Wok Bilong Jisas – Sin (1)
Mak 4:35-41.
Mak 7:20-23.
Pastaim yumi skelim wanpela samting. Lukim stori i stap long Mak 4:35-41 na yumi skelim.
Ol disaipel bilong Jisas ol pret. Long wanem? Bikpela bikpela win i mekim solwara i solap nogut tru na i no gat wanpela samting ol disaipel yet i ken i mekim bilong helpim ol yet long dispela trabel. Em olsem na ol i singaut long Jisas long mekim sampela samting bilong helpim ol. Na Jisas i harim singaut bilong ol na Em i stopim bikpela win na Em i stopim solwara i solap, na ol i no lus long solwara. Ol i stap seif.
Em olsem tasol lukim lain 41. Bikpela bikpela win i mekim solwara i solap na klostu tru ol dring solwara, tasol Jisas i wokim mirakel bilong stopim win na solwara na ol i stap seif. Tasol pret i no lusim ol. Nogat. Pret bilong ol i kamap bikpela moa! Pastaim ol i pret, tasol nau ol i pret nogut tru! Em olsem wanem? Long wanem as ol i pret moa? Long wanem as ol i mas pret moa?
Yu gat wanem tingting? Skelim lain 41 gen. Ol i toktok namel long ol yet olsem, “Dispela man em i husat tru na win na wara i save harim tok bilong Em?” Taim ol i skelim Jisas Em i husat, orait ol i pret moa long laip bilong ol. Ol i tingim olsem bikpela trabel moa i kamap long ol.
Pikinini Bilong Man.
Taim ol disaipel i lukim pawa bilong Jisas bilong bosim win na solwara, orait ol i stat bilong kisim tingting olsem, tru tumas Jisas Em i Pikinini Bilong Man bilong visin bilong Daniel. Jisas Em i gat namba na Em i gat pawa na Em i gat glori olsem God na Em i king bilong kingdom bilong God. Ol i stat bilong kisim tingting olsem, “Tru tumas Jisas Em i God i kam daun long dispela graun na i stap namel long mipela.”
Na yu tingim. Sapos wantu God i kamap long yu, na yu stap fes tu fes wantaim God yet, orait yu bai i stap olsem wanem? Bai yu mekim wanem?
Ating sampela manmeri bilong dispela graun ol i ken i tingim olsem, em i gutpela samting long bungim God fes tu fes. Ol i tingim olsem, God Em i met bilong ol na Em bai i stap wanbel long ol na i no gat samting. Ol i tingim olsem, ol bai amamas long bungim God na God bai amamas long bungim ol wankain olsem yumi amamas long bungim ol sampela lain manmeri bilong yumi i bin i stap longpela taim long Mosipi.
Tasol taim ol disaipel i klia olsem, Jisas Em i God, orait ol i no amamas. Nogat. Ol i pret nogut tru! Em olsem wanem?
Ol i no stretpela.
Long bel bilong ol disaipel, ol i save olsem, ol i no stretpela manmeri. Ol i save olsem, ol i sin manmeri, na ol i pret bikos ol i save olsem, God Em i holi. Ol disaipel ol i save long tok bilong God long Olpela Testamen na ol i klia pinis olsem, God Em i holi na Em i hetim sin olgeta.
Na yumi save pinis olsem, yumi no naispela manmeri olsem yumi save toktok. Nogat. Yumi laik ol manmeri ol i mas tingim olsem yumi gutpela manmeri, tasol yumi save olsem yumi no gutpela manmeri tumas. Long bel bilong yumi, yumi save olsem, yumi sin manmeri na yumi manmeri bilong givim baksait long God na yumi manmeri bilong bihainim laik na save bilong yumi yet.
Bel bilong yumi em i yumi trutru.
Long Mak 7:20-23 Jisas i putim yumi long ples klia. Yumi save giaman long antap skin bilong yumi, tasol bel bilong yumi em i yumi trutru. Wanem kain man yumi laik ol manmeri i lukim, orait yumi mekim long antap skin bilong yumi. Tasol yumi stap wanem kain man trutru, orait yumi i stap long bel bilong yumi. Yumi laik ol manmeri i lukim antap skin bilong yumi, tasol Jisas i abrusim antap skin bilong yumi na Em i lukim yumi trutru long bel bilong yumi.
