Moning.
Jisas Em i Pikinini Bilong Man. Em i King bilong kingdom bilong God. Ol mirakel Jisas i bin wokim, na ol pawa bilong Jisas bilong bosim na kontrolim olgeta samting bilong dispela graun, ol dispela samting i stap evidens na i soim olsem, Jisas i gat namba bilong Pikinini bilong Man bilong visin bilong Daniel.
Ol manmeri Israel ol i tingim olsem Pikinini Bilong Man bai kam na Em bai rausim ol birua bilong ol na mekim Israel i kamap nambawan na i winim olgeta kantri nabaut. Em olsem na ol i tingim olsem Pikinini Bilong Man bai i stap King bilong ol long hia long dispela graun.
Tasol Jisas yet i tok klia olsem, “Mi kam bilong lusim laip bilong Mi bilong baim bek laip bilong planti manmeri. (Lukim Mak 10:45.) Planti taim Jisas i skulim ol disaipel bilong Em olsem, “Mi kam bilong i dai.”
Ples Getsemani.
Jisas Em i kam bilong lusim laip bilong Em bilong baim laip bilong ol planti manmeri, na taim dispela samting i kamap klostu pinis, orait Jisas i pilim bikpela hevi nogut tru bilong dispela samting.
32Ol i go long wanpela hap nem bilong em Getsemani. Na Jisas i tokim ol disaipel bilong Em olsem, “Yupela sindaun hia, Mi laik i go na mekim prea.” 33Em i kisim Pita na Jems na Jon i go wantaim Em, na Em i stat nau na pilim bikpela hevi stret long bel bilong Em. 34Na Jisas i tok, “Bikpela hevi tru i kamap long bel bilong Mi na klostu dispela hevi i pinisim laip bilong Mi. Yupela stap hia na was.” 35Na Jisas i go liklik moa, na Em i pundaun long graun na Em i prea olsem, “Sapos i gat wei bilong Mi ken i abrusim dispela taim, orait Mi laik abrusim.” 36Na Em i prea olsem, “Aba, Papa, wanem samting Yu laik mekim Yu inap mekim. Plis rausim dispela kap long Mi. Tasol, Mi no laik Yu bihainim laik bilong Mi. Nogat. Mi laik Yu bihainim laik bilong Yu.” Mak 14:32-36.
Jisas Em i save olsem, i no gat narapela rot bilong sin manmeri i ken i pas long God. Long rot bilong Jisas i kapsaitim na lusim laip bilong Em, em tasol em i rot bilong Jisas i baim laip bilong sin manmeri na God i kisim bek ol na ol i pas long Em.
Taim Jisas i tok, “Plis rausim dispela kap long Mi,” orait Em i kisim wanpela tok bilong Olpela Testamen na Em i tok. Long Olpela Testamen God i tok piksa na Em i tok long wanpela kap i pulap olgeta long bel hat bilong Em, na Em bai kapsaitim dispela bel hat long ol sin manmeri na ol bai dringim. God i mekim olsem bilong mekim save long sin bilong ol. (Yu ken i lukim Aisaia 51:17-22.)
Na taim Jisas i tok long kap, orait Em i tok long dispela kap bilong bel hat bilong God. God bai kapsaitim bel hat bilong Em long Jisas na Jisas bai kisim na pinisim, na long dispela rot ol planti sin manmeri ol i no inap kisim bel hat bilong God long sin bilong ol.
Na taim Jisas i stap long diwai kros na Em i tok, “Em i pinis nau,” (Jon 19:30) orait Jisas i tok long ol samting bilong dispela kap. Olgeta bel hat bilong God i kapsait long Jisas na Jisas i kisim na Em i pinisim olgeta.
Em olsem na yumi mas klia olsem, wok bilong Jisas long diwai kros em tasol em i rot na i no gat narapela rot na bai God i kisim bek sin manmeri.
Pikinini Bilong Man Em i lus long God.
Long diwai kros God i givim baksait long Jisas. Papa bilong Jisas i lusim Em. Jisas Em i lus long God.
33Na long 12 klok tudak i kamap long olgeta hap bilong ol i go inap long 3 klok long apinun. 34Na long 3 klok Jisas i mekim bikmaus olsem, “Eloi, Eloi, lama sabaktani?” Minim bilong dispela tok i olsem, “God bilong mi, God bilong mi, long wanem as Yu lusim mi? ……. 37Na Jisas i mekim bikmaus strong moa na Em i dai. Mak 15:33-34 na 37.
Na yumi mas save olsem, pe bilong sin em i dispela kain samting. Ol sin manmeri ol i lus long God, na bihain ol bai lus long God oltaim oltaim long kalabus hel. Long hel yu no inap lukim God i stap pren bilong yu, na yu no inap lukim wanpela blesim bilong Em. Yu bai lus long God na yu bai lus long olgeta samting bilong God oltaim oltaim.
Dai bilong Jisas i trupela stori o nogat?
Yu save, planti manmeri ol i ken i tok olsem, “Dispela stori bilong Jisas i dai long diwai kros em i no trupela histori samting i kamap long dispela graun. Nogat. Dispela stori i giaman stori nating tasol.”
Tasol tingim. Long wanem as ol disaipel i lusim laip bilong ol bilong autim dispela tok bilong baim bek wok bilong Jisas long diwai kros? Sapos dispela tok i no tru, orait ol i no inap tromoi laip bilong ol bilong autim tok. Tasol olgeta disaipel ol i tromoi laip bilong ol bilong sapotim na bilong autim tok bilong baim bek wok bilong Jisas long diwai kros.
Na yu skelim narapela samting tu. Ol planti ai witnis i stap na ol planti evidens i stap bilong soim olsem, Jisas i trupela man i kam na Em i lusim laip bilong Em long diwai kros. Na God i lukautim ol toktok bilong ol ai witnis na ol dispela toktok God i putim i stap long Baibel, bai yumi ken i save.
Wanpela rot tasol.
Yumi mas save olsem, Pikinini Bilong Man tasol i ken i baim bek yumi long kalabus bilong i dai. Dai bilong Pikinini Bilong Man em i pe bilong rausim sinmanmeri long kalabus bilong i dai. Pe bilong sin em i dai, na Jisas Em i dai bilong baimaut pe bilong sin bilong sinmanmeri, bai ol i stap fri long kalabus bilong i dai na ol i no ken i lus long God oltaim oltaim long kalabus hel.
Em olsem na, putim bilipim na trastim bilong yu tasol long feitful baim bek wok bilong Jisas long diwai kros. Yu no ken i bilipim na trastim ol narapela samting olsem lotu pasin bilong yu o baptais bilong yu o Sande na Sabat pasin o ol sampela gutpela pasin bilong yu. Nogat. Yu pas olgeta long Jisas tasol, na bihainim Jisas tasol, na yu bilipim na trastim God tasol long kisim bek yu long feitful baim bek wok bilong Jisas long diwai kros.
Glenn.
