Prea em i wanem samting?

Pastaim yumi bai skelim tupela toktok…….

1. Prea em i wanem samting?
2. Husat i ken i prea?

1. Prea em i wanem samting?

Prea em i pasin bilong toktok long God. Harim toktok bilong king Devit taim em i prea long God……..

Buk Song 4

¹God, Yu yet Yu stretpela pasin bilong mi,
plis harim prea bilong mi taim mi singaut long Yu.
Taim mi stap insait long hevi Yu bin givim bel isi long mi.
Plis mekim grasia long mi na harim prea bilong mi.

⁸Taim mi laik slip, bai mi bel isi na slip;
mi bai bel isi na slip bikos BIKPELA Yu tasol Yu lukautim mi.

Buk Song 5

¹BIKPELA, plis harim prea bilong mi;
plis skelim tok mi mekim long Yu.

²King na God bilong mi, plis harim kraiaut bilong mi,
long wanem, long Yu tasol mi prea.

³BIKPELA, long olgeta moning Yu harim nek bilong mi;
long olgeta moning mi givim prea bilong mi long Yu na mi wet long kisim gutpela bekim bilong Yu.

Buk Song 8

¹BIKPELA, Yu Bikpela bilong mipela,
nem bilong Yu i nambawan tru long olgeta hap long dispela graun!
Yu bin mekim glori bilong Yu i antap tru na i winim skai.

²Na long maus bilong ol pikinini na ol liklik pikinini
Yu putim strong bilong Yu i stap
bilong semim ol birua na bilong sailensim ol man i egensim Yu.

³Taim mi lukluk antap long skai bilong Yu, long ol samting Yu bin wokim long han bilong Yu,
na mi lukim mun na ol sta Yu bin putim i stap,

⁴mi save tingim olsem, manmeri em i wanem samting na Yu save tingim em,
long wanem as Yu save lukautim pikinini bilong dispela graun?

⁹BIKPELA, Yu Bikpela bilong mipela,
nem bilong Yu i nambawan tru long olgeta hap long dispela graun!

Yu save, Devit em i toktok long God. Em i toktok long God olsem em i toktok long wanpela man. Em i opim maus na em i toktok long God. Prea em i pasin bilong toktok long God.

God i no wanpela diwai o wanpela wara o wanpela ston o sampela kain samting olsem. Nogat. God Em i olsem wanpela man we yumi ken i toktok long Em. God Em i man olsem yumi, olsem na, yumi ken i toktok long Em.

Ating mi no ken i tok “God Em i man olsem yumi.” Mobeta mi tok, “Yumi man olsem God Em i man.” Long wanem, long bipo tru taim God i wokim olgeta samting Em i wokim man na meri olsem Em yet.

Lukim Jenesis 1:26-27.

²⁶Orait, nau God Em i tok, “Yumi wokim manmeri na ol bai i stap wankain olsem Yumi yet. Na ol i ken i bosim ol fis, na ol pisin, na ol animal i stap long ples, na ol animal i stap long bus, na ol liklik animal i save raun long graun.”

²⁷Olsem na God Em i wokim man na em i stap wankain olsem Em yet,
wankain olsem God yet Em i bin wokim em,
man na meri yet God Em i bin wokim ol.

God i wokim man wantaim meri na tupela i kamap olsem God yet. Tupela i kamap wankain olsem God yet.

Tasol nogut yumi paul long dispela toktok. Yumi no olsem God long olgeta samting. Nogat. Yumi olsem God long sampela samting tasol – yumi no olsem God long olgeta samting.

Skelim dispela….

• God Em i save long olgeta samting long olgeta hap. Tasol yumi no save long olgeta samting long olgeta hap, nogat. Save bilong yumi i sot tru. Olsem na, long dispela samting yumi no olsem God.

• Taim God i wokim olgeta samting Em i tok tasol na olgeta samting i kamap. Tasol yumi no inap tok na wanpela samting i kamap, nogat. Yumi no gat dispela kain pawa. Olsem na, long dispela samting tu yumi no olsem God.

• God i save stap long olgeta hap. Em i stap long ples na Em i stap long taun – Em i save stap long olgeta hap long seim taim. Yumi no inap mekim olsem. Taim yumi stap long ples, em nau yumi stap tasol long ples. Na taim yumi stap long taun, em nau yumi lusim ples pinis na yumi stap long taun tasol. Yumi no inap i stap long narapela narapela hap long seim taim. Olsem na long dispela samting tu yumi no olsem God.

Tasol long ol sampela samting yumi olsem God. Skelim dispela….

