Wokabaut olsem yupela pikinini bilong lait.

Long stadi bilong yumi long Efesus 5:3-7 yumi kisim save olsem, pamuk pasin na olgeta kain pasin i doti na pasin bilong mangalim meri bilong narapela man na mangalim meri pikinini bilong wanpela man, i no gutpela pasin bilong holi manmeri bilong God. Pol i tok, “Namel long yupela ol dispela kain pasin i no ken i kamap.”

Na tu, doti toktok na stupit toktok na pilai toktok i doti, i no gutpela pasin bilong holi manmeri bilong God. Pol i tokim yumi long lusim ol dispela kain toktok na em i tok, “Mobeta yumi yusim toktok bilong yumi bilong tok tenkyu long God.”

Yu save, toktok nogut i save bagarapim tingting na bel bilong ol manmeri i mekim na i harim. Olsem na, mobeta yumi mekim gutpela toktok bilong tok tenkyu long God na long dispela rot tingting bilong yumi bai i stap stret na toktok yumi mekim bai helpim ol manmeri i harim tok bilong yumi.

Ol pasin nogut na ol toktok nogut i save bagarapim yumi yet na i bagarapim ol narapela manmeri tu. God i tokim yumi long lavim ol brata na sista bilong yumi. Olsem na, yumi lusim ol dispela kainkain pasin nogut na yumi lusim ol kainkain toktok nogut, na long dispela rot yumi lavim brata na sista bilong yumi.

Na yumi bin skelim wanpela strongpela tok bilong God…. God i tok, manmeri i save mekim ol dispela kain pasin – manmeri i givim ol yet long ol dispela kain pasin – manmeri i save mekim pasin pamuk na pasin i doti na mangalim pasin – manmeri i save mekim toktok i doti na stupit toktok na pilai toktok i doti – ol dispela kain manmeri ol i no inap lukim kingdom bilong Krais na God – ol i no inap i go long heven – nogat – ol bai lukim na kisim bel hat bilong God long hel tasol. Ol dispela pasin em i mak bilong manmeri ai na ia na bel bilong ol i no op na ol i no tanim bel na ol i no bilipim na trastim na bihainim feitful wok bilong Jisas.

Tasol yumi i bilipim na trastim God long kisim bek yumi long feitful wok bilong Jisas long diwai kros, na yumi bilipim na trastim na bihainim Jisas, orait yumi no stap olsem. Nogat. Holi Spirit i opim ai na ia na bel bilong yumi pinis na feitful wok bilong Jisas i kisim yumi i kam pinis long femili bilong God. Olsem na, yumi bilong God na yumi laik bihainim na wokabaut long gutpela bilong God, Papa bilong yumi. Dispela em i mak bilong ol trupela manmeri bilong God.

Em olsem na yumi no ken i larim ol sampela manmeri i giamanim yumi – yumi no ken i paul long tingting bilong yumi – yumi no ken i tingim olsem yumi ken i wokabaut long pasin nogut na bihainim Jisas wantaim. Nogat.

Long lain 7 Pol i tokim yumi long yumi no ken i poroman wantaim ol manmeri i wokabaut long kainkain pasin nogut.

Long lain 8-14 Pol i givim 2-pela tok moa long yumi na yumi ken i klia long wanem as yumi no ken i wokabaut long ol kainkain pasin na toktok nogut, na long wanem as yumi no ken i poroman wantaim ol manmeri i save mekim ol kainkain pasin na toktok nogut.

Fes toktok i olsem….

1. Yumi no manmeri bilong tudak, nogat, nau yumi bilong lait bilong BIKPELA.

Lukim lain 8-10.

Bipo, yumi i stap olgeta long pasin tudak. Bipo, taim Holi Spirit i no kam yet long laip bilong yumi na Em i no opim ai na ia na bel bilong yumi na Em i no givim bilip long yumi, long dispela taim yumi stap long pasin tudak. Long dispela taim olgeta pasin yumi mekim em i tudak pasin bikos yumi wok long givim baksait long God – yumi no save long lait na yumi no kam yet long lait.

Long dispela taim yumi no save long wok bilong Krais – yumi bin harim stori, tasol yumi no save. Yumi no save Jisas i bin mekim wok bilong rausim asua bilong yumi na mekim yumi i stap stret na holi long ai bilong God. Yumi no save God i bin salim Jisas i kam bilong mekim dispela wok bilong kisim bek yumi na bilong adoptim yumi na bilong mekim yumi pikinini long femili bilong Em. Yumi no save God i kisim bek yumi long ol dispela feitful wok bilong Jisas tasol. Taim yumi stap yet long ol tudak pasin yumi no save long ol wok bilong God na Krais.

Tasol, bihain, Holi Spirit i kam, na Em i mekim wok insait long yumi, na Em i opim ai na ia na bel bilong yumi na Em i soim yumi ol dispela wok bilong God na Krais – Em i kliaim tingting bilong yumi na Em i givim save long yumi long olgeta wok bilong God na Krais.

