Moning.
Ating yumi no tingting tumas long laip bilong yumi. Yumi save marit na karim pikinini na pilai spot na harim musik na wokim gaden na raun long taun na mekim fani – yumi mekim ol kainkain samting olsem long laip bilong yumi – tasol yumi no skelim na tingim olsem, “Mi westim laip bilong mi o nogat?”
Yumi we Holi Spirit i bin kamapim laip pinis long yumi na yumi bilipim na trastim God long kisim bek yumi long feitful wok bilong Jisas na yumi bilipim na trastim na bihainim Jisas, orait aposel Pol i gat sampela toktok long yumi long pasin bilong westim laip bilong yumi. Lukim Efesus 5:8-14.
8Bipo yupela i stap manmeri bilong tudak, tasol nau yupela i stap manmeri bilong lait bilong BIKPELA. Wokabaut olsem yupela i pikinini bilong lait. 9Olgeta samting i gutpela tumas na stretpela tumas na i tru tumas em i prut bilong lait. 10Yupela mas wok long painimaut wanem pasin BIKPELA i save laikim.
11Yupela no ken i stap klostu long ol pasin bilong tudak. Ol dispela pasin i no save karim gutpela kaikai. Olsem na, mobeta yupela wok long soim ol manmeri dispela kain pasin em i pasin nogut. 12Pasin ol manmeri nogut i save mekim long ples hait em i samting bilong sem tasol na em i no gutpela long yumi toktok long pasin ol i mekim. 13Tasol ol samting i kamap long lait bai i kamap ples klia olgeta. 14Long wanem, lait i save mekim olgeta samting i stap ples klia. Long dispela as wanpela tok i stap olsem,
“Yu man i slip tumas, yu wekap,
kirap long dai bilong yu,
na Krais bai i givim lait long yu.”
Aposel Pol i mekim 2-pela toktok long yumi.
1. Yumi no manmeri bilong tudak, nogat, nau yumi manmeri bilong lait.
Bipo, yumi i stap olgeta long pasin tudak. Bipo, taim Holi Spirit i no kam yet long laip bilong yumi na Em i no opim ai na ia na bel bilong yumi na Em i no givim bilip long yumi, long dispela taim yumi stap long pasin tudak. Long dispela taim olgeta pasin yumi mekim em i tudak pasin bikos yumi wok long givim baksait long God – yumi no save long lait na yumi no kam yet long lait.
Long dispela taim yumi no save long wok bilong God. Yumi no save Jisas i bin mekim wok bilong rausim asua bilong yumi na mekim yumi i stap stret na holi long ai bilong God. Yumi no save God i bin salim Jisas i kam bilong mekim dispela wok bilong kisim bek yumi na bilong adoptim yumi na bilong mekim yumi pikinini long femili bilong Em. Yumi no save God i kisim bek yumi long ol dispela feitful wok bilong Jisas tasol.
Tasol, bihain, Holi Spirit i kam na Em i mekim wok insait long yumi, na Em i opim ai na ia na bel bilong yumi na Em i soim yumi ol dispela wok bilong God na Krais – Em i kliaim tingting bilong yumi na Em i givim save long yumi long olgeta wok bilong God na Krais.
Em olsem na Em i givim bilip long yumi, na long dispela as tasol yumi tanim bel na yumi bilipim na trastim olgeta wok Krais i bin mekim bilong mekim yumi klin long ai bilong God na God i kisim bek yumi. Taim Holi Spirit i mekim ol dispela wok insait long laip bilong yumi, em nau, Holi Spirit i bin kisim yumi i kam long lait.
Long wok bilong Holi Spirit God i kamautim yumi long tudak – Em i opim ai na ia na bel bilong yumi – Em i kamapim laip long yumi – na long dispela rot Em i putim yumi i kam long lait bilong Em. Pastaim yumi stap long tudak, tasol nau yumi manmeri bilong tulait.
