Aposel 2:37-41.
12….Tok bilong God em i gat laip, na em i wok strong i stap. Sap bilong em i winim sod i sap long 2-pela sait. Na em i ken i sutim i go insait tru namel long laip na spirit bilong yumi, namel long skru na kru bilong bun wantaim. Em i ken i sutim i go insait tru bilong skelim tingting na laik i stap long bel bilong yumi. Hebru 4:12.
17…. sod bilong Holi Spirit – dispela em i Tok bilong God. Efesus 6:17.
Tok bilong God i olsem sod ol i sapim long 2-pela sait, na em i ken i sut i go insait tru long bel na laip bilong manmeri. Tok bilong God i olsem sod Holi Spirit i holim na i yusim bilong sutim bel na tingting na laip bilong yumi manmeri bilong dispela graun.
Tok bilong God em i no sod bilong yumi. Tok bilong God em i no strong bilong yumi. Yumi no ken i tingim olsem, taim yumi autim Tok bilong God na yumi yusim ol kainkain kleva save pasin bilong yumi na yumi autim, orait yumi givim sap long Tok bilong God. Nogat tru! Tok bilong God yet i gat sap na taim Holi Spirit i holim na yusim, orait Tok bilong God i sutim i go insait tru long bel na laip bilong manmeri. Tok bilong God yet em i sap, na long han bilong Holi Spirit sap bilong en i ken i sut i go insait stret long bel na tingting bilong sinmanmeri.
Tok bilong God em i no samting nating. Nogat. Em i trupela samting. Na long han bilong Holi Spirit em i ken i katim i go dip insait long bel bilong yumi sinmanmeri. Tok bilong God i gat laip na i wok strong, na long han bilong Holi Spirit em bai painim mak bilong em long bel bilong yumi. Long han bilong Holi Spirit Tok bilong God i save katim bel bilong yumi sinmanmeri.
Taim ol manmeri i harim tok aposel Pita i autim, orait dispela tok “i sutim tru bel bilong ol.” (Aposel 2:37.) Yumi no ken i saprais (kirap nogut) long dispela samting. Long wanem, Pita i autim Tok bilong God tasol, na long han bilong Holi Spirit Tok bilong God i save sutim tru bel bilong sinmanmeri.
Pita em i autim Tok bilong God bilong Olpela Testamen. Em i autim tok bilong Joel 2:28-32 na em i autim tok bilong Buk Song 16:8-11 na Buk Song 110:1. Na Pita i autim tok Jisas i bin skulim em long en – tok bilong Jisas em i Tok bilong God tu.
Em olsem na Pita em i no autim tok bilong em yet, na em i no autim tok long strong bilong em yet. Nogat. Em i autim Tok bilong God tasol, na Em i autim long strong bilong Holi Spirit. Aposel 2:4 i putim ples klia olsem, Holi Spirit i pulap long Pita, na Pita i autim tok long strong bilong Holi Spirit tasol.
Holi Spirit i kisim Tok bilong God, tok Pita i autim na eksplenim, na Em i “sutim tru bel bilong ol” manmeri i harim tok Pita i autim. Holi Spirit i sutim tru bel bilong ol 3000 manmeri! Long lain 41 Luk i tok olsem (Luk em i man i raitim Buk Aposel), “Long dispela de God i joinim 3000 manmeri wantaim ol manmeri i bilip.”
Taim Holi Spirit i sutim tru bel bilong ol long trupela Tok bilong God, orait ol dispela 3000 manmeri i kraiaut olsem, “bai mipela i mekim wanem nau?” Holi Spirit i sutim bel bilong ol na ol i klia nau olsem, ol i bin wokim rong taim ol i givim baksait long Jisas na ol i givim baksait long tok bilong Jisas. Ol i klia olsem ol i stap insait long bikpela trabel (kot bilong God) na ol yet i no gat rot bilong abrusim dispela trabel bilong ol. Olsem na ol i kraiaut na askim Pita olsem, “bai mipela i mekim wanem nau?”
