Aposel 4:32-37.
Bilong harim (Audio)
Sapos yumi laik kisim gutpela save na klia tingting long tok i stap long Aposel 4:32-37, orait yumi mas skelim lain 32 pastaim, na yumi larim dispela tok i stiaim tingting bilong yumi. Long lain 32 yumi ken i save olsem, Luk (man i raitim buk Aposel) em i stori long manmeri i bilip, em ol manmeri i kisim na holim trupela bilip.
Na trupela bilip bilong ol i olsem wanem? Ol i bilip long wanem samting?
Yumi lukim pinis long Aposel sapta 3 – ol i bilipim na trastim Jisas. Ol i bilipim na trastim feitful wok bilong Jisas long diwai kros. Ol i bilipim na trastim promis bilong God long olgeta wok bilong Jisas.
Promis bilong God i olsem, manmeri i tanim bel na i bilipim na trastim Jisas, orait God i no inap tilim pe long ol long sin bilong ol. God i promis long karamapim olgeta sin na feil bilong ol long feitful wok bilong Jisas long diwai kros. God i promis long baim bek (kisim bek) ol long feitful wok bilong Jisas tasol. God bai lukim na skelim feitful wok bilong Jisas tasol bilong baim bek ol manmeri i tanim bel na i bilipim na trastim Jisas na i bilipim na trastim feitful wok bilong Jisas, na Em i no inap tru long lukim na skelim feitful wok bilong ol manmeri yet bilong kisim bek ol.
Manmeri i kisim na holim trupela bilip, ol i no save bilipim na trastim baptais, o Lordsapa, o ol gutpela pasin bilong ol yet, o pasin bilong lukautim de Sabat, o ol kainkain lotu pasin. Nogat. Ol i save olsem, ol dispela kain samting i no rot bilong God i kisim bek sinmanmeri. Ol i klia olsem, ol dispela samting i no mekim ol i kamap stretpela manmeri long ai bilong God na God i kisim bek ol. Ol i bilipim na trastim feitful wok bilong Jisas long diwai kros tasol i mekim ol i kamap stretpela manmeri long ai bilong God na God i kisim bek ol.
Trupela manmeri bilong trupela bilip, tingting na bel bilong ol i senis. Ol i tanim bel, tingting long bel bilong ol i senis, na nau ol i bilipim na trastim tok God i mekim, na ol i bilipim na trastim rot God i makim bilong kisim bek sinmanmeri. Pastaim ol i givim baksait long God, na ol i givim baksait long rot God i makim, na ol i bihainim ol rot ol yet i makim. Tasol nau ol i senisim tingting bilong ol, na ol i bilipim na trastim God, na ol i bilipim na trastim rot God i makim. Ol i bilipim na trastim God long kisim bek ol long feitful wok bilong Jisas long diwai kros tasol.
Em olsem na ol i bilip olsem. Na dispela trupela bilip i save kamapim 2-pela samting long laip bilong ol manmeri i kisim na holim trupela bilip.
1. Trupela bilip i senisim bel na tingting bilong ol na ol i sindaun gutpela wantaim na ol i strongim lavim bilong ol long ol wantaim.
Lukim lain 32. Luk em i stori long manmeri i bilip, em ol manmeri i kisim na holim trupela bilip, na em i tok, “Olgeta manmeri i bilip ol i stap wanbel na ol i gat wanpela tingting tasol. Na i no gat wanpela man bilong ol i tok olsem, ‘Samting bilong mi, em i bilong mi tasol.’ Nogat. Olgeta samting bilong ol, em i bilong olgeta wantaim.” Ol i wanbel na ol i gat wanpela tingting, na ol i soim na strongim lavim bilong ol na ol i serim olgeta samting bilong ol wantaim.
