Moning.
Las wik, long Buk Song 4, yumi bin skelim wanpela hevi i kamap long king Devit. (Lukim Sande Baibel Toktok – “Stretpela pasin bilong God.” ) Ol sampela manmeri ol i mekim tok bilong daunim gutpela nem bilong Devit na ol i givim sem long em, tasol tok bilong ol i no gat as bilong em na ol i tok giaman na ol i daunim em nating. Ol i tok Devit i mekim pasin nogut, tasol Devit em i no mekim pasin nogut olsem ol i tok. Em olsem na Devit i pilim hevi long dispela samting ol i mekim long em, na em i prea long BIKPELA na tokim BIKPELA long hevi bilong em.
Na Devit em i save olsem, em i no stretpela man olgeta. Em i klia olsem, em i gat sin i stap long laip bilong em olsem olgeta manmeri i gat sin i stap long laip bilong ol. Tasol Devit em no wokim ol pasin nogut olsem ol sampela manmeri i tok. Ol i giaman na sutim tok nating long Devit na Devit i pilim hevi na sem long tok bilong ol.
Na yumi save long dispela kain pasin. Long wanem, sampela taim ol sampela manmeri i sutim giaman tok long yumi na daunim yumi long sampela samting yumi no bin wokim. Na dispela kain pasin i kamapim hevi long yumi tu na yumi save pilim sem long ai bilong ol manmeri bilong ples.
Tasol planti taim tumas yumi bel hat na yumi sutim tok nogut i go bek long ol manmeri i sutim giaman tok long yumi. Yumi bel hat na mekim kros toktok na toktok planti bilong daunim manmeri i daunim yumi. Yumi mekim giaman tok tu bilong bekim bek manmeri i mekim giaman tok long yumi. Na sampela taim yumi pait na solapim manmeri i daunim gutpela nem bilong yumi.
Na taim yumi slip long bet bilong yumi, yumi tanim tanim na yumi tingting tingting long hau yumi ken i bekim bek long manmeri i sutim giaman tok long yumi. Tru tumas, yumi no slip isi. Nogat. Yumi tingting planti na wariwari i go i go painim tulait.
Ol dispela kain pasin bilong yumi em i no gutpela pasin bilong ol manmeri i bilipim na trastim feitful wok bilong Jisas. Long Buk Song 4 Devit i tokim yumi long sampela samting i ken i helpim yumi lusim dispela kain bel hat nogut bilong yumi na yumi slip isi.
Tingting long lavim bilong God long yu.
Devit i klia olsem bel hat bilong em i ken i kamapim sin. Taim ol manmeri i mekim giaman tok long em bilong daunim em, orait em i bel hat, na dispela bel hat bilong em i ken i kamapim sin long bel bilong em na long laip bilong em. Em olsem na Devit i skulim em yet na em i skulim yumi tu long tingim BIKPELA na long trastim BIKPELA. Na pasin bilong tingim na trastim BIKPELA em i gutpela pasin bilong manmeri i stap aninit long God. Dispela pasin em i gutpela pasin bilong yumi i bilipim na trastim na bihainim Jisas. Lukim lain 4-5.
DEVIT I RAITIM DISPELA SONG. EM BILONG MAN I BOSIM MUSIK NA I GAT OL MUSIK SAMTING I GAT STRING.
1 God, Yu yet Yu stretpela pasin bilong mi,
plis harim prea bilong mi taim mi singaut long Yu.
Taim mi stap insait long hevi Yu bin givim bel isi long mi.
Plis mekim grasia long mi na harim prea bilong mi.2 Yupela ol man, hamas taim bai yupela wok long daunim gutpela nem bilong mi na mekim mi sem?
Hamas taim bai yupela laikim ol tok i no gat as bilong em i stap,
na hamas taim bai yupela bihainim ol giaman tok?
3 Tasol yupela mas save olsem, BIKPELA i bin makim ol manmeri i bihainim wei bilong God na ol i bilong Em stret;
BIKPELA i save harim mi taim mi singaut long Em.4 Yupela ken i bel hat, tasol yupela no ken i mekim sin.
Taim yupela slip long bet bilong yupela,
orait, long bel bilong yupela, yupela skelim gut na yupela pasim maus.
