol manmeri na yu prea. God i ken i save long tokples bilong yumi.
Jisas i tok wanem long ol samting bilong prea?
Lukim Matyu 6:5-13.
5“Na taim yupela laik mekim prea yupela no ken bihainim pasin bilong ol man bilong giaman, nogat. Ol i laikim tru ol pasin we ol i save sanap insait long haus lotu na long ples na mekim prea inap ol man bai givim biknem long ol. Tru tumas ol dispela kain lain ol i kisim pinis ol gutpela samting bilong ol, na ol i no inap kisim wanpela gutpela samting moa. 6Tasol, taim yu laik mekim prea, orait yu go insait long haus bilong yu na pasim dua na mekim prea long Papa bilong yu i stap long ples hait. Yu mekim olsem, orait Papa bilong yu Em i save lukim ol samting i hait, na Em bai givim gutpela gutpela samting long yu. 7Na taim yu prea yu no ken mekim planti toktok nating kain olsem ol lain we ol i no save long God, nogat. Ol dispela lain ol i save tingim olsem, ‘Sapos mipela no mekim planti toktok, orait prea bilong mipela bai go nating.’ 8Harim, taim yu no askim yet, Papa bilong yu Em i save pinis long wanem samting yu sot. Na long dispela as yu no ken bihainim tingting na pasin bilong ol dispela kain lain.
9“Orait, yupela mas mekim prea kain olsem dispela prea nau Mi tokim yupela.
” ‘Papa bilong mipela, Yu stap long heven,
mekim nem bilong Yu i stap holi tru,
10na mekim kingdom bilong Yu i kamap,
na mekim laik bilong Yu i kamap strong long
dispela graun kain olsem em i strong long heven.
11Helpim mipela long kaikai inap long dispela de.
12Fogivim sin bilong mipela,
olsem na, nau mipela fogivim sin bilong narapela.
13Pulim mipela i kam insait tru long ol stretpela tingting na stretpela pasin,
na helpim mipela na winim dispela man nogut.’
Jisas Em i tokim ol disaipel bilong Em long hau ol i ken i prea. Pastaim i gat 2-pela samting Jisas i laik ol disaipel bilong Em i mas save long em, na bihain long dispela toktok Jisas i givim wanpela eksempel long ol long hau ol i ken i mekim prea.
Jisas i tokim ol disaipel long 2-pela samting pastaim…..
1. Ol i no ken i mekim prea olsem ol sampela lotu manmeri i save mekim.
2. Ol i no ken i mekim prea olsem ol manmeri i no save long God i save mekim.
Na bihain long dispela 2-pela toktok…..
3. Jisas i givim wanpela eksempel long ol long hau ol ken i mekim prea.
1. Ol i no ken i mekim prea olsem ol sampela lotu manmeri i save mekim.
5“Na taim yupela laik mekim prea yupela no ken bihainim pasin bilong ol man bilong giaman, nogat. Ol i laikim tru ol pasin we ol i save sanap insait long haus lotu na long ples na mekim prea inap ol man bai givim biknem long ol.
Ol sampela manmeri i go long lotu ol i laik sanap long ai bilong ol manmeri na mekim prea. Long wanem, ol i laik ol manmeri i lukim ol na ol i ken i givim biknem long ol. Ol i laik ol manmeri i ken i mekim sampela kain tok olsem, “Aiyo, ol i strongpela lotu lain stret.”
Ol i no tingting long mekim toktok long God, nogat. Ol i tingting tasol long kisim biknem long ai bilong ol manmeri. Ol i so-ov tasol long ai bilong ol manmeri bilong kisim biknem. Olsem na long dispela as Jisas i tok long lain 5 olsem…..
“Tru tumas ol dispela kain lain ol i kisim pinis ol gutpela samting bilong ol, na ol i no inap kisim wanpela gutpela samting moa.”
Ol i laik kisim biknem tasol na taim ol manmeri i givim biknem long ol, em nau ol i kisim pinis ol samting bilong ol na ol i no inap kisim wanpela samting moa – ol i no inap kisim wanpela samting long han bilong God. Nogat tru.
Ol disaipel bilong Jisas, ol manmeri i pas tru long Jisas, ol i no ken i bihainim dispela kain pasin, nogat. Jisas i stiaim ol i go long narapela rot bilong mekim prea. Em i tok….
6Tasol, taim yu laik mekim prea, orait yu go insait long haus bilong yu na pasim dua na mekim prea long Papa bilong yu i stap long ples hait. Yu mekim olsem, orait Papa bilong yu Em i save lukim ol samting i hait, na Em bai givim gutpela gutpela samting long yu.
Taim yumi laik mekim prea, orait yumi hait i stap insait long haus bilong yumi o long sampela ples hait we ol manmeri i no inap harim yumi na yumi prea long God. Long dispela wei yumi no ken i tingting long so-ov long ai bilong ol manmeri na bai yumi toktok stret long God.
Na wankain olsem taim mipela askim yu long mekim prea insait long lotu bilong yumi. Yu mas mekim prea long God olsem yu hait i stap long haus bilong yu yet na wanpela manmeri i no inap harim yu. Yu mas pasim ai na tingting tasol yu i stap wanpela tasol. Long dispela wei yu no ken i tingting long so-ov long ai bilong ol manmeri na bai yu toktok stret long God.
