Yumi bihainim husat tru?

Moning.

Yumi bihainim husat tru? Long maus yumi ken i tok olsem, “Mi bihainim Jisas tasol.” Em olsem tasol planti taim yumi manmeri yumi ken i mekim wanpela kain toktok long maus bilong yumi na long bel bilong yumi, yumi bihainim ol narapela samting olgeta.

Em olsem na sampela manmeri i tok strong olsem, “Mi bihainim Jisas,” tasol long bel bilong ol, ol i no bihainim Jisas. Nogat. Ol i bihainim ol lotu samting bilong ol, o ol i bihainim misin bilong ol, o ol i bihainim waitman bilong ol, o ol i bihainim ol narapela samting olsem. Sampela taim ol i tingim kago tasol. Long maus ol i tok, “Mi bihainim Jisas,” tasol long bel bilong ol, ol i bihainim laik bilong ol bilong kisim ol kago samting.

Na Jisas i putim dispela kain pasin long ples klia. Ol planti manmeri ol i mekim gutpela toktok long maus bilong ol na ol i givim biknem long Jisas, tasol long bel bilong ol, ol i tingting tasol long kisim ol kaikai na kago samting long han bilong Jisas. Yu ken i lukim dispela tok long Jon 6:1-69. Yumi sotim sotim na skelim.

• Long hapsait bilong raunwara Galili Jisas i givim kaikai long 5,000 manmeri. Em i wokim mirakel na Em yusim 5-pela bret na 2-pela pis tasol na Em i tilim kaikai long olgeta manmeri. Na bihain ol i kaikai inap pinis, orait i gat 12-pela basket i pulap long kaikai i stap yet na ol i no fit long pinisim. (Jon 6:1-13.).

• Na planti manmeri i lukim mirakel bilong Jisas na ol i tok olsem, “Tru tumas, Jisas Em i dispela profet God i bin tok long salim i kam.” Long dispela tok ol i givim biknem long Jisas, tasol long bel bilong ol, ol i gat narapela kain tingting. (Jon 6:14-15.).

• Orait Jisas i lusim ol na Em i brukim raunwara na i go long hapsait. Na planti bilong ol dispela 5,000 manmeri ol tromoi lek na ol i raunim raunwara na i go bungim Jisas gen long hapsait. (Jon 6:16-24.).

• Na Jisas i save long bel bilong ol na Em i save olsem, ol i no bilipim na trastim na bihainim Em trutru. Nogat. Ol i laik Jisas i wokim ol mirakel moa long ol na kamapim ol sampela kaikai na kago samting moa long ol. Em olsem na Jisas i givim woning long ol, bai ol i no ken i tingting long ol kago samting. Nogat. Ol i mas bilipim na trastim na bihainim Jisas. Long wanem, laip i stap oltaim oltaim i kamap long feitful wok bilong Jisas tasol. Em olsem na ol i mas pas long Jisas na bilipim na trastim God long kisim bek ol long feitful wok bilong Jisas. (Jon 6:25-29.).

• Tasol ol i bekim tok bilong Jisas olsem, “Yu mas wokim ol mirakel pastaim na bai mipela i pas long Yu na mipela i bilipim na trastim na bihainim Yu.” Ol i lukim ol mirakel pinis, tasol ol i laik lukim ol sampela samting moa. Na Jisas i tok nogat long ol. Ol kago samting bai pinis, tasol laip Jisas i ken i givim ol i no inap pinis. Jisas i tok piksa long ol na Em i tok, “Sapos yupela kaikaim Mi, orait bai yupela lukim trupela laip i stap oltaim oltaim.” Jisas i minim olsem, sapos ol i pas long Jisas na ol i bilipim na trastim Jisas, na ol i bilipim na trastim God long kisim bek ol long feitful wok bilong Jisas, orait ol bai lukim trupela laip bilong oltaim oltaim. (Jon 6:30-65.).

• Na ol i les long toktok bilong Jisas na ol i lusim Em na ol i go bek long haus bilong ol yet. (Jon 6:66.).

• Jisas i sutim tok long ol 12-pela disaipel bilong Em na Em i tok, “Na yupela? Bai yupela lusim Mi tu, a?” (Jon 6:67.).

• Na Pita i kisim maus bilong olgeta 12-pela disaipel na em i bekim askim bilong Jisas. Lukim Jon 6:68-69..

⁶⁸ Saimon Pita i bekim tok bilong Jisas olsem, “BIKPELA, bai mipela i go na pas long husat? Yu tasol i holim tok bilong laip i stap oltaim oltaim. ⁶⁹ Na bilip i kam long mipela na mipela save olsem, Yu Holi Man bilong God.”
Jon 6:68-69.

Ol planti manmeri ol i tingting long ol mirakel samting na ol kaikai na kago samting na ol i bihainim Jisas. Long maus ol i givim biknem long Jisas, tasol taim Jisas i tok nogat long ol long ol mirakel na kaikai na kago samting, orait ol i les na ol i lusim Jisas na ol i go bek gen long ples bilong ol.

Tasol ol 12-pela disaipel i klia olsem, Jisas yet Em i as bilong trupela laip. Jisas yet Em i Holi Man God i bin makim bilong mekim wok bilong baim bek sinmanmeri. Olsem na, ol i no larim bel bilong ol i go pas long narapela man na i go pas long ol narapela samting. Nogat. Ol i pas long Jisas. Long maus bilong ol na long bel bilong ol, ol i bilipim na trastim na bihainim Jisas. Ol i bilipim na trastim Jisas long kamapim laip i stap oltaim oltaim. Ol i bilipim na trastim God long kisim bek ol long feitful baim bek wok bilong Jisas.

Yumi olgeta manmeri yumi mas skelim bel bilong yumi. Nogut yumi i stap olsem ol dispela planti manmeri bilong stori na yumi larim bel bilong yumi i pas long ol narapela samting. Nogut yumi tok long maus, “Mi bihainim Jisas,” na yumi larim bel bilong yumi i pas tasol long kisim kago samting o pas tasol long kisim biknem samting o pas tasol long kisim ol kainkain narapela samting olsem.

Nogut yumi larim bel bilong yumi i pas long lotu tasol. Nogut yumi larim bel bilong yumi i bihainim misin pasin tasol. Nogut yumi larim bel bilong yumi i pas long ol sampela waitman tasol. Long wanem, ol dispela samting i no as na i no rot na i no inap kamapim trupela laip bilong oltaim oltaim.

Jisas wanpela Em i as bilong trupela laip i stap oltaim oltaim. God i kisim bek sin manmeri long baim bek wok Jisas i mekim long diwai kros. Em olsem na, sapos yumi laik lukim trupela laip bilong oltaim oltaim, orait yumi mas pas long Jisas wanpela tasol. Yumi mas bilipim na trastim feitful wok bilong Jisas tasol. Yumi bilipim na trastim God long kisim bek yumi long feitful baim bek wok bilong Jisas long diwai kros. Long maus na long bel yumi pas trutru long Jisas tasol.

Glenn.