Ol brata na sista, mi laik tokim yu olsem, yumi no nidim ol man i save autim tok long tingting na save bilong ol yet. Yumi no nidim ol man i save autim tok long ol samting bilong ol misin bilong ol. Yumi no nidim ol man i autim tok long ol kainkain kleva save pasin bilong ol na ol i save mekim ol kainkain so-of bilong ol long ai bilong ol manmeri. Nogat. Yumi nidim man i autim trupela Tok bilong God na i trastim Holi Spirit i kisim trupela Tok bilong God na i sutim bel bilong sinmanmeri.
Yumi no nidim ol kainkain wokman bilong misin. Nogat. Yumi nidim man i lavim trupela Tok bilong God na i trastim trupela Tok bilong God na i autim trupela Tok bilong God, na i trastim Holi Spirit long yusim trupela Tok bilong God bilong sutim bel na mekim wok insait long laip bilong yumi manmeri.
Ol 3000 manmeri i kraiaut olsem, “bai mipela i mekim wanem nau?”. Orait, Pita i bekim askim bilong ol olsem wanem? God (long maus bilong Pita) i bekim askim bilong ol olsem wanem?
Lukim lain 38. Pita i tokim ol olsem, “Yupela olgeta wanwan, yupela tanim bel na kisim baptais long nem bilong Jisas Krais na bai God i fogivim sin bilong yupela, na bai God i givim Holi Spirit long yupela.” Pastaim yumi skelim minim bilong “yupela tanim bel”. Na bihain yumi skelim minim bilong “kisim baptais”.
“Yupela tanim bel.”
Taim Pita i tok, “yupela tanim bel”, orait em i tok long wanem samting? Yumi lukim Aposel 26:17-18 na dispela tok bai helpim yumi klia long minim bilong tanim bel….
17…. Nau Mi (Jisas) salim yu (Pol) i go long ol Jentail manmeri 18bilong opim ai bilong ol, bai ol i tanim na lusim tudak na i kam long lait, na bai ol i tanim na lusim pawa bilong Satan na i kam long God, na bai God i fogivim sin bilong ol na ol i kisim ples wantaim ol manmeri God i bin mekim holi long rot bilong bilip long Mi.
Long dispela hap bilong Buk Aposel, aposel Pol em i stori long taim em i bin tanim bel. Na em i stori long Jisas i givim wok long em bilong witnisim Jisas long ol lain Jentail, bai ol i tanim bel na bilipim na trastim feitful wok bilong Jisas na ol i kam pas wantaim femili bilong God.
Na yumi skelim tok Jisas i tokim Pol. Em i tok, ol Jentail manmeri “bai ol i tanim na lusim tudak na i kam long lait.” Ol bai tanim. Dispela i minim olsem, ol bai lusim tudak pasin bilong ol, na ol i kam long pasin bilong tulait. Ol bai lusim rot bilong Satan, na ol i kam long rot bilong God. Ol bai lusim pasin bilong givim baksait long Jisas, na ol i kam long pasin bilong bilipim na trastim feitful wok bilong Jisas.
Tanim bel em i dispela kain samting. Tanim bel em i pasin bilong tanim. Pastaim ol i bihainim ol sampela samting, tasol taim ol i tanim bel, orait ol i lusim dispela samting na ol i kam long narapela samting. Ol i lusim wanpela rot na ol i kam long narapela rot. Ol i lusim olpela rot, na ol i kam long nupela rot.
Em olsem na taim Pita i tokim ol manmeri “Yupela olgeta wanwan, yupela tanim bel” orait em i minim olsem, “Yupela lusim dispela rot yupela i wokabaut long en na yupela kam long nupela rot.” Ol i bin givim baksait long Jisas na ol i bin givim baksait long tok bilong Jisas. Em olsem na Pita i minim olsem, “Yupela lusim pasin bilong givim baksait long Jisas na yupela lusim pasin bilong givim baksait long tok bilong Jisas, na yupela tanim na kam pas long Jisas na yupela harim na bihainim tok bilong Jisas.” Pita i minim olsem, “Pastaim yupela i lusim Jisas na lusim God, tasol nau yupela tanim na yupela kam long Jisas na kam long God.”
