Efesus 2:1-3.
Long wanpela Fraide mi autim tok long maket na wanpela man em i no amamas long tok mi bin autim. Mi autim tok olsem, “Yumi yet yumi no fit long kamapim stretpela pasin God i save laikim. Em olsem na God i mas givim stretpela pasin long yumi, God i mas stretim yumi, na long dispela rot God i ken i kisim bek yumi.”
Mi eksplenim hau God i save kisim bek ol lain bilong Em. Mi eksplenim olsem, God i transferim sin bilong ol lain bilong Em i go long Jisas, na Jisas i kisim na pinisim pe bilong sin bilong ol long diwai kros. Na tu, God i transferim stretpela pasin bilong Jisas i kam long ol. Long dispela rot God i kolim ol “stretpela manmeri”. Em olsem na long dispela rot tasol, God i kisim bek sin manmeri.
Ol planti manmeri i autim tok olsem, “Yu yet yu mas kamapim stretpela pasin bilong yu yet, na sapos yu wokim na mekim ol gutpela na stretpela pasin, orait God i ken i amamas long dispela stretpela pasin bilong yu na kisim bek yu.” Ol i autim tok olsem na mi tok olsem, dispela tok i no tru na i pulim bilip bilong ol manmeri i go long samting i no tru, na long dispela pasin bilip bilong ol i popaia.
Na man i no amamas long mi long maket em i mekim tok olsem, “God i bin wokim yumi olsem Em yet na yumi stap olsem God, na long dispela as yumi ken i mekim pasin God i save laikim.” Em i tok olsem, “Yumi manmeri yumi spesol long ai bilong God na God i ken i amamas long pasin bilong yumi na kisim bek yumi long naispela pasin yumi yet i mekim.” Em i tok, “Sapos yumi lavim God na lavim ol manmeri, em nau, yumi mekim gutpela pasin God i save laikim na God i ken i kisim bek yumi long dispela naispela pasin yumi mekim.”
Na yumi save olsem, yes, God i wokim yumi olsem Em yet. Lukim Jenesis 1:26-27.
26Orait, nau God Em i tok, “Yumi wokim manmeri na ol bai i stap wankain olsem Yumi yet…..
27Olsem na God Em i wokim man na em i stap wankain olsem Em yet,
wankain olsem God yet Em i bin wokim em,
man na meri yet God Em i bin wokim ol.
God i wokim manmeri olsem Em yet, na long dispela as yumi ken i tingting na yumi ken i skelim ol sampela samting – olsem God i save tingting na God i save skelim ol sampela samting. Yumi ken i toktok wantaim ol narapela manmeri – olsem God i ken i toktok wantaim ol narapela. Yumi ken i amamas na yumi ken i pilim sori – olsem God i ken i amamas na God i ken i pilim sori. Long dispela wei yumi stap olsem God.
Em olsem na, yes, yumi spesol long ai bilong God. Yumi no olsem ol animal. Nogat. Yumi olsem God.
Tasol yumi no God. Long wanwan samting yumi stap olsem God, tasol long planti samting yumi no stap olsem God – yumi no save long olgeta samting, na yumi no stap long olgeta hap, na yumi no gat olgeta pawa na strong, na yumi no wokim na kamapim olgeta samting. Yu save, yumi olsem God long sampela samting, tasol long planti samting yumi no olsem God. Long wanem? Yumi no God, yumi man tasol.
Na narapela samting tu, yumi no holi na stretpela olsem God Em i holi na stretpela. Long wanem as yumi no holi na yumi no stretpela olsem God? Yumi no holi na yumi no stretpela bikos fes man Adam em i pundaunim yumi olgeta manmeri na yumi olgeta i stap insait long sin na dai. Lukim Rom 5:12.
12Wanpela man i bin mekim sin. Na long rot bilong dispela man sin i kam long olgeta manmeri. Na sin i bin kamapim dai. Na long dispela as dai em i kam long olgeta manmeri. Long wanem, olgeta manmeri i bin kamap sin manmeri.
Long Efesus 2:1-10 Pol i putim manmeri long ples klia olgeta. Em i tokaut stret long sindaun bilong manmeri. Na i luk olsem, ol manmeri ol i no stap gutpela tumas na ol i no stretpela tumas na ol i no holi tumas. Ol i no olsem God tumas.
Long 3-pela stadi bai yumi skelim dispela hap long Efesus 2:1-10. Orait, nau long dispela stadi yumi bai skelim lain 1-3. Mi gat 2-pela toktok na fes toktok i olsem….
1. Spirit bilong manmeri bilong dispela graun i no gat laip.
Yu save, long sapta 1 Pol i tokaut long olgeta samting God i bin mekim long ol manmeri bilong God i stap long taun Efesus. Em i tokaut long hau God i bin makim ol long bipo bipo, na hau God i bin pasim ol long Krais, na hau Krais i mekim wok long diwai kros bilong mekim ol holi na stretpela na i no gat asua moa long ai bilong God.
