Sios mas i stap wanpela na i stap wanbel wantaim.

Dispela buk Efesus i pulap long ol planti gutpela gutpela toktok.

Pastaim, long sapta 1, Pol em i stori long wok God i bin mekim – long bipo bipo, taim dispela graun i no kamap yet, God i bin makim ol wanwan manmeri na Em i givim ol long Krais.

Em i givim ol long Krais Jisas bai Jisas i mekim wok bilong mekim ol holi na i no gat asua long ai bilong God, bai God i kisim bek ol – bai God i adoptim ol na mekim ol i kamap femili bilong Em.

Na Pol em i bin stori long wok bilong Holi Spirit tu. Holi Spirit i save mekim wok insait long bel bilong ol manmeri God i bin makim na Jisas i mekim ol holi na i no gat asua long ai bilong God. Holi Spirit Em i mekim wok bilong opim ai na ia na bel bilong ol, na Em i givim bilip long ol. Long dispela as tasol ol i bilipim na trastim feitful wok Jisas i bin mekim bilong ol na ol i stap aninit tru long Em.

Long sapta 2-3 Pol em i stori long sios femili bilong God. Ol manmeri God i bin makim na pasim long Jisas, na Holi Spirit i wok insait long ol na i givim trupela bilip long ol, orait God Em i pasim ol wantaim na Em i kamapim sios femili bilong Em. Sios femili bilong God em i wanpela nupela komyuniti we ol manmeri bilong God i pas wantaim.

Bipo ol i stap nabaut long ol wanwan komyuniti bilong dispela graun. Tasol nau ol i pas long wanpela nupela komyuniti. God i save bringim ol dispela wanwan manmeri Em i bin makim na i givim long Jisas na Em i pasim ol wantaim na Em i kamapim wanpela nupela komyuniti. Na bihain, ol wanwan nupela komyuniti bilong God bai pas wantaim long heven na olgeta bai sindaun wantaim insait long olgeta blesim bilong heven i go i go olgeta.

Yu save, wanpela bikpela toktok long Buk Efesus i olsem, olgeta wok bilong kisim bek na bilong kamapim sios femili em i wok God yet i bin mekim – Papa God wantaim Pikinini bilong God (Jisas) wantaim Holi Spirit – olgeta wok bilong ol dispela samting God tasol i bin mekim – yumi no mekim wanpela wok long dispela samting. Nogat tru.

Yumi i bilipim na trastim God long kisim bek yumi long feitful wok bilong Jisas long diwai kros tasol – yumi i bihainim Jisas – pastaim yumi i stap insait long sin na dai na yumi no gat trupela laip i stap insait long yumi. Tasol God i kamapim laip insait long yumi na Em i givim bilip long yumi na Em i bringim yumi i kam insait long nupela komyuniti bilong Em. God i bin mekim ol dispela samting long yumi wanwan bikos God Em i God bilong grasia na marimari.

Pol i bin mekim ol dispela tok i go i go i go na nau long sapta 4 em i tok olsem, long dispela as yupela – yupela God i singautim i kam, yupela God i bringim i kam – yupela mas wokabaut long pasin i gutpela bilong ol manmeri God i singautim na i bringim i kam.

God i mekim planti gutpela gutpela wok na Em i bringim yumi wanwan i kam insait long sios femili komyuniti bilong Em, olsem na, long dispela as, yumi mas wokabaut long pasin i gutpela bilong ol manmeri God i singautim na i bringim i kam.

Yupela man na meri na boi na gel God i bin singautim i kam – yupela i bilipim na trastim God long kisim bek yupela long feitful wok Jisas i bin mekim tasol – yupela i pas long Jisas na pas wantaim long sios femili – orait yupela wokabaut nau long pasin i gutpela bilong manmeri God i singautim i kam.

Orait, wanem pasin i gutpela pasin bilong ol manmeri God i singautim i kam? Long sapta 4-6 Pol i tokaut long ol planti pasin i gutpela pasin bilong ol manmeri God i singautim na bringim i kam.

Tasol nau bai yumi statim na yumi skelim ol wanwan pasin i gutpela pasin namel long sios femili bilong God. Lukim lain 2-3 – Pol i tokaut long 6-pela samting….

• Yupela mas wokabaut long pasin we yupela no apim yupela yet.
• Yupela mas sindaun isi wantaim.
• Yupela no ken i belhat.
• Yupela no ken i les hariap.
• Yupela mas bihainim wei bilong lavim.
• Yupela mas i stap isi wantaim na lukautim ol narapela manmeri God i singautim i kam.

Ol dispela pasin em i gutpela pasin na em i rait pasin bilong yumi wanwan manmeri bilong Sios bilong God. Dispela pasin i mas stiaim tingting na wokabaut bilong yumi bilong nupela komyuniti bilong God.

