Moning.
Stori bilong yumi i wanem kain stori? Na stori bilong misin bilong yumi na stori bilong lotu bilong yumi i wanem kain stori? Pastaim yumi skelim stori bilong buk Aposel. Lukim Aposel 1:1-11….
1Tiofilus, long fes buk mi bin raitim, mi bin tokaut long stat bilong wok na tisim bilong Jisas. 2Na mi bin stori i go inap long taim God i kisim Em i go antap long heven. Long dispela taim Jisas i bin givim tok long ol aposel bilong Em, em ol man Em i bin makim, na long strong bilong Holi Spirit Em i tokim ol long wanem kain wok ol i ken i mekim. 3Pastaim Em i kisim pen na Em i dai, na bihain Em i kamap long ai bilong ol aposel na Em i mekim planti samting, bai ol i ken i save tru olsem Em i stap laip. Long 40-pela de ol i lukim Em na Em i tokim ol long ol samting bilong kingdom bilong God.
4Na taim Jisas i stap wantaim ol aposel Em i tokim ol olsem, “Yupela no ken i lusim Jerusalem. Nogat. Yupela mas wetim promis bilong Papa. Bipo Mi bin tokim yupela long dispela samting. 5Long wanem, Jon i baptaisim ol manmeri long wara, tasol long liklik taim bai yupela i kisim baptais long Holi Spirit.”
6Em olsem na taim ol aposel i bung wantaim, ol i askim Jisas olsem, “BIKPELA, nau bai Yu kirapim gen kingdom bilong Israel, a?” 7Na Jisas i tokim ol olsem, “Dispela samting i no samting bilong yupela na bai yupela i save long taim na long de Papa i makim. Nogat. Em yet i bosim ol dispela samting. 8Tasol yupela bai kisim pawa taim Holi Spirit i kam long yupela, na yupela bai i stap witnis bilong Mi long Jerusalem, na long olgeta hap bilong distrik Judia na Samaria, na long olgeta 4-kona bilong dispela graun.” 9Na taim Jisas i pinisim dispela toktok God i kisim Em i go antap, na ol aposel i lukluk i stap, na wanpela klaut i karamapim Em na ol i no lukim Em moa. 10Na taim ol lukluk i go antap yet, wantu 2-pela man i gat waitpela klos i sanap wantaim ol. 11Na tupela i tok, “Yupela ol man bilong Galili, long wanem as yupela sanap na lukluk i go antap long skai? Dispela Jisas, Em i lusim yupela na i go antap long heven, Em bai kam bek gen wankain olsem yupela i lukim Em i go long heven.”
Taim Holi Spirit i kam long ol aposel, orait Holi Spirit bai givim strong long ol bilong witnisim Jisas. Taim ol i autim tok bilong feitful wok bilong Jisas long diwai kros na kirap bek bilong Em, orait ol i witnisim Jisas. Holi Spirit bai givim strong long ol bilong ol i ken i lusim ples bilong ol na gaden bilong ol na hauslain bilong ol, na i karim ol kainkain hevi, na ol i witnisim Jisas. Holi Spirit bai givim strong long ol bilong tisim na skulim ol manmeri long feitful wok bilong Jisas na kirap bek bilong Em long olgeta 4-kona bilong dispela graun.
Orait na long wanem as ol aposel bai i stap bilong witnisim feitful wok bilong Jisas long diwai kros na witnisim kirap bek bilong Em? Long rot bilong witnisim Jisas, Jisas bai singautim ol lain manmeri bilong Em – Em bai kisim ol i kam long Em na bungim ol na ol i stap lain manmeri bilong Em. Ol manmeri Jisas i bin lusim laip bilong Em bilong kisim bek, em ol manmeri God i bin givim Em bilong sevim, orait Jisas bai singautim ol na kisim ol i kam long Em na bungim ol. Taim ol aposel i witnisim dai na kirap bek bilong Jisas, orait ol manmeri God i bin makim bilong kisim bek ol bai harim na ol bai kam long Jisas na ol bai bilipim na trastim God long kisim bek ol long feitful wok bilong Jisas, na wantaim ol bai bihainim Em na i stap aninit long bosim bilong Em. Lukim Aposel 13:48….
