Moning.
Aposel Pol i diskraibim 2-pela kain manmeri na 2-pela i narapela narapela kain olgeta. Ol sampela manmeri bilong ailan Krit, em ol manmeri i save autim na bihainim giaman tok, pasin bilong ol i nogut olgeta. Pol i tok olsem, “Laip bilong ol i sting tru, na ol i lain bilong sakim tok, na ol i no fit long mekim wanpela gutpela samting” (Taitus 1:16). Tasol laip bilong ol manmeri i bilipim na bihainim trupela tok – ol i bilipim na trastim God long kisim bek ol long feitful wok bilong Jisas tasol long diwai kros na ol i bihainim Em – laip bilong ol i narapela kain olgeta, na Pol i strongim ol long wokabaut long pasin i gutpela bilong ol manmeri i bihainim trupela tok.
Laip bilong manmeri i bihainim giaman tok em i sting. Tasol laip bilong manmeri i bihainim trupela tok bilong feitful wok bilong Jisas em i swit moa. Lukim Taitus 2:1-10….
1Tasol yu, yu mas autim tok i pas olgeta long trupela tok bilong God. 2Yu mas tokim ol man i bikpela pinis na ol i mas i stap long gutpela tingting, na ol i mas i stap gutpela man long ai bilong manmeri, na ol i mas stiaim gut tingting na pasin bilong ol yet, na ol i mas holim strong trupela bilip, na ol i mas lavim manmeri, na ol i mas wok hat bilong i stap olgeta long wei bilong God. 3Na tu ol meri i bikpela pinis ol i mas mekim pasin i holi, na ol i no ken i tok baksait long ol narapela manmeri, na ol i no ken i pas long ol strongpela dring bilong spak. Ol i mas wok long autim gutpela toktok, 4na long dispela pasin ol i ken i trenim ol yangpela meri long lavim man na pikinini bilong ol, 5na long stiaim gut tingting na pasin bilong ol yet, na long ol klinpela pasin, na long mekim gutpela wok long ples bilong ol yet, na long pasin bilong wanbel na helpim narapela manmeri, na long pasin bilong harim tok bilong man bilong ol. Ol i mas trenim ol long ol dispela samting na ol manmeri i no ken i tok bilas long tok bilong God. 6Na wankain olsem, yu mas tok strong long ol yangpela man na ol i mas stiaim gut tingting na pasin bilong ol yet. 7Long olgeta samting yu mas mekim gutpela pasin, bai ol manmeri i ken i luksave long yu na mekim wankain pasin. Na taim yu autim tok, orait yu mas autim long gutpela na stretpela wei i no gat asua, 8na yu mas autim tok i stret na tru olgeta, bai wanpela man i no ken i daunim, na ol man i egensim yumi ol i ken i sem, na ol i no ken i painim wanpela rong bilong sutim tok nogut long yumi. 9Ol slev ol i mas i stap aninit tru long bosman bilong ol long olgeta samting. Ol i mas mekim gutpela wok i amamasim bosman, na maski long mekim tok pait long em. 10Ol i no ken i stilim ol samting bilong bosman. Nogat. Ol i mas i mekim gutpela wok na bosman bai trastim ol long olgeta samting. Em olsem na long olgeta pasin bilong ol, ol bai mekim olgeta trupela tok bilong God Bilong Sevim yumi i stap naispela long ai bilong ol manmeri.
Long olgeta pasin bilong yumi, yumi mekim olgeta trupela tok bilong God Bilong Sevim yumi i stap naispela long ai bilong ol manmeri.
Dispela las toktok bilong Pol long lain 10 i makim olgeta manmeri i bilipim na trastim God long kisim bek ol long feitful wok bilong Jisas long diwai kros tasol – olgeta man na meri i kamap bikpela pinis, olgeta yangpela meri na yangpela man, manmeri i mekim wok bilong autim tok bilong God, wantaim manmeri i stap wokman bilong ol sampela bosman bilong kampani. Olgeta kainkain manmeri i bilipim na trastim God long kisim bek ol long feitful wok bilong Jisas tasol – taim ol i bihainim olgeta pasin bilong ol, em olgeta pasin Pol i diskraibim bilong ol, orait ol i mekim olgeta trupela tok bilong God Bilong Sevim yumi i stap naispela long ai bilong ol manmeri.
