Moning.
Long buk Efesus aposel Pol i tokim yumi long ol bikpela samting stret. Em i tokim yumi long hau God i bin makim yumi na pasim yumi long Jisas na Jisas i kam i dai long diwai kros bilong mekim yumi stretpela na holi long ai bilong God. Long dispela rot God i kolim yumi “stretpela manmeri” na Em i kisim bek yumi – Em i adoptim yumi na mekim yumi femili bilong Em. Ol dispela samting i gutpela “blesim bilong heven”.
Na Pol i tokim yumi long wok bilong Holi Spirit – Holi Spirit i kam long yumi na Em i opim ai na ia na bel bilong yumi – Em i givim laip long yumi – na long dispela rot nupela laip i kamap long yumi – Em i tanim bel bilong yumi na yumi bilipim na trastim God long kisim bek yumi long feitful wok bilong Jisas long diwai kros.
Na long ol dispela rot na long ol dispela pasin God i pasim yumi wantaim long sios femili komyuniti bilong Em.
Long Efesus 4:17 aposel Pol i tok long yumi olgeta manmeri bilong sios femili olsem, “Yupela no ken i wokabaut moa olsem ol haiden Jentail manmeri.” Long Efesus 4:23 em i skruim dispela tok olsem, “Nau tingting bilong yupela mas kamap nupela, na laip bilong yupela mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela bai i stap stretpela na holi olgeta.”
Em olsem na, yumi olgeta manmeri bilong sios femili bilong God yumi no ken i stap olsem ol haiden manmeri. Nau tingting bilong yumi olgeta i mas kamap nupela, na laip bilong yumi olgeta i mas kamap nupela. Long wanem, God i bin mekim yumi olgeta i kamap nupela lain manmeri, bai yumi olgeta i stap olsem Em yet na laip bilong yumi olgeta i stap stretpela na holi olgeta.
God i laik tingting bilong marit manmeri na tingting bilong manmeri i no marit na tingting bilong pikinini na tingting bilong papamama na tingting bilong wokboi nating na tingting bilong bosman i kamap nupela, na olgeta ol i no ken i wokabaut moa olsem ol haiden manmeri long ples bilong ol. God i laik olgeta manmeri bilong sios femili komyuniti bilong Em i kisim nupela tingting na wokabaut long nupela tingting bilong Krais.
Na i hatpela wok tru long yumi lusim ol haiden pasin na ol pasin bilong ples na yumi kisim na wokabaut long olgeta tingting na pasin bilong Jisas. Long wanem? Lukim Efesus 6:10-13.
10Orait, las toktok bilong mi i olsem, yupela mas i stap strong long strong bilong BIKPELA. Yupela stap strong long bikpela bikpela strong bilong Em. 11Putim na werim olgeta ama bilong God na long dispela wei yupela inap fesim na winim ol kainkain trik na giaman Satan i save mekim. 12Long wanem, yumi no wok long egensim manmeri bilong dispela graun. Nogat. Yumi wok long egensim ol strongpela spirit nogut. Yumi wok long egensim ol strongpela spirit bilong tudak pasin bilong dispela graun. Yumi wok long egensim ol ami bilong ol spirit i laik strongim ol pasin nogut. Ol dispela kain lain i stap antap tru na i gat narapela kain strong. 13Olsem na, yupela mas putim na werim olgeta ama bilong God. Na long taim bilong pasin nogut bai yupela no inap surik. Nogat. Bai yupela sanap strong na winim ol samting nogut. Pasin bilong sanap strong em i nambawan samting.
Satan i stap baksait long olgeta haiden pasin na ol pasin bilong ples.
Ol haiden pasin na ol pasin nogut bilong ples, ol dispela pasin em i no ol samting bilong dispela graun. Nogat. Ol dispela samting em i samting bilong Satan wantaim ol spirit nogut bilong tudak. Ol dispela samting i gat strong i winim strong bilong yumi manmeri bilong dispela graun. Long dispela as tasol yumi no fit na i hat tru long yumi lusim ol haiden pasin na ol pasin nogut bilong ples.
Long Efesus 6:10-13 God i tokim yumi long yumi no ken i sanap long strong bilong yumi yet na yumi wok long lusim ol haiden pasin na ol pasin nogut bilong ples na yumi kisim nupela tingting na pasin bilong Krais. Nogat. Sapos yumi sanap long strong bilong yumi yet, bai yumi feil tasol.
Em olsem na yumi mas sanap long bikpela bikpela strong bilong God. God Em i winim Satan wantaim ol wokboi lain bilong em. God Em i winim ol pasin bilong Satan – pasin bilong Satan em i ol haiden pasin na ol kainkain pasin nogut bilong ples. Yumi no inap winim ol dispela samting, tasol God Em inap. Olsem na yumi mas sanap long strong bilong Em.
Sios femili bilong God mas sanap long bikpela bikpela strong bilong BIKPELA.
Harim. Dispela samting yumi stap long em – dispela wok yumi stap long em bilong lusim ol haiden pasin na bilong lusim ol kainkain pasin nogut bilong ples – ol dispela samting i bikpela samting tumas. Long wanem, Satan i stap long baksait long ol dispela pasin na em i les long yumi sios femili bilong God i lusim em na i lusim pasin bilong em. Olsem na, em i wok long egensim yumi bilong holimpas yumi na yumi no ken i lusim em na lusim pasin bilong em na bihainim Jisas na bihainim pasin bilong Jisas.
Satan i gat narapela kain strong bilong em i stap na long dispela as ol strong bilong dispela graun i no inap long yumi sios femili bilong God. Nogat. Yumi nidim strong bilong God – yumi nidim bikpela bikpela strong bilong BIKPELA bilong yumi sios femili i kisim nupela tingting na yumi wokabaut long nupela tingting na long nupela pasin bilong Jisas. Yumi mas yusim strong God i givim yumi – yumi mas yusim ol tuls God i givim yumi bilong yusim.
Sapos yumi wok long lusim ol samting bilong dispela graun tasol, orait yumi ken i yusim strong bilong dispela graun bilong winim ol dispela samting. Tasol Satan wantaim ol “ami” bilong em i stap na em i laik holimpas yumi long ol kainkain haiden pasin bilong em long dispela graun – em i no laik yumi lusim na yumi wokabaut long pasin bilong Jisas – em no laik sios i wokabaut long pasin bilong Jisas. Nogat tru.
Satan em i wok long egensim yumi i laik bihainim Jisas. Long dispela as yumi mas yusim strong bilong BIKPELA. Aposel Pol i tok piksa long ol ami na em i tok olsem, i olsem yumi pait long ami – olsem na yumi mas putim ol klos bilong ami na yumi pait na egensim ami bilong Satan (lain 13). Sapos yumi yusim ol strongpela samting bilong God long “pait” long ol ami bilong Satan, orait yumi ken i sanap strong na yumi lusim haiden pasin bilong Satan na yumi bihainim ol stretpela pasin bilong Jisas.
Neks wik long Sande Baibel Toktok bai yumi skelim ol tuls God i givim yumi bai yumi sanap long strong bilong BIKPELA.
Glenn.
