Efesus 5:25-33.
Long las stadi yumi bin skelim toktok God i mekim long sindaun bilong marit meri bilong sios femili komyuniti bilong God. Nau bai yumi skelim toktok God i mekim long sindaun bilong marit man bilong sios femili komyuniti.
Na yumi save pinis, long Efesus 4:17 aposel Pol i tok pinis long sios femili olsem, “Yupela no ken i wokabaut moa olsem ol haiden Jentail manmeri.” Na long Efesus 4:23 em i skruim dispela tok olsem, “Nau tingting bilong yupela mas kamap nupela, na laip bilong yupela mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela bai i stap stretpela na holi olgeta.”
Na long Efesus 5:25-33 Pol i skruim dispela tok na em i makim ol marit man. Na i olsem Pol i tok, “Yupela marit man bilong sios femili, yupela no ken i stap olsem ol haiden manmeri. Nau tingting bilong yupela long marit i mas kamap nupela, na laip bilong yupela long marit i mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela insait long marit bilong yupela bai i stap stretpela na holi olgeta.”
Orait, bikpela het toktok nau yumi mas kisim i olsem….
Long sios bilong Krais, man i mas lavim meri bilong em wankain olsem Jisas i bin lavim sios na Em i lusim laip bilong Em bilong sevim sios.
Sapos yu man, na yu bin tanim bel na yu bilipim na trastim God long kisim bek yu long feitful wok bilong Jisas long diwai kros na yu bihainim Em, orait yu bilong sios femili komyuniti bilong God, na God i laik yu lavim meri bilong yu wankain olsem Jisas i lavim sios na i lusim laip bilong Em bilong sevim sios (lukim lain 25).
Long marit bilong ol sios femili komyuniti bilong God man em i het bilong meri bilong em wankain olsem Krais Em i Het bilong sios. Na dispela i minim olsem man i mas lavim meri bilong em wankain olsem Jisas i lavim sios bilong Em. Long dispela graun ol man i stap het ol i laik bosim na kontrolim ol narapela manmeri, tasol yumi no ken i stap het bilong meri bilong yumi long dispela kain pasin. Nogat. Yumi mas lavim meri bilong yumi olsem Krais i lavim sios na i lusim laip bilong Em bilong sevim laip bilong ol.
Long sios femili bilong God tupela marit i no ken i stap olsem ol haiden marit manmeri i stap na bihainim pasin bilong ol haiden marit manmeri. Nogat. Tupela marit i no ken i stap olsem ol marit manmeri bilong ples na bihainim pasin bilong marit manmeri bilong ples. Nogat. Long sios femili bilong God man bai lavim meri bilong em olsem Jisas i lavim sios na i lusim laip bilong Em bilong baim bek laip bilong manmeri bilong sios, na meri bai amamas bilong i stap aninit long dispela lavim bilong man bilong em.
Lavim bilong Krais.
Lukim Efesus 5:22-33 na skelim lain 25 na 28 na 32.
3-pela taim Pol i tokim ol manmeri long sios bilong taun Efesus olsem, “Yupela man, yupela mas lavim meri bilong yupela.” Na lavim em i wanem kain pasin? Lukim lain 25 gen. Man i mas lavim meri bilong em wankain olsem Krais i bin lavim sios bilong Em na Em i lusim laip bilong Em bilong helpim sios.
Tingim….
- Krais i no tingim Em yet. Nogat. Em i bin tingim ol narapela manmeri. Em i no tingim sindaun bilong Em yet. Nogat. Em i tingim sindaun bilong ol narapela manmeri na Em i lusim gutpela sindaun long heven na Em i kam hia long dispela graun na Em i kisim hat laip bilong helpim ol lain manmeri God i bin makim na givim Em.
- Krais i no tingim nem bilong Em yet. Nogat. Em i kisim nem nogut long ai bilong ol lotu manmeri na Em i kisim nem nogut long ai bilong olgeta manmeri taim ol i nilim Em long diwai kros. Jisas i gat biknem, tasol Em i no kea long nem bilong Em yet. Nogat. Em i kea long ol manmeri Em bai sevim taim Em i dai long diwai kros.
- Krais i no tingim amamas bilong Em yet. Nogat. Em i kisim pen na hevi tasol long dispela graun. Sampela taim Krais Em i pilim bikpela hevi tumas na Em i sindaun na krai tasol. Na taim Em i dai long diwai kros Em i kisim bikpela pen na hevi bilong ol manmeri bilong Em. Em i kisim hel bilong ol lain manmeri God i bin givim Em.
- Na Krais i no tingim laip bilong Em yet. Nogat. Em i lusim laip bilong Em bilong sevim laip bilong ol lain manmeri God i bin makim na givim Em.