Na yumi mas save olsem, ol dispela manmeri i bung i stap, sampela bilong ol i wanlain, na sampela bilong ol i narapela lain olgeta. Yu save, Jerusalem i olsem ol taun bilong yumi. Long taun i gat planti manmeri i kam i stap na yumi no save ol i husat. Em olsem na taim sampela bilong ol i tanim bel, na ol i bilipim na trastim feitful wok bilong Jisas, na ol i bung wantaim, orait sampela bilong ol i wanlain, na sampela bilong ol i narapela lain na ol narapela klen. Ol i manmeri bilong narapela narapela hauslain, tasol taim ol i kisim na holim trupela bilip wantaim, orait ol i sindaun gutpela wantaim na ol i strongim lavim bilong ol long ol wantaim.
Ol i narapela narapela hauslain, ol i narapela narapela klen, na sindaun bilong ol i narapela narapela tu. Sampela bilong ol i gat mani na sampela bilong ol i no gat mani. Sampela bilong ol i sindaun gutpela na sampela bilong ol i rabismanmeri. Long taim bilong ol aposel, ol dispela kainkain manmeri ol i no inap pas wantaim. Nogat. Ol mani manmeri na ol rabismanmeri ol i no inap sindaun wantaim na pas wantaim na pren wantaim. Ol i no inap kaikai wantaim, na ol i no inap kam slip long haus bilong ol wantaim, na ol i no inap toktok wantaim. Nogat. Wanwan taim ol mani manmeri ol i ken i tromoi liklik toea long ol rabismanmeri, tasol ol i no inap sindaun na pas na pren wantaim ol.
Ol manmeri i kisim na holim trupela bilip, orait ol i kainkain manmeri olsem, sampela ol i mani manmeri na sampela ol i rabismanmeri. Tasol ol i stap wanbel na ol i gat wanpela tingting, na ol i sindaun wantaim, na ol i pas wantaim, na ol i pren wantaim, na narapela i lavim narapela. Pastaim ol i stap longwe longwe, separet separet, tasol nau ol i pas wantaim na pren wantaim. Em olsem na yumi ken i save olsem, bikpela senis i kamap long bel na tingting bilong ol. Trupela bilip i senisim bel na tingting bilong ol na ol i sindaun gutpela wantaim na ol i strongim lavim bilong ol long ol wantaim.
2. Trupela bilip i slekim tingting bilong ol long ol graun na mani na kago samting bilong dispela graun.
Lukim lain 33-37. Ol manmeri i kisim na holim trupela bilip, pastaim ol i stap olsem ol narapela manmeri bilong dispela graun, na graun bilong ol, na mani na kago samting bilong ol, em i bikpela samting long ol. Tasol, nau nogat. Taim ol i kisim na holim trupela bilip, orait dispela trupela bilip i senisim bel na tingting bilong ol, na ol i wanbel long lusim graun na serim mani bilong ol long ol narapela manmeri i bilip na i stap rabismanmeri.
Pastaim tingting bilong ol i strong long holim graun na holim mani bilong ol. Tasol nau, trupela bilip long feitful wok bilong Jisas i slekim tingting bilong ol long ol graun na mani, na ol i wanbel long lusim graun, na yusim mani bilong ol bilong helpim ol nupela brata na sista bilong ol i rabismanmeri na ol i nidim sampela helpim. Tingting bilong bel bilong ol long graun na mani na kago i senis, na ol i bihainim nupela tingting long bel bilong ol.
Na yumi no ken i paul long dispela nupela pasin bilong ol. Taim ol i helpim ol brata na sista i stap rabismanmeri, orait ol i helpim ol fri tasol, ol i helpim ol nating tasol. Ol i no mekim pasin yumi save lukim long ples bilong yumi. Nogat. Long ples bilong yumi, ol sampela manmeri ol i tingim olsem, “Pastaim mi givim liklik hap samting, orait bihain mi ken i kisim bikpela hap samting.” Long ples ol sampela manmeri i tingim olsem, “Pastaim mi helpim ol, na bihain ol i ken i bekim bek na helpim mi long ol sampela samting.” Ol manmeri i bilip ol i no kisim dispela kain tingting. Nogat. Taim ol givim ol samting, orait ol i givim fri tasol, ol i givim nating tasol, na ol i no tingim olsem bihain ol i ken i bekim bek. Tru tumas, bel na tingting bilong ol i senis na ol i givim helpim bilong ol fri tasol, ol i helpim ol nating tasol.
