Aposel 4:23-31.
Bilong harim (Audio)
Yu tingim o yu no tingim olsem, long wanem as yumi no save lukim pawa bilong Holi Spirit olsem ol lain bilong Pita na Jon i lukim? Yumi skelim buk Aposel na yumi lukim stori bilong ol mirakel na ol sain i save kamap, tasol yumi no save lukim ol dispela kain samting namel long yumi long ples bilong yumi. Em olsem wanem?
Na yumi save olsem, ol sampela misin manmeri ol i save wokim ol giaman samting bai ol manmeri ol i ken i tingim olsem mirakel na sain i kamap. Ol i no wokim mirakel na sain trutru. Nogat. Ol i save trikim ol manmeri tasol bilong kisim biknem long ai bilong ol manmeri.
Em olsem na olsem wanem yumi no save lukim ol trupela mirakel na ol trupela sain i kamap namel long yumi long ples bilong yumi? Long wanem as samting bilong bipo i no save kamap long ai bilong yumi na yumi lukim?
Ol brata na sista, mi laik bekim ol dispela kain askim na mi laik autim sampela toktok bilong strongim yupela, bilong strongim yumi wantaim. Em olsem tasol pastaim yumi skelim stori na yumi klia long wanem samting stret i kamap. Yumi lukim Aposel 4:23-31….
Lukim lain 23. Taim ol hetpris lain ol i lusim Pita na Jon, orait tupela i go long haus bilong ol frens bilong ol. Ol i no go long haus we ol narapela aposel i stap long en. Nogat. Ol i go long haus bilong ol frens bilong ol, ating em ol femili na ol wanlain bilong ol.
Em olsem na, ol manmeri i prea i stap em i ol nomal manmeri tasol. Ol i ol papa na ol mama na ol brata na ol sista na ol smolpapa na ol smolmama na ol kandere na ol kain manmeri olsem. Holi Spirit i kam long ol nomal manmeri olsem na i no long ol aposel tasol. Holi Spirit i stap wantaim ol nomal manmeri na Em i wokim sain long ol na haus bilong ol i guria.
Lukim lain 23 gen. Ol hetpris lain ol i bin tretim Pita na Jon, na Pita na Jon i tokim ol frens na ol femili bilong ol long olgeta pret toktok ol hetpris lain i bin mekim.
Taim ol hetpris i tretim Pita na Jon, orait ol i tretim olgeta aposel wantaim ol femili na frens bilong ol. Long wanem, ol i save tretim olgeta manmeri i bihainim Jisas na i tokaut long Jisas i kirap bek long matmat na i stap laip. Ol planti femili na frens ol i bin lukim Jisas i stap laip, na wanpela taim klostu 500 bilong ol i bin lukim Jisas i stap laip (1 Korin 15:6). Na ol i bilipim na trastim na bihainim Jisas. Em olsem na ol hetpris lain ol i hetim ol dispela manmeri tu, na ol pret toktok ol i mekim long Pita na Jon, orait ol i mekim long olgeta manmeri i bihainim Jisas. Em olsem na ating ol tu ol i pret long ol tretim bilong ol hetpris lain.
Na dispela samting i no nupela samting. Long histori bilong dispela graun ol manmeri i les long Jisas na i les long tok bilong Jisas, ol i laik sailensim ol manmeri i bilipim na trastim na bihainim Jisas, ol i laik sailensim ol manmeri i tokaut olsem, God i kisim bek sinmanmeri long feitful wok bilong Jisas tasol.
Lukim lain 24. Na taim Pita na Jon i tokim ol femili na frens bilong ol long ol tretim bilong hetpris lain, orait ol i mekim wanem? Ol i prea long God.
Ol i no kros na sutim ol sampela toktok i go bek long ol hetpris lain. Nogat. Ol i prea long God. Na ol i no tokim Pita na Jon long tupela i stap isi na lusim autim tok bilong Jisas. Nogat. Ol i prea long God. Na ol i no lusim Pita na Jon na stap longwe long tupela na larim tupela tasol i fesim trabel. Nogat. Ol i prea long God.
Lukim lain 29. Taim ol i prea, orait ol i mekim wanem kain prea? Ol i prea long wanem samting? Ol i mekim wanem kain toktok? Ol i askim God long mekim wanem?
