Moning.
Tingim. Long wanem as God i bin makim na pasim yumi long Krais? Long wanem as God i salim Jisas i kam dai bilong mekim yumi holi na i no gat asua long ai bilong Em? Long wanem as God Em i adoptim yumi? Long wanem as God i soim as bilong plen bilong Em long yumi? Long wanem as God i givim Holi Spirit long yumi? Long wanem as Em i opim ai na ia na bel bilong yumi? Long wanem as God i bringim yumi i kam insait long sios femili komyuniti bilong Em?
God i mekim ol dispela wok long yumi bai yumi ken i save long Em. God i laik yumi mas save long Em. God i laik yumi mas klia long Em – Em i laik yumi save long tingting na laik bilong Em na yumi save long as bilong pasin na wok bilong Em. Em i no laik yumi stap longlong long Em. Nogat. Em i laik putim Em yet long ples klia long ai bilong yumi, bai yumi ken i save long Em na bai yumi amamas long Em na lavim Em na pas trutru long Em na yumi wanbel nating long litimapim nem bilong Em.
Lukim Efesus 1:17….
17Olgeta taim mi askim God bilong BIKPELA Jisas Krais bilong yumi na Papa i bikpela na gutpela tumas, na Em i ken i givim yupela trupela save na givim yupela klia tingting long as na minim bilong tok bilong God, na long dispela wei bai yupela save long God moa yet.
Pol i gat bikpela amamas long wok bilong God long laip bilong ol manmeri bilong God long sios i stap long taun Efesus na dispela i mekim Pol i holim ol long prea. Na taim em i prea long ol em i prea olsem, ol i mas save long God moa yet.
Tru, yumi i bin tanim bel pinis na i bilipim na trastim God long kisim bek yumi long feitful wok bilong Jisas tasol, Holi Spirit i bin mekim wok insait long yumi pinis na Em i bin opim ai na ia na bel bilong yumi na yumi klia pinis long sampela samting bilong God, na yumi harim tok bilong Em pinis long sampela samting bilong Em, na yumi bilipim na trastim pinis ol sampela samting bilong God. Olsem na, yumi save pinis long ol sampela tingting na laik na pasin na wok bilong God. Tasol, God i laik yumi mas save moa yet long Em.
Nambawan samting long kristen laip bilong yumi i olsem, yumi mas kisim save moa long God. Taim yumi kisim save moa long God, orait dispela save bai senisim tingting na pasin bilong yumi na hau yumi sindaun wantaim ol narapela manmeri. Taim yumi kisim save moa long God, orait bai yumi lavim Em moa na yumi amamas long Em moa na yumi aninit long Em moa na yumi litimapim nem bilong Em moa.
Orait na hau na bai yumi save moa long God? Pol i tokaut long 2-pela samting….
1. Yumi mas kisim save i trupela save.
Long lain 17 Pol i prea long God, bai God i ken i givim trupela save long ol lain bilong God i stap long Efesus. Em olsem na trupela save em i samting God yet i mas givim yumi – em i no samting yumi yet i ken i kamapim long laip bilong yumi. Long dispela as yumi mas prea olsem aposel Pol na askim God long givim trupela save long yumi.
Na trupela save i wanem kain save? Long Buk Song 111:10 i gat dispela toktok i stap….
10Sapos yu pret long God, orait dispela em i stat long yu kisim trupela save. Olgeta manmeri i bihainim wei bilong God ol i gat gutpela tingting. Long God tasol yumi mas givim biknem oltaim oltaim.
Pret long God em i stat bilong trupela save. Manmeri i bihainim wei bilong God em i gat gutpela tingting na dispela em i stat bilong trupela save. Taim wanpela man o wanpela meri i tingim olsem God Em i trupela God tumas, na em i pret long God (em i daunim em yet na em i rispektim God i BIKPELA), na em i tanim bel na sindaun aninit tru long God na em i bilipim na trastim na bihainim olgeta tok bilong God (em i bilipim na trastim God long kisim bek em long feitful wok bilong Jisas long diwai kros tasol olsem God i tok), em nau em i stat long kisim trupela save.
Dispela em i trupela save bikos God yet Em i oana na bos bilong olgeta samting yumi sindaun long en. Dispela em i trupela save bikos laip na dai bilong olgeta manmeri i stap long han bilong dispela trupela God. Olsem na, sapos yu gat trupela save, orait bai yu tingim dispela God i bin wokim yu na i givim win long yu na i givim olgeta samting long yu, na bai yu pret long Em (rispektim na onarim Em) na stap aninit tru long Em.
Manmeri i kisim trupela save em ol manmeri i pret long God na i harim olgeta tok bilong God. Ol i no pret long man. Nogat. Ol i no pret long lusim toktok na rot ol man i makim na bihainim. Nogat. Ol i bilipim na trastim God long kisim bek ol long feitful wok bilong Jisas long diwai kros tasol olsem God i tok, na ol i tok tenkyu long God long wok bilong Jisas na ol i bihainim Em.
2. Yumi mas kisim klia tingting long as na minim bilong Tok bilong God.
Long wanem as yumi mas klia long as na minim bilong Tok bilong God? Yumi mas klia long as na minim bikos i no gat narapela rot na bai yumi save tru long God.
God Em i wanpela bikpela Man tumas na yumi no fit long skelim tingting bilong yumi yet na yumi save long God. Nogat tru. God yet i mas tokim yumi. Na Em i tokim yumi pinis – Tok bilong God – Baibel – em i toktok bilong God yet. Tok bilong God – Baibel – em i tok God yet i givim yumi, bai yumi ken i save gut long Em.
Taim God i givim Tok bilong Em i kam long yumi, em nau, God i putim Em yet long ples klia. God Em i hait na yumi no inap lukim Em – God Em i spirit na yumi no lukim Em. Tasol yumi ken i save long Em. Hau? Em i bin tokaut long ol samting Em i laik yumi mas klia long em. God Em i no givim Tok bilong Em nating. Nogat. Em i givim Tok bilong Em long yumi bikos Em laik yumi mas save long Em.
Em olsem na maski driman na maski “profet toktok” bilong ol sampela manmeri. Yumi no nidim ol dispela samting bikos yumi gat Tok bilong God yet i stap – yumi i gat Baibel i stap. Yumi no ken i trastim tok bilong ol man o driman bilong ol man. Nogat. Yumi ken i trastim Tok God yet i bin givim yumi. Sapos yumi laik save moa long God, orait yumi mas skelim na kisim trupela as na minim bilong olgeta Tok bilong God.
God i laik yumi save moa long Em.
God i laik yumi kisim trupela save, na Em i laik yumi kisim klia tingting long as na minim bilong Tok bilong Em. Em i givim Holi Spirit long yumi bilong stiaim yumi long trupela save na long trupela as na minim long Tok bilong Em. Long dispela rot tasol yumi ken i save long God na bai yumi ken i save moa long Em.
Glenn.
