Moning.
Nau em i Ista Sande, olsem na mi laik stori liklik long kirap bek bilong Jisas. Yu save, Ista em i taim bilong tingim dai na kirap bek bilong Jisas.
Kirap bek bilong Jisas i senisim ol disaipel.
Pastaim ol disaipel bilong Jisas ol i no tingim olsem Jisas bai dai na kirap bek olsem Jisas i tokim ol. Nogat. Taim Jisas i tokim ol long dai na kirap bek bilong Em, orait ol disaipel i krosim Jisas tasol. (Lukim Mak 8:31-33.)
Na taim Jisas i kirap pinis, orait ol disaipel i stap we? Olsem wanem ol i no i stap long ples matmat na wetim kirap bek bilong Jisas? Planti taim Jisas i bin tokim ol long kirap bek bilong Em, olsem na, olsem wanem ol i no stap na wetim kirap bek bilong Em? Yu save, ol i no tingim olsem Jisas bai kirap bek gen na i stap laip, olsem na, ol i wokabaut i go bek gen long ples bilong ol. (Lukim Mak 16:17.)
Em olsem tasol taim yumi skelim ol tok i stap long buk Aposel, orait yumi ken i save olsem ol disaipel i senis olgeta. Pastaim ol i no tingim olsem Jisas bai kirap bek na i stap laip. Na taim ol sikuriti i kam arestim Jisas, orait ol disaipel i pret tumas na ol i ranawe na hait nabaut. Tasol, long buk Aposel, yumi ken i save olsem ol disaipel i kisim bikpela strong na ol i no pret moa, na maski ol manmeri i paitim ol, ol i autim tok i go yet bilong witnisim olgeta samting bilong Jisas. (Lukim Aposel 4:19-20.)
Wanem samting i senisim ol? Ol i lukim Jisas i kirap bek na i stap laip na dispela i senisim laip bilong ol. Tru, Holi Spirit i givim strong long ol. Tasol, wantaim wok bilong Holi Spirit, olgeta disaipel ol i kisim save tru olsem, Jisas i kirap bek long dai olsem Em i tokim ol. Taim ol i lukim Jisas i stap laip, orait olgeta tubel bilong ol i lus na ol i bilipim na trastim Jisas trutru. Long dispela as ol i sanap strong nau na ol i no pret moa na ol i no ranawe moa. Ol i witnisim Jisas long ai bilong ol planti manmeri na dispela pasin bilong ol i soim yumi olsem, bilip bilong ol i stap olgeta long Jisas. Na yumi mas save olsem, bihain, olgeta disaipel i lusim laip bilong ol bilong witnisim na bilong difenim Jisas na kirap bek bilong Em.
Kirap bek bilong Jisas em i trupela histori bilong dispela graun.
Tru tumas, Jisas Em i kirap bek long dai. Dispela em i trupela histori bilong dispela graun. Na i gat planti witnis bilong sapotim kirap bek bilong Jisas. Lukim tok bilong aposel Pol long 1 Korin 15:3-8.
Krais Em i dai long sin bilong yumi olsem Tok bilong God i tok, 4na ol i planim Em na long 3-pela de Em i kirap gen olsem Tok bilong God i tok. 5Na Em i kamap long ai bilong Sifas na bihain Em i kamap long ai bilong olgeta disaipel na ol i lukim Em. 6Na bihain Em i kamap long ai bilong ol planti brata na sista, namba bilong ol i winim 500, na wantaim ol i lukim Em. Planti bilong ol i stap yet na wanwan tasol i dai pinis. 7Na Em i kamap long ai bilong Jems, na Em i kamap long ai bilong olgeta aposel na ol i lukim. 8Na las Em i kamap long ai bilong mi na mi lukim.
Tingim. Ol 500 manmeri ol i bung na olgeta wantaim ol i lukim Jisas i kirap bek na i stap laip. Kirap bek bilong Jisas em i narapela kain samting, tasol em i trupela samting.