• God Em i save tingting. Em i gat het na Em i save tingting na Em i save skelim tingting bilong Em yet. Na Em i ken i yusim tingting bilong Em bilong skelim planti samting. Olsem na yumi tu yumi gat het na yumi ken i yusim tingting bilong yumi bilong skelim ol samting. Yu save, taim God i wokim manmeri olsem Em yet, orait Em i givim het long ol bai ol i ken i tingting na skelim ol samting olsem Em yet i save mekim. Em olsem na yumi save tingting olsem God i save tingting.

• God i save kisim ol kainkain pilim. Sampela taim Em i ken i pilim amamas. Sampela taim Em i ken i pilim kros. Sampela taim Em i ken i pilim sori. Sampela taim Em i ken i pilim hevi. God i save kisim ol kainkain pilim. Olsem na yumi tu yumi ken i kisim ol kainkain pilim. Sampela taim yumi ken i pilim amamas o pilim kros o pilim sori o pilim hevi o ol narapela kainkain pilim. Em olsem na yumi save pilim olsem God i save pilim.

• Na tu God i save toktok. God i ken i toktok na stori. God i ken tokim yumi long ol sampela samting na yumi ken i harim na yumi ken i save long toktok bilong God. Na wankain olsem God yumi tu yumi ken i toktok na stori. Yumi ken i toktok long brata bilong yumi na long papamama bilong yumi na ol narapela manmeri na ol inap harim na save long toktok yumi mekim. Olsem na long dispela samting tu yumi stap olsem God. Yumi ken i toktok olsem God i toktok.

Yu save, long dispela as yumi ken i prea – toktok – long God. God i wokim yumi olsem Em yet na long dispela as yumi ken i toktok long Em. Yumi ken i yusim tingting bilong yumi na yumi ken i pilim ol sampela pilim bilong yumi na yumi ken i opim maus na toktok long God long ol kainkain tingting na pilim na toktok bilong yumi – na God i ken i harim na save.

Yumi mas klia olsem, God i no olsem ol tewel bilong ol tumbuna, na God i no olsem ol masalai i stap long hul bilong ston o long bus o long wara. Nogat. God i no olsem ol. God Em i “man” na yumi ken i toktok long Em. Ol dispela narapela samting yupela no inap toktok long ol na ol i harim, nogat. Mi save, yupela save pret long ol dispela samting. Long dispela as taim yupela mumu yupela save putim liklik hap kaikai antap long han bilong diwai, nogut ol tewel bilong tumbuna i kros. Tasol yupela no inap toktok long ol na ol i no inap harim tok bilong yupela.

God i no olsem ol, nogat tru. God Em i trupela God i stap na God i stap “man” olsem yumi stap man na God i ken i harim na save wanem toktok yumi mekim long Em.

Yumi no ken i pret long God. Sapos yu no tanim bel na yu no laik bilipim na trastim God long kisim bek yu long feitful baim bek wok bilong Jisas tasol, orait yu ken i pret long God bikos long bihain God bai mekim save long yu. Tasol, sapos yu tanim bel pinis na yu bilipim na trastim God long kisim bek yu long feitful baim bek wok bilong Jisas tasol, na yu bilipim na trastim na bihainim Jisas, orait yu no ken i pret long God, nogat. God Em i invaitim yumi long toktok long Em.

Lukim Filipai 4:5-6.

…BIKPELA i stap klostu. ⁶Yupela no ken i wari long wanpela samting, nogat. Long olgeta samting yupela ken i prea na toktok long God. Tok tenkyu long Em na tokim Em long askim bilong yupela.

Long olgeta samting yumi ken i prea na toktok long God. Wanem askim yumi laik askim God i tok askim tasol. God Em i invaitim yumi long toktok long Em. Yumi no ken i pret long toktok long Em.

God i bin wokim yumi olsem Em yet na long dispela as yumi ken i toktok long God. Prea em i pasin bilong toktok long God. God Em i invaitim yumi long toktok long Em.

Orait, nau yumi mas skelim dispela toktok…..

Long rot bilong prea yumi ken i toktok long God, tasol hau na bai God i toktok long yumi? God i save toktok long yumi long rot bilong Tok bilong God. God i yusim Baibel long toktok long yumi.

Harim tok bilong God yet long Hebru 1:1-2.

¹Bipo, long planti taim na long kainkain pasin God i bin tok long ol tumbuna bilong yumi long maus bilong ol profet. ²Tasol long dispela taim nau, taim bilong ol las de, God i bin tokim yumi long maus bilong Pikinini Man bilong Em.

Bipo God i bin toktok long ol profet bilong Em na ol profet i karim dispela toktok i go long ol manmeri. Long dispela wei God i bin toktok long ol. Tasol, bilong nau, Jisas yet i tokaut na soim yumi olgeta samting God i laik yumi mas save long em. Na olgeta tok bilong Jisas na olgeta pasin bilong Jisas na olgeta tisim bilong Jisas na olgeta tisim Jisas i givim ol Aposel bilong Em, olgeta i stap pinis insait long Nupela Testamen na yumi ken i lukim na save long ol dispela tok bilong God. God i save yusim Baibel long tokim yumi long olgeta samting Em i laik yumi save long em.