Em olsem na Em i givim bilip long yumi, na long dispela as tasol yumi bin tanim bel na yumi bilipim na trastim olgeta wok Krais i bin mekim bilong mekim yumi klin long ai bilong God na God i kisim bek yumi. Taim Holi Spirit i mekim ol dispela wok insait long laip bilong yumi, em nau, Holi Spirit i bin kisim yumi i kam long lait.

Lukim 1 Korin 6:9-11 – lukluk gut long lain 11….

⁹Ating yupela no save, ol manmeri nogut ol i no inap kisim kingdom bilong God. Yupela no ken i giamanim bel bilong yupela. Ol manmeri i mekim ol kainkain pamuk pasin, na ol manmeri i lotu long ol aidol, na ol marit manmeri i mekim pasin pamuk, na ol 2-kina man, na ol man i mekim marit pasin wantaim narapela man, ¹⁰ na ol stilmanmeri, na ol manmeri i tok baksait, na ol kon manmeri, ol i no inap kisim kingdom bilong God. ¹¹Na pastaim sampela bilong yupela i bin i stap olsem. Tasol, long wok bilong BIKPELA Jisas Krais na long Holi Spirit bilong God bilong yumi, God i wasim yupela, na Em i mekim yupela holi manmeri, na Em i givim stretpela pasin long yupela bilong kolim yupela “stretpela manmeri”.

Long wok bilong BIKPELA Jisas Krais God i wasim yumi na Em i mekim yumi holi manmeri bilong Em na Em i mekim yumi kamap stretpela manmeri long ai bilong Em na yumi kisim nem “stretpela manmeri”. Na long wok bilong Holi Spirit God i kamautim yumi long tudak – Em i opim ai na ia na bel bilong yumi – Em i kamapim laip long yumi – na long dispela rot Em i putim yumi i kam long lait bilong Em. Pastaim yumi stap long tudak (lain 9-10), tasol nau yumi manmeri bilong tulait (lain 11).

Em olsem na, long dispela as, yumi no ken i poroman wantaim ol manmeri bilong tudak bikos ol i bilong narapela samting olgeta. Yes, bipo yumi bilong dispela narapela samting tu, tasol nau nogat. Nau yumi bilong BIKPELA – nau yu bilong lait bilong BIKPELA. God i bin wasim yumi na mekim yumi klin, bai yumi wokabaut long klinpela pasin – Em i kisim yumi i kam long lait bai yumi wokabaut long lait.

Yupela mama, yupela save long dispela samting. Taim yu wasim pikinini bilong yu, orait yu no wasim em bai em i ken i tanim tanim long graun malumalu olsem ol pik na kamap doti gen. Nogat. Taim yu wasim pikinini na yu wasim klos bilong em, orait yu minim long em i stap klin na i wokabaut long klin tasol.

Na wankain olsem. God i bin mekim bikpela wok bilong wasim yumi na mekim yumi klin, olsem na, yumi mas i stap klin – yumi mas i wokabaut long pasin i klin – yumi mas wokabaut long lait bilong BIKPELA. Yumi no ken i tanim tanim long doti tudak pasin. Yumi no ken i wokabaut long tudak.

Lukim Efesus 5:9-10 gen – olgeta samting, olgeta pasin, i gutpela tumas na i stretpela tumas na i tru tumas em i kaikai bilong lait.

Manmeri i kam long lait bai karim prut bilong lait. Olsem na, yumi Holi Spirit i kisim yumi i kam long lait, i kam long Krais, orait yumi mas karim kaikai bilong lait, kaikai bilong Krais. Kaikai bilong lait bilong BIKPELA em i olgeta samting i gutpela tumas na i stretpela tumas na i tru tumas. Yumi mas karim dispela kain prut – yumi mas wokabaut long dispela kain pasin.

Na olgeta samting i nogut tumas na i pipia tumas na i rabis tumas em i kaikai bilong tudak. Olgeta samting i gutpela tumas na stretpela tumas na i tru tumas em i kaikai bilong lait. Yumi mas wokabaut long lait. Yumi no ken i wokabaut long tudak pasin. Nogat. Yumi givim baksait long tudak na yumi tanim pes bilong yumi long tulait na yumi wokabaut i go i go long tulait.

Long dispela as Pol i tok olsem, “Yupela mas wok long painimaut wanem pasin BIKPELA i save laikim.

Na hau na yumi painimaut wanem pasin BIKPELA i save laikim? Lukim na skelim Baibel – i no gat narapela rot – long Baibel tasol. Olsem na, yumi mas wok long skelim gut Tok bilong God na bihainim wanem pasin Em i tokim yumi long mekim na bihainim.

