Moning.
Long 3 mun long yia 2016, wanpela man, nem bilong em Tomas, em i laik redi long lotu bilong em. Olsem na, em i go daun long wara na waswas. Na taim em i wokabaut i kam antap, orait ol sampela man ol i holimpas em, na ol i paitim em na katim katim em na kilim em i dai. Long wanem, ol i tingim olsem Tomas em i wanpela posin man.
Bipo, ol sampela manmeri long ples bilong Tomas ol i sutim toktok long em, na Tomas i harim tok win olsem, ol i laik kilim em i dai. Em olsem na Tomas i mekim tok olsem, “Mi no wokim rong, olsem na, mi no inap ranawe. Nogat. Bai mi stap na mi bai trastim God long lukautim mi.” Tasol, i luk olsem God i no lukautim Tomas, long wanem, liklik taim long bihain ol i holimpas Tomas na kilim em i dai.
Na king Devit i fesim kain samting olsem. Ol i no tok, “Devit i wokim posin.” Nogat. Tasol ol i sutim tok nogut long Devit, na pikinini bilong Devit wantaim ol planti man long lain bilong Em i kamap birua na i laik kilim em i dai. Lukim tok bilong Devit long Buk Song 3.
DISPELA SONG DEVIT I RAITIM. EM I RAITIM TAIM EM I RANAWE LONG APSALOM, PIKININI MAN BILONG EM.
1 BIKPELA, ol birua bilong mi i kamap planti moa!
Planti manmeri i kirap na ol i egensim mi;
2 planti ol i tok baksait long mi olsem,
“God i no inap sevim em.”3 Tasol Yu, BIKPELA, Yu save raunim mi,
Yu as bilong gutpela nem bilong mi,
na Yu save litimapim het bilong mi.
4 Mi kraiaut long BIKPELA,
na Em i stap long holi maunten bilong Em na Em i harim kraiaut bilong mi.5 Mi sindaun long bet na mi slip,
na mi kirap gen bikos BIKPELA i save holim mi.
6 Mi no inap pret long hamas tausen manmeri
i raunim mi na i laik egensim mi.7 BIKPELA, plis kirap.
God bilong mi plis sevim mi.
Long wanem, Yu save paitim ol birua bilong mi long maus,
na Yu save brukim tit bilong ol manmeri nogut.8 BIKPELA i save sevim ol pipel bilong Em;
blesim bilong Em i stap wantaim ol pipel bilong Em. Buk Song 3:1-8.
Pikinini man bilong Devit i wokim birua long Devit, na em i grisim planti manmeri na ol i bihainim em, na olgeta i egensim Devit. Ol i laik pinisim laip bilong Devit. Ol i tok baksait long Devit, na ol i tok olsem, “God i no inap helpim em.” (Lain 1-2.) Em olsem tasol Devit, long nait, em i sindaun long bet bilong em na em i slip. (Lain 5-6.) Em i no pret na tingting planti na tanim tanim. Nogat. Em i slip tasol.
Na em olsem wanem? Devit i trastim BIKPELA. Devit i save olsem, BIKPELA i save raunim em bilong lukautim em. Ol birua i daunim nem bilong Devit, tasol Devit i larim dispela samting i stap long han bilong BIKPELA. (Lain 3-4.) Devit em i save long God bilong em, na Em i save olsem, BIKPELA Em i God bilong sevim ol manmeri bilong Em, na blesim bilong God i stap wantaim ol manmeri bilong Em. (Lain 8.)
Tru, Devit i laik God i kirap na mekim save long ol birua i laik bagarapim em. (Lain 7.) Tasol, em i larim olgeta samting i stap long han bilong BIKPELA na em i trastim BIKPELA.
Na Devit i trastim Bikpela long mekim wanem samting? Em i trastim BIKPELA long rausim ol birua bilong em, a? Devit i trastim BIKPELA long stretim gutpela nem bilong em long ai bilong ol manmeri, a? Devit i trastim BIKPELA long mekim olgeta samting long laip bilong em i kamap gutpela na wanpela trabel i no holimpas em na em i sindaun gutpela, a?
Nogat. Devit em i no save God bai mekim wanem samting long ol birua long em. Devit em i no save God bai givim gutpela sindaun long em o nogat. Devit em i no save God bai stretim gutpela nem bilong em long ai bilong ol manmeri o nogat.
Devit i save olsem, BIKPELA Em i gutpela. Em olsem na Devit i trastim God na wanem samting God i laik mekim long em, orait dispela samting bai i stap gutpela samting. God bai wokim gutpela samting tasol na Devit i wanbel olgeta long wanem samting God i mekim long em. Devit i trastim God na larim sindaun bilong em i stap long han bilong Gutpela God bilong em tasol.
God i save bosim na kontrolim olgeta samting na Devit i trastim God long bosim na kontrolim olgeta samting bilong sindaun bilong em long dispela graun. God i laik mekim wanem long Devit long dispela graun, orait Devit i save wanbel na trastim Gutpela God bilong em.
Na tu, Devit i trastim Gutpela God bilong em long ol samting bilong bihain. Maski wanem samting i kamap long ol femili bilong God long hia long dispela graun, blesim bilong God i stap wantaim ol na ol i no inap lus.
Ol manmeri i bilipim na trastim feitful wok bilong Jisas long diwai kros ol i femili bilong God na ol dispela manmeri, maski wanem hevi i kamap long ol long dispela graun, ol i no inap lus. Manmeri i bilipim na trastim God long kisim bek ol long feitful wok bilong Jisas ol i no inap lus long bihain. Nogat tru! Feitful wok bilong Jisas i holimpas ol na i raunim ol na i lukautim ol.
God bilong Devit em i kain God olsem, na long dispela as Devit i ken i slip, maski ol birua i laik bagarapim em.
Taim ol hevi i holimpas ol manmeri i bilipim na trastim feitful wok bilong Jisas, orait long ai bilong ol manmeri bilong dispela graun ol i tingim olsem, “God i no inap sevim ol.” Tasol ol i rong olgeta. Maski wanem hevi i holimpas ol femili bilong BIKPELA, blesim bilong Em i pas wantaim ol na ol bai i stap laip wantaim Em long heven.
Yes, trabel na hevi i ken i holimpas yumi i bilipim na trastim feitful wok bilong Jisas. Yes, ol sampela manmeri i ken i mekim birua na bagarapim yumi i bihainim Jisas. Tasol Bikpela bilong yumi Em i gutpela, na yumi ken i trastim God, maski wanem samting i kamap long yumi long hia long dispela graun, yumi ken i save olsem, God i yusim dispela samting bilong mekim ol gutpela samting long yumi.
Gutpela God bilong yumi Em i raunim yumi long feitful wok bilong Jisas long diwai kros, na long dispela pasin God i mekim gutpela long yumi na Em bai karim yumi seif i go long ples bilong Em.
Glenn.
