Moning.
Yumi i bilipim na trastim God long kisim bek yumi long feitful wok bilong Jisas long diwai kros na yumi bilipim na trastim na bihainim Jisas, orait Baibel i tok klia long yumi olsem, yumi mas wokabaut long rot bilong lavim. Yumi stap long nupela sios femili komyuniti bilong God na yumi mas lavim ol brata na sista bilong yumi, em ol manmeri bilong God. Lukim Efesus 5:1-2….
1Olsem na, yupela mas mekim wankain pasin God i save mekim bikos yupela pikinini bilong Em na Em i lavim yupela tumas. 2Wokabaut long rot bilong lavim olsem Krais i bin lavim yumi na lusim laip bilong Em bilong sevim yumi. Em i bin givim Em yet olsem wanpela naispela switpela ofa long God.
Na lavim pasin em wanem kain pasin?
Long Efesus sapta 4 (yumi skelim ol sampela tok pinis long ol narapela Sande Baibel Toktok) aposel Pol i tokim yumi long senisim laip bilong yumi. Em i tok olsem….
“Yupela no ken i wokabaut moa olsem ol haiden manmeri.”
“Nau tingting bilong yupela i mas kamap nupela na laip bilong yupela mas kamap nupela.”
“God i mekim yupela kamap nupela lain manmeri bai yumi i stap olsem Em yet na laip bilong yupela bai i stap stretpela na holi olgeta.”
Na Pol i skruim tok na em i tokim yumi long pasin yumi mas mekim long ol brata na sista bilong yumi long nupela sios femili komyuniti bilong God….
- Yu no ken i mekim giaman tok long ol. Nogat. Yu mas mekim trupela tok olgeta taim long ol.
- Yu no ken i mekim giaman pasin long ol. Nogat. Yu mas mekim pasin i tru na rait olgeta long ol.
- Yu no ken i larim bel hat bilong yu i winim yu na yu bel hat nogut long ol. Nogat. Yu mas kontrolim bel hat bilong yu na mekim gutpela long ol manmeri bilong sios femili.
- Yu no ken i stilim ol samting bilong ol. Yu no ken tingting tasol long kisim ol samting bilong ol. Nogat. Yu mas wok, na yu mas tingting long helpim ol sapos ol i nidim sampela helpim.
- Yu no ken i mekim tok nogut long ol. Nogat. Mekim gutpela tok i save helpim ol.
- Yu no ken i bel nogut. No ken i kros long ol. No ken i belhat long ol. No ken i bikmaus nogut long ol. No ken i tok bilas long ol. No ken i tingting long bagarapim ol.
- Mekim gutpela pasin long ol (namel long ol), na givim bel bilong yu long ol, na fogivim ol olsem God, long wok bilong Krais, i bin fogivim yu.
Taim yumi senisim tingting bilong yumi na yumi senisim pasin bilong yumi na yumi wok long lusim ol kainkain pasin nogut olsem Pol i tok, orait yumi stat nau na yumi wokabaut long rot bilong lavim.
Ol sampela manmeri i save tok olsem, “Mipela lain bilong lavim ol manmeri.” Tasol, ol i save mekim tok baksait, ol i save mekim tok giaman, ol i save mekim giaman pasin bilong trikim ol manmeri, ol i save stilim ol samting bilong ol, ol i save kros na tok pait na ol i mekim ol kain kain pasin olsem. Harim. Ol i no manmeri bilong lavim. Ol i wokabaut yet long pasin bilong ol haiden manmeri.
Tasol, hau na bai yumi kisim dispela trupela pasin bilong lavim?
1. Holim tingting yu husat – Yu pikinini bilong God!
Lukim Efesus 5:1. “Yupela mas mekim wankain pasin God i save mekim bikos yupela pikinini bilong Em na Em i lavim yupela tumas.”
Holim tingting. Yumi no kanaka. Yumi no pipia manmeri. Yumi no haiden manmeri. Yumi no manmeri bilong dispela graun. Yumi no blek. Yumi no wait. Nogat. Yumi pikinini bilong BIKPELA God. Na ol brata na sista bilong yumi long sios femili i stap olsem.
2. Tingting long wok Krais i bin mekim long yu na hau Em i lavim yu.
Lukim Efesus 5:2. “Wokabaut long rot bilong lavim olsem Krais i bin lavim yumi na Em i lusim laip bilong Em bilong sevim yumi.”
Profet Aisaia i bin tokaut long lavim bilong Jisas. Lukim ol wanwan ves bilong Aisaia 53….
4Tru tumas, dispela wokman em i karim safa bilong yumi, na em i kisim bel hevi bilong yumi,
tasol yumi tingim olsem God i mekim save long em na God i stikim em na givim hevi long em long rong bilong em yet.
5Tasol nogat. Long asua bilong sin bilong yumi bodi bilong em i bruk,
na long ol rong bilong yumi em i kisim bagarap,
em i karim na pinisim pe bilong sin bilong yumi na yumi lukim bel isi [bilong God],
na olgeta bagarap bilong em i stretim sik [bilong sin] bilong yumi.
6Yumi olgeta yumi olsem ol sipsip i lus nabaut,
yumi olgeta yumi bihainim laik na save bilong yumi yet,
na BIKPELA i hipim sin bilong yumi olgeta antap long wokman bilong em.
7Ol i mekim nogut long dispela wokman, na em i safa planti,
tasol em i no opim maus bilong em na mekim toktok,
wankain olsem pikinini sipsip ol i pulim i go bilong kilim na kaikai,
na wankain olsem sipsip ol i holim bilong rausim gras bilong em,
em i no opim maus bilong em na mekim toktok.
8Ol i mekim nogut long em long kot bilong ol na ol i holimpas na karim em i go,
na ol manmeri bilong jeneresen bilong em, husat bilong ol i save olsem em i lusim laip bilong em na
em i kisim pe bilong sin bilong ol lain manmeri bilong Mi [BIKPELA]?
9Ol i makim em i man bilong tromoi long matmat bilong ol man nogut,
wantaim ol man i hangre tumas long kisim mani,
tasol em i no mekim wanpela pasin nogut
na em i no mekim wanpela giaman tok……..
11Na bihain long safa na hevi bilong em, em bai lukim kaikai bilong wok bilong em na em bai bel isi i stap,
long wok bilong dispela stretpela man, wokman bilong Mi,
em bai mekim planti manmeri i kamap stretpela manmeri long ai bilong Mi na Mi kisim bek ol,
na em i karim pe bilong olgeta sin bilong ol.
12……..em i kapsaitim laip bilong em yet na em i dai,
na em i kisim nem nogut wantaim ol sin manmeri.
Em i mekim olsem bilong karim pe bilong sin bilong ol planti manmeri,
na em i sanap long ai bilong Mi bilong lukautim ol sin manmeri.
Taim Aisaia i tok “wokman” orait em i makim Jisas. Jisas Em wokman bilong God. Na Jisas Em i kisim ples bilong yumi – yumi inap kisim ol dispela bagarap bikos yumi sin manmeri! – tasol Jisas i kisim ples bilong yumi bilong stretim yumi long ai bilong God na yumi no ken i kisim kot na pe bilong sin bilong yumi. Jisas i lusim laip bilong Em bilong sevim laip bilong yumi. Dispela pasin em i lavim bilong Jisas. Long dispela rot Jisas i lavim yu na Em i lavim mi na Em i lavim ol lain manmeri bilong Em long nupela sios femili komyuniti bilong Em.
Jisas i lavim ol manmeri bilong sios femili komyuniti bilong Em, em ol brata na sista bilong yumi. Na olsem wanem yumi les long lavim ol?
Glenn.