Harim. Mobeta yumi poroman wantaim ol sampela manmeri i tanim bel trutru na i bilipim na trastim Jisas trutru, na yumi raun wantaim dispela kain manmeri. Long wanem? Em i ken i helpim yu na yu ken i helpim em long mekim na bihainim pasin God i save laikim. Yu na em i ken i wokabaut wantaim long lait bilong BIKPELA.

Yumi no ken i mekim rabis pasin na rabis toktok na poroman wantaim ol tudak manmeri bikos yumi no bilong tudak moa. Nogat. Nau yumi bilong lait bilong BIKPELA.

2. Taim yumi wokabaut long pasin bilong lait, orait pasin yumi mekim i putim tudak pasin long ples klia, na sampela manmeri i ken i sem na tanim bel na kam insait long lait.

Lukim lain 11-14.

Yumi bilong lait bilong BIKPELA nau – Em i bin mekim bikpela wok na kisim yumi i kam long lait bilong Em, olsem na, yumi mas i stap long lait bilong BIKPELA. Kaikai bilong lait em i olgeta samting i gutpela tumas na stretpela tumas na tru tumas.

Rot bilong tudak em i no save kamapim wanpela gutpela samting. Olsem na, yumi no ken i wokabaut long tudak pasin wantaim ol manmeri bilong tudak. Nogat. Mobeta yumi helpim ol i save olsem tudak pasin em i nogut pasin (lain 11).

Tudak pasin em i samting bilong sem tasol. Na sapos yumi helpim manmeri save olsem, tudak pasin em i samting bilong sem, orait yumi ken i helpim ol i lusim tudak bilong ol na i kam insait long tulait wantaim yumi. Long dispela rot yumi bai helpim ol na yumi lavim ol.

Lait i save putim olgeta samting long ples klia. Dispela em i pasin bilong lait. Taim yumi laitim lam, orait olgeta samting insait long haus bilong yumi i kamap ples klia na yumi ken i lukim. Na wankain olsem long pasin bilong lait bilong BIKPELA. Taim yumi mekim gutpela pasin na pasin i stretpela na holi, orait dispela pasin bilong yumi bai putim ples klia sem bilong tudak pasin. Ol manmeri i wokabaut long tudak pasin, taim ol i lukim pasin i stretpela na holi, orait ol bai save olsem pasin bilong ol i no gutpela pasin na i no kamapim wanpela gutpela samting na ol i ken i sem na ol i ken i tingting long kam insait long lait wantaim yumi.

Tasol, sapos yumi wokabaut long tudak pasin wantaim ol, orait dispela i no inap helpim yu na i no inap helpim ol. Nogat. Dispela pasin bilong yu bai kamapim ol samting nogut tasol – bai yu bagarapim ol manmeri bilong tudak moa na bai yu bagarapim yu yet wantaim.

Yu save, pasin yumi mekim, pasin yumi wokabaut long em, i ken i karim gutpela kaikai o i ken i karim kaikai nogut. Sapos yu wokabaut long lait pasin, orait bai yu karim gutpela kaikai – na pasin yu mekim i ken i karim gutpela kaikai tu long laip bilong narapela manmeri.

Em olsem na mobeta yumi wokabaut long lait bilong BIKPELA. Mobeta yumi wokabaut long pasin i gutpela tumas na i stretpela tumas na i tru tumas bikos dispela kain pasin em i pasin bilong lait. Na dispela lait i ken i givim lait long komyuniti bilong yumi – komyuniti bilong yumi i wokabaut long tudak pasin na yumi ken i helpim ol save long pasin nogut bilong ol na soim rot bilong ol i ken i kam insait long lait wantaim yumi.

Lukim lain 14 – Yumi ken i helpim ol tudak manmeri i wekap long dai bilong ol na ol i kam long lait bilong BIKPELA. Sapos yumi wokabaut long pasin bilong lait, bai yumi helpim planti manmeri. Tasol sapos yumi wokabaut long tudak pasin wantaim ol tudak manmeri, orait yumi no inap helpim wanpela manmeri na yumi westim laip bilong yumi.

Nogut yumi westim laip bilong yumi, a? Yumi no bilong tudak. Nogat. Yumi bilong lait bilong BIKPELA. Olsem na, yumi no ken i wokabaut long pasin bilong tudak. Nogat. Mobeta yumi wokabaut long pasin bilong lait na sampela manmeri i wokabaut long tudak ol i ken i lukim tulait pasin bilong yumi na ol i sem long tudak pasin bilong ol na ol i tanim bel na kam long lait wantaim yumi.

Long dispela wei laip bilong yumi i no wes nating. Nogat. Laip bilong yumi i karim gutpela kaikai bilong lavim na dispela i gutpela samting stret.

Orait tingim. Bai yumi karim wanem kain kaikai bilong laip bilong yumi? Bai yumi westim laip bilong yumi o nogat? Skelim na tingting gut.

Em tasol.