Prea pasin insait long sios miting.

Long 4-pela stadi yumi kisim toktok long sait bilong mekim prea. Pastaim yumi holim tingting long 5-pela bikpela toktok yumi bin kisim….

• Prea em i pasin we yumi ken i toktok long God. Yumi ken i toktok long God olsem yumi toktok long papa o mama o brata o susa bilong yumi. Long prea yumi ken i toktok long God.

• Na God i save harim prea bilong ol lain manmeri bilong Em. Em i no harim prea bilong manmeri i givim baksait long Em na i wok long egensim Em. Nogat. God i save harim prea bilong manmeri Em i givim long Jisas bilong mekim wok bilong klinim ol. God i save putim ia bilong Em long harim prea bilong ol manmeri bilong Em.

• Papa bilong yumi Em i save pinis long wanem samting yumi nidim. Olsem na, yumi no ken i mekim planti toktok bilong bilasim prea bilong yumi olsem ol manmeri i no save long God i mekim. Na yumi no ken i mekim planti toktok nating bilong so-ov long ai bilong ol manmeri i harim prea bilong yumi. Nogat. Yumi ken i stap hait long haus bilong yumi o long gaden bilong yumi na yumi toktok tasol long God, na God bai harim prea bilong yumi na helpim yumi.

• Prea bilong manmeri i save gut long God bai pulap long olgeta samting bilong God. Sapos yu save gut long God bai yu tokaut long olgeta samting bilong God. Bai yu tokaut long olgeta wok God i bin mekim long wok bilong Jisas bilong kisim bek yu. Prea bilong yu bai pulap long bikpela tok tenkyu long olgeta samting God i mekim bilong sevim yu. Yu bai tok tenkyu bikos yu klia olsem wok bilong kisim bek yu em i wok bilong God long stat tu pinis. Prea bilong manmeri i save gut long God bai pulap long God.

• Taim yumi prea yumi mas trastim God. Mi no minim olsem yumi mas bilip strong olsem God bai givim ol samting long yumi olsem yumi askim long Em. Nogat. Mi tok olsem, yumi mas trastim God long bekim prea bilong yumi long gutpela wei maski Em i givim yumi ol samting yumi askim long Em o Em i givim ol narapela samting long yumi. Olsem na, sampela taim yumi ken i askim God long rausim wanpela sik bilong yumi, tasol God i ken i mekim dispela sik i kamap bikpela moa bikos long dispela sik God i laik mekim sampela wok long laip bilong yumi na dispela i gutpela moa long yumi. Olsem na, yumi mas trastim God long bekim prea long yumi long laik bilong Em yet bikos Em yet i save wanem samting i gutpela tru long yumi. Yumi mas trastim Em tasol.

Prea pasin yumi ken i mekim insait long sios miting bilong yumi.

Nau mi laik tokaut long prea pasin yumi ken i mekim taim yumi bung wantaim ol narapela manmeri i bilipim na trastim God long kisim bek ol long feitful baim bek wok bilong Jisas long diwai kros.

Na toktok mi laik mekim bai i go stret long wanpela prea pasin ol sampela manmeri i save mekim. Pasin ol i mekim i olsem, ol i save mekim prea bilong ol yet long seim taim na ol i no save harim prea bilong man ol i bin makim bilong mekim prea.

Sampela manmeri bilong yumi ol i mekim dispela kain pasin long sios bilong yumi. Em olsem na, taim man yumi makim bilong mekim prea em i mekim prea, orait sampela manmeri bilong yumi ol i save daunim het na mekim prea bilong ol yet na ol i no save harim prea bilong man yumi makim pinis bilong mekim prea.

Na mi laik tok klia olsem, mi no toktok long dispela samting bilong givim sem long yupela. Nogat tru. Mi no toktok long dispela samting bilong sutim toktok long sampela manmeri bilong yumi. Nogat tru. Mi laik toktok tasol bikos yumi i bilipim na trastim feitful wok bilong Jisas yumi laik bihainim gutpela wei bilong Jisas. Long dispela as tasol mi laik tokaut long dispela prea pasin ol sampela bilong yumi i save mekim.

Tok bilong God i mas bosim bilip bilong yumi, na Tok bilong God i mas bosim pasin bilong yumi olgeta manmeri bilong sios bilong Krais. Em olsem na bai yumi skelim tok bilong God na yumi ken i save long wanem prea pasin i gutpela pasin bilong sios bilong Krais.

Na pastaim yumi mas klia long sios – sios em i wanem kain samting. Na taim yumi klia long sios, orait yumi ken i klia long wanem prea pasin i gutpela pasin bilong sios.

Baibel i tok olsem……

Sios i olsem bodi, na Krais Em i het bilong bodi.

Lukim ol wanwan Baibel ves….

Efesus 1:22-23.

²²God i putim olgeta samting aninit long lek bilong Krais, na Em i mekim Krais i stap het tru bilong olgeta samting, na Em i mekim dispela hetman het bilong sios, ²³ na sios em i bodi bilong Krais.

