Yumi mekim wanem
Mak 11:12-21.
Yumi save pinis, sapos yumi givim baksait long tok bilong Jisas, orait yumi givim baksait long Jisas yet. Tok bilong Jisas na Jisas yet tupela i wanpela samting na i pas olgeta. Sapos yu givim baksait long toktok bilong Jisas, orait yu no ken i tok olsem, “Mi pas long Jisas.” Nogat. Sapos yu givim baksait long toktok bilong Jisas, orait yu givim baksait long Jisas na yu givim baksait long baim bek wok bilong Jisas wantaim.
Na planti manmeri tumas i wokim mistek olsem, ol i amamas long Jisas i mekim wok bai God i kisim bek ol, tasol ol i les long i stap aninit long Jisas na bihainim Em. Ol i tingim olsem, “Mipela bilip manmeri na mipela Kristen,” tasol ol i no aninit long Jisas na ol i no bihainim Jisas, olsem na, ol i no bilip manmeri tru na ol i no Kristen tru. Ol i lus manmeri na ol i kalabus yet long pe bilong sin.
Manmeri i bilipim na trastim feitful wok bilong Jisas na i pas long Jisas na bihainim Em, orait ol i save tok nogat long ol laik bilong ol yet (ol i daunim laik bilong ol yet), na ol i karim ol hevi i kamap long ol na bihainim Jisas i go yet (ol i kisim diwai kros bilong ol), na ol i wok long wokabaut long pasin Jisas i wokabaut long em (ol i bihainim Jisas).
Long dispela stadi (namba 12) yumi bai skelim pasin bilong givim baksait long Jisas na Jisas i tok wanem long manmeri i givim baksait long Em na i givim baksait long tok bilong Em.
Orait, yumi lukim na skelim Mak 11:12-21.
Wanpela diwai fik.
Haus slip bilong Jisas wantaim ol disaipel i stap long wanpela liklik ples, nem bilong em Betani. Na Betani i stap autsait long taun Jerusalem. Orait, long moning, Jisas wantaim ol disaipel i wokabaut i go bek long Jerusalem taun. Na long rot ol i lukim wanpela diwai fik. Fik em i wanpela kaikai bilong ol na i swit moa. Jisas i lukim diwai fik na Em i laik kaikai, tasol diwai i no karim frut. Na Jisas i mekim tok long diwai fik olsem, “Ol man i no inap kaikai gen long prut bilong yu.” Em olsem na bihain diwai i drai.
Lukim lain 20-21. Long neks de ol i wokabaut gen long rot na ol i lukim diwai fik, na diwai fik i drai pinis. Diwai fik i no drai liklik. Nogat. Olgeta lip na rop wantaim i drai olgeta. Diwai i bagarap olgeta.
Toktok i stap long namel.
Long namel long dispela stori bilong diwai fik Jisas Em i go long tempel i stap long Jerusalem taun. Na sapos yumi laik save gut long stori bilong diwai fik, orait yumi mas skelim samting i kamap long namel long stori bilong diwai fik. Samting i kamap namel long stori bai stiaim tingting bilong yumi na helpim yumi klia long as na minim bilong stori bilong diwai fik i drai.
Na taim Jisas i go kamap long tempel, orait Em i lukim wanem samting? Jisas i lukim pasin nogut i kamap insait long tempel. Em olsem na Jisas i kisim maus bilong profet Aisaia wantaim Jeremaia na Em i skulim ol na Em i tok, “Haus bilong Mi bai i stap haus we olgeta manmeri bilong olgeta kantri i ken i kam na prea, tasol yupela i mekim em i kamap ‘ples bung bilong ol stilman.’”
Tempel i stap long Jerusalem em i wanpela bikpela haus God yet i tokim King Solomon long wokim bilong soim olsem, God i stap wantaim ol. Em olsem na Jisas i kolim tempel, “Haus bilong God.” Lukim lain 17. Tempel em i haus we ol Juda wantaim olgeta manmeri bilong olgeta hap i ken i kam na prea long God na harim Tok bilong God na ol i ken i holim tingting long God Em i trupela God i stap wantaim ol.
Tasol Jisas i no lukim ol Juda i stap na tingim God. Nogat. Ol i tingim mani tasol. Ol i maketim ol samting insait long tempel bilong pulim na stilim mani bilong manmeri i kam long tempel. Em olsem na Jisas i tok, “Yupela i mekim tempel i kamap ‘ples bung bilong ol stilman.”
