Rom

Stretpela skelim bilong God.

2

¹Olsem na, yupela lain bilong sutim tok long ol narapela manmeri yupela no inap toktok. Long wanem, yupela i mekim wankain pasin ol i save mekim. Na taim yupela sutim tok long ol, yupela sutim tok long yupela yet. Long wanem, yupela i mekim wankain pasin ol i mekim. ²Yumi save pinis, God i skelim stret na Em i makim pe nogut bilong ol manmeri i mekim pasin nogut. ³Yupela manmeri, yupela save sutim tok long ol narapela manmeri, tasol yupela i mekim wankain pasin ol i mekim. Na olsem wanem yupela tingim God i no inap makim pe nogut long yupela? ⁴God Em i mekim gutpela pasin tru long yupela na Em i bel isi long yupela na wetim yupela. Tasol yupela tingim ol dispela samting em i samting nating. Yupela no klia olsem ol dispela gutpela pasin bilong God em bilong givim tingting long yupela na bai yupela tanim bel. ⁵Tasol yupela pasim tingting pinis na yupela no tanim bel. Na long dispela as i olsem yupela hipim pe nogut bilong yupela yet. Na bai yupela kisim dispela pe nogut long de bilong bel hat bilong God. Long dispela de olgeta manmeri bai lukim stretpela skelim bilong God.

⁶God “bai tilim samting long olgeta manmeri inap long pasin ol i bin mekim.” (Buk Song 62:12, Sindaun 24:12) ⁷Olsem na, manmeri i strong long bihainim gutpela pasin i go i go bilong kisim glori na bilong kisim gutpela nem na bilong kisim laip, orait God bai givim laip i stap oltaim oltaim long ol. ⁸Tasol sampela manmeri ol i amamasim skin bilong ol yet na ol i givim baksait long trupela tok na ol i save mekim pasin nogut. Long dispela kain manmeri God bai bel hat na givim pe nogut long ol. ⁹Trabel na hevi bai kamap long olgeta manmeri i save mekim pasin i no stret. Na dispela i ken i kamap long ol lain Juda pastaim na long ol lain Jentail tu. ¹⁰Tasol ol manmeri i bihainim gutpela pasin ol bai kisim glori na gutpela nem na bel isi. Na dispela i ken i kamap long ol lain Juda pastaim na long ol lain Jentail tu. ¹¹Harim, God i save skelim olgeta manmeri long wankain pasin tasol, maski ol i bilong wanem lain.

Lo bilong God na skelim bilong God.

¹²Sampela manmeri ol i no save long lo na ol i mekim sin na ol bai lus maski ol i no save long lo. Na sampela manmeri i aninit long lo na ol i mekim sin na God bai yusim lo bilong kotim ol na tilim pe nogut long ol. ¹³Yupela no ken i tingim olsem manmeri i save harim tok bilong lo ol i stretpela long ai bilong God. Nogat. Manmeri i save mekim na bihainim lo em i dispela manmeri tasol i stretpela long ai bilong God. ^14-15Harim, ol lain Jentail ol i no save long lo. Tasol taim ol i kisim tingting na ol i mekim sampela gutpela pasin i stap insait long lo, em nau ol i bihainim lo. Na taim ol i bihainim gutpela pasin i stap insait long lo, orait i klia olsem tok bilong lo i stap pinis long tingting bilong ol na long bel bilong ol. Em olsem na taim ol i mekim pasin nogut ol i klia olsem ol i mekim pasin nogut. Na taim ol i mekim gutpela pasin ol i klia olsem ol i mekim gutpela pasin. ¹⁶Olsem na, God bai skelim olgeta tingting na pasin bilong ol manmeri. Em i givim dispela wok long Jisas Krais, na Em bai skelim olsem long de God i makim pinis. Na dispela tok i stap pinis insait long gutnius mi save autim.

¹⁷Yupela ol Juda, yupela i stap aninit long lo na yupela toktok planti olsem, “Mipela gutpela lain bilong God.” ¹⁸Yupela kisim skul pinis long lo, na long dispela as yupela klia pinis long laik bilong God na yupela klia long wanem samting i gutpela samting. ¹⁹Yupela pilim olsem yupela save lain stret na yupela inap soim rot long ol aipas lain. Yupela tingim olsem yupela i stap long tulait na yupela inap soim rot long ol lain i stap long tudak. ²⁰Yupela tingim olsem yupela inap skulim ol lain i no gat save na skulim ol pikinini. Na yupela kisim lo pinis na yupela tingting olsem, “Mipela save long as bilong olgeta tok bilong God.” ²¹Orait, yupela save skulim ol narapela manmeri, tasol olsem wanem yupela no skulim yupela yet? Yupela save autim tok olsem, “Yu no ken stil”. Tasol yupela stil. ²²Yupela save tok olsem, “Yu no ken mekim pasin pamuk.” Tasol yupela mekim pasin pamuk. Yupela hetim ol giaman god. Tasol yupela save kisim kago bilong ol. ²³Yupela toktok planti long lo, tasol yupela save sakim lo. Long dispela as yupela givim sem long God. ²⁴Dispela kain tok i stap pinis long Buk bilong God na i tok, “Ol lain Jentail ol i save lukim dispela pasin bilong yupela na ol i tok bilas na daunim nem bilong God.” (Aisaia 52:5, Esekiel 36:22)

²⁵Sapos yupela bihainim lo tru tru, orait pasin bilong katim skin em i gutpela. Tasol sapos yupela sakim lo, orait pasin bilong katim skin em i samting nating na yupela i stap olsem ol lain i no katim skin. ²⁶Tasol sapos ol lain i no save katim skin ol i bihainim lo tru tru, orait God bai tingim olsem ol i trupela lain na ol i stap olsem ol i katim skin pinis. ²⁷Olsem na, yupela kisim pinis lo na pasin bilong katim skin, tasol yupela lain bilong sakim lo. Orait, ol manmeri i no katim skin, tasol ol i bihainim lo tru tru, ol inap daunim yupela. ^28-29Sapos wanpela man em i man Juda long antap skin tasol, orait em i no man Juda tru tru. Nogat. Sapos em i man Juda long bel, orait em i man Juda tru tru. Na wankain olsem long sait bilong katim skin. Em i no samting bilong antap skin. Nogat. Em i samting bilong bel na samting Holi Spirit i save mekim long manmeri. Olsem na, dispela kain man em i no save litimapim nem bilong em yet. Nogat. Em i save litimapim nem bilong God.