Na tu, ol lidaman bilong ol, ol i no semim ol na fosim ol long lusim graun na givim mani bilong helpim ol brata na sista i stap rabismanmeri. Nogat. Yu save, long ples bilong yumi, sampela taim ol lidaman ol i makim ol wanwan femili na ol i makim hamas mani ol i mas givim, na ol i raitim nem bilong ol long pepa, na sapos ol sampela femili ol i no givim mani, orait ol bai semim ol bilong fosim ol long givim mani. Em olsem tasol ol manmeri i kisim na holim trupela bilip, ol lidaman ol i no semim ol na ol i givim mani bilong helpim ol brata na sista i rabismanmeri. Nogat. Bel na tingting bilong ol i senis na ol i amamas long helpim ol nupela brata na sista bilong ol.
Stori bilong Ananaias na Safaira (long Aposel 5:1-11) i mekim klia olsem, ol bikman ol i no semim ol na fosim ol long lusim graun. Nogat. Ol yet i kisim gutpela tingting, na long laik bilong ol yet na long amamas bilong ol yet ol i lusim graun na yusim mani bilong helpim ol nupela brata na sista i stap rabismanmeri.
Ol brata na sista, ol manmeri i kisim na holim trupela bilip, orait dispela trupela bilip i senisim bel na tingting bilong ol na ol i sindaun gutpela wantaim na ol i strongim lavim bilong ol long ol wantaim. Na trupela bilip i slekim tingting bilong ol long ol graun na mani na kago samting bilong dispela graun na ol i amamas long helpim ol brata na sista bilong ol i rabismanmeri. Trupela bilip i save senisim manmeri olsem. Manmeri i kisim na holim trupela bilip ol bai lukim dispela kain senis i stat long kamap long laip bilong ol.
Na olsem wanem trupela bilip long feitful wok bilong Jisas i save senisim bel na tingting bilong yumi olsem?
Taim yumi tanim bel na yumi bilipim na trastim feitful wok bilong Jisas, orait yumi save skelim olgeta samting long narapela kain pasin. Pastaim, taim yumi no kisim trupela bilip, orait yumi save tingim olsem, as bilong laip bilong yumi em i samting bilong ol tumbuna na graun na mani na kago na kopi na marit na pikinini na amamas na ol kainkain samting olsem. Tasol nau yumi save olsem, as bilong laip bilong yumi em i no ol dispela samting. Nogat. Nau yumi save olsem, wanpela trupela na gutpela God i stap, na Em i mekim bikpela wok long Jisas bilong kisim bek sinmanmeri, na Em i wok nau long kisim ol i kam long Jisas, bai ol i stap lain manmeri bilong Em long femili bilong Em. Jisas i lusim laip bilong Em bilong baim bek ol planti manmeri, na God i wok long kisim ol i kam, long olgeta 4-kona bilong dispela graun God i kisim ol i kam, bai ol i stap manmeri bilong Em yet long femili bilong Em.
Ol samting yumi lukim long hia long dispela graun, em i no ol dispela samting tasol i stap na em tasol. Nogat. God i stap, na Em i bisi long kisim ol lain bilong Em i kam long Jisas, na long hia long dispela graun long ol wanwan ples ol bai i stap manmeri bilong Em. Na bihain, taim God i makim bilong ol, orait Em bai kisim ol i go long narapela ples, long heven, na ol bai i stap femili bilong God long ples bilong God. Em olsem na taim yumi dai, orait spirit bilong yumi em i no save raun long bus na long as bilong diwai olsem ol tumbuna i bin tokim yumi. Nogat. Taim yumi dai, taim God i makim bilong yumi, orait Em bai kisim yumi i go long ples bilong Em long heven, na ol manmeri bai planim bodi bilong yumi tasol long graun.