Na tu, yumi mas toktok long God olsem yumi save toktok long papa bilong yumi bilong dispela graun. Yu save, taim yumi toktok long papa bilong yumi, yumi save toktok gut wantaim em na yumi no save mekim ol so-ov pasin. Na wankain olsem taim yumi prea yumi mas toktok gut long “Papa bilong yu i stap long ples hait” na yumi no ken i so-ov.
Yumi lain bilong Jisas yumi mas toktok long God olsem yumi toktok long papa bilong yumi bilong dispela graun. Toktok tasol long Em. Kolim Em Papa. Em i ken i harim yu na ensaim prea bilong yu.
2. Ol i no ken i mekim prea olsem ol manmeri i no save long God i mekim.
7Na taim yu prea yu no ken mekim planti toktok nating kain olsem ol lain we ol i no save long God, nogat. Ol dispela lain ol i save tingim olsem, ‘Sapos mipela no mekim planti toktok, orait prea bilong mipela bai go nating.’
Manmeri i no save tru long God ol bai mekim planti toktok nating taim ol i mekim prea. Ol bai mekim planti toktok i no gat as na minim bilong em i stap. Ol bai mekim toktok we ol narapela manmeri i no inap klia long wanem toktok ol i mekim. Na ol bai mekim dispela toktok i go i go i go.
Ating ol i tingim olsem ol i mas mekim olsem bai God i ken i harim ol na amamas long ol na bekim prea bilong ol. Ol i tingim olsem God i ken i laikim dispela kain prea. Tasol nogat. God i no laikim.
Ol i no save long God. Ol i no save long wei bilong God na ol i mekim dispela kain pasin. Sapos ol i klia long God, orait ol i ken i save God i no laikim dispela kain prea na ol bai mekim nomal toktok tasol taim ol i prea long God.
Ol lain manmeri bilong Jisas ol i no ken i mekim prea olsem ol dispela kain lain, nogat. Ol i mas mekim gutpela toktok long God – tokim Em stret long wanem toktok yu laik mekim – na God bai harim yu. Yu no ken yusim planti toktok nating. Long wanem, God i save pinis wanem samting yu nidim na Em i sanbai tasol long ensaim prea bilong yu.
Taim yu laik kisim marasin long haus sik, orait yu no save mekim planti toktok nating bilong kisim, nogat. Yu no save bilasim toktok bilong yu na tromoi han lek bilong yu na mekim ol kainkain samting olsem, nogat. Taim yu laik kisim marasin, orait yu save toktok nomal na ol haus sik manmeri ol i ken i harim na skelim toktok bilong yu na tilim marasin long yu.
Na wankain olsem, taim yu laik toktok long God, orait yu toktok nomal long Em na askim Em long wanem helpim yu nidim. Em i ken i harim yu. Yu no ken i mekim planti toktok nating na bilasim toktok bilong yu.
3. Jisas i givim wanpela eksempel long ol long hau ol ken i mekim prea.
Orait 2-pela toktok yumi skelim pinis. Nau yumi skelim liklik wanpela eksempel prea Jisas i givim yumi, bai yumi ken i klia long wanem prea em i gutpela prea.
Lukim lain 9-13.
- Taim yu prea orait yu toktok tasol long God i stap long heven.
- Ol lain bilong God ol i save long God na ol i save long wok bilong God na ol i laik wok bilong God i stap strong long hia long dispela graun. Olsem na taim yu laik prea, orait yu prea long dispela samting.
Ol manmeri bilong God ol i klia olsem, God i stretim ol na kisim bek ol long baim bek wok bilong Jisas long diwai kros. Na ol i save olsem Holi Spirit i save opim ai na ia na bel bilong ol na i givim trupela bilip long ol na long dispela as ol i tanim bel na bilipim na trastim wok God i bin mekim bilong kisim bek ol.
Em olsem na ol lain bilong God ol i amamas tru long ol dispela wok bilong God na ol bai prea long God i ken i strongim dispela wok bilong Em long dispela graun na long dispela wei God bai kisim biknem hia long dispela graun olsem Em i gat biknem long heven.
Wok bilong God Em i nambawan olgeta. Tasol dispela i no minim olsem God i no kea long ol samting bilong yumi long hia long dispela graun. Nogat. Em i kea long yumi na Em i tingim yumi. Em olsem na…
- Yu ken i askim God long lukautim yu long kaikai.
- Yu ken i askim God long lukautim yu taim yu mekim sin – tokim Em long sin bilong yu na askim Em long fogivim yu bikos Jisas i bin i dai bai God i ken i fogivim yu (Lukim Efesus 1:7-8).
- Askim God long givim tingting long yu long fogivim ol sampela manmeri i mekim rong long yu.
Nogut yu askim God long fogivim yu long rong yu mekim long Em, tasol yu no inap fogivim ol manmeri i mekim rong long yu. Nogut yu giaman.
- God i laik ol lain bilong Em i mas bihainim pasin i holi. Olsem na askim God long strongim yu na helpim yu mekim pasin i holi tasol. God i sanbai long helpim ol lain bilong Em i laik bihainim ol pasin i holi na stret.
- Na askim Em long lukautim yu taim ol nogut samting i laik bagarapim yu.
Em tasol.
