Moning.
Long dispela graun i gat planti manmeri i stap na ol i tingim olsem ol i gutpela manmeri. Em olsem na ol i no tingim baim bek wok bilong Jisas tumas. Long tingting bilong ol, ol i no nidim Jisas i kam baim bek ol long sin na feil bilong ol. Ol i tingim olsem ol i gutpela manmeri na ol i no lus long God. Ol i tingim olsem ol i gutpela manmeri na bihain ol i no inap lus long God oltaim oltaim long kalabus hel.
Yumi mas lavim God.
Long Mak 12:28-31 Jisas i makim stret as bilong sin bilong yumi olgeta manmeri bilong dispela graun. Harim tok bilong Jisas long dispela hap.
28Na wanpela tisa bilong lo em i kam na em i harim ol Sadyusi i diskasim bekim bilong Jisas. Na dispela tisa bilong lo em i klia olsem Jisas i bin bekim ol gutpela tru, na Em i askim Jisas olsem, “Bilong olgeta lo bilong God wanem lo i namba wan stret?” 29Na Jisas i bekim em olsem, “Namba wan lo stret em i olsem, ‘Yupela ol lain Israel yupela harim. Bikpela, God bilong yumi, Em wanpela tasol Em i Bikpela. 30Na yu mas lavim Bikpela, God bilong yu. Yu mas lavim Em long bel bilong yu olgeta, na long laip bilong yu olgeta, na long tingting bilong yu olgeta, na long strong bilong yu olgeta.’ (Lo 6:4-5) 31Na namba 2 lo em i olsem, ‘Yu mas lavim ol narapela manmeri olsem yu lavim yu yet.’ (Wok Pris 19:18) Na narapela lo i no winim dispela tupela lo.” Mak 12:28-31.
Pasin bilong lavim God long bel bilong yumi olgeta, na long laip bilong yumi olgeta, na long tingting bilong yumi olgeta, na long strong bilong yumi olgeta, i minim olsem yumi mas lavim God olgeta taim. Yumi no ken i lavim Em tasol long Sande o long Sabat. Yumi no ken i lavim Em tasol long taim bilong lotu na long Krismas na long Ista. Nogat. Yumi mas lavim Em long olgeta sekon long olgeta minit long olgeta aua long olgeta de long olgeta wik long olgeta mun long olgeta yia.
Yumi mas lavim God long bel bilong yumi olgeta….
Tasol planti taim tumas bel bilong yumi i pulap long pasin bilong lavim yumi yet! Yumi save lavim yumi yet tumas na i no gat banis bilong em i stap! Lavim yumi yet i nambawan samting bilong yumi.
Yumi mas lavim God long laip bilong yumi olgeta….
Tasol planti taim tumas laip bilong yumi i pas long ol samting bilong yumi. Laip bilong yumi i pas long ol samting bilong femili bilong yumi, na long ol samting bilong klen bilong yumi, na long ol samting bilong graun na pik na gaden na misin bilong yumi, na long ol kainkain samting olsem.
Yumi mas lavim God long tingting bilong yumi olgeta….
Tasol planti taim tumas tingting bilong yumi i strong long ol samting bilong yumi yet. Yumi no tingim ol samting bilong God bai yumi ken i save long Em, na yumi no tok tenkyu long Em long ol wok Em i mekim bilong blesim yumi na helpim yumi. Planti taim tumas tingting bilong yumi i pulap long aigris na long kros na long misin samting na long ol samting bilong tumbuna na long ol samting bilong ples.
Yumi mas lavim God long strong bilong yumi olgeta….
Tasol planti taim tumas yumi save yusim strong bilong yumi bilong kirapim na strongim na bihainim ol samting bilong yumi yet. Yumi no yusim strong bilong yumi bilong skelim gut olgeta tok bilong God bai yumi ken i lainim ol sampela samting moa long God na yumi ken i lavim God moa na strong long bihainim Em.
Tingim….
- Taim yumi sindaun pilai kads, orait yumi lavim God long olgeta bel bilong yumi na long olgeta laip bilong yumi na long olgeta tingting bilong yumi na long olgeta strong bilong yumi, a?
- Taim yumi kros pait, orait yumi lavim God long olgeta bel bilong yumi na long olgeta laip bilong yumi na long olgeta tingting bilong yumi na long olgeta strong bilong yumi, a?
- Taim yumi pulim nus, orait yumi lavim God long olgeta bel bilong yumi na long olgeta laip bilong yumi na long olgeta tingting bilong yumi na long olgeta strong bilong yumi, a?
- Taim yumi smok spak brus na dring bia, orait yumi lavim God long olgeta bel bilong yumi na long olgeta laip bilong yumi na long olgeta tingting bilong yumi na long olgeta strong bilong yumi, a?
- Taim yu paitim meri bilong yu, yu lavim God long olgeta bel bilong yu na long olgeta laip bilong yu na long olgeta tingting bilong yu na long olgeta strong bilong yu, a?
Tru tumas yumi nidim Jisas long baim bek yumi.
Yumi feil pinis long nambawan samting bilong God – yumi no lavim God long olgeta bel bilong yumi na long olgeta laip bilong yumi na long olgeta tingting bilong yumi na long olgeta strong bilong yumi. Ating lavim bilong yumi long God em i liklik liklik tumas olgeta.
Dispela graun em bilong God na yumi i stap long dispela graun bilong lavim Em. Na sapos yumi no lavim Em olsem Em i tok, orait i gat pe i stap bilong dispela sin na feil bilong yumi. Pe bilong sin em i dai. Na dai i olsem, yumi lus long God na bihain yumi bai lus long God oltaim oltaim long kalabus hel.
Ating i no gat kwesten mak i stap – tru tumas yumi nidim Jisas i baim bek yumi long sin na feil bilong yumi. Yumi nidim Jisas long baim fridom bilong yumi long kalabus bilong i dai.
Gutnius bilong Jisas Krais, Pikinini Bilong Man.
Tenkyu tru long God! Long wanem, gutnius i stap. Na gutnius i olsem, Pikinini Bilong Man Em i kam long dispela graun bilong lusim laip bilong Em bilong baim bek laip bilong yumi manmeri i lus long God long sin na feil bilong yumi. Yumi no lavim God olsem God i tok, olsem na, yumi lus long God. Tasol Pikinini Bilong Man Em i kam bilong baim bek yumi, bai yumi no ken i lus long God.
Em olsem na, lusim rot bilong yu, na yu kam i stap aninit long Jisas na trastim God long kisim bek yu long feitful baim bek wok bilong Jisas long diwai kros.
Glenn.