Wanpela taim mi harim wanpela stori long redio. Wanpela man i go insait long wanpela stoa na em i sutim na kilim ol sampela manmeri insait long stoa. Taim ol police i holim em, em i tok olsem, “God i tokim mi long mi mas sutim na kilim ol manmeri insait long stoa.”

Orait yumi skelim, God i ken i toktok long yumi olsem dispela manya i tok o nogat? Na God i save yusim driman long toktok long yumi o nogat?

Mi no save. Tasol wanpela samting mi save na mi mas tokim yupela. God i no tokim manya long sutim na kilim ol manmeri i stap insait long stoa. Nogat tru! Long wanem, God i no save kapsaitim tok bilong Em yet. Nogat tru. Long Baibel God i tok klia pinis olsem, “Yu no ken i kilim man i dai.” Em olsem na God i no inap kapsaitim tok bilong Em yet na tokim manya long i go kilim i dai ol manmeri.

Harim. Yumi mas was gut long dispela kain samting. Ol sampela manmeri i ken i tok olsem, “God i tokim mi long driman.” Na ol i ken i tok, “God i tokim mi na mi harim nek bilong Em.” Tasol hau na bai ol i save tru olsem God i bin tokim ol o nogat? Nogut Seten i trikim ol, a? Seten em i man bilong giaman, olsem na em i ken i trikim ol manmeri na ol manmeri ol i tingim God i tokim ol long driman.

Yumi mas skelim gut. Yumi mas yusim Tok bilong God – Baibel – na yumi skelim olgeta samting. Sapos wanpela toktok i kamap na dispela toktok i no pas tru long Tok bilong God, orait yumi ken i klia olsem dispela tok i no tok bilong God – God i no toktok.

Lukim 1 John 4:1.

¹Ol prens bilong mi, yupela no ken i bilipim na trastim olgeta man i tok, “Spirit bilong God i givim tok long mi”. Nogat. Yupela mas skelim tok bilong ol – ol i autim tok bilong God o nogat. Long wanem, planti giaman profet i go nabaut pinis long dispela graun.

Dispela toktok i klia. Yumi mas skelim toktok – toktok em i tok bilong God o nogat. Yumi mas yusim Baibel long skelim toktok.

Long rot bilong prea yumi ken i toktok long God. Na long rot bilong Baibel God i save toktok long yumi. Holi Spirit bilong God i ken i stiaim yumi i go long wanem tok God i laik yumi mas lukim na harim insait long Baibel. Baibel em i tok bilong God long yumi.

Orait, wanpela tok yumi skelim pinis. Nau yumi bai skelim tok namba 2.

2. Husat i ken i prea?

Ating mobeta yumi senisim dispela askim na yumi tok, “God i ken i harim tok bilong husat?” Yumi skelim tok bilong God yet long dispela samting….

Ol Provep 15:8 na 15:29.

⁸BIKPELA i hetim tru ol ofa bilong ol man nogut,
Tasol Em i laikim prea bilong ol stretpela man.

²⁹BIKPELA i stap longwe tru long ol man bilong mekim pasin nogut,
tasol Em i harim prea bilong ol stretpela manmeri.

Long Ol Provep wantaim ol song na ol prea i stap insait long Buk Song, taim ol i tok “stretpela man” , orait ol i makim ol lain manmeri bilong God. God yet i save stretim ol lain manmeri bilong Em. Long wok bilong God yet God i stretim ol. Na ol dispela manmeri ol i bilipim na trastim God long stretim ol. Ol lain manmeri God yet i stretim, orait God i kolim ol “stretpela manmeri.” Na ol dispela manmeri ol i save tanim bel na ol i bihainim God.

Na yumi i lukim na skelim Nupela Testamen, orait yumi save olsem, God i stretim ol lain bilong Em long feitful baim bek wok bilong Jisas long diwai kros. Ol manmeri God i stretim long feitful wok bilong Jisas, orait God i kolim ol “stretpela manmeri.” (Rom 3:23-24 i tok olsem, “Olgeta manmeri ol i wankain tasol. Ol i manmeri bilong mekim sin, na ol i kamap sot long glori bilong God. Na God i ken i kolim ol “stretpela man” long wok Krais Jisas i bin mekim bilong baim bek manmeri. Dispela em i presen bilong God, na i kam long rot bilong grasia bilong God.”) Na ol dispela manmeri ol i bilipim na trastim God long stretim ol long feitful wok bilong Jisas, na ol i tok tenkyu long God long stretim wok bilong Jisas, na ol i lavim Em na ol i bihainim Em.