5 Yupela mas mekim ofa i stretpela,
na putim trastim bilong yupela i go long BIKPELA.6 Planti manmeri i tok olsem, “Mipela laik lukim ol gutpela samting.
BIKPELA, mekim lait bilong fes bilong Yu i kamap long mipela.”
7 Taim kaikai na wain i kamap planti long gaden, mi save kisim bikpela amamas.
Tasol, amamas Yu bin putim long bel bilong mi em i winim tru dispela amamas.8 Taim mi laik slip, bai mi bel isi na slip;
mi bai bel isi na slip bikos BIKPELA Yu tasol Yu lukautim mi. Buk Song 4:1-8.
Taim yumi pasim maus bilong bel bilong yumi (yumi no tingting planti moa) na yumi tingim BIKPELA na trastim BIKPELA, orait i olsem yumi wokim naispela ofa. Na naispela ofa em i rait pasin bilong ol manmeri bilong God. God i laik lukim dispela kain pasin i kamap long bel na tingting bilong ol lain bilong Em.
Na taim yumi tingim BIKPELA, orait yumi tingim lavim bilong BIKPELA long yumi. God Em i no kisim bek yumi nating. Nogat. Jisas Em i lusim laip bilong Em long diwai kros bilong baim bek laip bilong yumi. God i kisim bek yumi long feitful baim bek wok bilong Jisas long diwai kros. Na dispela i soim lavim bilong God long yumi i pas long Jisas na i bilipim na trastim na bihainim Em. Lukim tok bilong aposel Jon.
9 God i bin soim lavim bilong Em namel long yumi long dispela wei – Em i bin salim dispela wanpela Pikinini Man bilong Em i kam long dispela graun, bai yumi kisim laip long wok bilong Em. 10 Dispela em i lavim – yumi no bin lavim God, tasol Em i bin lavim yumi na Em i salim Pikinini Man bilong Em i kam na Em i dai bilong pinisim bel hat bilong God long sin bilong yumi. 1 Jon 4:9-10.
13 Man i lusim laip bilong em yet bilong helpim ol frens bilong em, em i lavim ol tru, na i no gat wanpela lavim i winim dispela lavim. Jon 15:13.
Taim yu tingim lavim bilong God long yu, orait bel bilong yu bai i stap isi. Maski ol manmeri i mekim nogut long yu, yu ken i holim tingting olsem, “BIKPELA i lavim mi na Em i lusim laip bilong Em bilong kisim bek laip bilong mi.”
King Devit na King Jisas.
Tingim. Pasin ol sampela manmeri i bin mekim long king Devit, orait ol manmeri i bin mekim long King Jisas tu. Ol i sutim giaman tok long Jisas bilong daunim Em. Ol i daunim gutpela nem bilong Jisas na ol i tokim Jisas olsem, “Yu wokboi bilong Seten.” Jisas Em i mekim gutpela pasin long planti manmeri na Em i stretim sik bilong ol, tasol ol manmeri ol i hetim Em na ol i pasim tok bilong kilim Em i dai. Tru, pasin ol i wokim long king Devit, orait ol i bin wokim long King Jisas tu.
Na pasin ol i mekim long Jisas em i no stret na i no gutpela. Nogat. Tasol Jisas i pasim maus na Em i karim ol dispela hevi. Long wanem? Em i lavim yumi na Em i kam bilong lusim laip bilong Em bilong baim bek laip bilong yumi sin manmeri.
Lavim bilong God i kamapim trupela amamas.
Sampela manmeri i laik God i wokim ol planti samting bilong ol. Lukim lain 6. Na Devit i amamas na tok tenkyu long God long ol samting God i wokim bilong em long hia long dispela graun. Lukim lain 7. Tasol, bikpela samting tru bilong Devit i olsem, God i lavim em na God i lukautim em long feitful baim bek wok bilong Jisas long diwai kros. Taim Devit i tingim dispela lavim bilong God long wok bilong Jisas, orait em i amamas na dispela amamas i winim olgeta amamas long ol samting bilong dispela graun.
Taim yu slip long bet bilong yu, orait yu lusim bel hat bilong yu, na yu pulimapim tingting bilong yu long lavim bilong God long yu long feitful baim bek wok bilong Jisas long diwai kros, na yu trastim dispela lavim na lukautim bilong BIKPELA, na yu slip isi.
Glenn.
