Moning.
Yumi save pinis, insait long Baibel i gat ol planti lo i stap. Long Olpela Testamen God i givim Lo long Moses na namba bilong ol dispela lo i winim 600. Sampela taim yumi tok, “God i givim Moses 10-pela lo.” Na dispela tok i tru. Tasol yumi no ken i lusim o haitim ol narapela lo God i givim Moses. Nogat. Ol lo God i givim Moses i winim 600 na taim yumi tingim na skelim Lo bilong God, orait yumi mas tingim na skelim olgeta lo God i givim.
Tasol sapos yumi skelim dispela 10-pela lo tasol, orait ating yumi ken i kisim bikpela sem. Long wanem, yumi no save bihainim gut ol dispela 10-pela lo. Olgeta taim yumi save feil long ol dispela 10-pela lo. Na sapos yumi skelim olgeta 600 lo, orait bai yumi kisim bikpela sem moa moa yet. Long wanem, yumi feil long ol planti lo bilong God na yumi ken i save olsem, yumi no stretpela manmeri long ai bilong God. Lukim Rom 3:19-20.
19 Yumi save pinis, olgeta tok lo i mekim em i mekim long ol manmeri i stap aninit long lo. Na tok bilong lo i stap bilong pasim maus bilong olgeta manmeri, bai olgeta manmeri bilong olgeta hap bilong dispela graun i sanap long kot bilong God. 20 Long wanem, i no gat wanpela manmeri bai i kamap stretpela manmeri long ai bilong God long rot bilong bihainim lo. Nogat. Long rot bilong bihainim lo ol manmeri bai klia long sin bilong ol yet na em tasol. Rom 3:19-20.
Tru tumas, sapos yumi tingim na skelim olgeta lo bilong God, orait ating yumi bai pasim maus na daunim het na sindaun kwait tasol. Long wanem, yumi ken i save olsem, yumi no gutpela manmeri long ai bilong God. Nogat. Yumi feil manmeri tasol na yumi sin manmeri tasol. Olsem na, yumi no ken i opim maus na tokim God olsem, “God, mi gutpela man, olsem na, Yu ken i kisim bek mi.”
Tasol tenkyu tru long God. Em i kamapim wanpela rot bilong helpim yumi feil manmeri. Lukim tok i stap long Rom 8:1-4.
1 Olsem na, nau God i no save daunim manmeri i pas long Krais Jisas. 2 Long wanem, Krais Jisas i bin mekim wok, na long dispela rot lo bilong Spirit bilong laip i mekim yumi fri long lo bilong sin na dai. 3 Yumi no gat strong long bihainim lo, na long dispela as lo i no kamapim laip long yumi. Tasol samting lo i no inap mekim God yet i mekim. God i salim Pikinini bilong Em yet i kam. Em i kamap man olsem yumi manmeri i mekim sin, na Em i kam bilong mekim wok long sin. Em olsem na long bodi bilong Pikinini bilong Em, God i daunim sin. 4 God i mekim olsem bai olgeta stretpela pasin bilong lo bai kamap long laip bilong yumi i no laik bihainim pasin bilong olpela bel na i laik bihainim laik bilong Holi Sprit. Rom 8:1-4.
Aposel Pol i tokaut long 2-pela kain lo i stap, lo bilong Spirit bilong laip na lo bilong sin na dai.
Lo bilong sin na dai.
Taim Pol i tokaut long “lo bilong sin na dai”, orait em i tokaut long ol lo bilong God. Lo bilong God i gutpela gutpela samting tru, tasol yumi save feil long bihainim olgeta lo bilong God olgeta taim. Em olsem na, taim yumi feil long bihainim lo bilong God, orait yumi wokim sin. Na pe bilong sin em i dai. Em olsem na, Pol i makim lo bilong God na em i tok, “lo bilong sin na dai.”
Lo bilong Spirit bilong laip.
Na “lo bilong Spirit bilong laip” em i gutnius bilong God. Gutnius bilong God i tokaut long wok God i bin mekim long dai bilong Krais long diwai kros bilong kisim bek sin manmeri. Spirit bilong God i save opim ai na ia na bel bilong sinmanmeri na long dispela as sinmanmeri i ken i tanim bel na bilipim na trastim feitful wok bilong Jisas long diwai kros na pas long Krais. Em olsem na, Spirit bilong God i kisim sinmanmeri i kam long Krais na wok bilong Krais long diwai kros i sevim laip bilong ol. Em olsem na, long dispela as Pol i tokaut olsem, “lo bilong Spirit bilong laip”.
Lo bilong Spirit bilong laip i mekim yumi fri long lo bilong sin na dai.
Pastaim Pol i tok olsem, God i no save kotim na daunim manmeri i pas tru long Krais. Long wanem? Krais i bin mekim wok bilong manmeri i pas long Em, na dispela wok i friim ol long lo bilong sin na dai. Lo bilong sin na dai i tok olsem, “Yu mekim sin, orait bai yu sanap long kot na kisim pe bilong sin, bai yu dai, bai yu lus long hel.” Wok bilong Krais i friim yumi long dispela samting.
God i bin salim Krais i kam na Em i kamap man olsem yu na mi, na Em i dai bilong friim yumi long toktok bilong lo bilong sin na dai. Krais i bin kisim dai bilong yumi, Krais i bin kisim pe bilong sin bilong yumi, bai yumi no inap kisim, bai yumi stap fri long dispela samting. Em olsem na toktok bilong lo i no inap holim moa yumi i pas long Krais.
Lo i tok, “Yu gat sin, orait bai yu dai.” Taim Krais i kisim sin bilong yumi, orait Em i kisim ples bilong yumi, na toktok bilong lo i holim Krais na long dispela as Krais Em i dai. Olsem na, long dispela as toktok bilong lo i no inap holim yumi. Krais i bihainim olgeta toktok bilong lo na long dispela as Krais Em i stretpela man trutru. Dispela stretpela pasin Krais i mekim em i mekim bilong yumi i pas long Em. Long dispela as God i save kolim yumi i pas long Jisas “stretpela manmeri.” Long ai bilong God i olsem yumi bin bihainim olgeta toktok bilong lo.
Em olsem na, yumi i pas long Krais yumi no ken i pret long lo bilong God. Nogat. Yumi ken i amamas. Long wanem, lo bilong Spirit bilong laip i mekim yumi fri long lo bilong sin na dai. Long wok bilong Jisas long diwai kros God i ken i kolim yumi stretpela manmeri, na long dispela rot Em i kisim bek yumi i pas long Krais.
Glenn.