Krais Em i hetman bilong olgeta samting. Na God i mekim Krais het bilong sios na sios Em i bodi bilong Krais. Sampela taim Tok bilong God i yusim tok piksa toktok bilong tokaut long sampela samting. Olsem na long sait bilong sios Baibel i tokaut olsem, sios i olsem bodi bilong wanpela man na Krais i olsem het bilong dispela bodi.

Lukim ol narapela Baibel ves….

Efesus 4:15-16.

¹⁵…Krais Em i Het bilong yumi. ¹⁶Na long Krais tasol olgeta hap bilong bodi i kisim strong. Na taim olgeta hap bilong bodi i pas gut na i wok gut, orait bodi bai i gro na kamap strong na i stap gut long pasin bilong lavim.

Rom 12:4-5.

⁴Yumi gat wanpela bodi, tasol planti hap bodi i stap long dispela wanpela bodi. Na olgeta hap bodi i no bilong mekim wanpela kain wok. Nogat. Ol i gat kainkain wok i stap. ⁵Na wankain olsem yumi manmeri i pas long Krais, yumi planti i stap tasol yumi olsem wanpela bodi. Na wanpela hap bilong dispela bodi em bilong ol narapela hap bilong dispela bodi.

Sios bilong Krais i olsem bodi bilong wanpela man. Bodi bilong wanpela man i gat planti hap bodi i stap. I gat han i stap na lek i stap na pinga i stap, na ai na ia na nus na bel na bun na ol masel na ol kainkain hap olsem i stap.

Tasol het i save bosim na kontrolim olgeta wanwan hap bilong bodi. Lek i no ken i bihainim laik bilong em yet na mekim ol sampela wok long laik bilong em yet, nogat. Na han tu i no ken i mekim wok inap long laik bilong em yet. Nogat. Het i save kontrolim olgeta hap bilong bodi. Het i save kontrolim olgeta wanwan hap bilong bodi bai olgeta wanwan hap bilong bodi i wok wantaim.

Tingting long hau bodi bilong yu i wok taim yu wokabaut….

Taim yu wokabaut 2-pela lek i wok wantaim, na 2-pela han i go kam wantaim na yu wokabaut. Na tu, ai bilong yu i save wok wantaim na i was gut long rot, nogut yu bamim wanpela diwai o yu putim lek long graun nogut na yu pundaun. Na tu, ia bilong yu i save harim ol nois, na taim yu harim wanpela nois, orait yu ken i tanim na lukluk long wanpela man i bihainim yu. Olsem na, yumi mas save olsem, taim yu wokabaut, orait olgeta wanwan hap bodi bilong yumi i wok wantaim.

Na i no han lek ai ia i wok wantaim taim yumi wokabaut. Nogat. Yu putim han bilong yu long baksait na yu wokabaut – bai yu pilim masel i go kam. Long lek na han tu olgeta masel i taitim na slekim i go kam olsem. Na pam bilong yu em tu i wok wantaim. Pam i pamim blut bilong yu raun long lek han na masel bilong yu bilong strongim wokabaut bilong yu.

Olsem na, taim yumi wokabaut olgeta wanwan hap bodi bilong yumi i wok wantaim. I no gat wanpela hap bilong bodi i save mekim narapela wok long laik bilong em yet. Nogat. Olgeta hap bilong bodi i wok wantaim na yumi wokabaut.

Na wankain olsem long bodi bilong Krais – wankain olsem long sios bilong Krais. Taim yumi bung yumi mas pas wantaim na wok wantaim. Yumi mas kisim wanpela tingting, na wanpela bel, na wanpela pasin, na yumi wok wantaim bilong litimapim gutpela nem bilong God bilong yumi.

Skelim pasin bilong ol nupela sios i kamap taim Pita i autim Tok bilong God long De Pentikos. Lukim ol wanwan Baibel ves long buk Aposel….

Aposel 2:44.

⁴⁴Olgeta manmeri i bilip, ol i stap wantaim na ol i tingim, “Samting bilong mi em i samting bilong olgeta bilip manmeri.”

Aposel 4:24.

²⁴… ol i wanbel na ol i beten wantaim long God olsem, “BIKPELA Bilong Bosim Olgeta Samting, Yu bin wokim skai na graun na solwara na olgeta samting i stap long em.”

Aposel 4:32-33.

³²Olgeta manmeri i bilip ol i stap wanbel na ol i gat wanpela tingting tasol. Na i no gat wanpela man bilong ol i tok, “Samting bilong mi, em bilong mi tasol.” Nogat. Olgeta samting bilong ol, em i bilong olgeta wantaim. ³³Olgeta taim ol aposel i tokaut long BIKPELA Jisas i kirap bek long matmat. Tok bilong ol i gat bikpela strong. Na grasia bilong God i pulap long ol olgeta.