Trupela bilip i senisim bel na tingting bilong ol manmeri i bilipim na trastim feitful wok bilong Jisas. Maski pastaim ol i bilong ol kainkain lain manmeri bilong dispela graun, nau ol i save olsem, ol i bilong nupela lain manmeri, na long dispela as ol i sindaun gutpela wantaim nupela lain manmeri, na ol i strongim lavim bilong ol long ol wantaim. Tingting bilong ol long ol samting bilong dispela graun i senis, na ol i save olsem, ol narapela samting i stap na ol i bilong narapela ples, na long dispela as tasol, ol i slekim tingting bilong ol long ol mani na kago samting bilong dispela graun na ol i amamas long helpim ol brata na sista i rabismanmeri.
Long laip bilong ol, ol i wokabaut long trupela bilip, na moa na moa tingting bilong ol bai senis long ol samting bilong dispela graun, moa na moa tingting bilong ol bai slek long graun na kago na mani samting bilong dispela graun, na moa na moa ol bai pas long nupela lain femili bilong ol na strongim lavim bilong ol long ol.
Em olsem tasol long wanem as sampela taim em i hat tumas long lavim nupela brata na sista bilong yumi na em i hat tumas long slekim tingting bilong yumi long ol kago na mani na graun samting?
Yumi skelim 2-pela samting….
1. Yumi bin larim ol tingting bilong dispela graun i kamap strong gen long tingting bilong yumi na dispela i wok long rausim nupela tingting.
Ol manmeri bilong ples ol i bihainim olpela tingting na ol i save skelim olgeta samting long olpela tingting na save bilong ol. Na ol i save toktok planti long skelim na save bilong ol. Em olsem na, sapos yumi no lukaut gut, orait isi isi toktok bilong ol i ken i rausim nupela tingting God i kisim yumi i kam long en na yumi bihainim gen stia bilong olpela tingting.
Long dispela as yumi no ken i sindaun wantaim ol tumas na larim ol i toktok planti long paul tingting na save bilong ol. Mobeta yumi bungim na yumi sindaun na yumi raun wantaim ol nupela brata na sista bilong yumi, na wantaim yumi ken i strongim nupela tingting bilong trupela bilip. Long dispela rot yumi na ol nupela brata na sista bilong yumi bai i stap strong long trupela bilip.
2. Yumi bin larim tingting bilong ol lotu i kamap strong gen long tingting bilong yumi na dispela tu i wok long rausim nupela tingting.
Long ples bilong yumi lotu em i bikpela samting. Ol manmeri bilong ples ol i tingim olsem, ol samting bilong God em i samting bilong lotu na samting bilong de lotu tasol, na long ol narapela taim na long ol narapela de yumi ken i bihainim ol samting bilong yumi yet. Ol i bihainim dispela kain tingting.
Taim yumi tanim bel na yumi bilipim na trastim Jisas, taim yumi bilipim na trastim God long kisim bek yumi long feitful wok bilong Jisas tasol, na yumi bihainim Jisas, orait laip bilong yumi senis, na long olgeta taim long olgeta de long olgeta wik long olgeta yia yumi bihainim Jisas. Trupela bilip em i samting i senisim tingting na bel bilong yumi, olsem na em i samting i senisim olgeta laip bilong yumi na olgeta sindaun bilong yumi na olgeta wokabaut bilong yumi. Olgeta samting i senis. Taim tingting long bel bilong yumi i senis, orait olgeta laip bilong yumi i senis wantaim.
Yumi i kisim na holim trupela bilip, yumi save long trupela samting bilong dispela graun, na yumi no ken i go bek gen long ol bipo tingting bilong yumi. Yumi no ken i go bek long ol bipo tingting na skelim bilong ol manmeri bilong ples. Sapos tingting bilong yumi i senis trutru, orait em i senis bilong oltaim oltaim.
Yumi i kisim na holim trupela bilip long feitful wok bilong Jisas, nau yumi narapela kain manmeri long narapela kain femili. Tingting bilong yumi i senis, na Papa bilong yumi i wok long senisim yumi i go yet, na moa na moa tingting bilong yumi na skelim bilong yumi i bihainim trupela save bilong God. Yumi no stap long tudak moa. Nogat. God i kisim yumi i kam long lait, na yumi amamas na yumi wokabaut long lait God i kisim yumi i kam long en.
Em tasol.
