Taitus
Autim trupela tok bilong God.
2
1Tasol yu, yu mas autim tok i pas olgeta long trupela tok bilong God. 2Yu mas tokim ol man i bikpela pinis na ol i mas i stap long gutpela tingting, na ol i mas i stap gutpela man long ai bilong manmeri, na ol i mas stiaim gut tingting na pasin bilong ol yet, na ol i mas holim strong trupela bilip, na ol i mas lavim manmeri, na ol i mas wok hat bilong i stap olgeta long wei bilong God. 3Na tu ol meri i bikpela pinis ol i mas mekim pasin i holi, na ol i no ken i tok baksait long ol narapela manmeri, na ol i no ken i pas long ol strongpela dring bilong spak. Ol i mas wok long autim gutpela toktok, 4na long dispela pasin ol i ken i trenim ol yangpela meri long lavim man na pikinini bilong ol, 5na long stiaim gut tingting na pasin bilong ol yet, na long ol klinpela pasin, na long mekim gutpela wok long ples bilong ol yet, na long pasin bilong wanbel na helpim narapela manmeri, na long pasin bilong harim tok bilong man bilong ol. Ol i mas trenim ol long ol dispela samting na ol manmeri i no ken i tok bilas long tok bilong God. 6Na wankain olsem, yu mas tok strong long ol yangpela man na ol i mas stiaim gut tingting na pasin bilong ol yet. 7Long olgeta samting yu mas mekim gutpela pasin, bai ol manmeri i ken i luksave long yu na mekim wankain pasin. Na taim yu autim tok, orait yu mas autim long gutpela na stretpela wei i no gat asua, 8na yu mas autim tok i stret na tru olgeta, bai wanpela man i no ken i daunim, na ol man i egensim yumi ol i ken i sem, na ol i no ken i painim wanpela rong bilong sutim tok nogut long yumi. 9Ol slev ol i mas i stap aninit tru long bosman bilong ol long olgeta samting. Ol i mas mekim gutpela wok i amamasim bosman, na maski long mekim tok pait long em. 10Ol i no ken i stilim ol samting bilong bosman. Nogat. Ol i mas i mekim gutpela wok na bosman bai trastim ol long olgeta samting. Em olsem na long olgeta pasin bilong ol, ol bai mekim olgeta trupela tok bilong God Bilong Sevim yumi i stap naispela long ai bilong ol manmeri.
11Long wanem, grasia bilong God i kamap pinis, na long dispela grasia God i kisim bek olgeta kainkain manmeri. 12Na grasia bilong God i trenim yumi long lusim pasin bilong givim baksait long wei bilong God na long lusim ol pasin bilong dispela graun. Na grasia bilong God i trenim yumi long stiaim gut tingting na pasin bilong yumi yet na long mekim pasin i stret na long bihainim olgeta wei bilong God long dispela taim nau yumi stap long em. 13Na grasia bilong God i trenim yumi long wetim gutpela hop bilong yumi we glori bilong bikpela God, Jisas Krais Bilong Sevim yumi, i kamap ples klia. 14Em i bin givim Em yet bilong baim bek yumi long ol pasin bilong sakim lo, na bilong mekim klin wanpela lain manmeri i bilong Em yet, na bai ol i gat bikpela laik long olgeta gutpela pasin.
15Yu mas tokaut klia long ol dispela samting. Yusim namba bilong yu bilong strongim ol na bilong krosim na stretim ol. Yu no ken i larim wanpela man i givim baksait long tok bilong yu.
