Taitus 2:1-10.
Long Taitus 1:10-16 aposel Pol i diskraibim pasin bilong ol sampela manmeri bilong ailan Krit, em ol manmeri i save autim na bihainim ol giaman tok. Long Taitus 2:1-10 aposel Pol i diskraibim pasin bilong ol manmeri i bilipim na bihainim trupela tok – ol i bilipim na trastim God long kisim bek ol long feitful wok bilong Jisas tasol long diwai kros na ol i bihainim Em. Pol i diskraibim 2-pela kain manmeri na 2-pela i narapela narapela kain olgeta.
Ol manmeri i lusim trupela Tok bilong God.
Pastaim yumi holim tingting long pasin bilong ol manmeri i autim na bihainim ol giaman tok, em ol manmeri i lusim trupela Tok bilong God. Lukim Taitus 1:10-16….
- ol i no save harim tok (lain 10)
- ol i save mekim tok nating (lain 10)
- ol i save giamanim ol manmeri (lain 10)
- ol i bagarapim ol wanwan femili bilong ol long giaman toktok bilong ol (lain 11)
- ol i autim tok i no gutpela long autim na ol i mekim olsem bilong kisim kago tasol (lain 11)
- ol i pulap long tok giaman (lain 12)
- ol i manmeri nogut tru olgeta (lain 12)
- ol i tingting tasol long kaikai planti na les nabaut (lain 12)
- ol i no holim trupela bilip – ol i bin harim trupela tok, tasol ol i no tingting long holim (lain 13)
- ol i pas long ol stori i no tru bilong ol Juda – ol i paulim tok bilong Olpela Testamen (lain 14)
- ol i pas long toktok bilong ol manmeri i tanim na lusim trupela tok (lain 14)
- ol i no bilip – ol i no bilipim na trastim God long kisim bek sinmanmeri long feitful wok bilong Jisas long diwai kros tasol – ol i tingim olsem God i ken i kisim bek ol long ol narapela samting (lain 15)
- wanpela samting em i no klin bilong ol – lotu bilong ol i no klin, i no gutpela, long ai bilong God. (lain 15)
- ol i doti long ai bilong God – olgeta pasin bilong ol wantaim olgeta lotu pasin bilong ol i doti long ai bilong God (lain 15)
- long wanem, tingting bilong ol wantaim bel bilong ol i doti pinis (lain 15)
- ol i tok olsem, “Mipela save long God” tasol pasin ol i mekim i soim olsem ol i givim baksait pinis long God (lain 16)
- laip bilong ol i sting tru (lain 16)
- ol i lain bilong sakim tok (lain 16)
- ol i no fit long mekim wanpela gutpela pasin – i no gat yus bilong ol i stap (lain 16).
Manmeri i bilipim na trastim na bihainim feitful wok bilong Jisas.
Taitus wantaim ol brata na sista bilong sios femili bilong God long ailan Krit, em ol manmeri i bilipim na trastim God long kisim bek ol long feitful wok bilong Jisas tasol, pasin bilong ol i mas i stap narapela kain olgeta. Taitus i mas “autim tok i pas olgeta long trupela tok bilong God”, na ol brata na sista bilong sios femili bilong God ol i mas bihainim pasin i pas olgeta long trupela tok bilong God. Pol i makim 6-pela kainkain manmeri bilong sios femili na em i mekim tok long ol wanwan.
Taitus 2:1-10.
Lukim lain 2. Ol man i bikpela pinis…..
- ol i mas i stap long gutpela tingting
- ol i mas i stap gutpela man long ai bilong manmeri
- ol i mas stiaim gut tingting na pasin bilong ol yet
- ol i mas holim strong trupela bilip
- ol i mas lavim manmeri
- ol i mas wok hat bilong i stap olgeta long wei bilong God.
Lukim lain 3-4. Ol meri i kamap bikpela pinis…..