Ol i askim God long strongim ol na ol i no ken i pret long tretim bilong ol hetpris lain. Na ol i askim God long givim strong long ol na ol i autim tok bilong Jisas i go yet na ol i witnisim Jisas i kirap bek pinis na i stap.
Orait, yumi skelim moa prea bilong ol na yumi lukim 2-pela samting….
1. Pastaim ol i pulimapim bel na tingting bilong ol long ol trupela tok bilong God, na dispela trupela tok bilong God i rausim pret bilong ol na i helpim ol i stap isi, na ol i trastim God na trastim plen bilong God.
Lukim lain 24-28. God Em i wokim olgeta samting na Em i bosim na kontrolim olgeta samting. Em olsem na God Em i bosim na kontrolim ol hetpris lain tu, na long dispela as ol hetpris lain ol i no inap winim God na kapsaitim ol samting God i laik mekim long plen bilong Em.
Long bipo tru Holi Spirit, long maus bilong king Devit, Em i tokaut long ol dispela samting, na yumi ken i lukim long Buk Song 2. Na Luk (man i raitim buk Aposel) em i kisim dispela tok na em i putim i stap long lain 25-26. Buk Song 2 i tokaut long ol Jentail manmeri na ol king na ol hetman na ol i bung wantaim bilong egensim BIKPELA. Long lain 27 Luk em i makim Pontius Pailat (em man Jentail) na Herot (em king) na ol hetman (ol hetpris bilong lotu Juda), na wantaim ol i bung na pasim tok bilong kilim Jisas i dai. Luk i makim Jisas Em i “dispela Man BIKPELA i bin makim”.
Ol dispela man ol i pas wantaim na ol i pasim tok bilong kilim Jisas i dai, na ol i tingim olsem ol i bihainim plen bilong ol yet bilong rausim Jisas na pinisim Jisas. Tasol God i yusim dispela tingting nogut na dispela pasin nogut bilong ol bilong kamapim plen bilong Em yet. Ol i kilim Jisas i dai, tasol dispela i kamap tasol long plen bilong God. God i bosim na kontrolim olgeta samting.
Na long Buk Song 2:4 Holi Spirit i tok olsem, “God i sindaun long heven na Em i lap long ol; Em i lap nogut tru long ol.” Na long wanem as God i lap long ol? God yet i bosim na kontrolim ol na ol i fulfilim plen bilong God tasol, tasol ol i no save. Ol i tingim olsem ol i rausim Jisas. Tasol nogat. Ol i fulfilim plen bilong God. Olsem na God Em i lap nogut tru long ol.
Em olsem na, Pita na Jon na ol frens bilong ol, ol i pulimapim bel na tingting bilong ol long ol dispela trupela tok bilong bosim na kontrolim bilong God, na dispela tok i rausim pret bilong ol na i helpim ol i stap isi, na ol i trastim God na trastim plen bilong God.
Orait, yumi skelim wanpela samting pinis long prea bilong ol, nau yumi skelim narapela samting….
2. Ol i askim God long ol manmeri ol i ken i luksave na klia olsem, Jisas Em i holi wokman bilong God na trutru Em i kirap pinis na i stap laip na Em i rot God i makim bilong kisim bek sinmanmeri.
Lukim lain 29-30. Ol i askim God long givim strong long ol na ol i no ken i pret long tretim bilong ol hetpris lain na ol i autim strong tok bilong God i go yet.
Na ol i askim God long wokim ol mirakel moa long nem (namba) bilong Jisas bai ol manmeri ol i ken i save olsem, trutru Jisas i kirap bek pinis na Em i stap laip na Em i King bilong olgeta king. Ol i askim God long wokim ol mirakel moa long nem (namba) bilong Jisas bai ol manmeri ol i ken i save olsem, Jisas em i rot God i makim bilong kisim bek ol kainkain sinmanmeri. Ol i askim God long wokim ol mirakel moa long nem (namba) bilong Jisas bai ol manmeri ol i ken i save olsem, tru tumas i no gat narapela nem i stap na bai God i fogivim sin bilong yumi na kisim bek yumi sinmanmeri.