Yumi i bilipim na trastim dai na kirap bek bilong Jisas, orait yumi bilipim na trastim samting i trupela histori na i gat ol planti witnis i stap. Na planti bilong ol witnis ol i lusim laip bilong ol bilong witnisim na sapotim na difenim Jisas i dai na Em i kirap bek na i stap laip.
Ating yumi manmeri bilong dispela graun yumi no yusim het bilong yumi tumas. Planti taim yumi bilipim na trastim ol stori bilong ol sampela samting na i no gat ol planti ai witnis i stap bilong witnisim dispela samting i tru o nogat, tasol yumi bilipim na trastim ol dispela stori. Na stori bilong Jisas i kam i dai na i kirap bek, i gat ol planti witnis i stap, tasol yumi no bilipim na trastim tumas na yumi tubel. Em olsem wanem?
Harim. Stori bilong Jisas i kam i dai na i kirap bek i gat planti ai witnis i stap. Olsem na, i no gat as long yumi tok, “Ol samting bilong Jisas i no tru.” Na i no gat as bilong yumi givim baksait long ol tok bilong Jisas.
Kirap bek bilong Jisas i soim yumi olsem, tok bilong Jisas i tru.
Na kirap bek bilong Jisas i ken i strongim yumi long bilipim na trastim olgeta tok bilong Jisas. Long wanem? Jisas Em i kirap bek olsem Em yet i tok. Jisas i bin tokaut long kirap bek bilong Em na Em i kirap bek olsem Em i tok, na long dispela as yumi ken i bilipim na trastim tok bilong Jisas. Jisas i soim yumi olsem, tok bilong Em i gat kaikai na yumi ken i bilipim na trastim tok bilong Jisas.
Na kirap bek bilong Jisas i ken i strongim yumi long bilipim na trastim nupela laip em i trupela samting. Jisas i kirap bek na kisim nupela laip bilong soim yumi olsem nupela laip em i trupela samting. Jisas i kisim nupela laip na Em i go bek long heven bilong soim yumi olsem nupela laip na heven i trupela samting.
Em olsem na taim Jisas i promisim nupela laip na heven i kamap long feitful baim bek wok bilong Em long diwai kros, orait yumi ken i bilipim na trastim dispela tok bilong Jisas. Ol dispela samting i trupela samting na yumi ken i kisim nupela laip na heven long feitful wok bilong Jisas olsem Jisas i tok na olsem Jisas i mekim.
Kirap bek bilong Jisas i soim yumi olsem, Jisas Em i Jas bilong manmeri i no laik bilipim na trastim Em.
Na kirap bek bilong Jisas i soim yumi olsem, i gat taim i stap na Jisas bai kotim na mekim save long ol manmeri i no laik bilipim na trastim na bihainim Em. Long Aposel 17:30-31 aposel Pol i tok olsem, God i kirapim Jisas long matmat bilong soim olgeta manmeri dispela i tru tumas.
30Pastaim God i larim ol manmeri i no gat save na i stap nating. Tasol nau, Em i tok strong long olgeta man long olgeta hap bilong dispela graun olsem, ‘Yupela i mas tanim bel.’ 31Long wanem, Em i bin makim wanpela de we Em bai kotim olgeta manmeri. Em bai mekim olsem long stretpela pasin bilong Em. Na Em i makim wanpela man na Em bai i stap jas bilong dispela kot. Na taim God i kirapim dispela man long matmat Em i soim olgeta manmeri dispela i tru tumas.”
Bai yu mekim wanem?
Tru tumas, Jisas i kirap bek long dai. Dispela i trupela histori. Ai witnis i bin witnisim. Kirap bek bilong Jisas i soim olsem, God i stap, na nupela laip i trupela samting na i kamap long feitful baim bek wok bilong Jisas, na heven i trupela samting, na kot bilong bihain em i trupela samting.
Em olsem na, bai yu mekim wanem? Bai yu pasim tingting bilong yu na i stap nating, a? Mobeta yu tanim bel bilong yu na yu pas long Jisas na yu trastim God long kisim bek yu long feitful baim bek wok bilong Jisas long diwai kros.
Glenn.