48Na taim ol Jentail manmeri i harim tok bilong tupela (Pol na Barnabas), ol i amamas na i tok, “Tok bilong BIKPELA i gutpela tru.” Na ol manmeri God i bin makim bilong kisim laip i stap oltaim oltaim, ol dispela manmeri i bilip.
Pol na Barnabas i bin autim tok bilong feitful wok na kirap bek bilong Jisas, tupela i bin witnisim Jisas, na ol manmeri God i bin makim bilong kisim laip, taim ol i harim, orait ol i tanim bel na ol i bilipim na trastim God long kisim bek ol long feitful wok bilong Jisas long diwai kros – ol i kisim laip long feitful wok bilong Jisas.
Yumi skelim sampela toktok long ol narapela hap bilong Baibel bilong helpim yumi klia long dispela samting. Pastaim yumi lukim tok bilong Jisas long Jon 10:27-29….
27Ol sipsip bilong Mi i save harim maus bilong Mi, na Mi save long ol, na ol i bihainim Mi. 28Mi givim laip i stap gut oltaim oltaim long ol, na ol bai i no inap lus. Wanpela man i no inap tru long rausim ol long han bilong Mi. 29Papa bilong Mi i bin givim ol long Mi, Em i winim olgeta samting, na wanpela man i no inap tru long rausim ol long han bilong Papa bilong Mi.
God i bin makim na givim bikpela lain manmeri long Jisas, na Jisas bai givim laip i stap gut oltaim otaim long ol na ol i no inap lus – Jisas bai sevim ol long feitful wok bilong Em long diwai kros. Long rot bilong feitful wok bilong Jisas long diwai kros na kirap bek bilong Em ol manmeri God i makim bilong kisim bek ol bai kisim laip bilong oltaim oltaim – ol i no inap lus.
Na yumi lukim tok bilong aposel Pol long Rom 10:13-14….
13….“Olgeta manmeri i singaut long BIKPELA bai kisim laip.” (Joel 2:32) 14Tasol, hau na bai ol i singaut long BIKPELA sapos ol i no bilipim na trastim Em? Na hau na bai ol i bilipim na trastim Em sapos ol i no bin harim tok bilong Em? Na hau na bai ol i harim tok bilong Em sapos wanpela man i no bin autim tok long ol? 15Na hau na bai wanpela man i autim tok long ol sapos BIKPELA i no bin salim em i go bilong autim tok long ol?
Ol manmeri God i bin makim na givim long Jisas na Jisas i lusim laip bilong Em bilong sevim laip bilong ol, orait ol bai singaut long BIKPELA na ol bai kisim laip. Tasol ol i no inap singaut long BIKPELA nating. Nogat. Pastaim BIKPELA Jisas bai salim man i go bilong autim tok long ol, bilong witnisim feitful wok na kirap bek bilong Jisas, na taim ol i harim tok, orait ol bai bilipim na trastim feitful wok bilong Jisas, na ol bai tanim bel na singaut long Jisas bilong kisim laip (ol bai konfesim sin bilong ol na askim Jisas long sevim ol) – na ol bai kisim laip.
Stori bilong buk Aposel.
Buk Aposel em i stori bilong Jisas i yusim ol aposel bilong singautim na kisim ol manmeri bilong Em i kam na ol i bilipim na trastim feitful wok bilong Em long diwai kros, na ol i kisim laip oltaim oltaim long dispela feitful wok bilong Em. Holi Spirit i givim strong long ol bilong witnisim Jisas, bilong autim tok bilong feitful wok na kirap bek bilong Jisas. Long dispela rot Jisas i kisim i kam ol manmeri God i bin givim Em bilong sevim, na ol i stap wantaim aninit long bosim bilong Em insait long femili bilong God.
Dispela em i stori bilong buk Aposel na dispela i mas i stap stori bilong yumi tu. Jisas Em i no tokim ol aposel long mekim wok bilong witnisim ol samting bilong ol yet (kain olsem ol samting bilong misin bilong ol yet). Nogat. Wok bilong ol aposel em i wok bilong witnisim feitful wok na kirap bek bilong Jisas.
Orait yumi mas skelim olsem, stori bilong yumi na stori bilong misin bilong yumi i olsem wanem?
Glenn.
Sapos yu laik save moa long dispela tok, orait yu lukim Aposel 1:1-11 long Autim Tok long www.pngbibleresources.org.