- ol i mas mekim pasin i holi
- ol i no ken i tok baksait long ol narapela manmeri
- ol i no ken i pas long ol strongpela dring bilong spak
- ol i mas wok long autim gutpela toktok (maski ol toktok nating na ol rabis toktok)
- ol i mas trenim ol yangpela meri (gutpela toktok bilong ol bai trenim ol yangpela meri).
Lukim lain 4-5. Ol yangpela meri…..
- ol i mas lavim man na pikinini bilong ol
- ol i mas stiaim gut tingting na pasin bilong ol yet
- ol i mas mekim ol klinpela pasin
- ol i mas mekim gutpela wok long ples bilong ol yet
- ol i mas mekim pasin bilong wanbel na helpim narapela manmeri
- ol i mas mekim pasin bilong harim tok bilong man bilong ol
- ….bai ol manmeri ol i no ken i tok bilas long tok bilong God.
Lukim lain 6. Ol yangpela man…..
- ol i mas stiaim gut tingting na pasin bilong ol yet.
Taitus i mas “tok strong” long ol yangpela man – ating ol yangpela man bilong bipo ol i olsem ol yangpela man bilong nau – ol i bel strong tumas, na ol i raunraun tumas long laik na save bilong ol yet, na ol i no tingting long sindaun isi na mekim wok bilong sapotim papamama bilong ol o mekim wok bilong sapotim na lukautim meri pikinini bilong ol.
Lukim lain 7-8. Wokman bilong God (Taitus) …..
- long olgeta samting em i mas mekim gutpela pasin, na ol manmeri i ken i luksave long em na mekim wankain pasin
- Na taim em i autim tok, orait….
- em i mas autim tok long gutpela na stretpela wei i no gat asua
- em i mas autim tok i stret na tru olgeta
- Na em i mas mekim olsem….
- bai wanpela man i no ken i daunim (trupela tok),
- ol man i egensim yumi (i bilipim na trastim feitful wok bilong Jisas) ol i ken i sem
- ol i no ken i painim wanpela rong bilong sutim tok nogut long yumi.
Lukim lain 9-10. Ol slev (o wokman) …..
- ol i mas i stap aninit tru long bosman bilong ol long olgeta samting
- ol i mas mekim gutpela wok i amamasim bosman
- ol i no ken i mekim tok pait long em
- ol i no ken i stilim ol samting bilong bosman
- ol i mas mekim gutpela wok, na bosman bai trastim ol long olgeta samting.
- ….Em olsem na, long olgeta pasin bilong ol, ol bai mekim olgeta trupela tok bilong God Bilong Sevim yumi i stap naispela long ai bilong ol manmeri.
Long olgeta pasin bilong yumi, yumi mekim olgeta trupela tok bilong God Bilong Sevim yumi i stap naispela long ai bilong ol manmeri.
Dispela las toktok bilong Pol long lain 10 i makim olgeta manmeri i bilipim na trastim God long kisim bek ol long feitful wok bilong Jisas long diwai kros tasol – olgeta man na meri i kamap bikpela pinis, olgeta yangpela meri na yangpela man, manmeri i mekim wok bilong autim tok bilong God, wantaim manmeri i stap wokman bilong ol sampela bosman bilong kampani. Olgeta kainkain manmeri i bilipim na trastim God long kisim bek ol long feitful wok bilong Jisas tasol – taim ol i bihainim olgeta pasin bilong ol, em olgeta pasin Pol i diskraibim bilong ol, orait ol i mekim olgeta trupela tok bilong God Bilong Sevim yumi i stap naispela long ai bilong ol manmeri.
Sapos yumi bilipim na trastim God long kisim bek yumi long feitful wok bilong Jisas tasol, na yumi wokabaut olsem aposel Pol i tokim ol brata na sista bilong sios femili long ailan Krit, orait ating planti manmeri bai skelim, na ol bai save olsem, tok yumi bilipim na bihainim i naispela na i gutpela na i trupela olgeta. Tok bilong God yet bai i stap naispela long ai bilong olgeta manmeri.