Long sapta 1 Pol i tokaut long hau God i bin adoptim ol dispela manmeri na Em i mekim ol i kamap femili bilong Em na ol dispela manmeri i stap nupela komyuniti bilong God – sios bilong God. Pol i tokaut long hau Holi Spirit i bin kam na Em i opim ai na ia na bel bilong ol, na long dispela rot ol dispela manmeri God i bin makim na pasim long Jisas ol i luksave long olgeta wok God i mekim long dai bilong Jisas na ol i tanim bel na ol i bilipim na trastim God long kisim bek ol long feitful baim bek wok bilong Jisas na ol i stap aninit tru long Em.
Long sapta 1 Pol i bin eksplenim ol dispela gutpela samting long ol, na long sapta 2 Pol i laik tokaut olsem, Yes, nau yupela i stap long ol dispela gutpela samting, long wanem, God i bin bringim yupela i kam long ol dispela gutpela samting. Tasol pastaim yupela no stap olsem. Nogat. Pastaim, bipo, yupela i stap long narapela samting olgeta na yupela pas long ol narapela samting tasol. Pol i tok olsem, Bipo, yupela i stap olsem olgeta manmeri bilong dispela graun na spirit bilong yupela i no gat laip. Lukim Efesus 2:1.
1Bipo, yupela i stap insait tru long ol kainkain rong na sin, na spirit bilong yupela i no gat laip.
Pol i mekim dispela toktok long ol manmeri bilong God i stap long taun Efesus. Ol i bilipim na trastim God long kisim bek ol long feitful baim bek wok bilong Jisas long diwai kros. Tasol pastaim ol i no stap olsem. Nogat. Pastaim, bipo, ol i stap insait tru long ol kainkain rong na sin, na spirit bilong ol i no gat laip.
Na dispela tok i makim yumi tu – yumi i bilipim na trastim God long kisim bek yumi long feitful baim bek wok bilong Jisas long diwai kros. Pastaim, bipo, yumi tu yumi i stap insait tru long ol kainkain rong na sin, na spirit bilong yumi i no gat laip.
Orait na taim Pol i tok, “Spirit bilong yupela i no gat laip,” em i tok long wanem samting? Em i tok olsem, tingting na bel bilong yumi i dai pinis long olgeta samting long sait bilong God. Tingting na bel bilong yumi i olsem spirit bilong yumi na i olsem laip bilong yumi. Olsem na, Pol i minim olsem, olgeta samting long laip bilong yumi – long tingting na long bel – i dai pinis long olgeta samting long sait bilong God.
Bel na tingting bilong yumi i pas long olgeta samting long sait bilong yumi yet. Tasol long olgeta samting long sait bilong God nogat – yumi no save mekim wanpela liklik samting long sait bilong God – yumi dai pinis long olgeta samting long sait bilong God – spirit bilong yumi i dai pinis long ol samting bilong God.
Bodi bilong yumi i save wok, na bel na tingting bilong yumi i save wok. Tasol, ol dispela samting i no wok long ol samting long sait bilong God. Nogat. Ol dispela samting i wok long ol samting long sait bilong yumi yet. Em olsem na Pol i tok, tingting na bel bilong yumi – spirit bilong yumi – i no gat laip. Spirit bilong yumi, bel na tingting bilong yumi, i dai pinis long olgeta samting long sait bilong God.
Lukim na skelim ol wanwan tok bilong Pol long dispela samting….
- Yumi stap insait tru long ol kainkain rong na sin. (Lukim Efesus 2:1.)
Yumi pas tru long ol kainkain rong na sin. Yumi no gat wanwan rong tasol i stap long laip bilong yumi. Yumi no save wokim ol wanwan mistek tasol. Nogat. Yumi stap insait tru long ol kainkain rong na sin.
Long Rom 3:9 Pol i tok olsem, “Sin i karamapim yumi.” Yumi stap insait tru long ol kainkain rong na sin – sin i karamapim yumi. Yumi no save mekim ol wanwan liklik sin long antap skin tasol. Nogat tru. Yumi insait tru long sin – sin i karamapim yumi – sin i winim yumi.
- Yumi bihainim olgeta pasin bilong dispela graun. (Lukim Efesus 2:2.)
Yumi pas pinis long olgeta pasin bilong dispela graun. Yumi pasim tingting na yumi bihainim ol pasin bilong dispela graun tasol. Ol samting bilong dispela graun i stap dip insait long bel na tingting bilong yumi. Olsem na, yumi bihainim tasol – yumi no tingting, nogat, yumi bihainim nating tasol.
Fes tingting i save kamap long tingting bilong yumi em i wei bilong dispela graun. Yumi no stop na tingting olsem, “Wei bilong God i wanem wei.” Nogat. Yumi hariap tasol na bihainim wei bilong dispela graun. Yumi hariap na bihainim wei bilong ples. Yumi hariap long bihainim wei bilong hauslain bilong yumi.
- Satan i giamanim yumi na yumi bihainim Satan tasol. (Lukim Efesus 2:2.)
