Moning.
Yumi manmeri i bilipim na trastim feitful wok bilong Jisas long diwai kros – yumi i bilip olsem, feitful wok bilong Jisas tasol i mekim yumi stretpela long ai bilong God, na God i kisim bek yumi long stretpela wok bilong Jisas tasol – yumi i bilip olsem, Jisas wanpela tasol Em i rot bilong God i kisim bek yumi na i no gat narapela rot – yumi i holim na bihainim dispela kain bilip, ating sampela taim yumi ken i tubel. Long wanem, long P.N.G. i gat planti manmeri i save toktok planti na toktok bilong ol i karamapim na i daunim dispela kain bilip.
Taim ol sampela manmeri ol i makim ol narapela samting em i rot bilong God i kisim bek yumi sin manmeri, orait dispela toktok i save karamapim na daunim trupela bilip long feitful wok bilong Jisas. Ol wanwan samting ol i makim i gutpela samting, tasol ol dispela samting i no rot bilong God i kisim bek yumi sin manmeri.
Pasin bilong baptais em i gutpela samting, tasol em i no rot bilong God i kisim bek yumi. Lo God i givim Moses em i gutpela samting, tasol em i no rot bilong God i kisim bek yumi. Pasin bilong stretim laip em i gutpela samting, tasol em i no rot bilong God i kisim bek yumi.
Em olsem na taim yumi tok, “Wok bilong Jisas long diwai kros tasol em i rot bilong God i kisim bek yumi,” orait sampela manmeri i sutim tok long yumi bilong kotim na daunim bilip bilong yumi. Sampela manmeri i tok olsem, “Yupela no trupela lotu na yupela lus lain tasol.”
Em olsem tasol yumi harim tok bilong God long Rom 8:31-34.
31 Orait, nau yumi bai tok wanem? Sapos God i mekim wok bilong helpim yumi, orait husat inap winim yumi? 32 God i no holim bek dispela wanpela Pikinini bilong Em. Nogat. Em i givim Em bilong helpim yumi olgeta. Olsem na, yumi ken i save, God Em i God bilong mekim grasia na Em bai givim ol narapela samting wantaim long yumi. 33 Husat inap kotim ol manmeri God i bin makim? I no gat wanpela man inap mekim. Nogat. Em i God yet i bin givim stretpela pasin long ol na kolim ol “stretpela man”. 34 Husat inap daunim ol lain bilong God? I no gat wanpela man inap mekim. Krais Jisas i bin i dai, na tu, Em i kirap gen na kisim laip. Em i stap pinis long han sut bilong God, na Em i save wok long askim God long helpim yumi. Rom 8:31-34.
Aposel Pol i putim 3-pela kwesten na 3-pela ensa bilong stiaim tingting na bel bilong yumi i bilipim na trastim God long kisim bek yumi long feitful wok bilong Jisas tasol. Yumi skelim dispela 3-pela kwesten wantaim ensa bilong em.
1. Husat inap winim yumi?
God yet i bin mekim wok bilong kisim bek yumi. Yumi no gutpela manmeri na yumi no mekim wanpela gutpela samting na God i kisim bek yumi. Nogat tru! Yumi manmeri bilong mekim pasin nogut tasol na God i kisim bek yumi. Em olsem na yumi ken i save olsem, God Em i God bilong mekim grasia.
Grasia em i pasin we God i givim bel na mekim gutpela pasin bilong helpim manmeri i bin mekim nogut long Em na i egensim Em na i daunim nem bilong Em. God i givim Jisas na Jisas Em i dai bilong rausim pe bilong sin na bilong stretim yumi long ai bilong God, bai God i fogivim yumi na kisim bek yumi. Dispela wok bilong God em i grasia bilong God.
God Em i God bilong mekim grasia na Em i wokim ol bikpela bikpela wok pinis long yumi long wok bilong Jisas long diwai kros. Em olsem na wanpela samting i no inap winim na kapsaitim yumi i bilipim na trastim na bihainim Jisas.
2. Husat inap kotim yumi?
Yumi tok pinis olsem, God i givim Jisas na Jisas Em i dai bilong rausim na pinisim pe bilong sin, na long dispela rot Em i stretim yumi long ai bilong God, bai God i fogivim yumi na kolim yumi “stretpela manmeri” na kisim bek yumi.
God i wokim ol bikpela wok pinis bilong rausim na pinisim pe bilong sin, na long dispela as Em i no inap kotim yumi long sin bilong yumi. Kot bilong olgeta sin bilong yumi i pinis olgeta long ai bilong God. Na sapos God i no inap kotim yumi, orait husat i ken i kotim yumi? I nogat wanpela man na i no gat wanpela samting i ken i kotim yumi. Long wanem, God i pinisim pinis kot bilong olgeta sin bilong yumi i pas long Jisas na i pas long feitful wok bilong Jisas.
3. Husat inap daunim yumi?
Taim Jisas i kam long dispela graun ol manmeri nogut ol i laik rausim Jisas na ol i kilim Em i dai long diwai kros. Na taim Jisas i dai pinis, orait ol i tingim olsem ol i winim Jisas. Tasol nogat. Jisas i winim ol na Em i kirap bek long matmat na Em i sindaun wantaim God long heven.
Long dai na kirap bek bilong Jisas, Jisas i pinisim kot na pe bilong sin bilong yumi, na Jisas i stap wantaim God oltaim oltaim na em i dispela samting i helpim yumi na yumi i stap seif. Jisas i stap wantaim God na dai bilong Em i lukautim yumi oltaim oltaim oltaim. Long wanem, dai bilong Jisas i stretim yumi long ai bilong God.
Tru, sampela manmeri bai sutim tok long yumi bilong kotim na daunim na winim bilip bilong yumi. Tasol, husat inap winim God? Husat inap kotim God? Husat inap daunim God? Wanpela man na wanpela samting i no inap tru. Long dispela as wanpela man na wanpela samting i no inap winim o kotim o daunim yumi. Long wanem, God i wokim olgeta samting long feitful wok bilong Jisas bilong kisim bek yumi.
Tru, sampela manmeri bai toktok planti long ol narapela narapela rot. Tasol yumi no nidim ol narapela rot. Nogat. Jisas wanpela Em i rot bilong yumi. Yumi i pas long Jisas yumi seif olgeta long han bilong Jisas. Yumi seif olgeta long olgeta wok God i mekim long feitful wok bilong Jisas long diwai kros bilong kisim bek yumi. Em olsem na, yumi ken i stap strong na trastim Jisas na bihainim Jisas i go i go olgeta.
Glenn.