Tingim. Jisas i yusim diwai fik olsem wanpela tok piksa long ol lotu Juda. Wankain olsem diwai fik i no karim kaikai, orait ol lotu Juda ol i no karim kaikai. Na wankain olsem diwai fik i gat ol naispela lip i stap long em na i stap smat, orait ol lotu Juda i gat ol planti lotu samting bilong ol i stap na ol i stap smat long ai bilong ol yet. Tasol, wankain olsem diwai fik i no karim kaikai, orait ol lotu Juda ol i no karim kaikai. Ol i stap na tempel i stap, tasol ol i no karim kaikai long laip bilong ol. Ol i no bihainim God olsem God i tok. Ol i no stap aninit long God. Ol i lotu, tasol ol i no bihainim God.
Na skelim pasin bilong ol lida bilong lotu Juda taim Jisas i rausim ol giaman maket samting bilong ol. Ol i no tok, “Jisas, yu tok stret. Mipela wokim rong. Mipela sori.” Nogat. Ol i bel hat long Jisas na ol i les long tok bilong Jisas, na ol i wok long painim rot bilong kilim Jisas i dai. Hamas mirakel Jisas i wokim bilong soim ol olsem, Jisas Em i God na Jisas Em i Pikinini bilong Man, tasol ol i givim baksait long Jisas na ol i les long toktok bilong Jisas.
Ol lotu Juda ol i laik God i kisim bek ol. Tasol, ol i les long rot bilong God i kisim bek ol. Ol i les long Jisas na ol i les long tok bilong Jisas. Ol i laik rausim Jisas na rausim tok bilong Jisas long laip bilong ol. Olsem na ol i wok long painim rot bilong kilim Jisas i dai. (Lukim Mak 3:6 tu.)
Long baptais bilong Jisas, Papa God i bin tokaut klia olsem, “Yu Pikinini Man bilong Mi na Mi lavim Yu na Mi amamas tru long Yu.” (Mak 1:11.) Tasol ol i les long tok bilong God, na ol i no laik putim ol yet aninit long Jisas na aninit long tok bilong Jisas. Nogat. Ol i laik kilim Em i dai tasol.
Yumi mas klia olsem, ol Juda ol i laik God i kisim bek ol, na ol i laik God i stap wantaim ol, na ol i laik ol samting bilong tempel i stap, tasol ol i no laik bihainim Jisas na ol i no laik bilipim na trastim tok bilong Jisas.
Long stori bilong diwai fik na Jisas i stretim tempel, orait Jisas i putim ples klia olsem, Em i lukim ol Juda na Em i klia long pasin bilong ol na Em bai kotim ol. Ol Juda ol i olsem diwai fik i no karim kaikai, na Jisas bai bagarapim ol, na ol i no gat sanis moa bilong karim kaikai bilong trupela bilip.
Jisas Em i Jas.
As bilong tok bilong Jisas long Mak 11:12-21 i olsem, Jisas Em i Bikpela Jas. Ol manmeri i no laik lusim rot bilong ol yet na bihainim Jisas na bihainim tok bilong Jisas, orait ol bai bagarap olsem diwai fik.
Holim tingting long tok bilong Jisas long Mak 8:38. Dispela tok bilong Jisas em i wankain long tok bilong Jisas long stori bilong diwai fik na Jisas i stretim tempel. Samting Jisas i mekim long diwai fik em i tok piksa long samting i ken i kamap long manmeri i givim baksait long Jisas na i givim baksait long tok bilong Jisas.
Em olsem na, nau yumi save long 2-pela trupela samting long Jisas:
- Em i Man Bilong Baim Bek bilong ol manmeri i bihainim Em, na Em bai sevim laip bilong ol.
- Em i Jas bilong ol manmeri i no bihainim Em, na Em bai distroim ol.
Jisas i lusim laip bilong Em long diwai kros bilong baim bek laip bilong ol planti manmeri, em ol manmeri i bilipim na trastim baim bek wok bilong Em na i lusim rot bilong ol yet na i bihainim Jisas. Olsem na, em ol i manmeri i daunim laik bilong ol yet, na i kisim diwai kros bilong ol, na i bihainim Jisas.
Na ol manmeri i no karim kaikai bilong trupela bilip, em ol manmeri i laik God i kisim bek ol, tasol ol i no laik Jisas i bosim wokabaut na sindaun bilong ol na ol i no lavim Jisas na bihainim Em, ol dispela manmeri bai sanap long kot bilong Jisas na Em bai mekim save long ol. Ol i bikhet na planti bilong ol i tingim olsem ol i bikpela manmeri long kingdom bilong God, tasol ol bai kisim bagarap long han bilong Jisas, Jas bilong ol.