Na taim Ol Provep na Buk Song i tok “ol man i mekim pasin nogut” , orait ol i makim ol manmeri God i no stretim, na ol dispela manmeri ol i no tanim bel na i no bilipim na trastim na bihainim God.

Olsem na, dispela 2-pela ves (Ol Provep 15:8 na 15:29) i tokaut klia olsem, God i laikim prea bilong ol lain bilong Em, na Em i stap longwe long ol manmeri i no lain bilong Em. God i harim prea bilong ol lain manmeri i tanim bel na i bilipim na trastim God long stretim ol, tasol Em i no save harim prea bilong ol manmeri i no laik tanim bel na ol i laik mekim wok bilong stretim ol yet.

1 Pita 3:12

¹² …..BIKPELA i save lukautim ol stretpela lain bilong Em,
na Em i save harim prea bilong ol.
Tasol BIKPELA Em i egensim ol man i mekim pasin nogut.

Tok bilong Pita i klia. God i wanbel wantaim ol lain manmeri bilong Em (em ol lain manmeri God yet i stretim long feitful baim bek wok bilong Jisas) na Em i save lukautim ol na Em i save harim prea bilong ol. Tasol, God i no wanbel long ol manmeri i no laik tanim bel na bilipim na trastim God long stretim ol long feitful wok bilong Jisas. Nogat. Em i egensim ol – Em i bel hat long ol. Na yu tingim na skelim – God i no inap harim prea bilong ol dispela manmeri. Nogat. Em i egensim ol tasol.

Yumi mas klia olsem, God i save harim prea bilong yumi i bilipim na trastim feitful wok bilong Jisas. God i save putim ia bilong Em long toktok yumi mekim long prea bilong yumi. Em save harim toktok yumi mekim long prea bilong yumi. Tasol God Em i egensim ol manmeri i no laik tanim bel na trastim Em long stretim ol. Em i no inap harim prea bilong ol.

Sampela stia toktok.

1. Yumi no ken i bilasim na yusim prea bilong apim yumi yet long ai bilong ol manmeri.

Sampela manmeri i laik yusim kain tok olsem “Haleluya” na “Hosana” na kain tok olsem. Na i no gat tambu long yusim dispela kain toktok. Tasol sampela manmeri ol i yusim dispela kain toktok bilong bilasim prea bilong ol. Ol i yusim dispela kain tok bilong apim ol yet long ai bilong ol manmeri. Olsem na, ol i no tingim God na toktok long God. Nogat. Ol i tingim ol manmeri bilong kongregesen na ol i mekim toktok long ol tasol.

Yumi i bilipim na trastim God long kisim bek yumi long feitful baim bek wok bilong Jisas, orait yumi no ken i mekim kain prea olsem. Taim yumi prea yumi mas was gut long wanem kain toktok yumi mekim. Long wanem, taim yumi prea, orait yumi no toktok long ol man. Nogat. Yumi toktok long God.

2. Manmeri i no tanim bel na bilipim na trastim God long kisim bek ol long feitful baim bek wok bilong Jisas, orait yumi no ken i makim ol long mekim prea long sios miting bilong yumi.

Sapos God i no save harim prea bilong manmeri i no bilipim na trastim God long stretim ol na kisim bek ol long feitful wok bilong Jisas long diwai kros, orait yumi tu yumi no ken i harim. Ol i no pas long rot yumi pas long em, olsem na prea bilong ol i no inap stiaim tingting bilong yumi long ol gutpela na trupela samting bilong God. Prea bilong ol i no inap helpim yumi tok tenkyu long God long feitful stretim wok bilong Jisas long diwai kros.

Mi laik mekim liklik tok long yupela manmeri bilong kongregesen….

• Sapos yu no tanim bel na mipela askim yu long mekim prea, orait yu mas tok klia olsem, “Mi no ken i prea.”

• Na sapos yu tanim bel pinis na yu laik prea na mipela no save askim yu, orait yu mas tokim mipela olsem, “Mi tanim bel pinis.”

• Na sapos yu no tanim bel na mipela no save askim yu long mekim prea, orait yu no ken i bel hevi long mipela. Long wanem, mipela no abrusim yu nating, nogat. Mipela laik bihainim tok bilong God tasol na long dispela as mipela no askim yu. Plis yu mas rispektim dispela pasin bilong mipela.

Orait, nau yumi save pinis….

Prea em i wanem samting? Prea em i pasin bilong toktok long God. God Em i invaitim yumi long toktok long Em. Na Husat i ken i prea? Manmeri i tanim bel na i bilipim na trastim Jisas tasol i ken i prea. God i save harim prea bilong ol lain bilong Em tasol.

Em olsem na, long ol sios i bilipim na trastim na bihainim feitful baim bek wok bilong Jisas long diwai kros, orait yumi i bihainim dispela lo tasol.

Em tasol.