Long Aposel 2:40 Pita i tokim ol olsem, “Yupela tanim bel, nogut yupela i bagarap wantaim ol dispela jeneresen nogut.” Ol “dispela jeneresen” i makim ol manmeri i stap long taim bilong ol aposel. Na pasin nogut bilong ol dispela manmeri i olsem, ol i givim baksait long Jisas na ol i givim baksait long tok bilong Jisas, na ol i tingim olsem, ol i gutpela lotu manmeri bilong God na God bai kisim bek ol long lotu pasin bilong ol na long pasin bilong ol long lukautim de Sabat. Ol i givim baksait long rot God yet i makim bilong kisim bek sinmanmeri. Em olsem na, ol i mas tanim bel long dispela nogut pasin bilong ol. Ol i mas tanim bel na lusim pasin bilong givim baksait long Jisas na lusim pasin bilong givim baksait long tok bilong Jisas. Ol i mas tanim bel na lusim rot ol yet i makim bilong God i kisim bek ol na kam long rot God i makim bilong kisim bek sinmanmeri. Long wanem, nogut ol i lus na ol i bagarap.
Ol brata na sista, ating planti manmeri bilong ples bilong yumi i stap olsem ol. Ol i givim baksait long Jisas, ol i givim baksait long tok bilong Jisas, na ol i tingim olsem, ol i gutpela lotu manmeri bilong God. Ol i tingim olsem, God i ken i kisim bek ol long lotu pasin bilong ol na long baptais pasin bilong ol na long pasin bilong kaikaim Lordsapa na long pasin bilong lukautim de Sabat na long ol narapela kain samting ol yet i makim. Em olsem na ol tu ol i gat wok long tanim bel. Yumi gat wok long tanim bel, na yumi lusim pasin bilong givim baksait long tok bilong Jisas, na yumi tanim na kam long Jisas, na yumi trastim rot God yet i makim, na yumi bilipim na trastim God long kisim bek yumi long feitful wok bilong Jisas long diwai kros tasol.
Tanim bel em i no pasin bilong sori long sin bilong yumi. Nogat. Tanim bel em i no pasin bilong pilim sori long bel bilong yumi long ol rong bilong yumi. Nogat. Tanim bel em i pasin bilong tanim. Tanim bel em i pasin bilong tanim na lusim pasin bilong givim baksait long Jisas, tanim na lusim pasin bilong givim baksait long tok bilong Jisas, na yumi bilipim na trastim rot God yet i makim, yumi bilipim na trastim God long kisim bek yumi long feitful wok bilong Jisas tasol.
Orait, nau yumi skelim minim bilong “kisim baptais”.
Yupela “kisim baptais.”
Ating planti manmeri i kisim rong tingting long dispela toktok bilong Pita. Ating planti manmeri i tingim olsem, Pita i minim olsem, ol i mas kisim baptais na God i fogivim sin bilong ol. Ol i tingim olsem, ol i mas kisim baptais na God i ken i kisim bek ol. Dispela kain tingting em i rong tingting na i paulim ol narapela tok insait long Baibel.
Tingim. Jisas i no tok olsem, “Mi wantaim baptais em i rot, na Mi wantaim baptais em i as bilong Tok i tru, na Mi wantaim baptais em i as bilong laip, na i no gat wanpela man inap i go long Papa long narapela rot. Nogat. Long Mi wantaim baptais tasol.” Nogat. Na Jisas i no tok olsem, “Man i bilip long Pikinini na baptais, em i gat laip i stap gut oltaim oltaim.” Nogat. Na Jisas i no tok olsem, “Tru tumas, Mi tokim yupela: Man i harim tok bilong Mi, na i bilip long God i bin salim Mi i kam, na i kisim baptais, em i gat laip i stap gut oltaim oltaim.” Nogat.
Harim tok bilong Jisas… “Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.” (Jon 3:36.) “Tru tumas, Mi tokim yupela: Man i harim tok bilong Mi, na i bilip long God i bin salim Mi i kam, em i gat laip i stap gut oltaim oltaim. Em bai i no gat kot. Nogat. Em i lusim sait bilong i dai na em i kamap insait long laip pinis.” (Jon 5:24.) “Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.” (Jon 14:6.)
Skelim ol narapela narapela tok bilong Buk Aposel….
Aposel 2:21 – “Olgeta manmeri i singaut long BIKPELA, bai Em i kisim bek ol.”