Long Mak 7:20-23 Jisas Em i diskasim ol sampela samting wantaim ol lotu lida bilong ol Juda, em ol Farisi. Na ol Farisi ol i no pret long God. Nogat. Ol i tingim olsem God i amamas long ol. Ol i save mekim ol lotu samting bilong wasim han bilong ol na bilong wasim ol plet na kap bilong ol na ol i mekim ol narapela narapela lotu pasin samting wantaim. Em olsem na ol i tingim olsem, God bai amamas long ol long ol lotu pasin bilong ol.
Tasol, long Mak 7:6-8, Jisas i krosim ol. Jisas i no amamas long ol lotu pasin samting bilong ol. Nogat. Jisas i abrusim ol antap skin samting bilong ol na Em i lukim bel bilong ol, na Em i no amamas.
Jisas i abrusim giaman bilong ol na Em i putim ol trupela samting bilong ol long ples klia (lukim lain 20-30). Yu save, samting trutru bilong yumi i stap long bel bilong yumi, na em i dispela samting em i givim bikpela trabel bilong yumi. Ol samting i stap long bel bilong yumi i mekim yumi doti long ai bilong God. Ol samting God i hetim na Em i bel hat long em, em ol dispela samting i stap long bel bilong yumi. Yumi stap olsem, na yumi no inap giamanim God long ol antap skin samting bilong yumi.
I gat as na yumi ken i pret.
Ol disaipel bilong Jisas, long bel bilong ol, ol i save olsem, sapos Jisas Em i God, orait ol i gat bikpela bikpela trabel. Long wanem, ol i save olsem, ol i stap sin manmeri na God Em i holi na Em i hetim sin.
Na tu, ol i save olsem, God i bin makim pe bilong sin. God i tok, “Pe bilong sin em i dai.” Ol i save olsem, tok dai em i narapela rot bilong tokaut long yumi lus long God. Ol i sin manmeri pinis, olsem na, ol i lus long God. Na ol i save olsem, taim ol i lusim dispela graun long hia, orait ol bai lus long God long kalabus hel oltaim oltaim.
Long dispela as ol disaipel i pret nogut tru! Ol i save long sin bilong ol na ol i save long holi bilong God. Em olsem na, ol i klia olsem, ol i stap insait long bikpela bikpela trabel.
Long wanem as yumi no pret tumas?
Taim ol disaipel i stat long kisim klia tingting olsem, Jisas Em i God, orait ol i pret nogut tru. Na olsem wanem yumi no pret olsem ol? Yumi skelim 2-pela samting.
1.. Yumi no bilip olsem, dispela man Jisas Em i trupela man i kamap long dispela graun 2000 yia long bipo na Em i trupela God i kam daun.
Ating yumi manmeri bilong dispela graun yumi les long trastim ol evidens na ol ai witnis evidens. Olgeta ai witnis evidens Mak i putim i soim yumi olsem, Jisas Em i God. Tingim. Jisas i bosim na kontrolim ol samting bilong dispela graun olsem win na solwara. Na Em i stretim ol wanwan manmeri i gat sik na i gat kainkain bagarap. Taim Jisas i toktok, orait Em i toktok olsem man i gat namba na man i gat save. Na Jisas i kirapim manmeri i dai pinis na ol i stap laip gen.
Na ol dispela samting i gat ai witnis i stap. Ol disaipel ol i stap wantaim Jisas na raun wantaim Jisas bai ol i ken i lukim olgeta samting bilong Jisas na harim olgeta tok bilong Jisas. Na God i lukautim ol dispela ai witnis toktok na i stap nau long han bilong yumi – buk Mak long Tok bilong God. Evidens i stap, tasol yumi les long bilipim na trastim ol evidens.
Tingim. Yumi no save holim tingting long ol nem bilong ol bipo tumbuna bilong yumi, tasol nem bilong Jisas i stap yet, 2000 yia bihain long taim bilong Em, na i stap long olgeta 4-kona bilong dispela graun. Em olsem tasol yumi les long bilipim na trastim Jisas na yumi bilipim na trastim ol toktok bilong ol tumbuna, nem bilong ol i lus pinis long yumi. Em olsem wanem?
2.. Yumi sanap long antap skin giaman bilong yumi na yumi tingim olsem yumi no inap lukim trabel.
Yumi manmeri bilong dispela graun yumi tingim olsem, Jisas i no trupela man i kamap long dispela graun. Na yumi no trastim toktok Jisas i mekim long yumi long sin i stap long bel bilong yumi. Yumi tok, “Yumi no manmeri nogut, na yumi no doti long ai bilong God, na yumi no sin manmeri na i stap aninit long bel hat bilong God. Nogat. Yumi gutpela manmeri na bai yumi i stap orait.”
