Moning.
Yumi save pinis olsem, prea em i pasin we yumi manmeri bilong God (yumi manmeri i bilipim na trastim God long kisim bek yumi long feitful wok bilong Jisas) yumi ken i toktok long God. Tasol, taim yumi prea, bai yumi toktok long wanem samting? Wanem samting i ken i stiaim prea bilong yumi?
Bilip na tingting bilong yumi bai stiaim prea bilong yumi.
Yumi i gat wanem kain bilip long God, na yumi i gat wanem kain tingting long ol samting bilong God, orait ol dispela bilip na tingting bilong yumi bai stiaim toktok bilong yumi taim yumi prea.
Sampela manmeri i tingim olsem prea em i pasin we yumi ken i askim God long givim ol samting long yumi. Ol i tingim olsem, sapos yumi bilip na yumi askim God, orait Em bai givim ol samting long yumi. Ol i tingim olsem God Em i stap bilong givim ol kago samting, na prea em i wei bilong askim God na Em i tilim ol dispela samting long yumi. Em olsem na dispela bilip na tingting bilong ol i stiaim prea bilong ol.
Na i no gat kwesten mak, God i save givim helpim long ol manmeri bilong Em. Las wik long Sande Baibel Toktok yumi lukim Matyu 6:8. Jisas i tok olsem, “…..taim yu no askim yet, Papa bilong yu Em i save pinis long wanem samting yu sot.” Papa bilong yumi i save pinis long wanem samting yumi sot long en na Em i amamas long helpim yumi long samting yumi nidim. God Em i amamas long helpim ol lain bilong Em.
Tasol, Baibel i gat sampela toktok moa long dispela samting. Lukim Jems 4:3.
3Na taim yupela i askim God, orait yupela no save kisim ol samting. Long wanem, tingting bilong yupela i no stret na yupela laik kisim ol samting bilong amamasim skin bilong yupela yet.
Sampela taim, ol lain bilong God ol i no save kisim ol samting ol i askim God long en. Long wanem, ol i askim God long kisim ol samting God i no laik givim ol. Long tingting bilong ol, ol i kisim selfis tingting, na ol i tingting tasol long kisim ol samting bilong amamasim ol yet na bilong apim ol yet, na ol dispela kain tingting i stiaim prea bilong ol na ol i askim God. Na God i no givim ol dispela samting long ol. Long wanem, ol dispela samting i no inap helpim ol na i no inap kamapim gutpela samting long laip bilong ol.
Pulapim tingting bilong yu long God yet na long wok bilong God.
Yumi tok pinis olsem, bilip na tingting bilong yumi bai stiaim prea bilong yumi. Yumi gat wanem kain bilip long God, na yumi gat wanem kain tingting long ol samting bilong God, orait ol dispela bilip na tingting bilong yumi bai stiaim toktok bilong yumi taim yumi prea. Em olsem na yumi mas pulimapim tingting bilong yumi long trupela bilip na long ol trupela samting bilong God, na taim yumi prea, orait ol dispela samting bai stiaim toktok bilong prea bilong yumi.
Holim tingting long tok Jisas i mekim long Matyu 6:5-8. Ol manmeri i mekim planti tok nating long prea bilong ol, Jisas i tok olsem ol dispela kain manmeri ol i no save long God. Ol manmeri i mekim toktok nating bilong bilasim prea bilong ol, ol i no save long God, olsem na prea bilong ol i narapela kain prea olgeta. Em olsem na yumi mas save long God na yumi save long olgeta wei bilong God na yumi larim ol dispela samting i stiaim prea bilong yumi.
Stori i stap long Luk 18:9-14 i putim dispela samting long ples klia. Yumi skelim….