Sios i mas i stap wanpela na i stap wanbel wantaim.

Na yumi tingim na skelim. Ol dispela kain pasin em i pasin bilong manmeri i stap wanpela na i pas gutpela wantaim. Ol dispela kain pasin em i pasin i mekim wanbel pasin i stap namel long sios femili bilong God. Em olsem na Pol i mekim dispela tok bai yumi manmeri bilong nupela komyuniti bilong God yumi i stap wanpela na yumi i stap wanbel wantaim. Dispela pasin em i gutpela pasin na em i rait pasin bilong yumi wanwan manmeri bilong Sios bilong God. Em i gutpela na em i rait long yumi sios femili bilong God yumi i stap wanpela na yumi i stap gutpela wantaim.

Wanpela bilong yumi i no winim narapela bilong yumi.

Long lain 3-6 Pol i givim sampela tingting long yumi bilong helpim yumi bihainim pasin i gutpela long yumi sios femili i ken i bihainim – bilong helpim yumi pas wantaim na i stap gutpela na i stap wanbel wantaim. Lukim lain 3-6 – Pol em i makim 7-pela samting….

1. Holi Spirit tasol i givim laip long yumi wanwan. Yu no kamapim laip long yu yet na mi no kamapim laip long mi yet. Nogat. Holi Spirit i kamapim laip long yumi wantaim na dispela i pasim yumi long nupela lain manmeri i gat laip wantaim.
2. Na i no narapela narapela samting i kamapim laip long yumi. Nogat. Em i wanpela Holi Spirit bilong God i kamapim laip long yu na i kamapim laip long mi na i pasim yumi wantaim long wanpela femili bilong God tasol.
3. Na i no narapela narapela samting i kisim yumi i kam long narapela narapela kain bilip. Nogat. Dispela wanpela trupela God tasol i kisim yumi i kam long wanpela trupela bilip tasol – dispela God i kisim mi i kam Em i kisim yu i kam tu, na Em i kisim yumi wantaim i kam long wanpela trupela bilip long feitful wok bilong Jisas.
4. Wanpela BIKPELA Em i het bilong yumi wantaim – wanpela man bilong dispela graun em i no het bilong yu na narapela man em i het bilong mi. Nogat. Jisas tasol Em i BIKPELA na Em i het bilong yumi wanwan.
5. Na baptais bilong yu i no winim baptais bilong narapela manmeri insait long trupela sios femili. Nogat. Baptais bilong yu na baptais bilong mi em i mak bilong soim olsem, wok bilong Jisas i mekim yumi klin na long dispela rot yumi pas wantaim long dai na kirap bek bilong Em.
6. Wanpela God Em i Papa bilong yu na bilong mi na bilong olgeta manmeri bilong sios.
7. Wanpela God tasol, seim God tasol, Em i antap long yumi, na Em i wok namel long yumi, na Em i stap insait long yumi olgeta i bilong Krais.

Pol i mekim ol dispela toktok bilong soim yumi olsem, wanpela bilong yumi i no winim narapela bilong yumi. Yumi olgeta yumi stap long seim level – long wanpela level.

Long ol komyuniti bilong dispela graun i gat sampela man i winim ol narapela man. Yu save, sampela man i stap bikman na sampela man i stap nating tumas. Long sampela komyuniti bilong dispela graun ol tingim olsem, man i winim meri. Man i bikpela samting na ol meri i no bikpela samting. Yu save, insait long ol komyuniti bilong dispela graun ol sampela manmeri i save luk-daun long ol narapela manmeri.

Tasol, long komyuniti bilong God olgeta manmeri i stap long wanpela level. Wanpela Holi Spirit i bin bringim ol i kam na ol i stap wanpela grup tasol. Wanpela Papa, wanpela BIKPELA, wanpela Holi Spirit, wanpela bilip – wanpela God i wok insait long ol na namel long ol na i stap insait long ol. Olsem na, i no gat as long wanpela i apim em yet na luk-daun long narapela. I no gat as long yu bel hat long wanpela o yu les long wanpela. I no gat as long yu tok, “Mi no laik sindaun wantaim dispela manmeri.”

Grasia na lavim bilong God.

Yumi i bilipim na trastim God long kisim bek yumi long feitful wok bilong Jisas, orait yumi klia liklik long olgeta wok God i mekim bilong kisim bek na adoptim yumi na mekim yumi femili bilong Em. Em olsem na yumi save long grasia bilong God long yumi. Yumi save long lavim bilong God long yumi.