Yumi tingim olsem, yumi naispela manmeri, na yumi les long harim tok i tokaut long yumi i stap manmeri nogut long ai bilong God. Yumi tingim olsem, sin bilong yumi i no bikpela tumas na yumi no inap lus long God long kalabus hel. Yumi stap olsem ol Farisi na yumi trastim antap skin giaman bilong yumi. Long antap skin yumi tok, “Mipela Kristen,” tasol long bel bilong yumi, yumi bilipim na trastim na bihainim ol samting bilong tumbuna bilong yumi.
As bilong kam bilong Jisas.
Long stadi namba 6 yumi bin skelim as bilong kam bilong Jisas. Long 5-pela taim Jisas i skulim ol disaipel long as bilong kam bilong Em. Long Mak 10:45 Jisas i tokaut klia long wok bilong Em. Em i tok olsem, “Mi kam bilong lusim laip bilong Mi bilong baim bek laip bilong ol planti manmeri.”
Sin em i bikpela bikpela samting tumas bilong yumi yet i stretim. Yumi ken i wasim na klinim antap skin bilong yumi, tasol Jisas Em i lukim bel bilong yumi. Yumi kalabus long sin na kalabus long pe bilong sin, na yumi nidim wanpela man i kam bilong baim fridom bilong yumi. Sapos i nogat man bilong baim fridom bilong yumi, orait yumi bai lus long God long kalabus hel oltaim oltaim.
Tok tenkyu long God! Jisas i bin kam bilong baim pe bilong sin bilong baim bek ol manmeri i harim singaut bilong Em na i kam pas long Em na i bilipim na trastim feitful wok bilong Jisas long diwai kros.
Wanpela sin i no inap winim wok bilong Jisas. Nogat. Wok bilong Jisas inap long baim olgeta sin bilong yumi. Tasol harim. Nogut yu givim baksait long Jisas olsem ol Farisi. Ol i tingim olsem ol i no nidim Jisas na ol i stap gutpela long ai bilong God. Tasol ol i rong olgeta. Sapos yu givim baksait long Jisas, orait husat i ken i baim fridom bilong yu long sin bilong yu? Yu mas klia olsem, sapos yu givim baksait long Jisas, orait yu givim baksait long fridom bilong yu, na bai yu lus long God long kalabus hel bilong oltaim oltaim.
Plis harim, yu no ken i givim baksait long sanis bilong yu. Tanim tingting bilong yu na yu bilipim na trastim Jisas olsem Jisas i tok, na yu bihainim Em na trastim feitful wok bilong Em bilong baim bek yu.
Ol Kristen.
Ating planti manmeri i tingim olsem, Kristen em i ol manmeri i harim lotu na i bihainim ol samting bilong lotu. Tasol nogat. Ol Kristen trutru em ol manmeri i lusim rot bilong ol yet na ol i tanim i kam na ol i bilipim na trastim feitful wok bilong Jisas long diwai kros na ol i bihainim Jisas. Ol Kristen trutru ol i trastim God long kisim bek ol long feitful baim bek wok bilong Jisas tasol. Ol Kristen trutru ol i bilip olsem, Jisas tasol i baim fridom bilong ol long pe bilong sin long kalabus hel.
Ol trupela Kristen manmeri ol i pulap long tenkyu long Jisas. Ol i amamas tru long wok bilong Jisas na ol i tok tenkyu olgeta taim long God long feitful baim bek wok bilong Jisas long diwai kros. Trupela Kristen em i no harim na bihainim lotu pasin tasol. Nogat. Trupela Kristen i harim na bihainim Jisas tasol.
Em olsem na yumi mas rausim misin pasin long tingting na bel bilong yumi. God i no kisim bek yumi long misin pasin bilong yumi o long wanwik bung bilong yumi o long ol kainkain lotu samting bilong yumi. Nogat tru. God i kisim bek yumi long baim bek wok bilong Jisas long diwai kros.
Planti manmeri i stap long antap skin lotu pasin na ol i tingim olsem ol bai i stap gutpela. Tasol nogat. Yumi mas lusim dispela kain rot na yumi pas long Jisas na yumi bilipim na trastim baim bek wok bilong Em long diwai kros.
Lavim Jisas na bihainim Jisas – Jisas tasol Em i rot bilong yumi i go long Papa long heven. Em olsem na, tok tenkyu long God. Tok tenkyu long feitful baim bek wok bilong Jisas. Tok tenkyu na bihainim rot bilong God. Tok tenkyu na bihainim Jisas.
Em tasol.