Ol manmeri bilong nupela sios ol i wanwan manmeri, tasol ol i stap wanpela bodi na ol i wok wantaim, wankain olsem han na lek na ai na ia na bel na pinga i stap wanwan samting, tasol ol i stap wanpela bodi na ol i wok wantaim. Em olsem na ol manmeri bilong sios ol i holim wanpela bilip na wanpela tingting na ol i pas wantaim na ol i tingim olgeta samting bilong ol i bilong olgeta wantaim. Na taim ol i prea ol i kisim wanpela nek na prea wantaim. Ol wanwan i no kisim kainkain tingting na mekim prea bilong ol yet. Nogat. Ol i kisim wanpela tingting na wanpela nek tasol na ol i wanbel na mekim wanpela prea wantaim. Long wanem, ol i pas wantaim na ol i wok wantaim olsem ol i wanpela bodi. Dispela em i wei bilong sios bilong Krais.

Olsem na, taim yumi bung wantaim long bodi bilong Krais na yumi laik prea, orait yumi mas kisim wanpela tingting na wanpela nek tasol na yumi wanbel na yumi prea.

Yu save, sapos yumi olgeta yumi mekim prea long laik bilong yumi yet, orait dispela i olsem lek na han bilong yumi i sakim tok bilong het na i mekim wok long laik bilong ol yet. Na yu save olsem, dispela i no gutpela. Nogat. Han na lek i mas bihainim laik bilong het na i mas wok wantaim olgeta narapela hap bilong bodi bilong mekim wanpela wok tasol.

Olsem na, taim yumi prea na wanpela bilong yumi i daunim het na mekim prea long laik bilong em yet, orait em i olsem em i stap separet long yumi na i no wanbel wantaim yumi na i no wok wantaim yumi. Sapos dispela pasin i kamap bikpela, orait sios i no stap moa olsem wanpela bodi na sios i no wok gut.

Yumi no ken i stap separet separet taim yumi bung. Nogat. Taim yumi bung yumi olsem wanpela bodi na yumi mas holim wanpela tingting na yumi mas wanbel wantaim na yumi was wok wantaim long olgeta samting insait long sios.

Tingim. Taim yumi singim song, orait yumi makim wanpela song na yumi singim dispela song wantaim. Taim yumi laik harim tok bilong God, orait yumi makim wanpela man na em i autim wanpela toktok na yumi olgeta yumi putim ia i go long dispela wanpela toktok na yumi harim wantaim. Na wankain olsem taim yumi laik prea. Yumi makim wanpela man na em i mekim prea na yumi olgeta i harim na wanbel wantaim long dispela wanpela prea.

Long haus bilong yu yet yu ken i mekim prea long laik bilong yu. Tasol long sios yu no ken i mekim prea long laik bilong yu. Nogat. Long sios yumi kisim wanpela nek tasol na yumi prea. Long sios yumi wanpela bodi, na yumi mas wok wantaim bilong litimapim nem bilong God bilong yumi.

Em olsem na, long dispela as….

Long sios bilong yumi, mobeta yumi no ken i bihainim prea pasin we olgeta manmeri i mekim prea bilong ol yet long seim taim. Nogat. Long sios bilong yumi, yumi makim wanpela man o meri yumi save trastim long kisim gutpela tingting na mekim gutpela toktok na em tasol i mekim prea, na yumi olgeta i harim na wanbel na bihainim dispela wanpela prea olsem dispela prea em i prea bilong yumi yet. Yumi bodi bilong Krais na i gutpela long yumi i pas wantaim long wanpela toktok long prea insait long sios miting bilong yumi.

Na tu….

Long sios bilong yumi, yumi strongim olgeta manmeri long harim prea bilong man o meri mipela i makim bilong mekim prea. Wanpela bilong yumi no ken i slip o pasim tingting. Nogat. Olgeta i mas harim prea bilong man mipela i makim na ol i wanbel na wok wantaim long dispela wanpela prea.

Sampela bilong yumi i no stap tru insait long bodi bilong Krais….

Mi minim olsem, sampela bilong yumi i no bin tanim bel na bilipim na trastim feitful baim bek wok Jisas i mekim long diwai kros. Sios bilong Krais em i ol manmeri i tanim bel na i bilipim na trastim God long kisim bek ol long feitful baim bek wok bilong Jisas. Em olsem na manmeri i no bilip olsem, orait ol i no bilong sios trutru – ol i kam na bung wantaim yumi tasol.

Mipela laik olgeta manmeri i kam bung wantaim mipela long sios miting ol i tanim bel na ol i bilipim na trastim feitful wok Jisas i mekim na ol i pas tru wantaim mipela long sios bilong Krais. Sapos yu no tanim bel na bilip yet, olsem wanem nau yu no laik tanim bel na bilip? Wanem samting i stopim yu long tanim bel na bilip? Plis, tanim bel na bilipim na trastim wok Jisas i bin mekim bilong God i ken i kisim bek yu. Tanim bel na pas tru wantaim mipela long sios bodi bilong Krais.

Em tasol.