Moning.
Long Taitus 1:10-16 aposel Pol i mekim strongpela strongpela tok! ….
10Long wanem, i gat planti manmeri i stap na ol i no save harim tok, na ol i save mekim tok nating, na ol i save giamanim ol manmeri. Ol lain i save katim skin ol i stap olsem. 11Yu mas stopim toktok bilong ol. Long wanem, ol i bagarapim ol wan wan femili. Ol i autim tok i no gutpela tok bilong autim, na ol i mekim olsem bilong kisim planti samting tasol. 12Wanpela man Krit, em i wanpela profet bilong ol Krit yet, em i bin tok olsem, “Ol manmeri Krit, ol i pulap long tok giaman, na ol i manmeri nogut tru olgeta, na ol i tingting tasol long kaikai planti na les nabaut.” 13Em i mekim trupela tok. Olsem na, yu mas krosim ol strong, bai ol i holim bilip i stret olgeta, 14na ol i no ken i pas long ol stori i no tru bilong ol Juda, na ol i no ken i pas long toktok bilong ol manmeri i tanim na lusim trupela tok. 15Olgeta samting em i klin bilong ol manmeri i klin long ai bilong God. Tasol wanpela samting em i no klin bilong ol manmeri i no bilip na i doti long ai bilong God. Long wanem, tingting bilong ol wantaim bel bilong ol i doti pinis. 16Ol i tok olsem, “Mipela save long God.” Tasol pasin ol i mekim i soim olsem ol i givim baksait pinis long God. Laip bilong ol i sting tru, na ol i lain bilong sakim tok, na ol i no fit long mekim wanpela gutpela pasin.
Long komyuniti bilong yumi ating yumi ken i tingim olsem, i no gutpela long yumi skelim ol narapela manmeri, na i no gutpela long yumi skelim bilip na lotu bilong ol narapela manmeri. Tasol aposel Pol i save skelim pasin na bilip na lotu bilong ol narapela manmeri, na em i tokim Taitus long skelim pasin na bilip na lotu bilong ol narapela manmeri tu. Olsem wanem?
Yumi mas save olsem, taim wanpela lotu i lusim trupela tok bilong God, taim ol i lusim tok i tokaut long God i kisim bek sinmanmeri long feitful wok bilong Jisas tasol, na ol i bihainim tok i tokaut long God i ken i kisim bek sinmanmeri long ol narapela samting, orait yumi mas klia olsem, ol i lus manmeri na taim ol i dai ol bai safa nogut tru oltaim oltaim. Tok bilong ol i save bagarapim ol manmeri.
Pasin bilong paulim Tok bilong God.
Pol i tok klia olsem, ol lain i save katim skin ol i stap kain lain olsem (lukim lain 10-11). Ol i no save harim tok God i mekim, na ol i no gat save na ol i mekim tok nating tasol, na ol i save giamanim ol manmeri. Ol i save kisim ol sampela toktok bilong Olpela Testamen na ol i yusim ol dispela toktok na giamanim ol manmeri. Ol i tok olsem, “Sapos yu no katim skin, orait God i no inap kisim bek yu – tru, Jisas i dai long sin bilong yu, tasol sapos yu no katim skin, orait God i no inap kisim bek yu.” Em olsem na, pasin bilong katim skin em i kamap rot bilong ol – ol i tingim olsem God i kisim bek sinmanmeri long rot bilong katim skin.
Olpela Testamen em i stori bilong ol Juda, tasol taim ol prisa i tanim tok bilong Olpela Testamen i go long ol narapela samting, orait dispela tok bilong ol i kamap “ol stori i no tru bilong ol Juda” (lukim lain 10 wantaim lain 14).