Aposel 4:11-12 – “Dispela man Jisas, Em i ston yupela ol wokman i bin lusim, tasol nau Em i kamap as ston. Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.”
Aposel 10:43 – “Olgeta profet i tokaut long Em (Jisas), na ol i tok olsem, ‘Olgeta manmeri i bilipim na trastim Em, bai God i fogivim sin bilong ol long nem bilong Em.’ ”
Aposel 13:38-39 – “…long wok bilong dispela man Jisas God i ken i fogivim sin bilong yupela.”
Lukim Aposel 15:9, na Aposel 16:30-31, na Aposel 20:20-21.
Tok bilong God i klia olsem, God i save kisim bek sinmanmeri long feitful wok bilong Jisas tasol, na Em i no inap kisim bek sinmanmeri long rot bilong baptais. Nogat. Long rot bilong feitful wok bilong Jisas tasol.
Em olsem tasol long wanem as Pita i tokim ol manmeri olsem, “Yupela kisim baptais”? Pita em i no minim olsem, baptais em i rot na sapos ol i no kisim baptais, orait God i no inap fogivim sin bilong ol. Nogat. Pita i minim olsem, ol i mas kam pas long Jisas. Pastaim ol i givim baksait long Jisas, na ol i pas wantaim ol manmeri i kilim Jisas i dai long diwai kros. Tasol nau, ol i mas lusim ol dispela lain manmeri, na ol i mas kam long sait bilong Jisas, na ol i bilipim na trastim Jisas, na ol i bilipim na trastim tok bilong Jisas.
Long ai bilong olgeta manmeri ol i bin givim baksait long Jisas na ol i givim baksait long tok bilong Jisas, na sapos ol i laik tanim bel na kam long Jisas na bilipim Em na trastim Em, orait ol i mas mekim olsem long ai bilong olgeta manmeri. Pasin bilong kisim baptais long nem bilong Jisas i soim olgeta manmeri olsem, ol i lusim pasin bilong givim baksait long Jisas, na ol i lusim pasin bilong givim baksait long tok bilong Jisas, na ol i no pas moa wantaim ol manmeri i bin lusim Jisas, na ol i kam pas long Jisas na pas long tok bilong Jisas.
Na baptais bilong yumi i wankain samting. Baptais i putim ples klia olsem, yumi lusim ol narapela narapela rot yumi yet i bin makim bilong God i kisim bek yumi, na yumi bilipim na trastim rot God i makim, yumi bilipim na trastim God long kisim bek yumi long feitful wok bilong Jisas long diwai kros tasol, na yumi bihainim Jisas.
Baptais em i no rot bilong God i fogivim yumi. Nogat. Baptais i putim yumi long ples klia tasol. Long baptais yumi soim olsem, yumi bilipim na trastim Jisas tasol, yumi bilipim na trastim tok bilong Jisas, na yumi bilipim na trastim olsem, Jisas wanpela em i rot, na i no gat narapela rot bilong God i kisim bek yumi.
Fogivim bilong God.
Ol planti manmeri, ol i bin givim baksait long Jisas, na ol i givim baksait long tok bilong Jisas, na ol i pas wantaim ol manmeri na ol i kilim Jisas i dai long diwai kros. Tasol, God i fogivim 3000 manmeri bilong ol. Holi Spirit i sutim bel bilong ol na ol i tanim bel na ol i kam long sait bilong Jisas, na ol i kam i stap long fogivim bilong God. God i givim Holi Spirit long ol, na Em i kisim ol i kam insait long femili bilong Em.
Fogivim bilong God i gutpela tumas! Maski wanem kain sin yumi bin mekim, fogivim bilong God i stap. Sin bilong kilim Jisas i dai i winim olgeta sin, na God i fogivim dispela sin. Em olsem na, i gutpela tru long yumi tanim bel. Yumi tanim na kam long sait bilong Jisas. Yumi tanim na yumi bilipim na trastim rot God yet i makim bilong fogivim na kisim bek sinmanmeri. Yumi tanim na yumi bilipim na trastim God long kisim bek yumi na fogivim yumi long feitful wok bilong Jisas tasol. Na yumi bihainim Jisas. Na yumi amamas na tok tenkyu long fogivim bilong God.
Em tasol.
