Moning.
Ating mi tok tru olsem, long Papua Niu Gini, na long planti hap long dispela graun, i gat planti manmeri i tok planti olsem, “Mi pas olgeta long Tok bilong God.” Ol i mekim kain tok olsem, tasol tru tumas, long wokabaut na sindaun bilong ol, ol i soim olsem, ol i no pas trutru. Long wanem, ol i wanbel long mekim pasin i no pas long toktok God i mekim long Baibel.
Long Taitus 1:5-9 aposel Pol i stori long dispela kain pasin. Em i stori olsem, man i stap na pasin bilong em i pas olgeta long tok bilong em, orait Taitus i ken i makim dispela kain man na em i ken i mekim wok bilong lukautim sios femili bilong God. Na man i stap na pasin bilong em i no pas long tok bilong em, orait dispela kain man i no fit man bilong lukautim sios femili bilong God. Lukim Taitus 1:5-9….
5Long dispela as mi bin lusim yu long ailan Krit, bai yu ken i pinisim wok mi bin lusim, na bai yu makim ol elda bilong sios long olgeta taun olsem mi bin tokim yu long mekim. 6Man i ken i kamap elda em mas i stap gutpela man na i no gat wanpela rong i stap we ol manmeri i tok baksait long em, na em i man bilong wanpela meri tasol, na ol pikinini bilong em ol i feitful na i stap gutpela na ol manmeri nabaut ol i no sutim tok olsem, “Ol i pilai nabaut wantaim ol man na meri, na ol i no save harim tok bilong papamama.” 7Lida bilong sios em i wokman bilong lukautim sios bilong God, na long dispela as em mas i stap gutpela man na i no gat wanpela rong i stap we ol manmeri i tok baksait long em. Na em i no man bilong apim em yet, na em i no man bilong bel hat hariap, na em i no pas long ol strongpela dring bilong spak, na em i no man bilong bel hat hariap na solapim narapela manmeri, na em i no man i hangre long kisim planti samting. 8Na em i man i amamas long mekim gutpela long ol manmeri i no wantok bilong em, na em i lavim ol stretpela samting, na em i stiaim gut tingting na pasin bilong em yet, na em i stap stret long olgeta samting, na em i mekim pasin i holi long laip bilong em, na em i strongpela man bilong mekim wok. 9Em i mas holim strong trupela tok em i bin kisim, na bai em i ken i skulim ol manmeri long trupela tok, na bai em i ken i krosim ol manmeri i egensim trupela tok.
Aposel Pol i bin lusim Taitus long ailan Krit, bai Taitus i pinisim wok Pol i bin mekim. Pol i bin autim gutnius bilong God i kisim bek sinmanmeri long feitful wok bilong Jisas long diwai kros, na Holi Spirit i bin opim ai ia bel bilong ol planti manmeri na ol i tanim bel na ol i bilipim na trastim feitful wok bilong Jisas na ol i bihainim Em. Long dispela rot ol wanwan sios femili i kamap long ailan Krit. Na Pol i laik Taitus i stap na mekim wok bilong makim ol wanwan man bilong lukautim ol dispela sios femili bilong God.
Orait na wanem kain man i ken i stap na mekim wok bilong lukautim sios femili bilong God? Pol i tokaut long 3-pela samting i makim pasin bilong man i ken i kamap wokman bilong God.
1. Wokman bilong God ol i mas pas olgeta long Tok bilong God na ol i soim dispela long laip bilong ol.
Lukim fes toktok bilong lain 6 wantaim lain 7-8. Pol i makim 12-pela samting i makim man i ken i mekim wok bilong lukautim sios femili bilong God. Dispela 12-pela samting i makim wokabaut na sindaun bilong em. Yumi ken i lukim dispela 12-pela samting long wokabaut na sindaun bilong ol.