Tingim. Olgeta pasin God i tokim yumi sios femili i mas mekim, orait God yet i save mekim long yu na Em i mekim long mi wantaim. Sapos God i apim Em yet, orait Em i no inap sori long yumi na helpim yumi sin manmeri. Lukim tok bilong Pol long Filipai 2:6-8….

⁶Krais Em i wankain tru olsem God, tasol Em i no tingim dispela em i samting Em i ken i yusim bilong apim nem bilong Em yet. Nogat. ⁷Em i daunim Em yet, na Em i mekim Em yet i kamap wankain tru olsem wanpela wokboi nating. Em olsem na Em i kamap wankain tru olsem ol man. ⁸Em i kamap wankain tru olsem wanpela man, na Em i daunim Em yet na Em i bihainim tru laik bilong God na Em i dai. Yes, Em i bihainim tru, maski Em i dai long diwai kros.

Na tingim. Sapos God i no sindaun isi wantaim yumi, na God i stap belhat tasol long yumi, na God i les hariap long yumi, na God i no bihainim wei bilong lavim, na God i no stap isi wantaim yumi na lukautim yumi, orait yumi bai olsem wanem? Bai yumi lus olgeta tasol. Bai yumi bagarap olgeta.

Em i dispela wanpela God i mekim ol dispela grasia wok na lavim wok long yumi wanwan, na long dispela as yumi ken i bihainim Papa bilong yumi na yumi mekim pasin namel long yumi yet olsem God i mekim namel long yumi. Sapos yu les, orait ating yu no save tumas long grasia bilong God long yu.

Yumi mas wok hat bilong yumi i stap wanpela na i stap wanbel wantaim.

Long lain 2 Pol i tok olsem…. “Yupela mas wok hat long i stap wanpela na i stap wanbel wantaim.”

Dispela pasin bilong sios i no save kamap nating. Nogat. Yumi mas wok hat na mekim dispela kain pasin i kamap na i stap namel long yumi.

Em olsem na yumi holim tingting olsem, wanpela bilong yumi i no winim narapela bilong yumi. Na yumi holim tingting long grasia na lavim bilong God long yumi yet, na yumi tingim…..

• “Mi man nogut, tasol Jisas i putim mi paslain long Em yet na Em i lusim laip bilong Em bilong baim bek laip bilong mi. Em olsem na mi no ken i apim mi yet bilong winim ol brata na sista bilong mi. Nogat. Bai mi putim ol paslain long mi.”

• “Mi gat planti rong i stap long laip bilong mi, tasol God i mekim bikpela wok long dai bilong Jisas bilong sindaun isi wantaim mi. Em olsem na i no gat as long mi no sindaun isi wantaim ol brata na sista bilong mi – em ol manmeri God i sindaun isi wantaim.”

• “Sin i stap yet long laip bilong mi na God i lukim, tasol God i tingim feitful wok bilong Jisas long diwai kros na belhat bilong Em i no sikrap long mi. Em i fogivim mi na mi amamas long dispela fogivim bilong God. Em olsem na taim mi pilim belhat, orait mi mas tingim fogivim bilong God long ol rong bilong mi na mi lusim belhat bilong mi long ol sampela brata na sista bilong mi.

• “Olgeta de mi save sakim ol sampela tok bilong God, tasol God i no save les hariap long mi. Nogat. Em i fogivim mi i go i go na Em i pas long mi i go i go. Em i no lusim mi. Em olsem na mi no ken i lusim brata na sista bilong mi – mi no ken i les hariap long ol.”

• “Mi no gutpela na naispela man na God i lavim mi. Nogat. God i wokim disisen na Em i lavim mi. Na Em i soim lavim bilong Em long dai bilong Jisas long diwai kros. Mi amamas long lavim bilong God long mi, olsem na, mi mas wokim disisen bilong mi na mi bihainim dispela wei bilong lavim long ol brata na sista bilong mi.”

• “God i save lukautim ol manmeri long femili bilong Em – Em i no laik ol i pundaun na bagarap. Mi amamas long lukautim bilong Em long mi. Em olsem na mi mas kisim dispela kain pasin na mi wok long lukautim ol brata na sista bilong mi.”

God i mas kisim biknem.

Lukim Efesus 3:20-21. God i mas kisim biknem long Jisas na long sios. Yumi ken i askim God long mekim wok insait long yumi na senisim yumi bai yumi ken i stap wanpela na i stap wanbel wantaim ol brata na sista bilong yumi long sios femili. Na taim yumi i stap wanpela na i stap wanbel wantaim ol brata na sista bilong sios, orait long dispela pasin God bai kisim biknem. God bai kisim biknem long feitful wok bilong Jisas bilong kisim bek yumi na God bai kisim biknem taim sios femili bilong Em i bihainim pasin bilong Em na ol i stap wanpela na i stap wanbel wantaim.

Em tasol.