Rom

God i kisim bek ol liklik lain bilong ol lain Israel.

11

¹Orait, ol dispela tok i minim olsem God i lusim olgeta ol lain bilong Em, a? Nogat tru. Long wanem, mi yet mi wanpela man bilong lain Israel na mi pikinini bilong Abraham na mi bilong lain bilong Benjamin. ²God i no givim baksait long lain manmeri bilong Em, em ol lain we bipo tru God Em i save tru long ol. Ating yupela no save long stori bilong Elaija i stap long Buk bilong God, a? Elaija i bin komplen long God long ol lain Israel na em i tok, ³“BIKPELA, ol i bin kilim i dai ol profet bilong Yu, na ol i rausim ol alta bilong Yu, na mi wanpela tasol i stap na ol i laik kilim mi tu.” (1 King 19:10, 14) ⁴Tasol God i mekim wanem tok bilong bekim tok bilong Elaija? God i tok, “Mi bin holim i stap 7,000 manmeri bilong Mi yet na wanpela bilong ol i no brukim skru long Bal.” (1 King 19:18) ⁵Na wankain olsem bilong nau. God i holim i stap hap lain manmeri bilong Em yet. God i bin mekim grasia long ol na makim ol. ⁶Em olsem na sapos God i mekim grasia long ol na makim ol, orait i klia olsem God i no skelim pasin bilong ol na makim ol. Nogat. Sapos God i skelim pasin bilong ol na makim ol, orait grasia bilong God i no gat wok bilong em i stap.

⁷Em olsem na samting ol Israel i laik kisim, ol i no kisim. Tasol ol manmeri God i bin makim, ol i bin kisim, na ol narapela manmeri God i pasim bel bilong ol. ⁸Buk bilong God i tok olsem,

“God i mekim ol i stap olsem man i slip i dai,
olsem na ai bilong ol i no save lukim,
na ia bilong ol i no save harim,
na ol i stap olsem yet.”

(Lo 29:4, Aisaia 29:10)

⁹Na Devit i bin mekim dispela tok,

“Larim ol blesim bilong God i holim na banisim ol,
bai ol i pundaun na kisim pe nogut.
¹⁰Larim ai bilong ol i stap tudak bai ol i no ken i lukluk,
na larim ol i karim hevi i go i go oltaim oltaim.”

(Buk Song 69:22-23)

God i joinim ol Jentail manmeri.

¹¹Orait, ol dispela tok i minim olsem taim ol Israel i pundaun ol i lus olgeta, a? Nogat tru! Ol i bin givim baksait long Krais na dispela pasin bilong ol i opim rot bilong ol Jentail i kisim laip long wok bilong Krais. God i laik ol Israel i mas lukim dispela samting na tingting gut. ¹²Na sapos sin bilong Israel i bin kamapim gutpela samting tru bilong ol manmeri bilong dispela graun, na feil bilong Israel i bin kisim gutpela samting tru i kam long ol Jentail, orait taim God i kisim Israel i kam bek gen long Em gutpela samting moa moa yet i ken i kamap bilong ol lain manmeri bilong dispela graun.

¹³Mi tok nau long yupela ol Jentail. Mi aposel bilong ol Jentail na mi save wok hat long dispela wok mi mekim namel long yupela. ¹⁴Mi mekim olsem bai ol wanlain bilong mi i ken i lukim na tingting gut, na sampela i ken i tanim bel na kam long Krais. ¹⁵Tingim. God i lusim Israel na long dispela pasin Em i kisim ol narapela manmeri bilong dispela graun i kam. Em olsem na taim God i kisim bek ol Israel planti manmeri bai i lusim dai na kisim laip. ¹⁶Sapos liklik hap bilong bret i holi, em ol man i givim olsem ofa, orait olgeta hap bilong bret em i holi. Sapos rop em i holi, orait ol han tu em i holi.