Orait na yumi lukim lain 31. Taim ol i mekim prea bilong ol olsem, orait Holi Spirit i kam long ol na haus bilong ol i guria. Na ol i no pret moa na ol i autim strong tok bilong feitful wok bilong Jisas na kirap bek bilong Em i go yet. Yu save, God i harim prea bilong ol na Em i givim samting ol i bin askim Em long en.
Orait, nau yumi skelim ol kwesten pastaim mi bin askim. Kwesten mi askim i olsem, “Olsem wanem yumi no save lukim ol trupela mirakel na ol sain i kamap namel long yumi long ples bilong yumi? Long wanem as ol mirakel sain samting bilong bipo i no save kamap long ai bilong yumi na yumi lukim?”
Yumi skelim 3-pela samting….
1. Yumi stap long narapela taim na long narapela ples.
Yumi mas holim tingting olsem, Pita na Jon na ol lain bilong ol, ol i stap long narapela taim na yumi i stap long narapela taim. Ol i stap long taim bipo na yumi stap long nau. Na taim ol i stap long en em i wanpela spesol taim – em i narapela taim stret long histori bilong dispela graun. Long wanem, longtaim Olpela Testamen i tokaut long Jisas bai kam, na Pita na Jon na ol lain bilong tupela, ol i stap na ol i lukim Jisas i kam i stap namel long ol. Ol i lukim taim we olgeta tok bilong Olpela Testamen i kamap olsem God i tok. Em olsem na em i wanpela spesol taim long histori bilong dispela graun.
Luk (man i raitim buk Aposel) em i save olsem, Olpela Testamen i tokaut long Jisas, na em i makim Buk Song 2 bilong soim yumi. Buk Song 2 em i tokaut long Jisas. “Man BIKPELA i bin makim” Em i Jisas. Jisas Em i King bilong kingdom bilong God, na Em i Man BIKPELA i bin makim, na long wok bilong Jisas tasol God bai kisim bek ol planti sinmanmeri na ol bai i stap lain manmeri bilong God long kingdom bilong God.
Yumi tok pinis olsem, taim bilong ol aposel em i wanpela spesol taim. Long lotu Juda i gat ol sampela manmeri i stap na ol i “trupela manmeri bilong lotuim God” (yumi bin lukim dispela tok long Aposel 2:5). Ol i bilipim na trastim tok bilong Olpela Testamen na ol i wetim Man BIKPELA i bin makim. Em olsem na Jisas i wokim ol mirakel long han bilong ol aposel bilong soim ol olsem, Jisas i stap laip, na Jisas Em i Man BIKPELA i bin makim, na Jisas Em i Man ol profet bilong Olpela Testamen bilong ol i bin tokaut long Em. Ol mirakel Jisas i wokim long han bilong ol aposel em i wanpela blesim bilong God long ol, bilong helpim ol tanim bel na bilipim na trastim na bihainim Jisas (yu save, pastaim ol i bin kilim Jisas i dai long diwai kros).
Em olsem na yumi no stap long dispela kain taim long ples bilong ol. Nogat. Em olsem na yumi no ken i tingim olsem yumi bai lukim ol samting ol i bin lukim. Tasol yumi ken i lukim toktok ol aposel i bin mekim. Ol i ai witnis long Jisas, na ol i ai witnis long kirap bek bilong Jisas, na ol i ai witnis long ol mirakel Jisas i wokim long han bilong ol, na ol i ai witnis long tanim bel bilong ol manmeri i kilim Jisas i dai, na ol raitim ol dispela samting na yumi save lukim long Nupela Testamen. Yumi ken i lukim na skelim ai witnis toktok bilong ol, na yumi ken i bilipim na trastim na bihainim Jisas. Long tok bilong Nupela Testamen yumi ken i save olsem, Jisas Em i Man BIKPELA i bin makim, na Em i rot bilong God i kisim bek yumi sinmanmeri.
Jisas i wokim ol mirakel long han bilong ol aposel bilong helpim ol fes lain i bilipim na trastim na bihainim Jisas. Yumi bihain lain na yumi gat ai witnis toktok bilong ol dispela fes lain i stap (em Nupela Testamen bilong yumi), na dispela i stap bilong helpim yumi bilipim na trastim na bihainim Jisas. Yumi stap long narapela kain taim na God i mekim narapela kain pasin long yumi.