Taim ol manmeri i skelim stret, orait ol i no inap tingim yumi. Nogat. Ol bai tingim toktok yumi bilipim na yumi bihainim. Ol bai tingim olsem, tok bilong God i naispela na tok bilong God i gutpela. Ol manmeri bai tingim feitful wok bilong Jisas i naispela na i gutpela, na i naispela na i gutpela long God i kisim bek yumi long feitful wok bilong Jisas tasol.
Na God bai yusim ol dispela samting bilong pulim ol sampela manmeri i kam long trupela tok bilong Em, bai ol i tanim bel na bilipim na trastim God long kisim bek ol long feitful wok bilong Jisas long diwai kros tasol na ol i bihainim Em.
Na long ol dispela samting God tasol i kisim biknem.
Yumi gat wok, tasol yumi no gat wok bai God i kisim bek yumi.
Yumi manmeri i bilipim na trastim God long kisim bek yumi long feitful wok bilong Jisas long diwai kros tasol, orait yumi olgeta i gat wok. Yumi man i bikpela pinis wantaim yumi meri i bikpela pinis wantaim yumi yangpela meri wantaim yumi yangpela man wantaim yumi i autim tok bilong God wantaim yumi wokman bilong bosman bilong kampani, yumi olgeta i gat wok.
Yumi manmeri bilong trupela tok yumi mas wokabaut long pasin bilong trupela tok. Laip bilong ol manmeri i bihainim giaman tok i nogut pinis. Yumi no ken i larim laip bilong yumi i stap olsem ol. Nogat. Laip bilong yumi i mas pas long trupela tok yumi save bilipim na bihainim – maski yumi husat – yumi gat wok long wokabaut long pasin i pas olgeta long trupela tok bilong feitful wok bilong Jisas.
Em olsem tasol dispela wok yumi mekim em i no bilong God i ken i laikim yumi na kisim bek yumi. Nogat tru! God i kisim bek yumi pinis long feitful wok bilong Jisas. God i no kisim bek yumi long feitful wok bilong yumi. Nogat. God i kisim bek yumi long feitful wok bilong narapela man Jisas Krais tasol.
Yumi no ken i paul. Yumi gat wok bilong lusim olpela pasin bilong yumi na bihainim nupela pasin i pas long trupela tok – yumi no gat wok bilong grisim God long kisim bek yumi. Nogat. God i kisim bek yumi pinis long feitful wok bilong Jisas tasol, na nau yumi wok long bihainim pasin i pas long trupela tok bilong God.
Pasin i pas long trupela tok bai sailensim ol manmeri i egensim trupela tok.
Taim yumi bihainim pasin i pas long trupela tok bilong God long feitful wok bilong Jisas, orait pasin bilong yumi bai pasim maus bilong ol man i laik daunim yumi. Ol i no inap sutim tok long yumi na tok, “Yupela giaman.” Long wanem, tok yumi bihainim na pasin yumi mekim i pas wantaim.
Ol sampela lotu manmeri ol i bisi long mekim toktok bilong daunim ol narapela lotu. Yumi ken i bisi tasol long bihainim pasin i gutpela bilong yumi i bilipim na trastim feitful wok bilong Jisas – yumi bisi long bihainim pasin aposel Pol i tokim ol manmeri bilong God long ailan Krit.
Long dispela rot – long olgeta pasin bilong yumi olgeta – yumi mekim olgeta trupela tok bilong God Bilong Sevim yumi i stap naispela long ai bilong ol manmeri, na ol i ken i lusim tok nogut bilong ol na kam trutru long God na bilipim na trastim Em long kisim bek ol long feitful wok bilong Jisas tasol, na bihainim Em.
Na God tasol i kisim biknem.
Em tasol.