Sapos yumi bilipim na trastim God long kisim bek yumi long feitful wok bilong Jisas tasol, na yumi wokabaut olsem aposel Pol i tokim ol brata na sista bilong sios femili long ailan Krit, orait ating planti manmeri bai skelim, na ol bai save olsem, tok yumi bilipim na bihainim i naispela na i gutpela na i trupela olgeta. Tok bilong God yet bai i stap naispela long ai bilong olgeta manmeri.
Taim ol manmeri i skelim stret, orait ol i no inap tingim yumi. Nogat. Ol bai tingim toktok yumi bilipim na yumi bihainim. Ol bai tingim olsem, tok bilong God i naispela na tok bilong God i gutpela. Ol manmeri bai tingim feitful wok bilong Jisas i naispela na i gutpela, na i naispela na i gutpela long God i kisim bek yumi long feitful wok bilong Jisas tasol.
Na God bai yusim ol dispela samting bilong pulim ol sampela manmeri i kam long trupela tok bilong Em, bai ol i tanim bel na bilipim na trastim God long kisim bek ol long feitful wok bilong Jisas long diwai kros tasol na ol i bihainim Em.
Yumi gat wok, tasol yumi no gat wok bai God i kisim bek yumi.
Yumi manmeri i bilipim na trastim God long kisim bek yumi long feitful wok bilong Jisas long diwai kros tasol, orait yumi olgeta i gat wok. Yumi man i bikpela pinis wantaim yumi meri i bikpela pinis wantaim yumi yangpela meri wantaim yumi yangpela man wantaim yumi i autim tok bilong God wantaim yumi wokman bilong bosman bilong kampani, yumi olgeta i gat wok.
Yumi manmeri bilong trupela tok yumi mas wokabaut long pasin bilong trupela tok. Laip bilong ol manmeri i bihainim giaman tok i nogut pinis. Yumi no ken i larim laip bilong yumi i stap olsem ol. Nogat. Laip bilong yumi i mas pas long trupela tok yumi save bilipim na bihainim – maski yumi husat – yumi gat wok long wokabaut long pasin i pas olgeta long trupela tok bilong feitful wok bilong Jisas.
Em olsem tasol dispela wok yumi mekim em i no bilong God i ken i laikim yumi na kisim bek yumi. Nogat tru! God i kisim bek yumi pinis long feitful wok bilong Jisas. God i no kisim bek yumi long feitful wok bilong yumi. Nogat. God i kisim bek yumi long feitful wok bilong narapela man Jisas Krais tasol.
Yumi no ken i paul. Yumi gat wok bilong lusim olpela pasin bilong yumi na bihainim nupela pasin i pas long trupela tok – yumi no gat wok bilong grisim God long kisim bek yumi. Nogat. God i kisim bek yumi pinis long feitful wok bilong Jisas tasol, na nau yumi wok long bihainim pasin i pas long trupela tok bilong God.
Pasin i pas long trupela tok bai sailensim ol manmeri i egensim trupela tok.
Taim yumi bihainim pasin i pas long trupela tok bilong God long feitful wok bilong Jisas, orait pasin bilong yumi bai pasim maus bilong ol man i laik daunim yumi. Ol i no inap sutim tok long yumi na tok, “Yupela giaman.” Long wanem, tok yumi bihainim na pasin yumi mekim i pas wantaim.
Ol sampela lotu manmeri ol i bisi long mekim toktok bilong daunim ol narapela lotu. Yumi ken i bisi tasol long bihainim pasin i gutpela bilong yumi i bilipim na trastim feitful wok bilong Jisas – yumi bisi long bihainim pasin aposel Pol i tokim ol manmeri bilong God long ailan Krit.
Long dispela rot – long olgeta pasin bilong yumi olgeta – yumi mekim olgeta trupela tok bilong God Bilong Sevim yumi i stap naispela long ai bilong ol manmeri, na ol i ken i lusim tok nogut bilong ol na kam trutru long God na bilipim na trastim Em long kisim bek ol long feitful wok bilong Jisas tasol, na bihainim Em. Na God tasol i kisim biknem.
Glenn.
