Moning.
Taim ol man i sutim tok long mi na daunim mi long sampela samting mi no bin wokim, orait dispela pasin i givim bikpela hevi na sem long mi. Ol i tok, “Yu wokim pasin nogut.” Tasol mi no wokim dispela samting ol i tok long em. Em olsem tasol ol i sutim tok long mi i go yet na mi kisim sem long ai bilong ol manmeri long ples. Ating yu tu yu save long dispela kain pasin…..
- Sampela taim man bilong yu i sutim tok long yu. Yu trai hat long i stap gutpela meri bilong man bilong yu, tasol em i sutim tok long yu na daunim yu. Yu no wokim ol samting nogut, tasol em i sutim tok long yu na sampela taim em i paitim yu bilong dispela samting yu no bin wokim.
- Sampela taim ol man nogut i wokim ol sampela pasin nogut, tasol ol i sutim tok long yu bilong karamapim rong bilong ol yet. Yu no wokim wanpela rong, tasol ol i sutim tok long yu bilong dispela samting yu no bin wokim.
- Sampela taim ol sampela man i hetim yu na ol i tok baksait long yu na daunim yu. Ol tokaut long ol sampela pasin nogut, tasol yu no bin wokim olsem ol i tok. Nogat. Ol i giaman bilong daunim yu na bilong bagarapim yu.
- Na sampela taim yu wokim ol gutpela pasin, tasol ol man i jelas na i tok baksait bilong daunim gutpela samting yu wokim na bilong daunim gutpela nem bilong yu.
Mi tok pinis, ating planti bilong yumi i save long dispela pasin we ol man i sutim tok long yumi na daunim yumi long sampela samting yumi no bin wokim. Na dispela kain pasin i kamapim hevi long yumi na yumi save pilim sem long ai bilong ol manmeri bilong ples.
Long Buk Song 4 i luk olsem ol sampela manmeri i wokim wankain pasin long king Devit. Lukim lain 2. Ol i mekim tok bilong daunim gutpela nem bilong Devit na ol i givim sem long em, tasol tok bilong ol i no gat as bilong em i stap na ol i tok giaman na ol i daunim em nating. Na Devit i pilim hevi long dispela samting ol i mekim long em, na em i prea long BIKPELA na tokim BIKPELA long hevi bilong em.
DEVIT I RAITIM DISPELA SONG. EM BILONG MAN I BOSIM MUSIK NA I GAT OL MUSIK SAMTING I GAT STRING.
1 God, Yu yet Yu stretpela pasin bilong mi,
plis harim prea bilong mi taim mi singaut long Yu.
Taim mi stap insait long hevi Yu bin givim bel isi long mi.
Plis mekim grasia long mi na harim prea bilong mi.2 Yupela ol man, hamas taim bai yupela wok long daunim gutpela nem bilong mi na mekim mi sem?
Hamas taim bai yupela laikim ol tok i no gat as bilong em i stap,
na hamas taim bai yupela bihainim ol giaman tok?
3 Tasol yupela mas save olsem, BIKPELA i bin makim ol manmeri i bihainim wei bilong God na ol i bilong Em stret;
BIKPELA i save harim mi taim mi singaut long Em.4 Yupela ken i bel hat, tasol yupela no ken i mekim sin.
Taim yupela slip long bet bilong yupela,
orait, long bel bilong yupela, yupela skelim gut na yupela pasim maus.
5 Yupela mas mekim ofa i stretpela,
na putim trastim bilong yupela i go long BIKPELA.6 Planti manmeri i tok olsem, “Mipela laik lukim ol gutpela samting.
BIKPELA, mekim lait bilong fes bilong Yu i kamap long mipela.”
7 Taim kaikai na wain i kamap planti long gaden, mi save kisim bikpela amamas.
Tasol, amamas Yu bin putim long bel bilong mi em i winim tru dispela amamas.8 Taim mi laik slip, bai mi bel isi na slip;
mi bai bel isi na slip bikos BIKPELA Yu tasol Yu lukautim mi. Buk Song 4:1-8.
Na Devit em i save olsem, em i no stretpela man olgeta. Em i klia olsem, em i gat sin i stap long laip bilong em olsem olgeta manmeri i gat sin i stap long laip bilong ol. Tasol Devit em no wokim ol pasin nogut olsem ol sampela manmeri i tok. Ol i giaman na sutim tok nating long Devit na Devit i pilim hevi na sem long tok bilong ol.
God Em i stretpela pasin bilong Devit.
Lukim lain 1. Devit i tok, “God, Yu yet Yu stretpela pasin bilong mi.” Yu save, God yet i wokim stretpela pasin bilong mekim Devit i stap orait long ai bilong God. Devit i no wokim ol stretpela pasin bilong mekim em yet i stap orait long ai bilong God. Nogat. Long wanem, Devit yet em i no stretpela man olgeta long laip bilong em. Em olsem na, Devit i trastim God long wokim stretpela pasin bilong mekim em i stap orait long ai bilong God.
Na yumi save olsem, Jisas Em i stretpela pasin bilong God. Long feitful stretpela wok bilong Jisas tasol Devit i ken i stap stretpela na i stap orait long ai bilong God. Lukim Rom 3:22-24.
22 Stretpela pasin God i givim manmeri em i kamap long feitful wok bilong Jisas Krais. God i save givim dispela stretpela pasin long ol manmeri i bilipim na trastim Jisas Krais. Olgeta manmeri ol i wankain tasol. 23 Ol i manmeri bilong mekim sin, na ol i kamap sot long glori bilong God. 24 Na God i ken i kolim ol “stretpela man” long wok Krais Jisas i bin mekim bilong baim bek manmeri. Dispela em i presen bilong God, na i kam long rot bilong grasia bilong God. Rom 3:22-24.
Yumi ken i slip isi.
Na Devit i stap bel isi na em i slip isi. Long wanem, Devit i save olsem, God i no skelim pasin bilong em na em i stap orait long ai bilong God. Nogat. God i skelim pasin bilong Jisas tasol na em i stap orait long ai bilong God. God i no kisim bek Devit long stretpela pasin bilong Devit yet. Nogat. God i kisim bek Devit long stretpela pasin bilong Jisas. Long dispela as Devit em i bel isi na em i slip isi.
Na yumi tu yumi ken i bel isi na slip isi. Long wanem, toktok bilong ol manmeri nogut i no inap bagarapim ol lain bilong God. Nogat. Ol i stap long han bilong God. Ol i stap orait long ai bilong God long stretpela pasin na stretpela wok bilong Jisas long diwai kros.
Yumi i bilipim na trastim na bihainim Jisas, orait yumi i stap orait long ai bilong God long stretpela pasin bilong Jisas. Em olsem na, maski ol sampela manmeri i sutim giaman tok long yumi na daunim yumi, yumi i stap orait long ai bilong God na yumi no bagarap.
“Taim mi laik slip, bai mi bel isi na slip; mi bai bel isi na slip bikos BIKPELA Yu tasol Yu lukautim mi.” Stretpela pasin bilong BIKPELA i lukautim na sevim Devit, na stretpela pasin bilong BIKPELA i lukautim na sevim yumi i bilipim na trastim feitful stretpela wok bilong Jisas long diwai kros.
Glenn.