¹⁷Sapos God i rausim sampela han, na Em i kisim yupela ol wail oliv na joinim yupela wantaim ol han i stap yet na yupela i serim gutpela gris i kam long rop bilong gutpela diwai oliv, ¹⁸ orait yupela no ken i hambak long ol han God i bin rausim. Tingim. I no yupela i givim gris long rop bilong diwai, nogat, em i rop i givim gris long yupela. ¹⁹Yupela i tok olsem, “Ol sampela han i lus, bai mipela i ken i pas.” ²⁰Em tru. Tasol, ol i lus bikos ol i no bilip. Yupela i pas tasol bikos bilip i bin kam long yupela. Olsem na, yupela no ken i apim yupela yet. Nogat. Mobeta yupela kirap nogut. ²¹Long wanem, sapos God i no larim i stap ol as han bilong diwai, orait Em i no inap larim yupela i stap. ²²Skelim gut. God Em i gutpela tru. Na God Em i hatpela tru. Em i mekim hatpela pasin tru long ol man i givim baksait long Em. Na Em i mekim gutpela pasin tru long yupela, tasol yupela i mas holim pas gutpela wei bilong God. Sapos nogat, orait God i ken i katim na rausim yu tu. ²³Na ol lain Israel, sapos ol i lusim pasin we ol i givim baksait long Krais, orait God i ken i joinim ol gen long diwai. Long wanem, God i gat pawa bilong joinim ol gen. ²⁴Pastaim yupela i stap han bilong wail diwai oliv, tasol God i katim yupela na joinim yupela long gutpela diwai oliv. Em olsem na sapos God i joinim han bilong wail diwai oliv long gutpela diwai oliv, orait i no gat kwesten mak long God i joinim ol han bilong gutpela diwai oliv i go bek gen long diwai bilong ol yet.

Ol Israel bai kam insait long kingdom bilong God.

²⁵Ol brata, nogut yupela i no gat save i tingim olsem yupela i gat bikpela save. Olsem na, bai mi putim ples klia samting i bin hait na yupela ken i save. Harim. Planti manmeri bilong ol Israel bel bilong ol i pas. Na bel bilong ol bai pas inap long ol planti manmeri bilong ol lain Jentail i kam pulap. ²⁶Em olsem na long dispela wei God bai kisim bek ol Israel. Buk bilong God i tok olsem,

“Man Bilong Sevim ol manmeri bai kirap long Saion,
na Em bai rausim sin bilong ol lain bilong Jekop.
²⁷Dispela em i kontrak Mi mekim long ol,
taim Mi tekewe sin bilong ol.”

(Aisaia 59:20-21, Aisaia 27:9, Jeremaia 31:33-34)

²⁸Nau ol Israel i stap birua bilong gutnius bilong God, bai gutnius i ken i kam long yupela. Tasol God i lavim ol Israel. Long wanem, Em i bin makim ol na Em i tingim yet ol tumbuna bilong ol. ²⁹Harim. God i bin givim ol gutpela samting long ol na Em i bin singautim ol na dispela i no inap senis. ³⁰Bipo yupela tu i bin givim baksait long God, tasol nau God i marimari long yupela. Ol Israel i bin givim baksait long God na long dispela as marimari bilong God i bin kam long yupela. ³¹Em olsem na nau ol Israel i givim baksait long God, tasol God i ken i marimari long ol. God i bin marimari long yupela na long dispela as marimari bilong God i ken i kam nau long ol Israel. ³²Long wanem, God i larim pasin bilong givim baksait long Em i kalabusim olgeta manmeri, bai Em i mekim marimari long olgeta.

³³Tru tumas, save bilong God, na gutpela tingting bilong yusim save long gutpela we, i pulap tru long God! I no gat wanpela man inap tru long skelim ol disisen bilong Em, na i no gat wanpela man inap tru long skelim ol pasin bilong Em!

³⁴“Husat inap save long tingting bilong BIKPELA,
na husat inap long givim stia tok long Em?”

(Aisaia 40:13)

³⁵“Husat inap long mekim sampela gutpela wok bilong BIKPELA,
bai BIKPELA i ken i bekim bek long em?”

(Jop 41:11)

I no gat.

³⁶Long wanem, olgeta samting i bin kam long han bilong Em, na olgeta samting i bin kamap long strong bilong Em, na olgeta samting i stap bilong litimapim nem bilong Em. Olgeta glori em bilong Em bilong oltaim oltaim. Tru tumas.