- Krais Em i no selfis. Nogat. Em i no selfis na tingim Em yet na tingim ol samting bilong em yet. Nogat. Em i tingim ol manmeri God i bin givim Em – Em i tingim sios femili – na Em i lusim laip bilong Em bilong kisim bek laip bilong olgeta manmeri bilong sios femili komyuniti bilong Em. Em i mekim ol klin. Em i mekim ol naispela long ai bilong God bilong God i kisim bek ol.
Lavim em i dispela kain pasin. Na yumi man, yumi mas lavim meri bilong yumi olsem. Lukim lain 28 gen. Yu no ken i kea long ol samting bilong yu yet. Nogat. Yu mas kea long ol samting bilong meri bilong yu.
Yu no ken i wok hat bilong kamapim gutpela sindaun bilong yu. Nogat. Yu mas wok hat bilong kamapim gutpela sindaun bilong meri bilong yu. Yu no ken i wok hat bilong kamapim na lukautim gutpela nem bilong yu. Nogat. Yu mas wok hat long kamapim na lukautim gutpela nem bilong meri bilong yu. Yu no ken i wok hat bilong kamapim gutpela amamas bilong yu. Nogat. Yu mas wok hat na kamapim gutpela amamas long meri bilong yu. Yu no ken i wok hat bilong kamapim gutpela laip bilong yu. Nogat. Yu mas wok hat bilong kamapim gutpela laip long meri bilong yu. Yu mas lavim meri bilong yu.
Na man i no lavim meri bilong em olsem Krais i lavim ol sios femili bilong Em, orait dispela man i sakim tok bilong God na em i no bihainim Jisas gutpela. Yumi man i laik bihainim Jisas, yumi mas lavim meri bilong yumi wankain olsem Jisas i bin lavim yumi na i lusim laip bilong Em bilong sevim laip bilong yumi.
Mi laik stretim wanpela samting planti man i save paul long em….
Planti man i tingim olsem ol i het bilong meri. Na ol i yusim dispela tok bilong bosim meri bilong ol na mekim nogut long meri bilong ol. Ol i yusim dispela tok bilong daunim meri bilong ol na apim ol yet.
Na ol i tingim dispela tok i minim olsem meri i mas bihainim olgeta laik bilong man na meri i mas tingting tasol long amamasim man bilong em. Ol i tingim dispela tok i mekim ol i kamap nambawan samting na meri bilong ol na pikinini bilong ol i mas baudaun (brukim skru) long ol.
Harim. Meri em i no wokboi nating bilong yu. Nogat! Planti man i save tingim meri em i wokboi nating tasol bilong wokim gaden na pikim kopi na kamapim pikinini.
Ol dispela kain tingting em i paul tingting na em i tingting bilong haiden manmeri. Man i save bosim meri bilong em olsem, orait em i no bihainim Tok bilong God. Nogat. Em i bihainim pasin bilong ples tasol. Em i bihainim pasin i nogut olgeta.
Harim tok bilong Jisas yet long Mak 10:45….
45Pikinini Bilong Man Em i no kam bilong mekim ol manmeri i stap wokboi bilong Em. Nogat. Em i kam bilong mekim wok bilong helpim ol na bilong givim laip bilong Em yet bilong baim bek ol dispela planti manmeri.”
Man em i het bilong meri olsem Krais Em i het bilong sios. Na Krais Em i het bilong sios olsem wanem? Em i bin lavim sios. Em i lavim ol dispela manmeri God i bin givim Em na Em i lusim laip bilong Em bilong baim bek laip bilong ol. Em i no mekim ol i kamap wokboi bilong Em. Nogat. Em i lusim laip bilong Em bilong sevim laip bilong ol na long dispela pasin Krais Em i stap Het bilong ol. Long dispela wei Krais Em i Het bilong sios. Het bilong sios i bin mekim bikpela wok long sios bilong sevim ol.
Olsem na, sapos yu laik i stap het bilong meri bilong yu, orait yu mas lavim meri bilong yu na mekim wok long helpim meri bilong yu olsem Krais i lavim sios na Em i mekim wok bilong helpim sios. Sapos yu laik i stap het bilong meri bilong yu, orait yu ken i lusim laip bilong yu bilong sevim laip bilong meri bilong yu. Mi minim olsem, yu ken i lusim tingting long olgeta samting bilong laip bilong yu na yu mekim gutpela wok long olgeta samting long laip bilong meri bilong yu.
Yumi no ken i stap het bilong meri bilong yumi olsem kastem pasin bilong yumi. Nogat. Yumi no ken i stap het bilong meri bilong yumi olsem ol man long ples i mekim. Nogat. Yumi mas lusim olpela wei bilong kastem pasin bilong ples, na yumi kisim na bihainim wei bilong God long marit bilong yumi. Yumi mas lavim meri bilong yumi.
