Moning.
Wanpela taim mi autim tok long maket na wanpela man em i no amamas long tok mi autim. Mi autim tok olsem, “Yumi yet yumi no fit long kamapim stretpela pasin God i save laikim, nogat. Olsem na, God i mas stretim yumi, God i mas givim stretpela pasin long yumi bilong kolim yumi stretpela manmeri, na long dispela rot God i kisim bek yumi.”
God i transferim sin bilong ol lain bilong Em i go long Jisas, na Jisas i kisim na pinisim pe bilong sin bilong ol long diwai kros. Na tu, God i transferim stretpela pasin bilong Jisas i kam long ol. Long dispela rot God i kolim ol “stretpela manmeri”. Em olsem na long dispela rot tasol, God i kisim bek sin manmeri.
Yu save, planti manmeri i autim tok olsem, “Yu yet yu mas kamapim stretpela pasin bilong yu yet, na sapos yu wokim na mekim ol gutpela na stretpela pasin, orait God i ken i amamas long dispela stretpela pasin bilong yu na kisim bek yu.” Ol i autim tok olsem na mi save tok olsem, dispela tok i no tru na i pulim bilip bilong ol manmeri i go long samting i no tru, na long dispela pasin bilip bilong ol i popaia.
Na man i no amamas long mi long maket em i mekim tok olsem, “God i ken i amamas long pasin bilong yumi na kisim bek yumi long naispela pasin yumi yet i mekim. Sapos yumi lavim God na lavim ol manmeri, em nau, yumi mekim gutpela pasin God i save laikim na God i ken i kisim bek yumi long dispela naispela pasin yumi mekim.”
Tasol, harim tok bilong aposel Pol….
1Bipo, yupela i stap insait tru long ol kainkain rong na sin, na spirit bilong yupela i no gat laip. 2Nau yupela no stap olsem, tasol long bipo yupela bihainim olgeta pasin bilong dispela graun na yupela bihainim hetman bilong ol spirit bilong pasin nogut, na em i dispela spirit i wok yet insait long ol manmeri i save sakim tok bilong God. 3Bipo, yumi olgeta i stap olsem ol dispela kain manmeri na yumi amamas long bihainim sin bilong olpela bel bilong yumi na yumi bihainim laik nogut na tingting nogut bilong olpela bel. Olsem na, wankain ol narapela manmeri yumi tu yumi bin i stap aninit long bel hat bilong God. Efesus 2:1-3.
Pol i mekim dispela toktok long ol manmeri bilong God i stap long taun Efesus. Ol i bilipim na trastim God long kisim bek ol long feitful baim bek wok bilong Jisas long diwai kros. Tasol pastaim ol i no stap olsem. Nogat. Pastaim ol i stap insait tru long ol kainkain rong na sin, na spirit bilong ol i no gat laip. Pastaim ol i stap wankain olsem olgeta manmeri bilong dispela graun na ol i stap aninit long bel hat bilong God.
Tingting na bel bilong yumi i no wok long ol samting long sait bilong God.
Pol i tok olsem, “….spirit bilong yupela i no gat laip. ” Em i minim olsem, tingting na bel bilong ol i dai pinis long olgeta samting long sait bilong God. Tingting na bel bilong ol em i spirit bilong ol. Em olsem na, Pol i minim olsem, olgeta samting long tingting na long bel i dai pinis long olgeta samting long sait bilong God.
Olgeta manmeri i stap olsem – spirit bilong ol i no gat laip. Na yumi i bilipim na trastim God long kisim bek yumi long feitful baim bek wok bilong Jisas long diwai kros, pastaim, yumi tu yumi stap olsem – pastaim spirit bilong yumi i no gat laip.
Em olsem na bodi bilong yumi i save wok, na bel na tingting bilong yumi i save wok. Tasol, ol dispela samting i no wok long ol samting long sait bilong God – i no wok long bihainim laik na save bilong God. Nogat. Ol dispela samting i wok long ol samting long sait bilong yumi yet – i wok long bihainim ol laik na save bilong yumi yet. Em olsem na Pol i tok, tingting na bel bilong yumi – spirit bilong yumi – i no gat laip long God.
Sin i holimpas tru yumi olgeta.
Sapos spirit bilong yumi i no gat laip long ol samting bilong God, orait hau na bai yumi harim tok bilong God na bihainim? Hau na bai yumi lavim God na lavim ol narapela manmeri? Hau na bai yumi mekim pasin God i save laikim?
Yumi no inap tru bikos yumi no gat laip insait long spirit bilong yumi. Bodi i save wok, tasol yumi no gat laip insait long spirit bilong yumi. Yumi no gat strong. Yumi no gat pawa bilong harim tok bilong God na bilipim na trastim Em. Yumi no fit long tanim bel na yumi no fit long bihainim laik bilong God – sin i holimpas tru yumi olgeta. Em olsem na, hau na bai God i kisim bek yumi long ol gutpela pasin yumi no save mekim na yumi no fit long mekim?
Tasol God….
4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais. Efesus 2:4.
God i stretim ol lain bilong Em long taun Efesus long feitful baim bek wok bilong Jisas long diwai kros. Na God, long rot bilong Holi Spirit, taim ol i stap yet insait long ol kainkain rong na sin, Em i kamapim laip long ol. Em olsem na Em i opim ai na ia na bel bilong ol, bai ol i ken i luksave long wok bilong God long feitful baim bek wok bilong Jisas long diwai kros na ol i tanim bel na ol i bilipim na trastim Em na bilipim na trastim na bihainim Jisas.
Na bai yumi mekim wanem? Sapos God i opim ai na ia na bel bilong yu pinis olsem Em i bin mekim long ol lain bilong Em long taun Efesus na yu bilipim na trastim God long kisim bek yu long feitful baim bek wok bilong Jisas, orait yu tok tenkyu tasol na yu litimapim nem bilong God na yu bihainim Em olsem ol lain bilong God bilong taun Efesus.
Sapos ai na ia na bel bilong yu i no op yet, na yu pret long laip bilong yu na yu pret olsem yu lus, orait yu askim God long opim ai na ia na bel bilong yu, yu askim God long givim klia tingting long yu, na taim yu klia olsem God i kisim bek sin manmeri long feitful wok bilong Jisas tasol, orait yu tanim bel na yu bilipim na trastim God long kisim bek yu long feitful wok bilong Jisas long diwai kros, na yu tok tenkyu long Em na bihainim Em.
Glenn.