Taim yumi mekim ol kainkain rong na sin, orait yumi tingim olsem yumi bihainim laik na save bilong yumi yet na yumi no save olsem yumi bihainim laik na save bilong Satan. Yumi bihainim laik bilong Satan tasol. Yumi bihainim wei bilong Satan tasol. Yumi bihainim pasin Satan i laikim tasol.
Satan i save trikim ol manmeri na ol manmeri ol i no tingim olsem ol i stap aninit long Satan. Nogat. Tasol, pasin ol i mekim i soim olsem, ol i stap aninit long Satan. Tasol ol i no tingim.
Satan i bin kalabusim ol manmeri na ol i pas long olgeta samting long sait bilong Satan. Adam i pundaunim olgeta manmeri insait long dispela samting tasol.
- Yumi tingting tasol long amamasim bel bilong yumi na bihainim laik bilong yumi tasol. (Lukim Efesus 2:3.)
Yumi no save yusim tingting na bel bilong yumi long mekim pasin God i save laikim. Nogat. Yumi save yusim tingting na bel bilong yumi bilong mekim pasin bilong amamasim yumi yet.
Manmeri bilong dispela graun i pas tru long mekim pasin bilong amamasim bel bilong ol yet. Ol i tingting tasol long bihainim tingting na laik bilong ol yet. Het bilong ol i pulap long mekim pasin tasol bilong amamasim ol yet.
Plis harim. Taim Pol i tok, “Spirit bilong yupela i no gat laip,” em i mekim trupela trupela tok tumas. Long sait bilong sin yumi gat laip. Han lek bel tingting bilong yumi i gat laip long sait bilong sin – yumi save gohet long olgeta samting long sait bilong sin. Tasol long olgeta samting long sait bilong God nogat – yumi no save mekim wanpela liklik samting long sait bilong God – yumi dai pinis long olgeta samting long sait bilong God – spirit bilong yumi i dai pinis.
Olsem na, yu tingim….
Sapos yumi dai pinis insait long spirit bilong yumi, orait hau na bai yumi harim tok bilong God na bihainim? Hau na bai yumi lavim God na lavim ol narapela manmeri? Hau na bai yumi mekim pasin God i save laikim? Hau na bai yumi skelim ol samting long dai bilong Jisas na bilipim na trastim Em?
Yumi no inap tru bikos yumi no gat laip insait long spirit bilong yumi. Bodi i save wok, tasol yumi no gat laip insait long spirit bilong yumi. Yumi no gat strong. Yumi no gat pawa bilong harim tok bilong God na bilipim na trastim. Yumi no fit long tanim bel na yumi no fit long bihainim laik bilong God – sin i holimpas tru yumi.
Orait, yumi tok pinis, spirit bilong manmeri i dai pinis long olgeta samting long sait bilong God. Em wanpela samting. Narapela samting i olsem….
2. Yumi stap aninit long bel hat bilong God.
Lukim na ritim lain 3.
Yes, taim God i kamapim manmeri Em i kamapim ol olsem Em yet na ol i spesol long ai bilong God. Tasol ol i stap aninit long bel hat bilong God – God i no amamas long ol, nogat tru. Long wanem? Ol i stap aninit long bel hat bilong God bikos ol i stap insait tru long ol kainkain rong na sin. (Skelim Efesus 2:1-3 wantaim Rom 3:10-12.)
Na yu gat wanem tingting? Manmeri i gutpela tumas, a? Manmeri i ken i stretim laip bilong ol na i stap gutpela manmeri, a? Manmeri i ken i kirapim ol yet na i stap klin na bihain Jisas i ken i kam amamas long klinpela pasin bilong ol na kisim ol, a? Nogat tru! Taim manmeri i pundaun insait long sin na dai, spirit bilong ol i dai pinis long olgeta samting long sait bilong God na ol i stap aninit long bel hat bilong God.
Tingim. Hau na bai manmeri i mekim pasin God i save laikim na God i ken i lukim na amamas na kisim bek ol? Hau na bai ol i mekim sampela wok bilong helpim ol yet? Hau na bai ol i mekim ol naispela pasin na Jisas i ken i laikim ol na kisim ol? Ol no inap tru. Yumi no inap tru. Yumi dai pinis long olgeta samting long sait bilong God.
Yumi manmeri nogut, tasol i gat hop i stap.
Lukim Efesus 2:4 …….Tasol God…….God i bin mekim wok bilong kisim bek ol lain bilong Em. Ol yet ol i no mekim wanpela wok – ol i stap insait tru long sin na spirit bilong ol i dai pinis long olgeta samting long sait bilong God – tasol God i bin mekim wok long dai bilong Jisas Krais bai God i ken i kisim bek ol manmeri Em i bin makim bilong kisim bek.
Long neks stadi bai yumi stori moa long dispela wok God i bin mekim. Tasol bilong nau, yumi mas klia olsem God i mas mekim wok bilong sevim yumi bikos yumi no fit tru long mekim wanpela wok bilong helpim yumi yet.
Givim tenkyu long God bikos God i bin mekim olgeta wok inap pinis long dai bilong Jisas bilong pulim yumi i kamaut long sin na dai na putim yumi insait long olgeta blesim bilong heven.
Em tasol.