Lavim bilong Jisas i dip tumas moa.
Lukim lain 25-33 na yumi tingim na skelim….
Lain 25. Man i mas lavim meri bilong em olsem Krais i bin lavim sios. Hau na Krais i lavim sios? Em i lusim laip bilong Em yet bilong sevim laip bilong olgeta manmeri bilong sios femili.
Lain 26. Krais Em i lusim laip bilong Em bilong mekim sios holi na i no gat asua long ai bilong God. Ol manmeri bilong sios ol i doti – sin i mekim ol doti long ai bilong God. Tasol Krais i mekim wok bilong wasim ol na mekim ol i kamap klin long ai bilong God. Long dispela rot Krais i sevim manmeri bilong sios femili.
Lain 27. Jisas i kam na Em i kisim olgeta doti bilong ol sios femili, na Jisas i pinisim olgeta pe dispela doti bilong sios femili i bin kamapim – em olsem na Jisas Em i kisim pe bilong ol dispela doti na pinisim. Long dispela rot nau ol sios femili i stap naispela tru long ai bilong God. Ol i klin na ol i no gat wanpela liklik mak bilong sin i stap bilong spoilim ol – nogat – ol i stap naispela tru long ai bilong God.
Lain 28-29. Na long dispela seim wei man i mas lavim meri bilong em olsem meri em i bodi bilong em yet. Tingim. Jisas i lavim sios femili na Em i pas olgeta long ol na Em i kisim sin bilong ol olsem dispela sin em i sin bilong Em yet. Na Em i kisim pe bilong ol dispela sin olsem em i pe bilong sin bilong Em yet. Long dispela rot Jisas Em i pas olgeta long sios femili bilong Em.
Na wankain olsem Jisas i pas olgeta long sios femili bilong Em (bodi bilong Em) na Em i kisim sin na Em i kisim pe bilong sin olsem ol dispela samting em i samting bilong Em yet, orait man i mas pas olgeta long meri bilong em, na em i mas kisim meri bilong em olsem meri em i hap bodi bilong em yet, na em i mas lukautim em olsem em i save lukautim em yet. Long wanem, man na meri i pas olgeta long wanpela bodi.
Lain 30-31. Long pasin bilong marit man i mas lusim papamama bilong em na i pas olgeta long meri bilong em. Em i no pas moa long papamama bilong em. Nogat. Em i pas nau long meri bilong em – na tupela i nupela femili na tupela i nupela hauslain na tupela i wanpela nupela bodi.
Tingim. Krais i bin lusim Papa God long heven na Em i kam daun na Em i pas olgeta long ol manmeri God i bin givim Em, na Em i givim laip bilong Em bilong baim bek laip bilong ol. Em i pas olgeta long ol na Em i kamap olsem Em i sin samting olsem ol, na Em i kisim pe bilong sin olsem Em i wanpela bilong ol.
Long dispela seim kain wei man i mas lusim papamama bilong em na em i mas pas olgeta long meri bilong em – olgeta samting bilong meri em i samting bilong em na olgeta samting bilong man em bilong meri bilong em – tupela i kamap wanpela – tupela i serim olgeta samting wantaim. Wankain olsem Jisas i karim pe bilong sin bilong ol sios femili bodi bilong Em, orait man na meri mas karim na serim olgeta samting bilong tupela wantaim na i stap wanpela.
Long 32-33. Pol i tok olsem, dispela samting i dip tumas na i hat long yumi klia olgeta long en. Tasol ol dispela i soim olsem hau man i mas pas olgeta long meri bilong em na lavim em na lukautim em na karim na serim olgeta samting wantaim em – wankain olsem Jisas i pas olgeta long yumi na i karim pe bilong sin bilong yumi na Em i serim olgeta blesim bilong Em long heven wantaim yumi.
Yumi man, yumi mas kisim dispela kain tingting na yumi pas olgeta long meri bilong yumi na yumi lavim em dip tru tumas olsem Jisas i lavim yumi sios femili bilong Em na i pas olgeta long en.
Pasin bilong lavim meri em i bikpela samting tru!
Orait, yumi ol man yumi gat wanem kain tingting nau? Sapos yumi bin tanim bel na yumi bilipim na trastim God long kisim bek yumi long feitful wok bilong Jisas na yumi bihainim Jisas, orait yumi bilong sios femili bilong God, na yumi mas lavim meri bilong yumi olsem Jisas i bin lavim yumi – olsem Jisas i bin lavim sios. Em i pas olgeta long sios na Em i lavim sios na Em i lusim laip bilong Em bilong baim bek ol. Em i karim hevi bilong sios na Em i serim olgeta blesim bilong Em wantaim sios. Yumi man yumi mas lavim meri bilong yumi wankain.
Em tasol.