Diwai fik em i tok piksa bilong ol lotu manmeri i no karim kaikai bilong trupela bilip. Ol i no lusim rot bilong ol yet na ol i no bihainim Jisas trutru. Ol i bihainim yet ol kainkain rot na bihainim yet ol toktok bilong ol tumbuna bilong ol. Ol i no lavim ol manmeri i bilipim na trastim na bihainim Jisas. Nogat. Ol i pait pait i go yet, na ol i les na pilai kas na westim mani bilong femili bilong ol i go yet, na ol i save bagarapim ol samting bilong sios bilong God long tok pait bilong ol na kros bilong ol, na ol i mekim ol kainkain pasin olsem. Ol i laik i stap bikman long sios na lida bilong sios, tasol ol i les long harim na bihainim tok bilong Jisas. Diwai fik em i tok piksa bilong ol dispela kain manmeri.
Harim. Long sios i gat planti manmeri i stap olsem diwai fik. Ol i stap bikpela diwai na i gat planti lip i stap long em, tasol ol i no karim kaikai. Ol i strongpela lotu manmeri, tasol ol i no karim trupela kaikai bilong bilip – ol i no lusim rot bilong ol yet na ol i les long Jisas i bosim laip bilong ol na ol i no bilipim na trastim feitful baim bek wok bilong Em na ol i no bihainim Em. Em olsem na klostu Jisas bai mekim save long ol olsem Jisas i mekim save long diwai fik.
Dispela tok em i wanpela bikpela tok stret, tasol i no gat narapela rot.
Yumi i bilipim na trastim na bihainim Jisas, yumi no ken i pret.
Dispela tok bilong diwai fik em i no stap bilong pretim yumi i bilipim na trastim feitful baim bek wok bilong Jisas. Dispela tok i no stap bilong pretim yumi i bihainim tok bilong Jisas long wokabaut na sindaun bilong yumi. Dispela tok i no stap bilong pretim yumi i stap aninit long bosim na namba bilong Jisas. Nogat.
Na i tru, yumi save feil feil long wokabaut na sindaun bilong yumi. Yumi sin manmeri na yumi save feil. Harim. Dispela tok bilong diwai fik em i no stap bilong pretim yumi i bihainim Jisas na i feil feil. Nogat. Long bel bilong yumi na long tingting bilong yumi, yumi laik bihainim Jisas long wokabaut na sindaun bilong yumi. Dispela tok bilong diwai fik i stap bilong pretim ol manmeri i no laik bihainim Jisas na i no laik Jisas i bosim wokabaut na sindaun bilong ol. (Yu ken i lukim Rom 7:7-25.)
Yumi i no bilipim na trastim na bihainim Jisas, yumi mas pret.
Dispela tok bilong diwai fik i stap bilong pretim ol manmeri i lotu tasol na ol i no karim trupela kaikai bilong bilip. Dispela tok i stap bilong pretim ol manmeri i laik God i kisim bek ol, tasol ol i les long rot bilong God long feitful baim bek wok bilong Jisas. Dispela tok i stap bilong pretim ol manmeri i les long harim na bihainim tok bilong Jisas long wokabaut na sindaun bilong ol.
Sapos yu stap olsem, orait yu mas harim dispela toktok na yu mas pret. Sapos yu no senis na yu stap yet olsem, orait yu mas save olsem, Jisas Em i Jas bilong yu na Em bai mekim wankain samting long yu olsem Em i bin mekim long diwai fik. Olsem na, Em bai mekim save long yu na bai yu bagarap.
Taim Jisas i kam o taim yumi i dai na lusim dispela graun, orait sampela bilong yumi bai lukim Jisas, Man bilong baim bek yumi, na yumi lukim laip wantaim Jisas long heven.
Na sampela bilong yumi bai lukim Jisas, Jas bilong ol, na ol bai bagarap long kalabus hel.
Yu mas wokim disisen bilong yu hariap.
Plis harim. Yu no ken i tok, “Bihain bai mi skelim ol samting bilong Jisas na bihainim Em.” Nogat. Nogut yu tuleit na yu lukim Jisas, Jas bilong yu, na yu lus long kalabus hel. Mobeta yu hariap na yu lusim rot bilong yu yet, na yu bilipim na trastim God long kisim bek yu long feitful baim bek wok bilong Jisas, na yu bihainim Jisas na yu stap aninit long bosim na namba bilong Jisas tasol.
Plis harim. Yu no ken i stap nating. Wanpela rot em i rot bilong laip wantaim Jisas long heven. Na narapela rot em i rot bilong i dai na lus long kalabus hel. Nau yu mas wokim disisen bilong yu long wanem rot yu bai bihainim.
Em tasol.