Long P.N.G. i gat ol planti prisa i mekim wankain pasin olsem ol dispela kain prisa. Ol i save kisim ol sampela tok bilong Olpela Testamen na ol i tok, “God i ken i kisim bek sinmanmeri long pasin bilong lukautim Sabat na long pasin bilong lukautim 10-pela Lo.” Na ol sampela prisa long P.N.G. i kisim ol sampela tok bilong Nupela Testamen na ol i tok, “God i ken i kisim bek sinmanmeri long pasin bilong baptais na long pasin bilong Lordsapa na long ol gutpela pasin Jisas i tokim yumi long mekim.”
Planti lotu i save kisim ol sampela tok bilong Baibel na ol i save tanim i go long ol narapela samting na ol i tok, “God i ken i kisim bek sinmanmeri long dispela samting.” Long dispela pasin na long dispela rot ol i lusim trupela tok bilong God na ol i bilipim na trastim na bihainim giaman tok. Na long bihain ol bai bagarap olgeta long dispela giaman tok bilong ol. Long wanem, ol i lusim trupela rot na ol i bihainim giaman rot.
Wanpela rot tasol i stap.
God i kisim bek sin manmeri long feitful wok bilong Jisas long diwai kros tasol, na Em i no inap kisim bek wanpela manmeri long narapela rot. Nogat. Long feitful wok bilong Jisas tasol. Dispela i trupela tok bilong God, na tok i makim ol narapela rot em i no tok bilong God. Lukim tok bilong Jisas (God) yet long Jon 14:6…
6Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.
Na aposel Pol i skruim tok long lain 15. “Olgeta samting em i klin bilong ol manmeri i klin long ai bilong God.” Olgeta manmeri i bilipim na trastim God long kisim bek ol long feitful wok bilong Jisas, na ol i bihainim Jisas, orait feitful wok bilong Jisas long diwai kros i mekim ol klin long ai bilong God, na long dispela rot God i kisim bek ol.
Tasol, ol manmeri i lusim dispela trupela tok na ol i bilipim na trastim God long kisim bek ol long ol narapela samting na long ol narapela rot, orait ol i doti yet long ai bilong God – wanpela samting bilong ol i no klin long ai bilong God. Long wanem, feitful wok bilong Jisas tasol i mekim sinmanmeri klin long ai bilong God.
Ol dispela manmeri i ken i tok planti olsem, “Mipela save long God.” Tasol ol i no save long Em. Nogat. Ol i givim baksait long tok bilong Em na ol i makim ol kainkain samting i rot bilong ol. Olsem na laip bilong ol i sting tru long nus bilong God na ol i no fit long mekim wanpela gutpela samting long ai bilong God. Lotu bilong ol na wanwik bung bilong ol na prea bilong ol na gutpela pasin bilong ol, olgeta dispela samting bilong ol i sting tru long nus bilong God na i samting nating olgeta long ai bilong God. (Lukim lain 16.)
Taim trupela tok i lus, orait olgeta gutpela samting i lus wantaim.
Yumi mas save na yumi mas klia olgeta olsem, taim trupela tok i lus, orait olgeta gutpela samting i lus wantaim. Laip bilong oltaim oltaim em i pas wantaim trupela tok, na sapos trupela tok i lus, orait laip i lus wantaim. Na sapos laip long heven i lus, orait olgeta gutpela samting i lus, na hel tasol i stap bilong ol. Harim tok bilong Jisas long Jon 3:36….
36Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.
Na Pikinini (Jisas) i tok pinis olsem, “Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.”
Nau yumi ken i save long wanem as Pol i mekim strongpela strongpela tok long Taitus. Pol i no tok long liklik samting. Nogat. Em i tok long samting bilong laip na dai bilong manmeri. Manmeri i bilipim na trastim na bihainim trupela tok bai lukim laip bilong oltaim oltaim, na manmeri i bilipim na trastim na bihainim tok i no tru bai lukim hevi na pen na bagarap long hel. Long dispela as Pol i tok strong long Taitus i mas stopim ol prisa i paulim trupela gutnius bilong God long Baibel.
Glenn.
