Moning.
Las wik wanpela gutpela pren bilong mi em i dai. Planti taim mitupela i sindaun na stori i stap. Sampela taim mitupela i raun wantaim. Na sampela taim mitupela i kros. Tasol mitupela no larim kros i stap longpela taim. Nogat. Hariap tasol mitupela i stretim na mitupela i sindaun gutpela gen. Em i wanpela bikpela man bilong ples na em i gat namba long lain bilong em. Na mipela olgeta femili bilong ples mipela i kraikrai i stap na sori long em i lusim mipela.
Na dispela pren bilong mi, planti yia bipo, em i tanim bel na em i bilipim na trastim God long kisim bek em long rot bilong feitful wok bilong Jisas. Em i no trastim ol sampela feitful wok bilong em yet, na em i no trastim gutpela tanim bel bilong em yet, na em i no trastim naispela lotu pasin bilong em yet. Nogat. Em i trastim feitful wok bilong Jisas long diwai kros. Bilip bilong em i olsem, “God i no lukim ol feitful na gutpela na naispela wok bilong mi yet na i kisim bek mi, nogat, God i lukim feitful na gutpela na naispela wok bilong Jisas long diwai kros tasol na Em i kisim bek mi.” Pren bilong mi i amamas long tok bilong aposel Jon olsem:
9 God i soim lavim bilong Em namel long yumi long dispela wei – Em i bin salim dispela wanpela Pikinini Man bilong Em i kam long dispela graun, bai yumi kisim laip long wok bilong Em. 10 Dispela em i lavim – yumi no bin lavim God, tasol Em i bin lavim yumi na Em i salim Pikinini Man bilong Em i kam na Em i dai bilong pinisim bel hat bilong God long sin bilong yumi. 1 Jon 4:9-10.
Mi tok pinis, dispela pren bilong mi em i wanpela bikpela man bilong ples. Tasol taim em i sindaun na stori, orait em i putim em yet i go daun. Em i no karamapim em yet long ol gutpela toktok. Nogat. Em i no sem long tokaut long sin bilong em. Nogat. Em i tokim ol manmeri olsem, “Mi man nogut. Pasin bilong mi i no gutpela pasin. Mi no naispela man na God i kisim bek mi. Nogat. Feitful wok bilong Jisas long diwai kros i karamapim sin na feil bilong mi long ai bilong God, na long dispela rot tasol God i kisim bek mi.” Em i bikpela man, tasol em i no wokabaut olsem em i bikpela man. Nogat. Jisas Em i BIKPELA bilong em na em i wokabaut aninit long Jisas tasol. Aposel Pol i tokaut long dispela kain pasin olsem:
27 Orait, husat i ken i apim em yet? Em i no gat wanpela manmeri i ken i apim em yet. Long wanem, dispela kain pasin i pinis. Na wanem samting i pinisim dispela kain pasin? Pasin bilong bihainim lo i no pinisim dispela pasin. Nogat. Pasin bilong bilip tasol i pinisim. 28 Long wanem, yumi klia olsem God i no inap kolim yumi “stretpela man” long wok bilong yumi long bihainim lo. Nogat tru. Long rot bilong bilip tasol God i givim stretpela pasin long yumi na kolim yumi “stretpela man”. 29 God Em i no God bilong ol lain Juda tasol. Nogat. God Em i God bilong ol lain Jentail tu. 30 Long wanem, God Em i wanpela tasol. Olsem na, ol manmeri i bilipim na trastim Jisas, dispela wanpela God bai givim stretpela pasin long ol na kolim ol “stretpela man”, maski ol i manmeri Juda o ol i manmeri Jentail. Rom 3:27-30.
Pren bilong mi i klia olsem, em yet em i no stretpela man i bihainim olgeta lo bilong God na God i kisim bek em. Nogat. Jisas wanpela tasol Em i stretpela man i bihainim olgeta lo bilong God, na God i givim stretpela pasin bilong Jisas long pren bilong mi, na long dispela rot tasol God i kolim em “stretpela man.” Pren bilong mi em i wanpela sinman, na mi lukim sin na feil bilong em long laip bilong em, tasol long ai bilong God em i wanpela stretpela man. Long wanem, God i lukim stretpela pasin bilong Jisas long diwai kros i karamapim pren bilong mi na God i no lukim moa olgeta nogut bilong em. Long dispela as pren bilong mi em i no apim em yet, nogat, em i apim Jisas tasol.
Na planti taim dispela pren bilong mi i tok, “Mi no inap lusim Jisas. Bai mi bihainim Em na mi painim dai bilong mi.” Em i bihainim dispela tok na nau em i painim dai bilong em, na nau em i stap long han bilong Jisas. Bodi bilong em i go daun long graun, na mipela i kraikrai i stap, tasol em i go pinis long han bilong BIKPELA bilong em na i stap gutpela tru. Mi yet mi sori long em i lusim mi, tasol mi amamas long em i lukim Jisas pinis na i stap wantaim Jisas pinis na em yet i kisim bikpela amamas stret. Ating tok tenkyu bilong em long feitful baim bek wok bilong Jisas i moa moa moa yet.
Bipo, mi i stap tisa bilong pren bilong mi. Mi bin skulim em long ol planti samting bilong wok bilong Jisas na long rot bilong God i kisim bek sin manmeri. Tasol nau dispela pren bilong mi i winim mi. Save bilong em long olgeta samting bilong God na long Jisas na long Holi Spirit i winim save bilong mi. Long wanem, em i lukim Jisas pinis na em i senis. Aposel Jon i tok long manmeri i bilipim na trastim feitful wok bilong Jisas olsem:
2 Ol gutpela pren bilong mi, nau yumi pikinini bilong God. Na bihain yumi bai i stap olsem wanem, orait God i no soim yumi yet. Tasol yumi save olsem, taim Krais i kamap ples klia, orait yumi bai lukim Em stret na yumi senis na kamap olsem Em. 1 Jon 3:2.
Mi stori pinis long pren bilong mi na em i stap olsem wanem. Na yu? Yu i stap olsem wanem? Yu bilipim na trastim dispela tok bilong God olsem pren bilong mi i bilipim na trastim o nogat? Taim yu i dai, orait yu bai olsem wanem?
Skelim ol wanwan tok bilong God na yu skelim laip bilong yu, na yu skelim bilipim na trastim bilong yu i pas long wanem samting.
25 God i bin salim Krais Jisas i kam, na Krais Jisas i kisim pe bilong sin na Em i dai, na blut bilong Em i kapsait bilong tekewe bel hat bilong God long sin bilong manmeri i bilipim na trastim Krais Jisas. Rom 3:25.
3 Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.” Jon 3:36.
6 Na Jisas i tok, Mi yet Mi rot, na Mi as bilong Tok i tru, na Mi as bilong laip. I no gat wanpela man inap i go long Papa long narapela rot. Nogat. Long Mi tasol.”
Jon 14:6.
Glenn.