Long dispela as yumi no ken i wokabaut long ol kainkain pasin nogut na yumi no ken i mekim ol kainkain toktok nogut. Ol dispela pasin em i mak bilong manmeri i stap yet long tudak. Nau yumi bilong BIKPELA – nau yumi bilong lait bilong BIKPELA. God i bin wasim yumi na mekim yumi klin, bai yumi wokabaut long klinpela pasin – Em i kisim yumi i kam long lait bai yumi wokabaut long lait.
2. Pasin bilong tulait i putim pasin bilong tudak long ples klia.
Rot bilong tudak em i no save kamapim wanpela gutpela samting. Olsem na, yumi no ken i wokabaut long tudak pasin wantaim ol manmeri bilong tudak. Nogat. Mobeta yumi helpim ol i save olsem tudak pasin em i nogut pasin (lain 11).
Tudak pasin em i samting bilong sem tasol. Na sapos yumi helpim manmeri save olsem, tudak pasin em i samting bilong sem, orait yumi ken i helpim ol i lusim tudak bilong ol na i kam insait long tulait wantaim yumi. Long dispela rot yumi bai helpim ol na yumi lavim ol.
Lait i save putim olgeta samting long ples klia. Taim yumi laitim lam, orait olgeta samting insait long haus bilong yumi i kamap ples klia na yumi ken i lukim. Na wankain olsem long pasin bilong lait bilong BIKPELA. Taim yumi mekim gutpela pasin na pasin i stretpela na holi, orait dispela pasin bilong yumi bai putim sem bilong tudak long ples klia. Ol manmeri i wokabaut long tudak pasin, taim ol i lukim pasin i stretpela na holi, orait ol bai save olsem pasin bilong ol i no gutpela pasin na i no kamapim wanpela gutpela samting na ol i ken i sem na ol i ken i tingting long kam insait long lait wantaim yumi.
Tasol, sapos yumi wokabaut long tudak pasin wantaim ol, orait dispela i no inap helpim yumi na i no inap helpim ol. Nogat. Dispela pasin bilong yumi bai kamapim ol samting nogut tasol – bai yumi bagarapim ol manmeri bilong tudak moa na bai yumi bagarapim yumi yet wantaim.
Yu save, pasin yumi mekim, pasin yumi wokabaut long em, i ken i karim gutpela kaikai o i ken i karim kaikai nogut. Sapos yu wokabaut long lait pasin, orait bai yu karim gutpela kaikai – na pasin yu mekim i ken i karim gutpela kaikai tu long laip bilong narapela manmeri.
Na dispela lait i ken i givim lait long komyuniti bilong yumi – komyuniti bilong yumi i wokabaut long tudak pasin na yumi ken i helpim ol save long pasin nogut bilong ol na soim rot bilong ol i ken i kam insait long lait wantaim yumi.
Yumi ken i helpim ol tudak manmeri i wekap long dai bilong ol na ol i kam long lait bilong BIKPELA (lain 14). Sapos yumi wokabaut long pasin bilong lait, bai yumi helpim planti manmeri. Tasol sapos yumi wokabaut long tudak pasin wantaim ol tudak manmeri, orait yumi no inap helpim wanpela manmeri na yumi westim laip bilong yumi.
Nogut yumi westim laip bilong yumi. Yumi no bilong tudak. Nogat. Yumi bilong lait bilong BIKPELA. Olsem na, yumi no ken i wokabaut long pasin bilong tudak. Nogat. Mobeta yumi wokabaut long pasin bilong lait na sampela manmeri i wokabaut long tudak ol i ken i lukim tulait pasin bilong yumi na ol i sem long tudak pasin bilong ol na ol i tanim bel na kam long lait wantaim yumi. Long dispela wei yumi no westim nating laip bilong yumi. Nogat. Laip bilong yumi i karim gutpela kaikai bilong lavim na dispela i gutpela samting stret.
Glenn.
