Moning.
Sapos wanpela man i brukim haus bilong mi na em i stilim ol samting bilong mi, orait narapela man i ken i rausim na fogivim dispela rong bilong stilman o nogat? Narapela man i ken i go long stilman na tokim em olsem, “Mi rausim na fogivim dispela rong bilong yu,” o nogat?
Harim. Mi wanpela tasol i ken i rausim na fogivim dispela rong bilong stilman. Long wanem, stilman i wokim rong long mi tasol, olsem na, mi wanpela tasol mi i ken i rausim na fogivim rong bilong stilman.
Na wankain olsem, God tasol Em i ken i rausim na fogivim sin bilong sin manmeri. Lukim Mak 2:1-7. Ol sampela tisa bilong lo ol i save long dispela samting na ol i tok, “Ol man i no inap tekewe sin. Nogat. God tasol i ken i tekewe sin.”
1Sampela de bihain Jisas i go bek gen long taun Kaperneam na ol manmeri i harim olsem Jisas i kam bek gen long haus. 2Olsem na, planti manmeri i kam bung na haus i pulap tru, na planti manmeri i pulap autsait long haus tu. Na Jisas i autim tok bilong God long ol. 3Na ol sampela man i kam long haus na 4-pela bilong ol i karim wanpela man lek bilong em i dai pinis. 4Tasol haus i pulap na ol i hat tru long kisim man i go klostu long Jisas. Olsem na, ol i go antap long rup bilong haus na ol i wokim hul long rup na ol i pasim rop long bet na lusim em i go daun long Jisas. 5Na Jisas i lukim bilip bilong ol na Em i tokim dispela man lek bilong em i dai pinis olsem, “Pikinini, Mi tekewe sin bilong yu.”
6-7Tasol, sampela tisa bilong lo i stap long haus na ol i kisim tingting olsem, “Long wanem as dispela man i mekim tok olsem. Em i mekim tok bilas long God. Ol man i no inap tekewe sin. Nogat. God tasol Em inap tekewe sin.” Mak 2:1-7.
Na olsem wanem God tasol i ken i rausim na fogivim sin (tekewe sin)? God tasol i ken i rausim na fogivim sin bikos taim yumi wokim sin, orait yumi wokim sin long God. Taim yumi wokim rong, orait yumi wokim rong long God. Long dispela as God tasol i ken i rausim na fogivim sin bilong yumi.
God i bin wokim yumi na Em i wokim olgeta samting bilong dispela graun. Em i Papa bilong yumi, na yumi mas lavim God na yumi mas harim na bihainim tok bilong God. Taim yumi givim baksait long Em na taim yumi sakim tok bilong Em na taim yumi lavim ol narapela samting bilong dispela graun na yumi no lavim God tasol, orait yumi wokim rong long God, na dispela rong Baibel i kolim sin.
Ol tisa bilong lo ol i skelim dispela samting stret na ol i tok, “God tasol Em inap tekewe sin.” Tasol, ol narapela samting ol i no skelim stret. Nogat. Ol i tingim olsem, Jisas Em i man nating tasol na Em i giaman. Em olsem na ol i tok, “Em i mekim bilas long God.” Sapos ol i skelim stret, orait ol inap save olsem, Jisas Em i God, na sapos Jisas i laik rausim na fogivim sin bilong wanpela man, orait Em i ken i rausim na fogivim sin bilong em.
Sin na hevi bilong sin, tupela i pas wantaim long tingting bilong Jisas.
Yumi mas klia olsem, olgeta kainkain sik bilong dispela graun em i kamap long rot bilong sin bilong Adam na Ivi. Taim tupela i givim baksait long God na tupela sanap long strong na save bilong tupela yet, orait God i putim olgeta samting bilong dispela graun insait long sik na dai. Em olsem na, olgeta kainkain sik na dai em i mak na hevi bilong sin. (Yu ken i lukim na skelim Jenesis sapta 1-3.)
Em olsem na, taim Jisas i stretim lek bilong lek nogut man, orait em i rausim hevi bilong sin long bodi bilong em. Long tingting bilong Jisas sin na hevi bilong sin tupela i pas wantaim. Em olsem na taim Jisas i rausim hevi bilong sin bilong lek nogut man, orait dispela i soim olsem, Jisas i gat strong bilong rausim na fogivim sin. Jisas i gat namba bilong rausim hevi bilong sin na Em i gat namba bilong rausim na fogivim sin. Rausim hevi bilong sin na rausim sin em i wankain samting long Jisas. Lukim Mak 2:8-11. Long dispela 4-pela ves Jisas i pasim dispela tupela samting wantaim.
8-9Na wantu Jisas i save long dispela tingting ol i mekim long bel bilong ol na Jisas i tokim ol olsem, “Long wanem as yupela kisim kain tingting olsem? Mi bin tokim dispela man lek bilong em i dai pinis olsem, ‘Mi tekewe sin bilong yu.’ Na Mi ken i tokim em tu olsem, ‘Yu kirap na kisim bet mat bilong yu na yu wokabaut i go.’ Na bilong dispela tupela tok wanem tok i no gat strong? 10-11Tasol, yupela mas klia olsem, Pikinini Bilong Man i gat namba long dispela graun bilong tekewe sin.” Olsem na, Jisas i tokim dispela man lek bilong em i dai pinis olsem, “Mi tokim yu nau, yu kirap na kisim bet mat bilong yu na yu wokabaut i go long haus bilong yu.” Mak 2:8-11.
Em olsem na, taim Jisas i stretim lek bilong lek nogut man, orait Em i putim ples klia olsem, Em i gat namba bilong rausim na fogivim sin.
Pasin bilong Jisas i sailensim ol tisa bilong lo. Long wanem, ol i klia olsem, taim Jisas i stretim lek bilong lek nogut man, orait Jisas i rausim na fogivim sin bilong em. Ol tisa bilong lo ol i lukim na ol i witnisim samting Jisas i wokim, tasol ol i pasim tingting na bel na ol i no laik bilipim na trastim Jisas.
Tasol ol narapela manmeri i stap na i lukim na witnisim. Ol i tanim het na ol i litimapim nem bilong God. Lukim Mak 2:12.
12Orait, long ai bilong olgeta manmeri em i kirap na em i kisim bet mat bilong em na em i wokabaut i go. Na dispela samting i tanim het bilong olgeta manmeri na ol i litimapim nem bilong God. Na ol i tok olsem, “Bipo, yumi no bin lukim dispela kain samting, nogat tru.” Mak 2:12.
Pikinini Bilong Man Em i rait man stret.
Ol samting bilong rausim na fogivim sin i stap long han bilong Jisas tasol. Em olsem na, maski yumi givim baksait long Jisas na yumi bihainim tok bilong ol man bilong dispela graun. Ol samting bilong rausim na fogivim sin em i no stap long han bilong mi, na em i no stap long han bilong yu, na em i no stap long han bilong ol bikman bilong ol kainkain misin i kam i stap long PNG maski ol i kam paslain o ol i kam bihain. Nogat. Ol samting bilong rausim na fogivim sin em i stap long han bilong Jisas tasol.
Jisas Em i Pikinini Bilong Man, na Em i gat pawa na Em i gat namba bilong rausim na fogivim sin. Olsem na Em i rait man stret bilong tokaut long olgeta samting bilong rausim na fogivim sin. Long dispela as yumi mas harim tok bilong Jisas, na yumi trastim feitful baim bek wok bilong Em na yumi pas long Em na bihainim Em. Yumi trastim God long kisim bek yumi long feitful baim bek wok bilong Pikinini Bilong Man long diwai kros tasol.
Glenn.