Yumi stori pinis long ol man i tok olsem, “Mi pas olgeta long Tok bilong God,” tasol ol i no tingting long bihainim Tok bilong God long wokabaut na sindaun bilong ol. Man bilong mekim wok bilong lukautim sios femili bilong God em i no ken i stap kain man olsem! Man i mekim wanpela kain toktok na i mekim narapela kain pasin, orait dispela man em i man bilong giaman na yumi no ken i trastim em. Man bilong giaman em i no ken i stap wokman bilong God bilong lukautim sios femili bilong God.
Man i laik kamap pasta, orait em i mas i stap man i pas trutru long olgeta Tok bilong God na ol i soim dispela long laip bilong ol – yumi mas lukim dispela long wokabaut na sindaun bilong ol.
2. Wokman bilong God ol i mas pas olgeta long Tok bilong God na ol i soim dispela long wok ol i mekim bilong lukautim femili bilong ol.
Ol sampela man ol i laik kamap pasta na elda na lida bilong sios. Ol i tok olsem, “Tok bilong God i bikpela samting na mi mas i stap bilong autim Tok bilong God i gutpela na bikpela tumas.”
Na sapos ol i no giaman, orait yumi ken i lukim ol i mekim ol gutpela pasin i pas long Tok bilong God insait long femili bilong ol yet longtaim pinis. Lukim lain 6. Sapos ol i pas trutru long olgeta Tok bilong God, orait ol bai pas olgeta long wei bilong God long marit bilong ol.
Em olsem na ol bai maritim wanpela meri tasol olsem God i tok, na ol bai skulim ol pikinini bilong ol olsem God i tok na ol pikinini i stap gutpela aninit long papamama na ol i no inap pilai pilai nabaut na kisim nem nogut i kam long femili. Sapos ol i pas trutru long olgeta Tok bilong God, orait ol bai stap gutpela lida bilong femili bilong ol na yumi lukim kaikai bilong Tok bilong God long laip bilong ol long femili.
Wokman bilong God mas i stap strongpela man bilong mekim wok (las toktok bilong lain 8). Em olsem na sapos em i no strongpela man bilong mekim wok insait long femili bilong em yet na i stap gutpela lida na pasta bilong femili bilong em yet, orait yumi ken i save olsem, em i no inap i stap strongpela man bilong mekim wok insait long femili bilong God na em i no inap i stap gutpela lida na pasta bilong femili bilong God.
3. Wokman bilong God ol i mas pas olgeta long Tok bilong God na ol i soim dispela na difenim trupela tisim na egensim giaman tisim.
Lukim lain 9. Wanpela bikpela wok bilong lida bilong sios i olsem, em yet bai holim trupela tok, na em bai skulim ol manmeri bilong God long trupela tok, na em bai egensim ol manmeri i kisim ol giaman tok i kam. Long dispela rot ol manmeri bilong God bai i stap seif long trupela tok bilong feitful wok bilong Jisas.
Planti taim tumas mi lukim ol sampela man na ol i no pas trutru long olgeta trupela Tok bilong God. Nogat. Ol i go kam long wanem misin i save givim planti kago samting long ol na i baim ol gut na i givim biknem long ol. Ol i no skelim tok misin i autim. Nogat. Ol i skelim ol kago samting ol i ken i kisim na ol i strongim na bihainim dispela misin tasol.
Ol i no kea long wanem tok i tru na wanem tok i giaman. Nogat. Ol i no tingting long autim na difenim tok i tru tumas. Nogat. Ol i no tingting long lukautim ol manmeri bilong God bai ol i stap seif long trupela tok bilong feitful wok bilong Jisas. Nogat. Ol i tingting tasol long ol samting ol yet i ken i kisim long han bilong misin na long han bilong ol waitman bilong misin.
Yumi mas glasim dispela kain man, na yumi no ken i makim em long kamap wokman bilong sios femili bilong God. Sios i mas makim man i save long trupela tok, na i bihainim trupela tok long laip bilong em, na i autim trupela tok, na i difenim trupela tok. Lida bilong sios em i man i pas olgeta long trupela tok bilong feitful wok bilong Jisas.
Glenn.