2. Yumi laik lukim ol narapela samting tumas.
Haus bilong ol prens bilong Pita na Jon i guria. Tasol Holi Spirit i wokim planti samting moa. Ol i askim God long kisim strong na ol i no ken i pret long tretim bilong ol hetpris lain, na ol i ken i sanap strong na autim tok bilong God long feitful wok bilong Jisas i go yet. God i harim prea bilong ol na Holi Spirit i wokim strong long ol na ol i sanap strong.
Yu save, planti taim tumas yumi laik lukim ol kainkain samting olsem haus i guria, na yumi laik lukim ol kainkain mirakel samting na ol kainkain sain samting olsem. Em olsem na dispela i mekim yumi aipas tumas long lukim bikpela wok bilong Holi Spirit long givim strong long ol manmeri bilong Jisas na ol i sanap strong na autim tok bilong God long feitful wok bilong Jisas.
Ol manmeri bilong Jisas ol yet ol i no gat strong. Nogat. Holi Spirit i save givim strong long ol na ol i sanap strong na ol i bilipim na trastim na autim tok bilong God long feitful wok bilong Jisas. Maski ol manmeri bilong ples i hetim ol, ol i pas yet long Jisas na ol i trastim God long kisim bek ol long feitful wok bilong Jisas tasol, na ol i autim dispela tok bilong God i go yet. Dispela wok bilong Holi Spirit i stap na i bikpela wok na i bikpela mak bilong Holi Spirit, na yumi ken i lukim.
3. Planti taim tumas yumi kisim selfis tingting na yumi askim God.
Taim ol frens bilong Pita na Jon ol i prea, orait ol i no tingim ol samting bilong ol yet na ol i prea. Nogat. Ol i tingim ol samting bilong Jisas, na ol i laik ol samting bilong Jisas i kamap strong, na ol manmeri ol i ken i save olsem, Jisas i stap laip na Em i rot God i makim bilong kisim bek sinmanmeri.
Ol i no askim God long wokim ol mirakel bai ol yet i kisim biknem. Nogat. Ol i no askim God long wokim mirakel bai ol i ken i yusim bilong kisim kago. Nogat. Ol i no askim God long wokim mirakel bikos ol i laik lukim mirakel tasol. Nogat. Trutru ol i laik ol manmeri i save olsem, Jisas i kirap bek na i stap laip. Ol i laik ol manmeri ol i save olsem, Jisas Em i rot God i makim bilong kisim bek sinmanmeri. Ol i laik ol manmeri ol i save olsem, God i kisim bek sinmanmeri long feitful wok bilong Jisas long diwai kros tasol.
Long Jems 4:3 Jems i tok olsem….
3Na taim yupela i askim God, yupela i no save kisim ol samting. Long wanem, tingting bilong yupela i no stret na yupela laik kisim ol samting bilong amamasim skin bilong yupela yet.
BIKPELA i harim prea bilong Pita na Jon na ol frens bilong tupela, long wanem, ol i kisim gutpela tingting na stretpela tingting na ol i askim God. Ol i no askim God long kisim ol samting bilong amamasim ol yet. Nogat. Trutru ol i laik Jisas i kisim biknem. Trutru ol i laik ol manmeri ol i save long Jisas na ol i save long Jisas i stap laip na i no gat narapela rot na bai God i kisim bek sinmanmeri.
Ol brata na sista, taim yumi prea, orait yumi mas kisim gutpela tingting na yumi askim God, olsem Pita na Jon na ol frens bilong tupela i mekim. Em olsem na askim God long helpim yumi na yumi no ken i pret long tokaut long feitful wok bilong Jisas. Jisas wanpela Em i rot, na ol narapela samting olsem baptais na Sabat na lotu pasin na stretpela pasin i no rot. Planti manmeri i kros long harim dispela kain tok, tasol yumi askim God long strongim yumi long bihainim na long autim dispela tok i go yet, bai ol planti manmeri ol i ken i tanim bel na trastim Jisas tasol, na God i fogivim sin bilong ol na kisim bek ol long feitful wok bilong Jisas tasol.
Em tasol.
