Rom
Yumi mas givim bodi bilong yumi long God.
12
1Olsem na, ol brata, nau mi laik tokaut strong olsem, God Em i marimari na Em i mekim planti gutpela wok bilong sevim yupela, na long dispela as yupela mas givim bodi bilong yupela long God olsem wanpela ofa i gat laip. Olsem na, yupela mas mekim pasin i holi na mekim pasin God i laikim. Taim yupela mekim olsem yupela lotuim God. 2Yupela no ken i wokabaut moa wankain olsem ol manmeri bilong dispela graun. Nogat. Yupela mas kisim nupela tingting na senisim pasin bilong yupela. Na sapos yupela traim na bihainim laik bilong God, bai yupela wanbel olgeta long laik bilong God. Yupela bai klia olsem pasin God i laikim em i gutpela samting na em i samting bilong kamapim amamas na em i samting i stret tru.
Tingting gut long wok bilong Krais.
3God i mekim grasia long mi na Em i givim strong long mi bilong mekim wok, na long dispela strong mi laik mekim sampela toktok long yupela wan wan. Yu no ken i tingim yu yet i nambawan tru na yu winim mak bilong yu. Nogat. Yu mas tingting gut na tingim na skelim ol samting bilong bilip, em dispela bilip God i bin givim yupela wan wan. 4Yumi gat wanpela bodi, tasol planti hap bodi i stap long dispela wanpela bodi. Na olgeta hap bilong bodi i no bilong mekim wanpela kain wok. Nogat. Ol i gat kain kain wok i stap. 5Na wankain olsem yumi manmeri i pas long Krais, yumi planti i stap tasol yumi olsem wanpela bodi. Na wanpela hap bilong dispela bodi em bilong ol narapela hap bilong dispela bodi. 6God i bin mekim grasia long yumi wan wan, na long dispela as Em i givim strong long yumi wan wan bilong mekim wan wan wok. Em olsem na yumi mas yusim dispela strong na mekim wok. Long sampela manmeri God i givim strong bilong mekim wok profet, orait em i mas yusim dispela strong inap long skel God i givim em. 7Long sampela manmeri God i givim strong bilong helpim ol narapela manmeri long mekim sampela wok, orait em i mas helpim. Long sampela manmeri God i givim strong bilong skulim ol narapela, orait em i mas skulim ol. 8Long sampela manmeri God i givim strong bilong strongim ol narapela, orait em i mas strongim ol. Long sampela manmeri God i givim strong bilong skelim na givim ol samting, orait em i mas skelim na givim. Long sampela manmeri God i givim strong bilong mekim wok lida, orait em i mas lidim stret na fea. Long sampela manmeri God i givim strong bilong mekim wok bilong sori na mekim gutpela long narapela manmeri, orait em i mas amamas na mekim.
Mak bilong trupela manmeri bilong God.
9Lavim bilong yupela mas i stap trupela samting. Yupela mas hetim ol samting i nogut na pas long ol samting i gutpela. 10Yupela mas givim yupela yet bilong lukautim ol brata na susa bilong yupela. Lavim ol na lukautim ol. Rispektim ol na putim ol i go paslain long yu. 11Yupela no ken i les o slek long bihainim BIKPELA. Holim pas strongpela tingting bilong yupela bilong bihainim ol samting bilong BIKPELA. 12Yupela mas amamas na wetim ol samting God bai wokim long bihain. Taim trabel na hevi i kamap yupela mas strong na bel isi i stap. Na yupela mas strong i stap bilong mekim prea. 13Helpim ol manmeri bilong God taim ol i nidim sampela helpim. Amamas na mekim gutpela wok bilong lukautim ol lain manmeri bilong God.
14Yupela mas mekim gutpela pasin long ol manmeri i wok long bagarapim yupela. Yupela no ken i mekim nogut long ol. Nogat. Yupela mas blesim ol. 15Na sapos sampela manmeri i gat amamas, orait yupela amamas tu. Na sapos sampela manmeri i gat hevi na ol i sori na krai, orait yupela sori na krai tu. 16Yupela mas wanbel na bel isi i stap wantaim ol narapela manmeri. Yupela no ken i apim yupela yet long tingting bilong yupela. Nogat. Yupela mas daunim dispela kain tingting na pren wantaim ol manmeri nating. Yupela no ken i tingim olsem yupela winim ol narapela manmeri. 17Na sapos sampela manmeri i mekim pasin nogut long yupela, orait yupela no ken i bekim bek na mekim pasin nogut long ol. Nogat. Yupela mas lukaut gut long ol pasin yupela i mekim, na yupela i mekim gutpela pasin ol manmeri i tingim i gutpela pasin. 18Sampela taim ol sampela manmeri i no inap sindaun isi wantaim yupela, tasol yupela mas wok hat bilong sindaun isi wantaim olgeta manmeri. 19Ol gutpela pren bilong mi, yupela no ken i tingting long bekim bek long ol manmeri i mekim rong long yupela. Nogat. Yupela mas larim na God bai mekim bel hat long ol. Dispela kain tok i stap pinis long Buk bilong God. BIKPELA i bin tok olsem, “Pasin bilong bekim rong em i wok i stap long han bilong Mi. Mi bai bekim bek.” (Lo 32:35) 20Pasin yupela i mas mekim i olsem Buk bilong God i tok, “Sapos birua bilong yu em i hangre, orait givim kaikai long em. Na sapos em i drai long wara, orait givim wara long em. Na taim yu mekim olsem, em olsem yu hipim hatpela sit bilong paia long het bilong em.” (Provep 25:21-22) 21Yupela no ken larim pasin nogut i winim yupela. Nogat. Yupela mas mekim gutpela pasin bilong winim pasin nogut.
