Moning.
Yumi tok pinis, kastem pasin nogut (ol mejik posin sanguma puripuri marila pasin samting) em i trupela samting ol sampela manmeri i mekim na wokim long pawa bilong Satan wantaim ol spirit nogut – em i trupela samting i gat strong, na Satan em i papa bilong en (Lukim Sande Baibel Toktok – “Kastem pasin nogut em i samting bilong Satan”).
Tasol i no olgeta samting yumi makim na yumi kolim “kastem pasin nogut” em i samting bilong Satan wantaim ol wokboi bilong em. Nogat. Ol wanwan samting yumi makim na yumi kolim “kastem pasin nogut”, sampela taim as bilong dispela samting em i paul tingting bilong yumi manmeri tasol – sampela taim as bilong dispela samting em i tudak tingting na haiden tingting bilong yumi manmeri tasol.
Sapos yumi skelim ol wanwan kastem pasin nogut bilong P.N.G., orait ating bai yumi save olsem, planti samting ol manmeri i makim na kolim mejik posin sanguma puripuri marila pasin samting em i no kamap long pawa na strong bilong Satan, nogat, em i kamap long paul tudak haiden tingting bilong ol manmeri tasol – em i kamap long paul toktok na pret toktok ol tumbuna i bin mekim, na dispela toktok i kamap bikpela na i kam long yumi.
Wanpela eksempel bilong kliaim tingting bilong yumi.
Long P.N.G. ol planti manmeri i tok olsem, taim wanpela manmeri i kisim sik o wanpela manmeri i bagarap o wanpela manmeri em i dai, orait ol dispela samting i kamap long rot bilong posin sanguma puripuri samting. Na ol manmeri i tingim olsem, dispela tok i tru – ol i tingim olsem, ol manmeri i dai, orait ol i no dai nating, nogat, ol posin man i kilim ol i dai.
Em olsem tasol God i tok klia long Baibel olsem, ol sik na bagarap na dai i kamap long narapela rot olgeta. Taim sin i kamap long dispela graun, orait sik na bagarap na dai i kamap wantaim. Taim Adam na Ivi i sakim tok bilong God na tupela i givim baksait long God (sin em i pasin bilong sakim tok bilong God na givim baksait long God), orait God i kamapim sik na bagarap na dai long tupela na long olgeta lain manmeri i kamap bihain long tupela. Lukim Jenesis 3:17-19….
17Na BIKPELA God Em i tokim Adam na Em i tok….
Long rong bilong yu graun bai kisim bagarap.
Long olgeta de long laip bilong yu
yu bai hat wok nogut tru na yu kaikai.
18Na graun em bai kamapim ol kainkain rop i gat nil na ol gras nogut,
na yu bai kaikai long sampela kaikai bilong bus.
19Yu bai hat wok na pilim tuhat nogut tru na yu bai kaikai,
na yu bai mekim i go i go inap long yu go bek gen long graun.
Mi bin wokim yu long graun,
na yu bai go bek gen long graun.”
Long rong (sin) bilong Adam graun i bagarap na ol manmeri i hatwok long kaikai i go i go na ol i kisim kainkain pen na kisim kainkain sik na ol i kamap lapun na painim dai bilong ol. Long rong bilong Adam dai i kamap long olgeta manmeri bilong dispela graun – i kamap long Adam pastaim na i kamap long olgeta manmeri i kamap bihain long Adam. Pastaim dai i no stap, tasol taim Adam na Ivi i givim baksait long God, orait God i mekim dai i kamap long tupela na i kamap long olgeta lain manmeri bilong tupela. Long dispela as tasol dai i save kamap long yumi olgeta manmeri long olgeta hap bilong dispela graun.
Giaman save.
Dispela em i trupela as bilong dai i kamap long yumi olgeta manmeri. Tasol, taim dispela trupela save em i lus, orait ol manmeri ol i kamapim ol sampela save bilong ol yet bilong eksplenim pasin bilong sik na dai. Ol i lukim manmeri i kisim sik na i kisim bagarap na i dai na ol i tingting planti. Ol i lusim trupela save pinis long as bilong sik na bagarap na dai, na long tudak tingting bilong ol, ol i kamapim giaman save na ol i makim posin sanguma puripuri samting, na ol i tok olsem dispela samting em i as bilong sik na bagarap na dai.
Na yumi mas klia olsem, dispela tok bilong ol i tok tasol. Samting ol i stori long en i no trupela posin sanguma puripuri samting, nogat, em i tok tasol – ol i tok tasol. Ol i no save long trupela as bilong sik na bagarap na dai, olsem na, ol i yusim paul tudak haiden tingting bilong ol yet na ol i kamapim ol sampela stori bilong eksplenim sik na bagarap na dai. Lukim Rom 1:20 na 21 na 24 na 25….
20….Ol manmeri ol i lukim ol samting God i bin wokim, na ol inap klia na ol inap save long God. Tasol taim ol i mekim pasin nogut ol i karamapim dispela save God i givim ol….
21Ol manmeri ol i save pinis long God, tasol ol i no aninit long Em na ol i no tok tenkyu long Em. Tingting bilong ol i paul na ol i no yusim het. Olsem na, tingting bilong ol i stap long tudak.24Olsem na, long dispela as God Em i larim ol dispela manmeri na ol i bihainim laik bilong ol yet.
25Ol i lusim trupela save bilong God na kisim ol giaman save.
Yu save, taim ol tumbuna bilong yumi i givim baksait long God na ol i bihainim laik bilong ol yet (sin em i dispela samting), orait ol i karamapim na haitim ol save God i bin givim ol na ol i kamapim na bihainim save bilong ol yet. Ol i no lusim nating trupela save God i bin givim ol. Nogat. Ol i karamapim na ol i haitim.
Ol tumbuna bilong yumi ol i bin giamanim yumi na ol i trikim yumi. Ol i no tokim yumi stret long ol samting bilong kastem pasin nogut – ol i no tokim yumi stret long ol samting bilong posin sanguma puripuri. Ol i kamapim giaman save bilong ol yet na ol i yusim dispela giaman save bilong holimpas yumi long pret tasol.
Yumi skelim gut.
Yumi mas skelim tingting bilong yumi yet – bai yumi harim na bihainim BIKPELA o bai yumi harim na bihainim toktok bilong ol man long ol samting bilong kastem pasin nogut? Yumi mas wokim disisen bilong yumi, long wanem, yumi no inap bihainim 2-pela samting wantaim. Long Matyu 6:24 Jisas i tok olsem,
24Wanpela man em i no inap aninit na bihainim tupela bosman, nogat. Em bai hetim wanpela na laikim narapela, o em bai aninit long wanpela olgeta na givim baksait long narapela. Yu no inap aninit na bihainim God na [samting bilong dispela graun] wantaim.
Yumi i bilipim na trastim God long kisim bek yumi long feitful wok bilong Jisas long diwai kros, orait yumi mas save olsem, God i kisim yumi i kam long trupela save bilong Em. Olsem na, yumi no ken i bihainim giaman save bilong ol tumbuna moa. Nogat. Nau yumi bihainim trupela save bilong God – nau yumi wokabaut long lait BIKPELA i kisim yumi i kam long en.
Glenn.