9Sampela manmeri i tingim ol i stretpela manmeri na ol narapela manmeri ol i no stretpela olsem ol. Long ol dispela manmeri Jisas i autim tok piksa. 10 “Tupela man i laik prea na tupela i go antap long tempel. Wanpela man em i Farisi na narapela man em i man bilong kisim takis. 11Na dispela Farisi man, em wanpela em i sanap na em i prea. Em i prea olsem, “God, mi tok tenkyu long Yu, long wanem, mi no olsem ol narapela manmeri. Ol i save stil na mekim pasin i no stret na mekim pasin pamuk, na ol i save mekim pasin olsem dispela man bilong kisim takis i save mekim, tasol mi nogat. 12Mi save tambu long kaikai long tupela de. Na olgeta samting mi kisim mi save brukim na givim tais long Yu.”
13Tasol, man bilong kisim takis em i sanap longwe na em i no lukluk i go antap long heven, nogat. Em i paitim bros bilong em na em i tok, “God, mi wanpela sin man stret, plis marimari long mi.”
14Na Jisas i tok, “Mi tokim yupela, dispela man bilong kisim takis, em tasol i kamap stretpela man long ai bilong God na em i go bek long haus bilong em. Tasol dispela narapela man nogat. Long wanem, ol manmeri i apim ol yet, bai God i daunim ol. Tasol ol manmeri i daunim ol yet, bai God i litimapim ol.
Farisi man. Farisi man i tingim olsem God bai amamas long gutpela pasin bilong em na God bai kisim bek em long dispela gutpela pasin bilong em. Dispela em i bilip bilong em. Em i bilipim na trastim dispela samting. Em i tingim olsem God Em i God bilong kisim bek manmeri long stretpela pasin ol yet i mekim.
Em olsem na taim Farisi man i mekim prea, orait prea bilong em i pulap long dispela tingting na bilip bilong em. Prea bilong em i pulap tasol long toktok bilong litimapim nem bilong em yet long ai bilong God.
Tingting na bilip bilong Farisi man i stiaim prea bilong em. Em i holim rong tingting long God na em i holim rong bilip long hau God i save kisim bek sin manmeri, olsem na prea bilong em i paul olgeta. Lukim lain 14. Jisas i tok olsem, God i no harim prea bilong em na kisim bek em. Nogat. God i larim em tasol na em i lus long rong tingting bilong em.
Takis man. Takis man em i save liklik long God. Em i save olsem God i save hetim sin pasin. Em i save olsem pe bilong sin em i dai. Em i save olsem God Em i no inap amamas long em bikos em i wanpela sinman stret. Long dispela as taim em i prea em i sem na em i daunim het bilong em.
Na tu, Takis man em i save olsem God Em i God bilong marimari. Em i klia olsem God Em i gutpela God. Olsem na em i putim em yet i go long han bilong dispela gutpela God bilong marimari. Em i trastim God long wokim wok bilong stretim em na bilong kisim bek em.
Dispela takis man em i no gat planti save long God tasol em i gat trupela save long God, na taim em i mekim prea, orait dispela trupela bilip na tingting bilong em i stiaim toktok bilong em. Na God i harim dispela toktok bilong em na God Em i marimari long em olsem em i askim.
Takis man em i no toktok planti na em i no bilasim toktok bilong em. Nogat. Em i tok stret tasol long nek bilong em yet. Em i save liklik long God na em i save liklik long pasin bilong God, na dispela liklik trupela save bilong em i stiaim prea bilong em. Na samting em i askim God long em, orait God i givim em.
Kisim trupela save na mekim prea.
Yumi mas kisim save moa long God na long pasin bilong Em. Yumi mas kisim save moa long wok Em i mekim long feitful baim bek wok bilong Jisas long diwai kros. Yumi mas save moa long wok God i mekim long wok bilong Holi Spirit insait long laip bilong ol manmeri bilong Em. Yumi mas pulimapim bel na tingting bilong yumi long ol dispela samting bilong God, na yumi bilipim na trastim ol dispela trupela samting bilong God, na taim yumi prea, orait prea bilong yumi bai pulap long olgeta toktok i gutpela.
Glenn.
